السبت، 30 أبريل، 2011

يوميات حماة الحلقة 11

بعد مقابلة سمير ومامته...قلت ليوسف ولاحمد لازم يسألوا عليه وعلى اخلاقه وسمعته اهم حاجة...احمد طبعا سأل ندى وطمنوه انهم جيران بقالهم سنين كتير والكل يشهد بأدبه...ويوسف راح سأل فى الشركة اللى بيشتغل فيها والنتيجة ان الكل بيشكر فى اخلاقه.
فى نفس الاثناء دى كانت خلصت اجازة نص السنة واسماء رجعت كليتها...وكان الولد بيسأل عليها كل يوم ويكلمنى يسأل عليه وكان فى منتهى الذوق وكل شوية يسألنى ييجى يقابل يوسف امتى؟؟
لما لقيت الحكاية كده وكل البشائر تؤكد اخلاقه العالية...اتفقت مع يوسف انه يحدد ميعاد قبل مااحمد يسافر"فاضل10ايام واجازة احمد تخلص ويسافر"وطبعا من ساعة كتب الكتاب وهو ينزل هو وندى يوميا فسح وخروج ويرجعلى على النوم بالليل"...مش فايقة لهم...
المهم تم تحديد اليوم وكنا مستعدين للاستقبال...و..وصلوا البيت
انا فتحت الباب "اهلا وسهلا اتفضلى يا حاجة...اتفضل ياسمير"
دخلت الحاجة ووقفت تسلم على يوسف ووقفوا الاتنين متسمرين قدام بعض..وسلموا على بعض بكل ود
"ازيك ياحنان"
"ازيك يا يوسف"            
وانا بكل بشاشة
"ايه ده انتوا تعرفوا بعض؟؟"
رد يوسف وقال
"طبعا...حنان كانت جارة خالتى زمان قبل ماتتجوز"
رديت"اهلا وسهلا اتفضلوا"
دخلوا وقعدوا وسرحت انا بالذاكرة ورجعت لوراااااا...معقول دى حنان اللى يوسف حكالى عنها وكان بيحبها وخطبها زمان قبل مايعرفنى...ياما حكالى عنها انهم كانوا بيحبوا بعض واتخطبوا وف مشكلة بين ابوه وابوها حصل عند وكل اب صمم يفسخ الخطوبة...وبعد كده بفترة اتجوزت وهو اتعرف عليه وحبينا بعض واتجوزنا...دلوقتى جوزها مات معقول يتقابلوا بالصدفة دى ...وبعدين ...وانا غرقانة فى الاسئلة...كانوا بيتبادلوا الحديث عامة يوسف وحنان واحمد وسميروقالولى اندهى العروسة
قمت ناديت على اسماء...وكانت فرحانة والكل فرحان...وانا سرحانة...الغيرة دبت فى قلبى معرفش ليه بس اهى غيرة وخلاص مش ده جوزى ومن حقى اغير عليه من الست اللى كان بيحبها...اتكلموا ويوسف مرحب جداااا بكل كلامهم وانا يدوب ابتسم واهز راسى وارد بكلام قليل...ماشى..ان شاءالله...ربنا يسهل...
واتفقوا ان يتم قراءة الفاتحة ويلبسوا الدبل اما الشبكة تكون بعد ماتخلص كليتها لان كل اللى فاضل التيرم التانى وتتخرج ان شاءالله.
البيت كله كان فرحان بالخطوبة وانا منكرش انى حبيت الولد وارتحت له بس دماغى مبطلتش تفكير...ياترى ممكن يوسف يحن للماضى ويرجع لحبه القديم؟؟؟ولو حصل هعمل ايه؟؟ وازاى هقدر اتعامل معاها وانا جوايا الشك ده...دى هتبقى حماة بنتى يعنى هنتجمع فى مناسبات كتير ومش هقدر ابعد جوزى عنها فى المناسبات الاجتماعية اللى هتجمعنا.
عدت الايام واحمد سافر واسماء بقت مشغولة بكليتها ومذاكرتها وخطيبها ويوسف كعادته من الشغل لاصحابه ع القهوة...وانا كل شوية بغرق فى غيرتى وشكى...ومقدرش اصرح باحساسى ده كرامتى متتحملش انى اقوله انى بشك فيه...وطول مدة جوازنا واحناعايشين فى ثقة متبادلة...لحد ماقررت انى اقطع الشك باليقين واراقب تصرفاته واشوف موبايله وكل حاجة تخصه يمكن ارتاح.

