الاثنين، 2 مايو 2011

يوميات حماة الحلقة13

اتصلت باحمد وحكيت له الحكاية وقاللى
"ياماما اهدى بس ممكن تكون مكنتش تعرف"
"يابنى ازاى مكنتش تعرف انا لما سألتها قالت مش فاكرة مش قالت مش عارفة"
"معلش ياماما مش اهم حاجة اننا عرفنا الحقيقة بدرى...معلش ياماما مش هعرف اكمل كلامى معاكى دلوقتى علشان انا فى الشغل"
حسيت ان الواد كلامه ببرود ولا كأن حاجة حصلت وانا جوايا ناااااااار منها
روحت متصلة بيها
"الو..ايوه يا ندى"
"ازيك ياماما عاملة ايه؟؟"
"زى الزفت"
"ليه بس خير..حصل ايه"
"فسخنا خطوبة اسماء يعنى انتى متعرفيش"
"امتى حصل الكلام ده وليه؟؟"
"لسه قبل مكلمك على طول عمك يوسف كلم سمير وفسخ الخطوبة...اما ليه بقى ده لانه كداب واحنا مينفعش معانا الكدابين ولا اللى يساعدوهم فى كدبهم"
"مش فاهمة يعنى..كدب فى ايه؟"
"طلع معاهوش شهادة...يعنى انتى متعرفيش"
بتعيط"وانا هعرف منين"
"بقولك ايه...انا مش احمد انتى بتعيطى ليه دلوقتى"
"لانى كنت فرحانة لاسماء وقلت الحمدلله انها اتخطبت علشان متبقاش متضايقة ولا غيرانة"
"مين دى اللى غيرانة..ليه هى قدك علشان تغير ..ثم انها مفيش مقارنة بينها وبين اى حد تانى"
"طيب ياماما انا ذنبى ايه؟؟وانتى بتكلمينى بنرفزة وزعل ليه..معلش ربنا يعوضها باحسن منه قريب"
"ان شاءالله طبعا هيجيلها احسن منه...انا بس مستغربة انك خبيتى عليه حاجة زى كده"
"مكنتش اعرف مش عايزة تصدقينى ليه"
"طيب خلاص مع السلامة"
قفلت معاها وانا مش مصدقاها مش عارفة ليه؟؟؟وموضوع فسخ الخطوبة ده شغلنى عن المكالمة الغريبة اللى جت ليوسف امبارح بالليل وقام نزل بعدها...ببص حواليه لقيت اسماء فى اوضتها ويوسف فى الحمام...روحت بسرعة على موبايل يوسف وجبت المكالمة  من ميعادها لقيتها متسجلة باسم الحاج/سعد كتبت الرقم بسرعة فى ورقة ولسه هدور على المكالمات الصادرة والواردة لقيت يوسف خرج من الحمام سبت الموبايل وكان شئ لم يكن.
حكيت له على مكالمتى مع ندى قاللى
"والله ياايمان مش عارف اقولك ايه؟؟بلاش نظلمها يمكن متعرفش والبنت مشفناش منها حاجة وحشة "
"بس انا حاسة انها بتكدب"
"لا انتى حاسة كده علشان انتى مقتنعة بكده"
"انت نازل؟؟"
"اه"
"رايح فين"
"نعم..من امتى بتسألينى يعنى ماانتى عارفة ياالقهوة ياالسوق بجيب طلبات البيت"
"طيب ..انا احتمال انزل انا واسماء شوية يعنى علشان لو متضايقة ولا حاجة"
"ماشى براحتكم"
بعد مانزل دخلت لاسماء لقيتها قاعدة ع الكمبيوتر بتكلم صاحبتها وقلتلها لما تخلصى قومى ننزل شوية...وفعلا نزلنا قعدنا شوية فى كافيه وقعدت اتكلم معاها لقيتها الحمدلله مش متضايقة اوى ومقتنعة بفسخ الخطوبة...ولما قعدنا براحتنا اقترحت عليها نعدى على يوسف فى القهوة علشان يوصلنا ونروح كلنا مع بعض.
روحت عند القهوة ملقيتش عربيته مركونة ولقيت ولد صغير قلت له يدخل يسأل القهوجى ...طلع القهوجى وقاللى" انه مجاش النهاردة"
ركبنا تاكسى وع البيت وطول الطريق وانا بفكر ليه كدب عليه...وراح فين...يعنى لولا موضوع حنان مكنتش اخدت بالى من تصرفات جوزى...التفت لاسماء
"متقوليش لابوكى اننا روحناله القهوة"
"ليه"
"علشان هو قاللى قبل كده متجيش عند القهوة ولو قلناله هيتخانق معايا وانا مش عايزة مشاكل"
"حاضر ياماما"
لما وصلنا البيت لقيت يوسف جه قلت لنفسى الحمدلله علشان اسماء متاخدش بالها من التناقض ده
اتعشينا ويوسف دخل ينام بعد مااتأكدت انه نام اتسحبت على موبايله وفتشت فى سجل المكالمات...لقيت اغلب الصادرة والواردة من نفس الاسم الحاج /سعد...وانا اعرف اغلب اصحابه مفيش فيهم حد اسمه سعد ...ده غير رقمى ورقم اسماء دول المكررين يوميا...الشك ملا قلبى...فيه حاجة مش طبيعية
قلت اول حاجة اعملها اتصل على الرقم ده واشوف يمكن افهم حاجة...جبت تليفونى ولسه هطلب الرقم...لقيته بيرن
"احمد ازيك ياحبيبى"
"حصل ايه ياماما مع ندى"
"قول ازيك ياامى قبل ماتقوللى حصل ايه"
"ندى بكلمها لقيتها منهارة ومكنتش عايزة تقوللى فى ايه؟
لقيت نفسى بزعق باعلى صوتى
"انا هلاقيها من مين ولا مين ندى دى ايه ...دى بقت عيشة تقرف"
وقفلت فى وشه السكة وانا بعيط بحرقة.

