الأحد، 24 أبريل، 2011

يوميات حماة الحلقة 8

رجعت البيت وانا بصراحة متغاظة اوى من الحركات اللى عملتها ندى بس اللى هدانى انى حسيت انها اتغاظت زى ما غاظتنى...وقعدت انا وجوزى واسماء نتفرج على الشبكة واحكى لجوزى اللى حصل وقلتلهم ان الكام يوم اللى فاتوا دول كانوا مليانين احداث وكلها على اعصابى حتى احمد بقاله اسبوع وملحقتش اقعد معاه خالص...قالولى لسه كتير على الشهرين مايخلصوا وقعدنا شوية ودخلت نمت قبل ماييجى.
تانى يوم احمد كان قاعد فى البيت ومخرجش بقيت فرحانة بيه اووووى وكل شوية قاعدة اهزر معاه بس حسيته متغير مش بيضحك كعادته...والغريب بقى ان التليفون مش على ودنه طول النهار زى اليومين اللى فاتوا...فى قرارة نفسى استريحت انى قاعدة مع ابنى من غير ماحد ياخده منى...بس حاسة بحاجة مريبة شكله متضايق وقاعد مع باباه وبيتكلموا وكل ماادخل عليهم يسكتوا؟؟؟!!!!
ونزل احمد اخر النهار شوية وبعد مانزل لقيت تليفونه فى البيت؟؟؟ قلت معقول نسى الموبايل؟؟ببص لقيت التليفون مقفول قلت يمكن فاصل شحن وسابه علشان كده"يعنى طول النهار مشحنوش ليه"مش عارفة قلت افتحه واحطه فى الشاحن...لقيته مشحون ع الاخر..استغربت شوية..قبل ماألحق استغرب ولا افكر لقيت الموبايل بيرن فى ايدى اتخضيت ورديت قبل مااقرا مين المتصل
سمعت صوت عياط وصوت بيقول...
"متزعلش منى يااحمد انا اسفة"
"مين معايا...ندى؟؟؟"
"ايوه ياطنط...هو احمد مش عايز يرد عليه؟؟"
"لا يابنتى احمد مش موجود...مالك؟؟"
"مفيش..بس لو سمحتى لو جنبك خليه يكلمنى"
البت بتكدبنى!!!
"يابنتى قلتلك نزل"
"طيب ياطنط ممكن لما ييجى تقوليله يرد عليه"
"حاضر هاقوله"
قفلت معاها ومنكرش ان فيه فرحة اتسربت الى نغاشيش قلبى وحسيت ان ابنى راجل وبياخد مواقف..بعد ماكان مش راكز اليومين اللى فاتوا ومش على بعضه...وفرحت كمان انها متنكدة زى مانكدت عليه اليومين اللى فاتوا وحرقت دمى
بس ياترى ايه اللى حصل ويقلب الواد 360درجة كده؟؟؟؟
طبعا جريت على اسماء وسألتها...
"اخوكى متخانق مع خطيبته"
"ايه ياماما يااروبة عرفتى منين"
"احترمى نفسك يا بت انتى وقوليلى مالهم وايه اللى حصل"
"معرفش حاجة"
"انتى هتستعبطى يا سر اخوكى...انطقى انتى اكيد عارفة"
"بصى ياماما اسأليه هو احسن او اسألى بابا ...انا مش هقول حاجة"
"ياسلاااااااااام هو الموضوع معروف للبيت كله وانا قاعدة طرطورة ومحدش عاملى قيمة...انا مش هستنى لما ييجوا من بره...اخلصى واحكى"
"بصى انا هقولك عناوين من غير تفاصيل والتفاصيل ياستى خديها من صاحب الشأن"
"قووووووووووولى زهقتينى"
"بصى ياماما الموضوع ذو شقين...بس قبل اى حاجة لازم تعرفى ان احمد متضايق جدا لانه شكله حبها "
"حبها فى يومين...حب اخر زمن"
"هتقاطعينى وتتريقى مش هكمل"
"اتكلمى يا ست الناظرة يا اللى بتدى امك اوامر"
"الشق الاول انها اتضايقت انه جابلى خاتم وقعدت تقوله جبت لها من شبكتى "
"ليه كان من فلوس امها ولا من جيب ابوها"
"ابوووووها...نيجى بقى لابوها...امبارح وهو عندهم قاله اقرا القايمة دى علشان تمضى عليها قبل كتب الكتاب"
"قايمة ايه دى"
"وده نفس السؤال اللى احمد سأله...وقاله قايمة ايه هو احنا لسه جبنا حاجة"
"يسلم لسان ابنى اسم الله عليه"
"برضه هتقاطعينى؟؟"
طبعا اديتها زغدة فى كتفها وقلتلها" كملى"
"بصى ياماما لما ابنك اسم الله عليه سأله....قاله علشان اضمن حق بنتى هنعمل قايمة صورية ب30الف جنيه ولما نجيب العفش نبقى نعمل قايمة تانية بالعفش الحقيقى ونقطع دى"
"ايه ده يابنتى هما دول كده ناس طبيعيين"
"ماهما اتخانقوا شكلها يعنى لبخت فى الكلام بس مش عارفة هى قالتله ايه مخليه مش طايقها للدرجة دى"
"الجوازة دى شكلها مش نافعة"