هناك 27 تعليقًا:

  1. رغم انها كانت مفاجأة جامدة لكن انا متشوق للمرة الجاية اكتر الصراحة
    رائعة كعادتك يا دينا

    ردحذف
  2. طيب الحمدلله انك متشوق علشان ننتظر ههههههههههه
    ربنا يخليك يامحمد
    كلك ذوق

    ردحذف
  3. هههههه دى ولعت علي الاخر مفاجأة غير متوقعة تماما يا تري هيحصل ايه

    ردحذف
  4. الله يا دينا الاحداث اتطورت خااااالص بجد مفاجأه غير متوقعة يا تري ايه اللي هيحصل

    ردحذف
  5. روزى
    ياترى هيحصل ايه؟؟؟؟؟؟؟؟
    مش عارفة هههههههههههه
    نتابع ونشوف

    ردحذف
  6. دودو
    لازم الاحداث تتطور علشان احتفظ بمتابعتكم
    هههههههههههههههه
    نورتووووووووووووونى والله

    ردحذف
  7. قصة اكثر من رائعة التكملة امتى ارجوا الرد

    ردحذف
  8. الله ينور منتظرين التكملة بفارغ صبر
    الي الامام

    ردحذف
  9. غير معرف
    انا كل مابكتب حلقة بنزلها على طووووووول
    شكرا جزيلا واتمنى تتابعنى دائما
    وتكون من الاصدقاء الدائمين
    نورتنى

    ردحذف
  10. د/احمد
    سعيدة برأيك
    واتمنى تتابعنى فى الحلقات القادمة والماضية
    نورتنى

    ردحذف
  11. سهرتينى عشان أقراهم كلهم
    جامده جدااااااااااااااااااااااااااااااا
    :)

    ردحذف
  12. غير معرف
    اسفة انى سهرتك بس علشان تقدرى تتابعى معانا بعد كده
    واتمنى تكون عجبتك بجد
    قوليلى بقى انتى مروة؟؟؟؟؟؟؟؟

    ردحذف
  13. هههههههههههههههههه
    الله يرحمك يا يوسف بعد ما موبايلك يتراقب
    كنت راجل طيب

    ردحذف
  14. غير معرف
    هههههههه ده جزاء كل راجل يفكر مجرد التفكير يلعب بديله ههههههههه
    اسعدنى مرورك

    ردحذف
  15. جيجي منتظرة بفارغ صبر30 أبريل، 2011 5:50 م

    ايه الجمال دة قصة را\ئعة جدااا منتظرين بقيت القصة يا جميييل

    ردحذف
  16. انتى اللى رائعة يا جيجى
    وكلامك كله ذوق
    انا ان شاءالله هحاول ازود كل يوم حلقة
    يارب تفضل عاجباكم دايما
    نورتييييييييييييينى

    ردحذف
  17. اسلوبك رائع ومتميز كعادتك
    فى انتظار التكملة

    ردحذف
  18. غير معرف
    شكرا لكلامك الجميل
    اسعدنى وجودك

    ردحذف
  19. انتي مش طبيعيه خااااااااالص بجد الحلقات فظيييييييييعه ومفاجاه غير متوقعه خالص
    مبدعه مووووووووووت

    ردحذف
  20. غير معرف
    مييييييييييييييرسى
    كتييييييييييييييير
    والله كلامكم ده اللى بيخلينى عايزة اطلع احلى ماعندى علشان اسعدكم زى مابتسعدونى

    ردحذف
  21. اناقريت كل بوستات ابريل حتي اللي قريتها قبل كدة ، اسلوبك في السرد سلس اوي و بسيط و ما يتوهش ، دة غير الاحداث المشوقة و اللي تخلي القارئ عايز يعرف بكرة في اية ، حلقات دمها خفيف

    معجبنيش ان احمد و اسماء سطحيين اوي لحد دلوقت ، دة ما يعيبش القاصة لان ممكن تبقي قاصدة كدة

    معجبنيش المشاهد الاوفر اوي و اللي قليل ما نشوفها ف الواقع زي مثلا ان خطيبة احمد تعيط و هما بيجيبوا الشبكة ، و زي انها تقولة ان خطيب بنت خالتها جابلها اسورة و هو جاي يتقدم " خصوصا في اول مقابلة بينهم " عموما احيانا المبالغة في الاحداث بيبقي مقبول في الكتابة الساخرة بس في نفس الوقت انتي اديتي انطباع للناس مش كويس عنها ، كمان مش منطقي ان المشروبات تيجي من غير صينية

    كمان غريبة ان ايمان و هي مفترض انها مثقفة تستغرب لما احمد ياخد تليفون خطيبتة ، بس اعتبرتة بعد كدة تلاكيك ستات خصوصا انها ما اعترضيتش لما بنتها اديت يوسف تليفونها ف الاول استغربت و بعدين انبسطت لانك قصدتي تبيني ازدواجيتها في الحكم ، كانت نقطة عبقرية منك

    كمان كان نفسي اشوف وصف اكتر للشخصيات بس للاسف دة بيبقي محدود شوية في اليوميات او المذكرات ، و بيجي مع الوقت و مع كتر الاحداث بنشكل الشخصية من تصرفاتها و من الاحداث

