الجمعة، 29 أبريل 2011

يوميات حماة الحلقة 10

انا فرحانة اوى بابنى طالع عريس ماشاءالله زى القمر وعروسته كمان طالعة حلوة اوى...واسماء بنتى طبعا قمرين مغطية على العروسة...اليوم كان خفيف وعدى بكل فرحة وهدوء وسعادة على الكل...وبعد كتب الكتاب احمد اخد ندى وعزمها على العشا وانا روحت انا واسماء...ويوسف جوزى قال رايح لاصحابه شوية"كالعادة يعنى مش من هواة البيت"
قعدنا نرغى انا واسماء لحد احمد ماجه وبعدين يوسف وقعدنا نضحك ونهزر ونمت وانا مبسوطة الحمدلله
تانى يوم بالليل بعد مااحمد جه من عند ندى لقيته ندهلى انا واسماء وقاللى
"اسماء جالها عريس"
ردت اسماء"مين وفين وازاى احكى بسرعة"
"اتلمى يابت...عريس مين ده يااحمد...مش عايزة فضايح زى المرة اللى فاتت"
قعدت اسماء تضحك وتقول لاحمد
 "ياااااااه يااحمد لو كنت موجود وشفت ماما عملت ايه فى العريس"
طبعا افتكرت الموقف هو عدى عليه مايقرب من سنة بس مش ممكن انسى اليوم ده وقعدت اضحك وحكينا لاحمد اللى حصل
...(الموقف فى البوست بعنوان عريس 1)...
"قولنا يااحمد مين العريس ده وشاف اختك فين وازاى"
"بصى ياماما ده يبقى جار ندى وشاف اسماء امبارح فى كتب الكتاب وانا قاعد عند ندى النهاردة..مامته جاتلهم علشان تسأل عن اسماء وان كانت مخطوبة ولا لأ ...وطبعا مكنتش تعرف انى موجود ولما شافتنى قالتلى اتفق معاكم انه ييجى يتقدم"
ردت اسماء بسرعة
"مين اللى يتقدم يابنى...انا اصلا معرفش شكله ايه ولا اسمه ولا اى حاجة عنه"
فاقترحت انا"بص يااحمد احنا نعمل زى ماعملنا معاك انت وندى...نقابله بره هو ومامته ونشوف ظروفه ايه و لو حصل قبول نبقى نسأل عليه ونشوف"
ردت اسماء "صح ياماما انا معاكى...طيب وبابا"
"ماله ابوكى"
"هيوافق اننا نقابله يعنى"
"اه طبعا...مش ده العادى...وبعدين الحاجات دى بتاعة الستات دور الرجالة مش دلوقتى"
لقيت احمد بينتبه
"ايه ياحاجة خلى بالك من كلامك...انا قاعد معاكم"
ضحكنا وقلت له لو سألوك تانى حدد معاهم معاد على كمان 3 او 4 ايام كده لازم نتقل شوية مش سلق بيض
وفعلا تانى يوم كانت ام العريس بتسأل ام ندى عن ميعاد وكنا يوم الجمعة فحددنا معاهم ميعاد على يوم الاثنين اللى بعده نتقابل فى نفس المكان اللى اتقابلوا فيه احمد وندى
وجه اليوم روحت انا واسماء والعريس ومامته وقابلناهم
انطباعى الاول لقيت شاب شكله عادى ومظهره وشكله محترم ومامته كمان شكلها ست طيبة
تبادلنا الحديث...اسمه سمير عنده26 سنة بيشتغل فى شركة مقاولات ولما سألته
"انت مهندس؟؟"
"لا انا بشتغل فى المكتب فى اعمال ادارية"
وكمل"انا ظروفى على قدى شوية والدى توفى من سنة ولينا ارض فى البلد يعنى لو بعت نصيبى هقدر اجيب الشقة وافرشها فى المعقول"
وقلتله"بص ياسمير احنا مش بنبص للمظاهر قد مااحنا عايزين حد يتقى الله فى بنتنا ويعاملها كويس ويقدر يفتح بيته بمال حلال"
"يا حاجة انا الحمد لله دخلى شهرى معقول واقدر اصرف على بيت"

"طيب خير...انتوا بقى اتكلموا شويه مع بعض وانا هقعد مع الحاجة نتكلم شويه واللى فيه الخير يقدمه ربنا"
قعدوا مع بعض حوالى ساعة واتفقنا اننا هناخد فرصة للسؤال وبعدين باباها يحدد ميعاد ييجوا فيه البيت وقمنا روحنا...لما رجعت البيت حكيت لاحمد ويوسف على المقابلة وقلتلهم انى مرتاحة له واسماء كمان قالت انها مبدئيا مرتحالة ...وقالتلى انه طلب منها رقم الموبايل وهى اديتهوله...قلت لها مفيش مانع حتى تتعرفوا على بعض...وقلت ليوسف يسأل على الولد كويس علشان هما مستنيين مننا رد بالميعاد.

هناك 12 تعليقًا:

  1. يا ترى ايه اللي هيحصل من فضلك كملى قصة ممتعة

    ردحذف
  2. روزى
    ربنا يخليكى ووجودك نورنى
    هنشوووووووووووف هيحصل ايه؟؟؟

    ردحذف
  3. عجبنى اوى تقمصك للشخصية وكأنها حقيقة ممسكة بكل اطراف الموضوع
    واخده بالك من التفاصيل
    واضح انك اشتغلتى خاطبه قبل كده
    هههههههههههه

    وده فى حد ذاته كويس عشان لما الواحد يجى يجوز ما يغلبش ويجيلك على طول
    ههههههههههه
    فكرة جميلة استمرى اما نشوف الواد هايتجوز امته
    ابدعتى

    ردحذف
  4. م.حجاز
    كلامك ده تاج على رأسى من كاتب رائع زيك
    ولما تنوى تعالى قوللى انت بس وهتشوف مارى منيب على حق ههههههههههه
    بجد اشكرك جدااااا على كلامك اللى شجعنى
    وجودك اسعدنى كتيييييييييييير

    ردحذف
  5. قصة جميلة جدااا يا ترى يا استاذة دينا هتكمليها امتى متلهفين جداااا للتكملة

    ردحذف
  6. من فضلك اجيب تكملة القصة منين بجدعجبتنى جدا

    ردحذف
  7. manonaa
    ربنا يخليكى
    وانا ضفت حلقة دلوقتى وهحاول اضيف كل يوم ولا يومين
    نورتيييييييييييينى

    ردحذف
  8. ريهام
    القصة تأليفى وكل مابكتب حلقة بنزلها على طووووول
    ومبسوطة اوووووى انها عجبتك
    نورتيييييييييينى

    ردحذف
  9. ملقتيش اسم غير سمير دا يادودو هههههههههههه

    بس تسلم ايدك بجد انا بستمتع جدااااااااااااا وانا بقرا والله :)

    ردحذف
  10. هبه
    ههههههههههه سمير مطولش معانا كتير علشان خاطرك
    ربنا يخليكى يا جميلة

    ردحذف
  11. جميلة يا دينا ..كلنا شوق في انتظار المزيد وعلى فكرة انا باعمل فاصل عشان اشكرك وارجع تاني اواصل رغم ان قصصك كلها تحت ايدي بس باستمتع بالتشويق بتاعك وبالحبكة الجامدة ماشاء الله ..تحياتي ..ماما زيزي

    ردحذف

قول رأيك بلاش تقرا وتقفل من سكات...ارائكم تهمنى