الأربعاء، 4 مايو، 2011

يوميات حماة الحلقة 16


وصلنا المستشفى وانا ملهوفة ومرعوبة يكون بنتى حصلها حاجة لقيت هناك اكتر من واحدة من صحباتها ولما سألتهم على اسماء
قالولى انهم بيعملوا لها اشعة وانها كويسة وان شاء الله خير لحظات ولقيت اسماء مخرجينها من الاشعة جريت عليها وطمنتنى انها بخير وراح يوسف يسأل الدكتور فقاله انهم عملوا اشعة على كل جسمها ليكون فى نزيف داخلى والحمدلله انها بسيطة مجرد كسر فى رجلها وتقعد شهر فى الجبس وتبقى كويسة.
ولما سألتها عن الحادثة حصلت ازاى
"متخافيش ياماما انا كنت بعدى الشارع واتكعبلت وقعت فجاة لقيت تاكسى بيفرمل عليه"
"وفين صاحب التاكسى ده"
"موجود وهو اللى جابنى هنا"
طلعت اشوف هو فين لقيت يوسف واقف مع راجل كبير روحت عليهم وهما بيتكلموا
"خلاص ياحاج حصل خير"
"والله يااستاذ انا ماكان قصدى وبعدين كان اهم حاجة انها تبقى كويسة انا عندى ولاد زيها ...ربنا يخليهالكوا...ولو عايز تعمل محضر انا تحت امرك بس انا رزقى ورزق عيالى بالتاكسى ده ولو وقف هما مش هيلاقوا ياكلوا"
"لا ياحاج خلاص طالما هى كويسة...ربنا يباركلك ولا محضر ولا حاجة"
طبعا متكلمتش لانى حسيت ان الراجل غلبان فعلا وكان اهم حاجة نطمن على اسماء...الدكتور قال اننا ممكن نروح اول ماالجبس ينشف يعنى ساعتين ولا حاجة ونمشى.
كلمت ندى وطمنتها اننا شوية وجايين وهى قالتلى انها هتنزل اول ماالست تخلص البيت.
بعد مارجعنا نيمت اسماء فى سريرها وكان الدكتور قايل لازم ترفع رجلها على حاجة عالية...روحت جبت فرش من الدولاب اللى فى اوضة احمد علشان تحط رجليها وتعليها
وانا بفتح الدولاب حسيت انه فيه حاجة ناقصة..بس ده دولاب البطاطين الحاجات واللى مش بنستعملها دايما...قعدت اركز واحاول افتكر ايه ناقص؟؟؟؟كرتونة اللاب توب الجديد بتاعة احمد مش موجودة...تكون الست اللى بتنضف سرقتها؟؟؟اكيد..بس هتشيل الكرتونة قدام ندى وتمشى بيها ازاى؟؟؟قلت ليوسف قاللى يمكن ندى نزلت قبلها؟؟حطيت الحاجة لاسماء واتطمنت عليها وروحت اتصل بندى
"الو..ازيك ياندى"
"الحمدلله...طمنينى ياماما اسماء عاملة ايه"
"الحمدلله كويسة...بس قوليلى انتى مشيتى وسبتى ام سيد لوحدها"
"لا ياماما هى مشيت وانا قفلت وراها ونزلت...ليه"
"تصدقى مش لاقية كرتونة اللاب توب الجديد..يعنى اتسرقت من البيت ازاى؟؟حاجة غريبة"
"مفيش حاجة اتسرقت...انا اخدتها"
"نعم...بتقولى ايه؟"
"بقول اخدتها حصل ايه"
طبعا لقيت نفسى بزعق ومتنرفزة جدااا
"يعنى ايه حصل ايه...يعنى انتى سرقتيها"
"ايه سرقتها دى...حاجة بتاعة جوزى وخدتها..فيها ايه"
"فيها انك خدتيها من بيتى بدون استئذان...وجوزك ده لما تبقى فى بيته برضه متخديش حاجة من بيتى بدون استئذان منى"
"والله دى حاجة جوزى يعنى حاجتى...وانا مغلطتش فى حاجة"
"غلطتى ياحرامية وبيتى ده مانتيش داخلاه تاني يا واطية"
"ايه ده ايه ده...انتى بيئة وهتردحيلى"
"اردحلك ايه يا سافلة...والله العظيم ماتدخلى بيتى تانى ولا اعرفك ولا تبقى على ذمة ابنى بعد كده"
"لااااا احمد بيحبنى ومش انتى اللى تقوليله يسيبنى"
طبعا يوسف كان جه ولما شاف مستوى الحوار شد منى السماعة وقفل السكة
"انتى بتشتميها كده ليه"
"الحرامية بنت ال...هى اللى سرقت اللاب توب وبتقولى حاجة جوزى...والله ماياخدها ابدا"
"اهدى ياايمان العصبية دى مش كويسة علشانك"
مسكت التليفون بسرعة واتصلت باحمد
"بص يااحمد...انت لو اخدت الحرامية دى متدخليش بيت وانت لا ابنى ولا اعرفك"
"حرامية مين؟؟حصل ايه تانى ياماما"
"الزفتة اللى اسمها ندى سرقت وبتقاوح وبتشتمنى كمان"
وحكيت له المكالمة بالتفاصيل وفى الاخر قلت له
"بص ياابنى من الاخر ياتطلقها يا مش عايزة اعرفكوا تانى...وابقى خليها تضحك عليك بكلمتين...اختار بقى"
وقفلت وانا حاسة انى بغلى ودمى محروق منها...وقررت لو اختارها هى مش هعرفه تانى ابداااااااااا.