    عاجبني اوي الشوك اللي انتي عملتية لما يوسف قابل مامة سمير و برغم شك ايمان بس كنت حاسس ان موقفها مش كافي كواحدة ست عرفت ان جوزها بيقابل حبيبتة القديمة بعد كل السنوات دي

    الاحداث متسارعة اوي و حسيت ان في مرور سريع لموضوع القايمة في خطوبة احمد و مرور سريع في خطوبة اسماء

    لحد دلوقت معرفناش غير فتات الفتات عن يوسف ، و علاقة يوسف بإيمان و دة مضايقني ، مش عارف دة مقصود و لا اية ، ولا لسة الايام مخبية احداث هترفع الستار عن الراجل الغامض دة " يوسف "

    استمتعت جدا و انا بقرا الحلقات ، و نقدي كلة مردود علية و علية تحفظ مني انا شخصيا بما ان القصة لسة غير مكتملة و النقد ليها دلوقت هيبقي غير منصف

    اخيرا مع شوية تعديلات بسيطة و اضافات صفيرة تنفع سيناريو هايل لست كوم جميل

    ردحذف
  22. صبرى صديقى واخى العزيز
    انا سعيدة جدااااااااااااااااااا بنقدك لانه نقد واعى وبناء ويفيدنى جدااا
    انا هبدأ فى الرد جزء جزء بالترتيب
    احمد واسماء مش سطحيين هما بس علشان انا الام فأكيد شايفة ولادى فى صورة كويسة...يعنى هتلاقينى فى اغلب الاوقات بلتمس لهم الاعذار واجيب الغلط على الاخرين...طبعا مش هيكون فى كل الاحداث ولكن بعض

    مشاهد العياط والكلام ده موجودة من منطلق سهوكة البنات وهى موجودة فعلا فى بعض البنات...والصينية ده موقف واقعى حصل وانا جبته فى القصة"يعنى مستوحى من الواقع"

    ازدواجية ايمان وتلاكيكها مقصودة

    انا مش قادرة اوصف الشخصيات لان المفروض ان الكلام على لسانى ومن وجهه نظرى اللى ممكن تكون مش موضوعية"ودى مضايقانى انى اخترت القصة كيوميات مقيدة حريتى شوية"

    الشوك مقصود علشان ياخد المتابع للاسئلة والتفكير والتنبؤ

    علاقة ايمان ويوسف هتبتدى تتضح من الحلقة 14

    انا بقى سعيدة بنقدك ده ومستنية كل فترة نقد من النوع ده وبعدين النقد الكلى نبقى نشوفه فى الاخر

    ليه اعتراض بقى على تصنيفك للقصة انها ساخرة
    انا قصدى اكتب مسلسل اجتماعى بما قد يحتويه من المواقف الساخرة او الدرامية

    سعيدة جداااااااااااااااا بمتابعتك

    ردحذف
  23. قصه جميله قووووووووووي بس هوليه مش كملت فيها كتيييييييير من مواصفات الحماه المصريه خصووصا تجاه مراه الابن بس يارين لوتكمليها بعد اذنك

    ردحذف
  24. هايل يا دينا وانا لولا سايباكي انتي تردي على الأستاذ صبري كنت انا رديت شويةمن حبي لكتابتك وفعلاً كل المواقف دي واكتر حصلت وبتحصل وبيحصل اكتر منها وخاصة لمابتتفاوت المستويات الإجتماعيةولعلمك يا أستاذ صبري البنيت اللي من مستوى اجتماعي اقل بيكونوا مبهرين للرجالة عن البنات اللي من مستوى اجتماعي متوسط لأن الأخيرات بتكون فيه قيم بتحكمهم اكتر ..شكراً يا دينا انك اتحتيلي الفرصة دي لتوضيح بعض الأمور ..ماما زيزي

    ردحذف
  25. حلوة الحلقة
    بس يا ترى موضوع حنان ده هيعمل مشاكل و لا ايه

    ردحذف
  26. أزال المؤلف هذا التعليق.

    ردحذف
  27. مدام دينا .. انا بحب اقرأ قصصك اوى وسامحيني لو العربي طبعى وحش بس بجد انا عمرى ما اهتمت اني اقرأ قصص بالعربي اﻻ لما قرأت مدونتك .. انا ضعيفة شوية فى العربي بس طريقة كتابتك سهلة الفهم ومشوقة جدا .. للأسف مش بعرف اكتب بالعربي بس بكتب بالإنجليزي و كان عندى سؤال ليكى بعد اذنك .. إحساسك بيبقى قوى جدا فى أجزاء كتير،، هل ده معنه انك مريتي بكل المواقف دى وﻻ بتعملي ايه عشان توصلي احساسك لغيرك بغض النظر عن استخدام الكلمات و اسلوب التعبير عن الحساس ؟؟

    ردحذف

قول رأيك بلاش تقرا وتقفل من سكات...ارائكم تهمنى