السبت، 7 مايو 2011

يوميات حماة الحلقة18


الايام اللى بعد كده كانت كلها بحث عن شقة مناسبة لنادية وطبعا كل فى اتجاه..يوسف واحمد واسماء وانا وبعد اسبوع لقينا الشقة المناسبة وبعت لنادية صور الشقة ع الميل وعجبتها ووافقت على سعرها وحجزت وبعد يومين كانت فى مصر.
اول كام يوم طبعا معرفناش نقعد مع بعض خالص كان استلام الشقة ونزلنا نجيب عفش وكل اللى يلزم لتجهيز البيت الجديد وفرشناه والحمدلله استقرت نادية واحنا قاعدين مع بعض لوحدنا سألتها
"كل ده ومسألتكيش عن رجوعك لوحدك واستقرارك هنا"
"زهقت وتعبت ياايمان"
"من ايه؟"
"من ناجى مبقتش طايقة استنى معاه"
"ليه ايه الجديد"
"الموضوع مش جديد ده قديم وانا اللى كنت ساكتة"
"احكى انا مش فاهمة حاجة"
"من اول جوازنا وهو بياخد مرتبى بحجة ان فلوسه مش كفاية للصرف على البيت وفضلت سنين عايشة على كده ومصدقاه وكان هو بيكبر فى شغله وانا بكبر فى شغلى وبرضه كل فلوسى بياخدها وخصوصا لما هشام دخل المدرسة كانت حجته مصاريف هشام...لحد مامرة ودى بعد اكتر من 10سنين قلت له تعالى نعكس وانا اخد مرتبك واصرف على كل حاجة...الاول اتحجج وقاللى مش هتقدرى المصاريف هتكون كتير عليكى..ولما صممت رفض فبطلت اديله المرتب وكان وقتها مرتبى كبير فبقيت اصرف على نفسى وعلى مدرسة هشام...تخيلى مكنش بيجيب اكل فى البيت وكنت ساعات من العند اكل فى الشغل علشان انا كمان مجيبش له حاجة...ومش بخل منه لانه ممكن يعمل عزومة تتكلف الاف الدولارات بس بمزاجه لناس اصحابه مثلا وبينهم مصلحة ولسانه الحلو كانت كل الناس بتحبه وفكرت فى الطلاق بس مقدرتش علشان هشام متعلق بيه اوى المهم بعد كده اتفقنا ان اى حاجة فى البيت او مصاريف هشام نقسمها بالنص...حتى لو اشترينا حاجة مشتركة برضه نقسم كل حاجة وعشنا سنين على كده وارتحنا وكانت حياتنا ماشية طبيعى طالما اننا ملتزمين بالاتفاق...ولما هشام اتخرج واشتغل رجع ناجى يستخسر تانى وبقى يضايقنى فى حكاية الفلوس دى...وعلى فكرة هو نزل من نظرى من زمان بس كنت عايشة وخلاص علشان ابنى...ومن فترة بسيطة كنت بتكلم مع هشام عن انى نفسى ارجع مصر واستقر لقيته رحب بالفكرة وقاللى انه هو كمان عايز يستقر فى مصر علشان لو اتجوز عايز يتجوز واحدة مصرية...الحسنة الوحيدة لناجى انه ساعدنى فى تربية هشام على العادات والتقاليد المصرية وتعاليم ديننا وكان الولد متقبل ده جدا ومكنش بيحب عادات الامريكان والحمدلله عمره ماكان عنده جيرل فريند زى اصحابه ولا عمره شرب خمرة ولا عمل حاجة تغضب ربنا"
"يااااااااااه يانادية كل ده كان جواكى ومش بتتكلمى"
"هتكلم لمين واقول ايه..اهى عيشة وخلاص"
"وهشام مجاش ليه"
"بيخلص اجراءات نقله لفرع الشركة هنا فى مصر...الحمد لله ان الشركة اللى هو فيها طلع لها فرع هنا وده اللى سهل قرار الرجوع...يعنى كام يوم كمان ويرجع ان شاءالله"
طبعا حكاية نادية صدمتنى مكنتش اتخيل ان ناجى الراجل الذوق اللى بيحبها وبيحب ابنه وكل الناس تشهد بكده تطلع دى حقيقته...صحيح البيوت اسرار...ربنا يخليك ليه يا يوسف ياحبيبى انت فعلا ونعم الزوج...الحمدلله
ومرت الايام ورجع هشام وطبعا مكنش غريب على احمد واسماء لانهم كانوا بيتقابلوا فى الاجازات..هى كانت كل كام سنة بس اهو ع الاقل يعرفوا بعض.
انا كنت عايشة فى قمة سعادتى برجوع نادية كنت حاسة انى مش لوحدى وقعدت احكيلها على اللى حصلى فى خطوبات العيال ولقيتها بتهزر وتقوللى
"ياسلام لو هشام ياخد اسماء ونبقى احنا الحموات الفاتنات"
"هههههههه ياختى ياريت وانا الاقى زى هشام"
"يعنى انا الاقى زى اسماء كفاية انها بنتك"
"ربنا يخليكى ..بس احنا مالنا ياريت هما اللى يقولوا"
"والله ياايمان انا حاسة ان هشام ميال شوية ناحيتها بس هو متكلمش صراحة"
"يمكن بيتهيألك"
"ليه وانا يعنى مش هعرف احس بابنى"
"بصى سيبى كل حاجة لوقتها...يعنى لو كلمك فعلا نبقى نتكلم"
طول الفترة اللى بعد كده وانا بفكر فى كلام نادية واتمنيت انهم يكونوا فعلا ليهم نصيب مع بعض ولما حكيت ليوسف لقيته هو كمان مرحب بالموضوع وقال نستنى لما الولد يفتح الموضوع مع مامته
وفى يوم وانا قاعدة مع اسماء لوحدنا قلت اجس نبضها واشوف رايها فيه ايه
"تصدقى يااسماء نادية بتقولى ياريت انتى وهشام تتجوزوا "
"ايه..؟"
"ايه مالك"
"اصل انا ياماما كنت عايزة اقولك من زمان بس كنتى مشغولة مع طنط نادية"
"عايزة تقولى ايه"
"انا...انا..بحب واحد تانى"

