الجمعة، 22 أبريل 2011

يوميات حماة الحلقة 7

بعد مااتغدينا دخلت لاحمد علشان اتكلم معاه لقيته طبعا قاعد يرغى فى التليفون مع الكونتيسة ندى شاورت له انى عايزة اتكلم معاه شاورلى 5 دقايق وهيقفل...طبعا انا خرجت بره الاوضة لحد مايخلص
فات نص ساعة وهو لسه بيتكلم رحت دخلتله وكان لسه بيتكلم وبيشاورلى 5 دقايق كمان...ابتسمت له ابتسامة صفرا وقلتله طيب وقعدت جنبه
طبعا ال5دقايق بقوا دقيقة لما انا قعدت وقفل بسرعة وانتبه لى
"خير ياماما..فى حاجة؟؟؟"
"ايوه انا متكلمتش معاك انت ناوى تجيب شبكة بكام ولا سايبها مفتوحة و ايه نظامك بالظبط"
"ياماما مش عارف هو المفروض نحدد ولا نسيبها مفتوحة...انا قلتلها ان اللى هى عايزاه هجيبهولها"
"يعنى ايه يابنى هو انت مليونير علشان تسيب الحكاية كده...مينفعش لازم تحدد معاها مبلغ معين حد اقصى علشان منتحرجش واحنا بنشترى"
"يعنى كام ياماما مثلا انا مش عارف؟؟"
"بص يعنى فى اسعار الدهب اللى احنا فيها دى من 8 ل10الاف حلو اوى وكفاية ومعقول جدا"
"طيب ياماما"
"يالا كلمها واتفق معاها علشان نبقى على نور قبل ماننزل"
قمت وسيبته يتكلم براحته

نزلنا انا واحمد واسماء وعدينا عليهم واخدناها هى ومامتها وروحنا عند المحل اللى بتعامل معاه..طبعا صاحب المحل رحب بينا جدااااا وقعد يفرجنا على احلى الحاجات اللى عنده...كل مايعرض علينا حاجة ندى تقول مش حلوة...مش عاجبانى...ذوقها مش مناسبنى
وفجأة قامت وقفت وقالت
 "انا مش عاجبنى حاجة هنا ممكن نروح محل تانى"
انا صدمت من الحركة...بجاحة منها انها تحرجنى
فرديت عليها"ليه هنا ماله ماكل حاجتى وحاجة اسماء من هنا وطول عمر المحل بيجيب احسن حاجة"
فصاحب المحل بادرنا بالكلام
"يا مدام ايمان مفيش مشكلة اتفرجوا فى محلات تانية احنا تحت امر عروستنا"
ولقيت احمد واسماء بيقولولى
 "معلش ياماما دى شبكتها وسيبيها تنقيها براحتها وعلى ذوقها"
قمت مضطرة وقلت انا هلتزم الصمت خالص وبلاها حرق دم وانا ضغطى عالى ومش ناقصة البت دى تعلى لى الضغط اكتر
قعدوا يتفرجوا وينقوا ده ويوزنوا ده...واستقرت على دبلة وتوينز واسورة وخاتم وسلسلة...انا ساكتة بس لما سمعت16الف جنيه
"ايه ده لالالالا ده كتير واحنا متفقناش على كده"
وبصيت لاحمد وقلت له
"انت مش اتفقت معاها تنقى فى حدود امكانياتك"
البنت لقيتها قعدت تعيط وتقوله
" خلاص مش مهم حاجة خالص...كفاية دبلة منك انا راضية"
والاهبل لقيته قعد يقولها متزعليش ويراضيها وامها واقفة ولا بتنطق زى قلتها لا بتهش ولا بتنش واسماء تقوللى ياماما بلاش احراج قدام الناس...وانا عمالة افكر دى ابتديتها بدموع التماسيح وابن ال.....مصدق الحركات دى...وجهت له كلامى
"انت معاك فلوس تجيب "
"ايوه ياماما انا معايا زيادة وعامل حسابى"
"طيب لما معاك زيادة جيب هدية لاختك بمناسبة الشبكة اللى جبتها"
"وماله ياماما...تعالى يااسماء شوفى انتى عايزة ايه"
لقيت اللى كانت بتعيط وعاملة مسكينة وراضية بدبلة سكتت وعينيها بقوا مفنجلين ومبرقين وباين عليها الغيظ مش عارفة من ايه
قعدت اسماء تقول لاحمد مش مهم انت لسه قدامك مصاريف وانا عندى كتير...لقيت التانية بتقوله
"معاها حق لسه قدامنا مصاريف كتير"
شخطت فى اسماء ..ولا كانى سمعت حاجة..وقلتلها نقى ليكى حاجة هدية من اخوكى...ودفع احمد الفلوس كلها بعد ماجاب لاخته خاتم  وولقيت احمد بيوصلنا الاول وبيقوللى انا هروح اوصلهم ياماما واجى...والكونتيسة اخده علبة الشبكة فى حضنها...قمت بكل برود مصطنع قلت له وماله ياحبيبى...هاتى ياندى الشبكة علشان حماكى يشوفها وهنبقى نجيبهالك تلبسيها قدام الناس فى كتب الكتاب.

