الأربعاء، 11 مايو 2011

الحلقة 22

كلام احمد مش بيروح من دماغى...يعنى ايه مش هيسيبها ومش هيعمل حاجة غصب عنى...انا برضه مش فاهمة حاجات كتير عن البنت دى وحاسة انها غامضة وعلاقتهم مش مريحة وخايفة اسأله فى التفاصيل يفتكر انى تراجعت عن رفضى ليها...مش عارفة اعمل ايه؟؟واسماء مش معانا خالص من شغلها للحاجات اللى بننزل نجيبها لخطيبها اللى يااما خارجة معاه يااما بتكلمه ع الشات...يبقى مفيش غير يوسف...هو اللى دايما ينقذنى فى المواقف الصعبة
فى يوم كانوا احمد واسماء بره فتكلمت معاه
"يوسف عايزة اطلب منك طلب"
"اؤمرينى"
"الامر لله ياحبيبى...بص يايوسف انا عايزة افهم حاجات كتير عن علاقة احمد بالبنت اللى يعرفها...وخايفة لو سألته يفتكرنى موافقة فقلت مفيش غيرك اللى هيجيبلى التايهه"
"حاضر...بس عايزة تعرفى ايه بالظبط"
"يعنى عايزة اعرف هو متمسك بيها للدرجة دى ليه؟؟وظروف طلاقها ويعنى ايه اتجوزت شهر واحد بس مش يمكن تكون هى مش كويسة...يعنى اتكلم معاه وشوف"
"حاضر يوم الجمعة بعد الصلاة هتحجج باى مشوار عايزه معايا فيه واتكلم معاه وكانك متعرفيش حاجة ابدا"
"ايوه كده حلو اوى"
وكنت مستنية اليوم ده على احر من الجمر عايزة افهم دماغه
وفعلا لما رجعوا يوم الجمعة لقيت يوسف بيقوللى طبعا مش قدام الولاد
"انا اتكلمت معاه وعرفت كل حاجة"
"هااا احكى بسرعة مش قادرة استنى"
"شوفى ياستى..البنت اسمها مى وبتشتغل محامية فى مكتب محامى كبير هى لسه تحت التمرين لانها خريجة السنة اللى فاتت اتجوزت وهى فى سنة رابعة فى الكلية...الخطوبة كانت سريعة جدا وملحقتش تتعرف عليه خالص...بعد مااتجوزت من اول يوم وهو بيعاملها وحش وفى اول اسبوع كان بيضربها ضرب ممكن تقولى عليه تعذيب وكان مانع اهلها يروحوا بعد السبوع ومنعها من الكلية خلال فترة جوازهم كان شكاك لابعد الحدود يعنى تقدرى تقولى غير سوى نفسيا...اخر يوم حصلت فيه المشكلة...جالها مكالمة على الموبايل وكان الرقم غلط ساعتها مصدقهاش وقالها انتى تعرفى حد وقعد يضرب فيها وهى كان فاض بيها فردت عليه وقالتله انه مريض نفسى قام جن جنونه وجاب حبل الغسيل وربطها على الكرسى طول الليل وكل شوية يكب عليها مياه ويقولها قولى انتى تعرفى مين وهو كل اعتقاده انها تعرف حد فعلا وطول الليل على ده الحال لحد الصبح سجايره خلصت نزل يجيب سجاير حاولت تفك نفسها وفعلا قدرت واتصلت ببوليس النجدة قبل ماهو يرجع...وجه البوليس وعملت تقرير طبى وهو اتحجز كام يوم واهله خرجوه من القسم وهى راحت عند اهلها ولما عرضوا عليه الطلاق رفض فرفعت قضية طلاق وفعلا اتحكم لها من اسبوعين تقريبا علشان كده هو لما حبها حس انها اتظلمت وعاشت ايام صعبة فوعدها انه مش هيسيبها خالص...ايه رأيك بقى"
"رأيي فى ايه؟؟؟لو كان كلامها صح يبقى ربنا يعوضها...انما مش لازم ابنى...هو ذنبه ايه ياخد واحدة اتجوزت قبل كده وهو لسه مدخلش دنيا"
"مش بيحبها وراضى بيها خلاص"
"لا ابدااااااا ابنى لازم ياخد بنت بنوت "
ولسه بنكمل كلامنا لقينا الباب بيخبط ونادية جاية هى وهشام
نادية" احنا حددنا معاد فرح هشام كمان اسبوعين ان شاءالله"
انا"الف مبروك ياهشام ربنا يتمم بخير"
يوسف "مبروك ياهشام"
انا"طيب لحقتوا تخلصوا كل التجهيزات"
نادية"البيت جاهز والعفش جديد ما كله على يدك"
انا"وناجى؟؟"
نادية"احنا قولنا لاهل العروسة انه مرتبط بشغل هناك ولما قلناله على ميعاد الفرح قال جاى طبعا...انا اصلا شيلته من حساباتى خالص ومش هيفرق معايا وجوده من عدمه...ومقلتليش اسماء هتتجوز امتى؟؟"
"ادينا بنخلص التجهيزات وبعدين نبقى نحدد"
بعد مامشيوا...قلت ادخل لاسماء علشان نشوف هيحددوا امتى لاننا تقريبا خلصنا حاجتنا وهو لسه معملش حاجة من اللى عليه...ولسه هدخل اوضتها سمعتها بتتكلم ع الموبايل
"انا مش هقبل منك كده تانى...كنت بتشتمنى واسكت انما تشتم اهلى كمان...خلاص اعتبر اللى بيننا انتهى بس رجعلى فلوسى الاول ومش عايزة اشوفك تانى"