هناك 24 تعليقًا:

  1. وااااااااااااااااااااااااااااااااااء انا هعيط مع الحجه

    احمد ده عاوز ضرب حرق بجاز وسخ.. ايه الشخصيه دي.. بارد برووووووود.. ياااااااالهوي

    الحج يوسف ده باين مش هيجيبها لبر

    هستناكي بكرا ف نفس الموعد هههههههههههههههههههههه

    وتصبحي على هنا وسعاده يااارب

    ردحذف
  2. هههههههههههه الست دي غلبانه ولا حماه ولا حاجه

    ردحذف
  3. ام زياد ع فكره هههههههههه

    ردحذف
  4. لييييييييييييييه يابرنسس احمد اتصل انا كنت مركزه ههههههههههههههههههه

    لا بجد جامده الحلقه دى عجبااانى

    ...........ميرا

    ردحذف
  5. se7r
    هههههههههههه
    انا عارفة ياختى ايه دول اذا كان احمد ولا يوسف هيجننوا الست
    وانتى من اهله يا جميل

    ردحذف
  6. ام زياد
    انتى اتعاطفتى معاها ولا ايه ههههههههههه
    منورة ياام زيزوووووو

    ردحذف
  7. ميرا
    احمد اتصل علشان العكننة تكمل
    حرق دم امه ع المسا عيال اخر زمن
    بجد اسعدتونى بارائكم

    ردحذف
  8. ههههههههههه ده نورك يابرنسس
    الست متبهدله لازم نتعاطف ههههههههه
    ام زيااااااد

    ردحذف
  9. هههههههههههههههههههههههههههههههههههههههههههههههههههههههههههههههههههههههههههههههههههههههه

    الست دي مفترررررررية

    دينا خليكي جدعة وابعتيلي باقي الحلقات دلوقت بصراحة الفضول حيجنني هههههههههههه
    فرج عبد الرحمن

    ردحذف
  10. ام زياد
    ههههههههههه ده حال كل الستات يا اووووووووووختى
    غلااااااااااابة

    ردحذف
  11. فرج
    مش لما اكتبهم الاول ههههههههههه
    منوووووووووورنى

    ردحذف
  12. هههههههههههههههههههههههههههههههههههه
    طب لما تكتبيهم متفتريش علي العروسة عشان البت دي طيبة

    وااه قبل ما انسي لو اسماء حلوة متجبلهاش عريس انا ابتديت افكر في الموضوع ههههههههههه

    انتي المنور الدنيا كلهااا يا استاذتناا :)
    فرج

    ردحذف
  13. فرج
    انت متعاطف معاها كده ليه؟؟؟؟؟؟
    شكلك تعرفها ههههههه
    ملكش دعوة باسماء علشان مقولش لناس اعرفهم
    ربنا يخليك كلك ذوووووووق

    ردحذف
  14. ههههههههههههههههههههههههههههههههه

    مش انا قلتلك الست دى ظالمه ندى البت طلعت ماعرفش هى الحموات كده ههههههههههههه

    ............. ميرا

    ردحذف
  15. ميرا
    حتى انتىمتعاطفة معاها ههههههههههه
    يمكن صحيح مظلومة مين عارف

    ردحذف
  16. ههههههههههههههههههه ماكتبلنا حلقه كمان كده خلينا نشوف مين الحج سعد ده هههههههههههههه

    ........... ميرا

    ردحذف
  17. ههههههههههههههههه
    ده انا متاخرة فى شغل الجريدة بسبب القصة اللى شدانى دى يااما بكتبها يااما بفكر فى الاحداث ياامابتابع كومنتات المدونة ههههههههه
    ومش عايزة اخلف وعدى واتاخر عن كل يوم
    ادعيييييييييلى

    ردحذف
  18. ربنا معاااااكى يااارب يابرنسس ومن نجاح لنجاااح ياااارب بس بطلى القهوه صحتك

    ............. ميرا

    ردحذف
  19. ربنا يخليكى وينجحك ياااااااااااااارب

    ردحذف
  20. يووووووووووووووووووووووووووووووووووووووووه بقا لا بجد بتقطعيهم فى حتت ببقا هموت واكمل

    امل

    ردحذف
  21. امل
    بعد الشر عليكى
    ههههههههه ده يوم وبنكمل مش كتيييييير
    سعيدة جداااااا بمتابعتك

    ردحذف
  22. دينا اوحش حاجة بقه لما الواحد بعد ما يندمج يستنى تانى لبكرة علشان يكمل القصة
    القصة مشوقة جدااا وياريت تكملى او تطولى شوية لسه هنستنه تانىىىى
    وبعدين ندى دى طلعت سووووووسة

    ردحذف
  23. دودو
    انا بحاول احافظ على عنصر التشويق وفى نفس الوقت تكون كل حلقة فيها حاجة جديدة
    التطويل خايفة منه ليزهق الناس
    وشوفى الحلقة الجديدة هتلاقى ندى سووووووووووسة جداااا

    ردحذف
  24. يا جميلة بتمتعينا ..الله عليكي ..ماما زيزي

    ردحذف

قول رأيك بلاش تقرا وتقفل من سكات...ارائكم تهمنى