الأحد، 8 مايو، 2011

يوميات حماة الحلقة 19


فوجئت طبعا بكلام اسماء بس محاولتش ابين وقع المفاجأة عليه...
"بجد يااسماء...مين ده؟"
وقبل ماتجاوب لقيت يوسف بيندهلى وعايزنى بسرعة
"خير يا يوسف "
"الحاج سعد توفى دلوقتى فى المستشفى..تحبى تيجى معايا لان مراته لوحدها زى ماانتى عارفة"
"لاحول ولا قوة الا بالله...اه طبعا جاية معاك"
نزلت معاه ورحت اواسى الست الوحيدة اللى بعد جوزها مبقاش لها حد خالص وراح يوسف يخلص اجراءات الدفن تانى يوم الصبح وفضلت اروح معاه ال3 ايام وخلال العزاء كان كل اقاربهم موجودين وقرروا انها مش هتقدر تعيش لوحدها وبعد ايام العزا سافرت الصعيد لتقيم اقامة كاملة مع اختها اللى بتعيش لوحدها ولكن اولادها المتزوجين بيراعوها
ولما خلصت الدوشة اللى كنت فيها قلت ارجع لاسماء اشوف الحكاية ايه واستغليت وقت كنا فيه فى البيت لوحدنا علشان محدش يقاطعنا
"هااا يااسماء احكيلى ياحبيبتى عن الموضوع اللى كنا بنتكلم فيه"
"بصى ياماما انا اتعرفت على اشرف يوم فرح رانيا كان تعارف عادى يعنى باعتباره اخوها وطول الفرح وانا شايفة اهتمامه بيه بس عادى يعنى محطيتش فى دماغى وبعدين لما احمد جه اخدنى بالليل لقيته بصلى كده بصة معجبتنيش برضه قلت عادى انا هعمل حساب الناس فى معاملتى مع اخويا...المهم بعد يومين لقيت مكالمة منه وبيقولى انه جاب رقمى من رانيا وعايز يقابلنى يتكلم معايا طبعا رفضت قاللى طيب الايميل مرضتش برضه بعد كده لقيته بييجى يقف قدام الشغل وانا مروحة وميكلمنيش لفترة وبعدين كلمنى قاللى انه بييجى عند الشغل علشان يشوفنى بس...وبعد بقى بيكلمنى كل يوم يسأل عليه بس لحد ماقاللى انه عايز يرتبط بيه بس قدامه شوية وقت بسيط بيظبط اموره المادية"
"طيب يعنى عنده كام سنة بيشتغل ايه امكانياته وظروفه الحاجات دى؟"
"عنده 28 سنة وفاتح سايبر"
"اوعى يكون معاهوش شهادة ده كمان تبقى مصيبة"
"ههههه لا ياماما معاه بكالوريوس بس هو فاتح السايبر من قلة الشغل ولانه بيحب الشغل فى الكمبيوترات وكده"
"وايه حكاية ظروفه المادية دى"
"بصى ياماما هو علشان ييجى لازم يكون معاه فلوس للشبكة ع الاقل وهو مستنى اخر الشهر دوره فى جمعية وكنت هقولك ونحدد معاد معاه ييجى يقابل بابا"
"طيب ياحبيبتى ربنا يتمم بخير"
وفعلا صدق فى كلامه وفى اول الشهر الجديد لقيت اسماء بتقوللى كلمى بابا علشان اشرف ومامته ورانيا ييجوا يطلبونى
ويوسف طبعا كعادته معترضش وجم عندنا
مبدئيا الولد وسيم وشيك جدا يعنى نقدر نقول شبه نجوم السينما ومامته ست كبيرة ورانيا طبعا قابلتها كذا مرة قبل كده واعرفها الى حد ما...اتكلموا وقالوا نفس الكلام اللى كانت قالتهولى اسماء
وحسيت اننا مش بنتكلم فى اهم حاجة فسألته
"وعندك شقة"
"شقة ماما كبيرة وانا بعد جواز رانيا مش هقدر اسيب ماما تعيش لوحدها"
"بس يعنى السكن مع الاهل بيقيد الحرية مع كل احترامى للحاجة انا مفضلش انى بنتى تسكن مع حد"
"ياطنط الشقة كبيرة يعنى اسماء هتبقى اخده راحتها بدون اى تقييد لان ماما دايما قاعدة فى اوضتها"
"معلش يابنى ده مبدأ عندى حاول انت تشوف حل لموضوع الشقة ده"
"يعنى ايه حضرتك مش موافقة"
"لا موافقة طبعا بس بعد ماتحل مشكلة الشقة حتى لو ايجار قانون جديد انا معنديش مانع"
"المشكلة مش انى الاقى شقة ولا لأ...انا كمان مبدأ عندى مش هسيب امى"
"خلاص يابنى نبقى متفقناش...وكل شئ نصيب"
قام هو واهله ودخلت اسماء تعيط واحمد دخل وراها يواسيها
ويوسف قاللى
"هنعمل ايه البنت شكلها عايزاه"
"يعنى انت مش عارف المشاكل اللى بتيجى من ورا السكن فى بيت العيلة"
"انا عارف بس زعلت علشانها"
"هتزعل شوية وخلاص"
حسيت ان اسماء زعلانة منى طول الفترة اللى بعد كده وبتتعامل معايا فى اضيق الحدود...فكرت انى اصالحها...فى يوم وانا خارجة من الشغل قلت اروح اجيب لها طقم شيك من اكبر المحلات وفعلا رحت مول كبير علشان اعرف انقى واختار واعملها مفاجاة
وانا بتمشى فى المول لمحت احمد قاعد مع واحدة فى كافيه وهو مشافنيش فمحبتش احرجهم وكملت واشتريت الطقم وروحت
لما رجعت البيت كانت اسماء لسه مرجعتش من شغلها وشوية ولقيت احمد داخل البيت
لما دخل اوضته روحت وراه وانا بهزر معاه
"النهاردة شفتك وكان معاك قمر يا واد مين دى"
"شفتينى فين"
"فى الكافيه...المهم قوللى انت بتحبها ولا بتتسلى هههههه"
"لا ياماما بحبها بجد وهى بتحبنى"
"وده من امتى"
"يعنى من كام شهر كده"
"وايه اللى مسكتك كل ده مقولتش ليه علشان نخطبهالك"
"اكيد ياماما كنت هقول طبعا بس بعدين"
"ليه بعدين"
"يعنى عندها ظروف كده لما تخلص اكيد هقولكم نخطبها"
"خير ظروفها ايه؟"
"ممم...ممم...مستنية..ت..ت...تتطلق"
وباعلى صوت عندى
"يالاااااااااااااااااااااااااااااااااااااااااااااهوى"