هناك 33 تعليقًا:

  1. ههههههههههههههههههههههههههه لا بجد مش معقول كده الست دى مش بموت ليه وتخلص

    امل

    ردحذف
  2. امل
    ومين يكمل لنا القصة هههههههههههه

    ردحذف
  3. يا خرااااااااااااااااااااااااااااااشي يا لهوى يا لهوى يا لهوى يا عيني عليكي يا ايمان يختي كان مستخبيلك ده كله فين بس يعني لاتتنصفي في الواد ولا في البنت ادي الخلفه واللي عايزين يخلفوا ييجوا يشووووووووفوا

    اسماء

    ردحذف
  4. اسماء
    ههههههههههههههههههههههههههه
    مفيش كلام تانى بعد كلامك

    ردحذف
  5. ههههههههههههههههههههههههههههههههههههههههه هم يضحك وهم يبكى كل ما تعدلها من حتة تبوظ من التانية يا عينى عليكى يا ايمان ربنا يصبرك يا اوختى على ما بلاكى

    ردحذف
  6. ايه
    سيبك انتى هو يوسف اللى فيهم
    بلا عيال بلا وجع قلب هههههههههههههههه

    ردحذف
  7. اه بجد يا بختها بيه يعنى هما الاتنين بيلعبو ف الستينات ولسه عندها نفس تقوله يا حبيبى هههههههه

    ردحذف
  8. ايه
    انا احتج هما بيلعبوا فى اواخر الخمسينات
    وبعدين زوج زى ده لازم يتقاله ياحبيبى 10 مرات فى اليوم

    ردحذف
  9. هههههههههههههههههههههههههههههههههه
    اكيد ايمان هاتنتحر فى اخر القصه

    ردحذف
  10. مصطفى
    ههههههههههههههه
    ربنا يهديهم

    ردحذف
  11. ويعدين بقى هى مفيش قصة حب بتنجح ليه ؟؟؟؟؟؟

    ردحذف
  12. كريم
    انا عاملة احلى قصة حب
    ايمان ويوسف زى قصة حب ميرفت وعيلاء
    هههههههههه

    ردحذف
  13. يانهاااااااااااااار ملحوس قلوس كماااااااان يا اسماء دا ايمان هاتموت بالسكته القلبيه
    بس كلام فسرك يا دينا هي دي فرصتها عشان تنطلق

