الأربعاء، 13 أبريل، 2011

يوميات حماة الحلقة 5

بعد مارجعنا من المقابلة...لقيت احمد فرحان ومزقطط وشوية شوية هيتنطط من الفرحة مش عارفة كل ده على ايه يعنى؟؟؟ولقيته بيحكى لابوه واخته وعمال يمدح فيها ويقول جميييييييييييلة لقيت نفسى برد عليه"مش اوى كده يعنى هى عادية"
"لا ياماما متقوليش كده دى زى القمر ومؤدبة ومحترمة حددتى معاهم معاد امتى"
"نحدد معاد ازاى هو انا كنت عرفت رايك"
"هى محتاجة راى ياماما موافق طبعا اما اقوم اكلمها واقولها ان احنا رايحين لهم بكرة"
"تكلم مين يابنى؟؟؟"
"اكلم ندى ياماما"
"وانت اخدت رقم تليفونها ازاى"
"مفيش هى اديتهولى علشان اكلمها لما اروح علشان تطمن عليه"
"ايه يابنى هى لحقت وازاى تديك الرقم كده على طول"
ردت اسماء محاولة تهدئة الفوران اللى ظهر على وشى
"ياماما مافيهاش حاجة البنت اعتبرته خطيبها عديها بقى "
احمد"انا هقولها على بكرة"
انا"لا استنى هنا مش على طول كده"
"ياماما هو فيه وقت احنا نروح لهم بكرة وخير البر عاجله ياحاجة"
الواد قام بسرعة قبل ماالحق اقول ربع كلمة...وقعد يكلمها من الساعة12معرفش لحد امتى انا دخلت انام بعد الفجر وهو لسه بيكلمها!!!!!!!!!!
دخلت انام وانا متغاظة هو الواد اتشقلب حاله كده ليه من مقابلة اومال لما يتجوزها هيعمل ايه؟؟
تانى يوم صحينا الظهر"ماانا اخدت اجازة اسبوعين علشان اقعد مع ابنى اللى واحشنى"وسالته كلمتها قاللى"ايوه ومستنيينا النهاردة الساعة 8"
لقيته بيقولى "احنا هناخد ايه معانا"
"قلتله هناخد شيكولاته"
قاللى"وايه كمان"..."عايزنا ناخد ايه كمان"..."مش هناخد حاجة دهب"...قلتله بعصبية"لا مش هناخد دهب احنا لسه رايحين نتكلم دهب ايه اللى هناخده"..."اصل ياماما هى قالتلى ان بنت خالتها لما خطيبها جالها اول مرة جابلها اسورة"
"بقولك ايه يجيب اسورة يجيب سم فران انا ماليش دعوة بحد انت لحقت هتسمع كلامها كده من الاول ..هى علبة شيكولاته يااما مش رايحة"
"خلاص ياماما انا بتكلم معاكى بس"
وجه الميعاد وروحنالهم البيت....اول حاجة صدمتنى السلم اللى قطع نفسى انا والراجل جوزى وخلانى وصلت لباب البيت وانا على اخر نفس وعايزة اترمى على اقرب كرسى  ودخلت البيت من جوه...البيت من جوه مش متوضب كويس ولا العفش راقى ولا حاجة...بس باباها ومامتها قابلونا كويس وقعد باباها وجوزى يتكلموا فى مواضيع عامة وانا قاعدة مش مرتاحة مش عارفة ليه؟؟لقينا العروسة داخلة علينا بتقدم لنا التحية...وكانت صدمتى الاطباق جايباها فى ايدها مش فى صينية وبتروح وتيجى هى ومامتها!!!!وشوشت احمد وقلتله ايه ده؟؟مش هينفع كده دى ناس مش نافعة خالص احنا نتحجج ونقوم...الواد قالى"استنى بس ياماما" ولقيته قام وجه الكلام لابو العروسة..."احنا ياعمى جايين بخصوص ندى وبابا هيتفق معاك على التفاصيل" الواد ابن ال...بيدبسنى
قعدت ملتزمة الصمت بس اقول الحق مقابلتهم كانت بترحاب شديد وجوزى بقى قعد يتكلم فى التفاصيل...
"احنا هنجيب شبكة معقولة تليق بيهم هما الاتنين ويتخطبوا واحمد مسافر سنة وهيرجع يستقر هنا ان شاءالله...والشقة موجودة واحنا هنجيب اوضتين وانتوا اوضتين ده طبعا غير باقى الحاجات اللى علينا وانتوا الحاجات اللى عليكوا معروفة ها قلت ايه يا حاج"
ابوها بكل ترحاب رد"ياابو احمد احنا نتشرف بيكوا واحنا بنشترى راجل والشبكة اللى يجيبها مفيش مشكلة حتى لو مجابش خالص اهى هدية من قيمته بس عندى طلب احنا نكتب الكتاب مع الخطوبة علشان لو خرجوا ولا جه البيت يبقى جوزها وغير كده مالناش اى طلبات"
لقيت احمد بيرد بسرعة"نقرا الفاتحة بقى"
وقرينا الفاتحة وسمعت الزغاريط عمالة  تزمر جوه ودانى ومبروك مبرووووووك واغانى وهيصة
قمت واقفة وقلت نستأذن احنا بقى وبنسلم لقيت احمد بيقول حضروا نفسكوا بكرة نروح نجيب الشبكة
نزلت من غير اى تعليق وقلت بس لما اروح ليلته سووووووووووودة