هناك 20 تعليقًا:

  1. هههههههههههههههههههههههههههه يخرب بيتك يا اسماء.. يا ما تحت السواهي دواهي والله

    بس جوز ناديه ده عيب يتحسب ع الرجاله لما يكون عينه ف مرتب مراته ومستخسر يصرف عليها وعلى ابنها

    اضافة جميله ويارب ما تتكسرش قلوب ف الاضافه الجديده

    ردحذف
  2. اديلوووووووووووووووو هههههههههههههههههههه

    اهو هشام جه على لفضى وبتحب مين دى ههههههههههههههههه البت طلعت سوسه ياختى

    جامده يابرنسس

    .................. ميرا

    ردحذف
  3. ههههههههههههههههههههههه
    حبته فين ده ف الجبس
    هههههههههههههههههههه
    ام زياد

    ردحذف
  4. توتا
    ههههههه اومال ايه يابنتى مفيش حد عبيط
    وربنا يستر على رأيك

    ردحذف
  5. ميرا
    هههههههههه هشام جاى مقتنع مش علشانها
    ياعينى الامهات اللى اتكبسوا

    ردحذف
  6. ام زياد
    هنشوووووووووف الحلقة الجاية او اللى بعدها او اللى بعد اللى بعدها هى حبت مين هههههههه

    ردحذف
  7. احنا قلن هيجى ويجوزها ونخلص بقى منها هههههههههههههههههههههههه
    .............. ميرا

    ردحذف
  8. ميرا
    هنعمل ايه البنت طلعت مرتبطة ههههه

    ردحذف
  9. اخسسسسسسسسسسسسسسس عليكي يا اسمااااااااااااااء
    انا قولت حتتجوز واحد حلو كفايه ان اسمه هشاااااااااام
    مبدعه اوي موت يا دودووووووو وحموت على الحلقة الجديده

    ردحذف
  10. شذى
    ده تحيز ده ولا ايه هههههههههه
    بتتحيزى للاسم
    ربنا يخليكى ياحبيبتى والحلقة الجديدة فى نفس الميعاد ان شاءالله

    ردحذف
  11. ايه الحاجات الغير متوقعه دي يا دندن بجد حلقه جميله عايزين بقى احمد ينقطنا شويه ولا المرة دي اسماء هي اللي هاتقوم بالدور الاروبه دي هههههههههههههه

    ايناس

    ردحذف
  12. هههههههههههههه
    ايوه طبعا ده تحيز للاسم واعترف بكده
    دي تاخده بس عشان اسمه هشام من غير تفكير وهي مغمضه
    حتي الحلقه الجديده باذن الله

    ردحذف
  13. ايناس
    متقلقيش الام منقوطة على طول لازم يطلع لها حاجة
    هههههههههه وهنشوف الحلقة الجاية

    ردحذف
  14. شذى
    هههههههههههههههههههههه
    خلاص نكلم اسماء فى الموضوع ده

    ردحذف
  15. ايووووووووووووووووووووووووة كده احب انا قصص الحب عايزين شوية رومانسية يادندن بقا هههههههههههههههه هههههههههههههههههه احكى يا اسماء احكى ياحبيبتى

    ردحذف
  16. mmmmmmmmmmmmmmmmmmmmmmmmmmmmmmmmmmmmmmmmmmmmmmmmmmmmm

    ردحذف
  17. هههههههههههههههههههههههههههه

    ردحذف
  18. الدنيا احلوت وبقى فيه احداث فرعية ..كمل يا جميل ..ماما زيزي

    ردحذف
  19. نادية دى طلعت حكايتها حكاية
    بس يا ترى مين ده اللى اسماء بتحبه

    ردحذف
  20. اسماء امها هتضربها دلوقتى بغطا الحله :D

    #دودى

    ردحذف

قول رأيك بلاش تقرا وتقفل من سكات...ارائكم تهمنى