    ايناس

    ردحذف
  14. ايناس
    هههههههههههه شفتى العيال ياختى
    بس مش فاهمة مين اللى تنطلق؟؟
    شكلك قصدك ايمان تروح شرم تانى؟؟؟

    ردحذف
  15. الناس تقول رجع جوابتي وصوري مش فلوسي ههههههههههه
    تذكرتين لشرم يايوسف وصلحه ههههههههه
    ام زيااااد

    ردحذف
  16. هو في ايييييييييييه
    هم ولادها عبط ولا ايه معندهمش عقل يفكرو بيه ولا ايه لالالالالا الولاد دول محتاجين وقفه ويوسف كمان لازم يبطل سلبيه مش كل ماحدش بكلمه يقول مش بتحبه خلاص ... مش بيحبها خلاص
    لازم الولاد دي تفوق بجد اهي ضيعت من ايديها هشام الهبله
    ههههههههههههههههههههههههههه
    بس جامده كالعاده يا دودو

    ردحذف
  17. هما كل اللى اسمهم ايمان منحوسين كدا ليه؟؟ هههههههههههههههههههه والله صعبانة عليا ايمان وعيالها معندهمش دم ويوسف دا فى التراوة خالص ومش فالح غير يا حبيبتى ويا عمرى هههههههههههههههههههه

    ردحذف
  18. ام زياد
    الصور والجوابات دى كان زمان
    دلوقتى فيه تطور...فلوسى او شيكاتى او وصولات الامانة ههههههههههههه

    ردحذف
  19. شذى
    انا عارفة انك متضايقة علشان هشام هههههههههههههه
    تحيز تحيز يعنى
    ربنا يخليكى يا حبيبتى

    ردحذف
  20. ايمان
    طيب كويس ان يوسف بيقول ياحبيبتى ويا روحى فيه ناس تانية بيبقوا فى التراوة ومش بيقولوا حاجة هههههههههههههه اهو احسن مايبقى من كله

    ردحذف
  21. هما العيال دول لاقين امهم فى الطريق دا ولا اكنها مرات ابوهم قاصدين ينقطوها

    ردحذف
  22. دعاء
    هههههههههههههههههههههه
    عيال اخر زمن

    ردحذف
  23. حرااااااااااااااااااام عليكى الست دى فى الأخر هايجيلها أزمه صدريه و جلطه و القلب و السكر و الضغط
    الرحمة حلوه
    :)

    ردحذف
  24. خالد
    انا مالى يا خويا مش بحكى اللى عيالها بيعملوه فيها ههههههههههه

    ردحذف
  25. ههههههههههههههههه
    انا مقهوره عشان هشام منتي عارفة بقي يا دودو
    هو في زي هشام يعني

    ردحذف
  26. شذى
    اكيد مفيش زيه طبعا ههههههههه

    ردحذف
  27. مش عارفه اقول ايه بقي بس اللي اقدر اعمله ادعيلك تكملي لينا الحلقات دي يا ايمان ههههههههههههههههههههه
    Eman Osama

    ردحذف
  28. ايمان
    ههههههههههههههههه
    خلاص قربت تخلص اهى

    ردحذف
  29. هار اسوووووووود هما العيال دول مالهم يخرجوا من مصيبة يقعوا ف كارثة كداليه هههههههههههههههههههههههههههههههههههههههه

    ردحذف
  30. عيالها مش عندهم خبره ولا عقل ابداااااااااااااااا

    ردحذف
  31. ومرة تانية اهو الحمد لله بالاقي ناس داخلة من يومين اتنين ..حبايبك كتير يادندونة استمري وعلقي بعد كده ..ماما زيزي

    ردحذف
  32. و الله مى دى صعبت عليا


    الست اسماء باه ايه حكاية الشتيمة و الفلوس دى

    ردحذف
  33. انا مش لاقية الحلقة 21 لية

    ردحذف

قول رأيك بلاش تقرا وتقفل من سكات...ارائكم تهمنى