الأحد، 10 أبريل 2011

يوميات حماة الحلقة 4

قعدت استعرض فى دماغى البنات المناسبة من العيلة ورجعت قلت لا جواز القرايب مصايب بلاش منه...طيب اصحاب اخته اللى نعرفهم؟؟؟مفيش حد معين فى دماغى ...طيب بنات زميلاتى فى الشغل...قعدت افكر وافكر لحد مااستقريت على.....
ندى...ندى دى تبقى بنت اخت سناء زميلتى فى المكتب انا شفتها من كام يوم لما جت المكتب عندنا لخالتها...البنت امورة وشكلها مؤدبة وهادية ولسه مخلصة كليتها ...الصبح ابقى اكلم سناء واشوف تحدد معاد علشان احمد يشوفها
وبالفعل الصبح روحت المكتب وبعد ساعة كده فى الهدوء روحت لسناء وقلتلها
"ازى ندى بنت اختك"استغربت  وقالتلى
"كويسة الحمدلله بس بتسألى ليه خير"
"مفيش انا قلتلك ان احمد ابنى جه من السفر من اسبوع وعايزة اشوفله عروسة فاللى جت على بالى ندى..ها ايه رأيك وطبعا انتى عارفة ان احمد بيشتغل فى دبى بس فاضله سنة وهيرجع يستقر هنا وطبعا شغله موجود فى الفندق اللى كان فيه قبل مايسافر وهو تقريبا جاهز الشقة موجودة ويدوب فاضل توضيب بسيط والعفش "
"طيب ياايمان انا هكلم مامتها وباباها وارد عليكى"
"طيب علشان مفيش وقت حاولى يشوفها فى اقرب فرصة وياريت المقابلة تبقى بره علشان نشوف هيحصل قبول بينهم ولا لأ"
"خلاص هكلمك بالليل اكون كلمتهم واقولك"
"ماشى مستنية الرد"
رجعت البيت وقلت لاحمد على الحكاية وفعلا بالليل اتصلت بيه سناء وقالتلى اننا نتقابل بكرة بالليل فى كافيه انا واحمد وسناء واختها وندى...وتانى يوم فى الميعاد كنا فى المكان المحدد
اتقابلنا...وكانت البنت فى منتهى الذوق والادب وقعدنا كلنا نتكلم كلام عام وبعدين اقترحت سناء ان احمد وندى يقعدوا على ترابيزة لوحدهم علشان يتكلموا براحتهم...وفعلا قعدنا حوالى ساعتين...وكلامى مع ام ندى كان فيه ترحيب كبير منها وقالتلى انها سعيدة بينا وحاولت اتهرب من اى وعد لانى ببساطة معرفتش رأى احمد فيها وياترى حصل قبول بينهم ولا لأ..استأذنت فى الانصراف وانتهت المقابلة بلا اى وعود  

هناك 9 تعليقات:

  1. شكرا جزيلا للمتابعة
    اتمنى معرفة رأيك اولا باول

    ردحذف
  2. مدونه جميله ومرتبه اوي اوي.. وهفضل اتابع اول باول لانه الاسلوب شدني والمحتوى جميل هو كمان هههههههههههه

    تسلم الايادي

    ردحذف
  3. تسلمى ياقمر
    واتمنى تفضل تعجبك كل مرة

    ردحذف
  4. بصرااااحة انتى مبدعة وانا بجد هخاصمك لو مكملتيش القصة منتظرة علي ناااااار

    ردحذف
  5. غير معرف
    ميرسى كتيييييييييييييييير
    وانا مقدرش على خصامك ههههههه
    بس فيه فعلا 6 حلقات مضافة بعد دى
    اخر حاجة ضفتها...كتب الكتاب
    وكمان كام ساعة ان شاءالله فى اضافة جديدة
    اتمنى معرفة رأيك ونورتييييييييينى

    ردحذف
  6. هايلة يا دينا ..سيبيني اتابع براحتي ..ماما زيزي

    ردحذف
  7. حلوة اوى الحلقة
    يا ترى احمد هيكون رايه ايه فى العروسة

    ردحذف
  8. بجد انا معجب كبير اوى بكتاباتك الجميلة ويارب دايما من نجاح لنجاح

    ردحذف

قول رأيك بلاش تقرا وتقفل من سكات...ارائكم تهمنى