هناك 28 تعليقًا:

  1. هههههههههههههههههههههههههههههههههههههههههه اللعبه احلوت اوي.. يا سلام عليكي يا ايمان.. عجبتيني اوي وبجد دي ندى زباله وقليلة ادب.. حاجة جوزي قال.. مش لما يبقى لك بيت الاول

    من اولها خدت الحاجه من غير ما تستاذن.. بس عادي تطلع ف الاخير قايله لاحمد وهو مديها تصريح او يقول الكلام ده لامه علشان ترضى عليهم.. ربنا ياخدك يا بعيده هههههههههههههههههههه

    ردحذف
  2. يالهووووووووووووووووووووووووى انا اه مش طايقة ندا دى بس ليه القلبة السودة دى
    انا عايزة حالا حلقة تانية وبسرعة
    ادينى الحقنة بسرعة ارجوكى محتاجة الجرعة هههههههههههه
    امل

    ردحذف
  3. أزال المؤلف هذا التعليق.

    ردحذف
  4. هههههههههههههههههههههههههههههههههههههههههههههههههههههههههههههههههههههههه هموت من الضحك
    المفروض يفرشوا الملايه بقى
    ندى غلطانه المفروض تستأذن الاول بس ماينفعش ايمان تشتمها هبتدى اكره ايمان على فكره ههههههههههههههههههههههههههههههههه
    تسلم ايدك يابرنسس
    .................ميرا

    ردحذف
  5. توتا يسلم لسانك
    ندى تستاهل الشتيمة هههههههههه

    ردحذف
  6. امل
    ده انا قلت القفلة مافيهاش تشويق النهاردة
    انتظرووووووووونى غدا ههههههه

    ردحذف
  7. ميراااا
    انتى متعاطفة مع ندى كتير شكلى هزعل منك ههههههههه
    يعنى تسرقنى واسكت لها"تقمص"

    ردحذف
  8. وانا بعتذر عموما عن الشتيمة اللى فى حلقة النهاردة
    بس الموقف حكم هنعمل ايه؟؟

    ردحذف
  9. ايه البجاااااااااااااااااااااااحة دي
    لا دي بنت مش طبيعيه لا دي بجد مستفزة موت
    الجوازة دي لايمكن تتم ابداااااااااا
    ههههههههههههههههههههههههههههه
    بس مبدعة والله يا دودو

    ردحذف
  10. ايييييييييييييه ده مش ممكن ...فى بنى ادمة كده ...دى بجحة جداااااااااااااااااااا ومش محترمة خااااااااااااااااالص ...لالالالالالالالالالالالالا هو احمد فعلا لو مسبهاش يبقى ميلزمش مامته فعلا ...معنى انها اخدت اللاب توب من جوه الدولاب يعنى فتشت فى حتت كتير ...يبقى لاتؤتمن ...مستحيييييييييييييييييل تفضل على ذمته مامته ليها نظرة م الاول