هناك 21 تعليقًا:

  1. ههههههههههههههههههههههههههههههههههههه ايه الواد المطيور ده.. ما صدق يلاقي بنت ولا ايه هههههههههه

    ردحذف
  2. ههههههههههه
    يستاهل ان مامته ناوياله على ليلة سودة

    ردحذف
  3. العيال دى مالها كدا مسلمه نمر البت تديه التليفون والواد عايز قال ايه يجيب لها دهب فى اول زيارة
    بص يا اختى البت دى مش هتعمر خليها خطوبة بس لحد ما تشوفي مييتهم ايه ليدبسوا الواد وتطلع البت مطيوره

    ردحذف
  4. هههههههههههه
    هنشوف مع بعض هيحصل ايه؟؟؟
    ياترى مين قراره هيمشى الام ولا الولد؟؟؟؟؟

    ردحذف
  5. عسل اوووووووووووووووووى

    ردحذف
  6. مييييييييييرسى
    كتييييييييييير

    ردحذف
  7. هههههههههههههههههههه احساسى مخيبش انك حاطه البت فى دماغك معرفش ليه

    هى لحد دلوقتى بيس مفيش غير رقم تليفونها اللى ممكن يتعدى بردو

    بس بصراحه اسلوبك عاجبنى جداااااااااااا :))

    ردحذف
  8. ربنا يخليكى يا هوبا
    ماانا عديت الحكاية اهو عادى
    وروحت خطبتهاله"من تحت الضرس"ههههههههه

    ردحذف
  9. ايه عبد العزيز1 مايو، 2011 9:59 م

    انا مش مرتاحة للبت ندى دى حاسة ان وراها مصيبة سودا وبعدين يا حاجة انتى هتفركشى الجوازة عشان صينية امهات اخر زمن

    ردحذف
  10. ايه
    مش علشان الصينية هههههههههه
    علشان الواد المسروووووووع ده

    ردحذف
  11. ههههههههههههههههههههه عريس عسل
    جميله اوي يا دندونه معلش بقي انا اول مره اتابع بس قولت لازم اجيب من الاول
    حتي معرفتش اعمل كومنت باسمي
    Eman Osama

    ردحذف
  12. ايمان
    انتى الاعسل وكلامك الحلو ده
    وفعلا لازم تتابعى من الاول علشان تفهميها
    نورتييييييييييييييييييييييييييييينى

    ردحذف
  13. استلقى وعدك يا استاذ احمد

    ردحذف
  14. دي شكلها هتنفخووووووووووووو لما يروحوووو
    هههههههههههههههههههههههه

    ردحذف
  15. هههههههههههه حلوة اوى اوى انا قرات قصصك كلها قبل القصة دى وكلهم عجبونى بس بجد الاسلوب الكوميدى الخفيف ده تحفففففففة ياريت تكتبى حاجات كوميدية كتييييييييييير

    ردحذف
  16. اية دا يا دينا
    انا حاسة انك بتحكى على خالتى بالظبط
    دا حصل فى عيلتى بالظبط بالظبط بنفس التفاصيل بنفس الكلام
    بسم الله الرحمن الرحيم
    انتى طلعتى من العيلة ولا اية

    آية

    ردحذف
  17. مية مية يادينا استمري ..ماما زيزي

    ردحذف
  18. يا عينى على هيحصلك فى البيت يا احمد

    ردحذف
  19. `LOL!!! ya 3eny 3alek ya ahmed leltak soda

    ردحذف
  20. ههههههههههههه مش عارفه اقول الله يكون فى عون العروسه و لا ايه

    ردحذف

قول رأيك بلاش تقرا وتقفل من سكات...ارائكم تهمنى