هناك 16 تعليقًا:

  1. انا كمان شايفة ان الجوازة دى مش نافعة هههههههههههه دول استغلالين هاتيلى انا احمد وانا هجيبله عروسة غلبانة وبترضا بقليلها هههههههههههه

    ردحذف
  2. عندك عروسة يعنى
    ههههههههههههه
    خلاص لو محصلش نصيب مع ندى اقولك
    نورتينى

    ردحذف
  3. طب ايه هيسبها يعنى

    ردحذف
  4. ????????????
    تفتكرى هيسيبها ولا ياخدها
    نتابع ونشوف
    نورتينى يادعاء

    ردحذف
  5. يافرحتك ياام احمد هههههههههههههههه

    انا بس عايزه اعرف اسماء لو كانت قالت تفاصيل مش عناوين كانت هتقول ايه ياترى ؟؟ هههههههههههههههههههه

    تسلم ايدك يابرنسس والله :)

    ردحذف
  6. في انتظار المزيد....... اسماء

    ردحذف
  7. هبه
    اسماء يدوب قالت عناوين ههههههههههههه
    تسلميلى يا هوبا وجودك اسعدنى

    ردحذف
  8. اسماء
    نورتينى واسمك على اسم بطلة من ابطال المدونة
    شفتى الصدف السعيدة
    منورة ياجميل

    ردحذف
  9. شكلها مش نافعه فعلا هههههههه .. حبيبه

    ردحذف
  10. هههههههههههههههههه
    هنشوف هيعملوا ايه؟؟؟
    نورتينى ياحبيبة

    ردحذف
  11. ههههههههههههههههههههههه ايه البت الى داخله على طمع دى هتلاقيها لبخت على مامته احسن خليه يديها على دماغها ههههههههههه

    تسلم ايدك يا برنسس .............. ميرا

    ردحذف
  12. تسلميلى يا ميراااااااااا
    منورة ياجميل

    ردحذف
  13. nada de kzra feha e lma ygeb lo5too 5atem mho giblha shbka lw7dhaa
    dol nas d5len 3la tm3

    ردحذف
  14. هه يا دينا بينا على الحلقة الجديدة ..ماما زيزي

    ردحذف
  15. hhhhhhhhhhh ana tfkere zy el 7ma De XD

    ردحذف
  16. انا قلت انها جوازة مضروبة من الاول

    ردحذف

قول رأيك بلاش تقرا وتقفل من سكات...ارائكم تهمنى