    ردحذف
  11. مش قويه قوى الحلقه
    :(

    ردحذف
  12. تقريا أحمد هايقولها أنه هو إلى قالها تاخده لسبب أو لأخر
    بس مش هايكون عمل كده

    ردحذف
  13. لا يا دينا كده خالد حرقلنا اليوميات بس البت ندى دي عايزة تتظبط ولو سي احمد دا قال كده زي ما خالد بيقول يبقى سوري يعني

    ايناس

    ردحذف
  14. شذى
    ميرسى ياجميل
    ومش عارفين احمد بيه هيعمل ايه...القرار فى ايده دلوقتى ههههههههههههه

    ردحذف
  15. د.هنودة
    معاكى حق والله الام بيبقى ليها نظرة بس ياترى هيختار ايه؟؟

    ردحذف
  16. خالد
    انا عارفة ممكن تكون الحلقة مش شيقة بس متنكرش انها صادمة شوية
    وهنشوف تنبؤاتك؟؟؟؟؟
    ومتقلقش مهما تنبأت انا القصة فى دماغى ومش هغير احداثها

    ردحذف
  17. ايناس
    ياستى حتى لو خالد حرق حلقة الاحداث جاية كتييييييييييير ههههههههه
    نشوف بكرة خالد صح ولا لا

    ردحذف
  18. يخرب عقلها البت دي
    بس لها حق معاها راجل راجل ومسنودة عليه بقي هههههههههههههههه

    ردحذف
  19. ام زياد ع فكره ههههههههه

    ردحذف
  20. ام زياد
    هههههههههه فعلا مستقوية بيه كلها دمعتين وبينخ على طووووووول زى يوم الشبكة جاب لها بالضعف بنت المحظوووووووووووووظة

    ردحذف
  21. بصى هى غلطانه اكيد محدش يقدر يقول حاجه بس انتى رد فعلك كان عنيف جداااااااااااااااااااااااااااااااا واوفر اوى بصراحه انتى وهى ف موضوع الشتايم دا
    بصراحه صدمتونى فيكوا ههههههههه

    ردحذف
  22. اسماء
    البت ندي دي بجحه بجاااحه اعوذبالله هاتيهالي وانا اربيهالك ولا تزعلي نفسك يا ايمان بس برده انتي انفعلتي وابتديتي بالشتيمه بس معاكي عذرك برده جايه اكيد من خضه اسماء وتلاقي بيتك بيتقلب وكمان بجحه لااااااااا دي عايزة قطم رقبتها انا عارفه كانت مستخبيالنا فين دي يختي ( واضح اني تقمصت دور صاحبه ايمان ) هههههههههههههههههه يلا بقي مش كل مرة حقولك في انتظار المزيد......... اديني

    ردحذف
  23. هبه
    البت غاظتنى ياختى وبترد عليه فاستفزتنى
    ههههههههههه حلو اوى وانتى بتكلمينى كانى ايمان

    ردحذف
  24. اسماء
    ههههههههههههههههههههههههههههههه
    شفتى ياختى البت عاملة فيه ايه والواد مقويها عليه مكنش احمد خد بنتك وبقينا احنا الحموات القاتنات..تقمص انا كمان ههههههههههه

    ردحذف
  25. nada de zbala awiii bgd da e lbga7a lly hia feha de
    w lly eman 3mlto da s7 gdaaaaan

    ردحذف
  26. انفعالك كله عفوية وتلقائية ..بس برضه حاتلاقي احمد في صف ندى بكرة تشوفي ..تحياتي ..ماما زيزي

    ردحذف
  27. بصراحة ايمان معاها حق لازم ندى يكون عندها احترام للبيت و اصحابه و تبلغهم قبل اى حاجة
    و احمد لو كمل معاها يبقى معندوش دم بصراحة

    ردحذف
  28. بصراحة ايمان جدعة جدا جدا وحلوة اوي القصة دي

    ردحذف

قول رأيك بلاش تقرا وتقفل من سكات...ارائكم تهمنى