هناك 21 تعليقًا:

  1. بجد ام سكرررررررررررررررررة وعندها حق واحمد مزودها اوى بصراحة

    ردحذف
  2. مش كده برضه
    ههههههههههههه
    نورتينى او نورتنى يا غير معرف
    واتمنى متابعتك دايما

    ردحذف
  3. أزال المؤلف هذا التعليق.

    ردحذف
  4. أزال المؤلف هذا التعليق.

    ردحذف
  5. ههههههههههههههههههههههه ايه الواد الخيخه ده.. شكله هيقع ع بوزه ف الآخر

    بحبحها شويه يا مؤلفنا الجميل هههههههههه

    ردحذف
  6. هههههههههههههههههههههههههههههههههههههههههههه

    امه مزوداها اوووى يابرنسس ههههههههههههههههه

    ردحذف
  7. se7r
    ههههههههه
    شكله خيخة فعلا
    ميرسى على متابعتك
    وخلينا ماشيين واحدة واحدة علشان محدش يزهق

    ردحذف
  8. غير معرف
    هههههههههههههه
    مش مزوداها اوى يعنى
    البت هى اللى مستفزة
    نورتينى او نورتنى ياغير معرف

    ردحذف
  9. هو صحيح الحب اعمى ....ومش ممكن الواحد يفوق الا على صدمة او كارثة.....؟ ولا ممكن بعد الخبرات المتتالية الواحد يقدر يكبح جماح قلبه فى الوقت المناسب...؟؟؟

    ردحذف
  10. من واقع خبرتى ياكريم
    ان اول مرة بتبقى بالعواطف الخالصة المخلصة
    بعد كده العقل بيتحكم شوية وكل واحد حسب شخصيته ان كان عقلانى او عاطفى
    يعنى من الاخر مفيش حاجة مطلقة دايما فيه تباين واختلافات من شخص لاخر ومن ظروف لاخرى

    ونورتنى كالعادة وتواجدك اسعدنى

    ردحذف
  11. مدونة جميلة يا دينا
    وبعدين لازم تاخدى حق ايمان "عايزين نشوف يوم ف ندى بقى"

    ردحذف
  12. ميرسى يا دعاء
    وجودك فى المدونة اجمل

    ايمان مفروسة خالص يا عينى من ندى
    هههههههههههههههه

    ردحذف
  13. بصى هو الواد متسرع اوى فعلا

    والبت باللى انتى بتحكيه دا شكلها هترخم لسه معرفش مقراتش اللى بعد كدا

    بس انا مصره انك حطاها فوق راسك وزاعقه بردو بصراحه هههههههههههههههههههه

    ردحذف
  14. هبه
    هو متسرع فعلا وده اللى مخلى الام مولعة منه ومن ندى
    وجودك نورنى يا جميل

    ردحذف
  15. 3ayel madlooo2
    we el-bt nada dii re5ma

    ردحذف
  16. nada de bi5a awiii w lly asmo a7md da e 3omroo mshaf bnat 2bl kda wla e
    w bsra7a lly tnt eman bt3mlo s7 w ana m3aha feh

    ردحذف
  17. والله يا دينا كإنها بصحيح والمخرج ماقالش غير كده ..سلمت ايديكي ..ماما زيزي

    ردحذف
  18. تسلم ايديكى
    بس بجد احمد ده اهبل اوى لما عمل كده فى الشبكة هيعمل ايه بعد كده

    ردحذف
  19. هههههههههههه بردو انا شايفه ان عندها حق

    ردحذف
  20. الست دي رخمه

    ردحذف
  21. لا الام عندها حق كتير قوى 16 الف جينة فى شبكة بس و البت شكلها بتستهبل جدا

    ردحذف

قول رأيك بلاش تقرا وتقفل من سكات...ارائكم تهمنى