هناك 28 تعليقًا:

  1. ههههههههههههههههههههههههههههههههههههه والله ايمان دى غلبانه مع عيالها المجانين دوووول

    ردحذف
  2. ايه
    ههههههههههه ده حال كل الامهات

    ردحذف
  3. ههههههههههههههههههههه يالهوي فعلا
    ام زياد

    ردحذف
  4. لالالالالالالالالالالالالالالا
    كتير كده والله اللى بيحصل للست دي مش معقوله
    وكمان تتطلق من قله البنات يعني
    منــــــــــه لـــــــــه
    هههههههههههههههه
    بس حلوه والله الحلقة بس طوليها شويتين
    :))))))))))))))))))))))))

    ردحذف
  5. ام زياد
    يالهوى دى حاجة قليلة جداااااا
    انا كنت هكمل ههههههههه

    ردحذف
  6. شذى
    الست خلاص هتطفش منهم ههههههههه
    على فكرة دى اطول حلقة من يوم ماالحلقات بدأت وكنت مرعوبة تزهقوا

    ردحذف
  7. هههههههههههههههه ...الحلقة دى فكرتنى بالقيلم بتاع سبعاوى ...انا مش فاكرة اسمه ايه بس هما ولادها كانوا مجنناها كده برده....بصراحة عيال مستفزة

    ردحذف
  8. د.هنودة
    طلعت قماااااااااااااش هههههههههههه
    فيلم عائلة زيزى
    والله يابنتى كل الامهات دلوقتى شايفين الويل من عيالهم

    ردحذف
  9. ههههههههههههههههههههههههههههههههه
    يالاااااااااااااااهوي العيال دول هايموتوا امهم على الخلفه واللي عايزينها بجد الله يكون فعونها

    ايناس

    ردحذف
  10. ايناس
    ههههههههههههه غلبانة ايمان ياااااااعينى

    ردحذف
  11. هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
    جامده دى
    :))))))))))))))))

    ردحذف
  12. بس حاسس أنها مكتوب كتابها مش متجوزه متجوزه
    هههههههههههههههههههههههههههههههههههههههه
    هاروح أشوف أهو

    ردحذف
  13. بجد كده اوفر علي الست دي ربنا يصبرها للاخر ههههههههههههههههه
    Eman Osama

    ردحذف
  14. هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه يا خيبتك فى جوازات عيالك يا ايمان

    بجد هموت من الضحك

    ردحذف
  15. ههههههههههههههههههههههههههههههههههه يا حرام الست دي شااااااااااااافت و شكلها هتشوووف كتييييييييييير .. ربنا يقويها

    ردحذف
  16. ya 3enii 3lekii ya emaaaaaaaaaaaaaaaaaaaaaaan :(

    ردحذف
  17. هههههههههههههههههههههههههههههههههههههههههههههههههههههههه رووووووووعة بجد تسلم ايديك ياريت تكتبى اجتماعى كوميدى كده كتييييييييييير

    ردحذف
  18. هههههههههههههه عيله مسخرة

    ردحذف
  19. هههههههههههههههههههههههههههههههههههههههههههههههههههههههه

    ردحذف
  20. انا بقى امهم الحقيقية ...انا ماما زيزي وحالطم انا كمان معاكي يا إيمان ..حلوة بجد ..

    ردحذف
  21. هههههههههههههههههههههههههههههه انا لو مامتهم كنت انتحر و اريح نفسى ....

    ردحذف
  22. لا العيال دول اتجننوأ هما الاتنين يعنى حكاية اسماء مبلوعة و فى ناس كتير بتقبلها
    بس الاخ اللى ماشى مع واحدة مستنية تتطلق ده مجنون رسمى

    ردحذف
  23. ههههههههههههههههههههههههههههههه لا جامدة

    ردحذف
  24. فعلا يا لهوووووووووووووي خلاص لست حتشد في شعرها ويقول تجننت

    ردحذف
  25. يا خرا ا ا ا ا ا ا ا ا ا ا ا شي :D

    ردحذف
  26. يا خرا ا ا ا اا ا ا ا شي :D

    ردحذف
  27. هههههههههههههههههههههههههههههههههههههههههههههههههههههههههههههههههههههه

    ردحذف
  28. ده يالهوووي فعلا هههههههههههه

    ردحذف

قول رأيك بلاش تقرا وتقفل من سكات...ارائكم تهمنى