الجمعة، 13 مايو 2011

الحلقة 23

لما سمعت كلام اسماء فتحت الاوضة بسرعة وكانت قفلت التليفون لقيتها منهارة وقاعدة تعيط...اخدتها فى حضنى ومقلتلهاش انى سمعت حاجة
"مالك ياحبيبتى"
"مفيش ياماما..انا سبت اشرف"
"ليه بس مش انتى كنتى متمسكة بيه ايه اللى حصل"
"عصبى جدا على حاجات تافهه ولما يتعصب مايفرقش مين قدامه ويقعد يشتم ويغلط ومش مهم احنا فين فى الشارع او ع التليفون او حتى قدام الناس ودى مش اول مرة بس كان كل مرة يرجع يعتذر ويتأسف ويقوللى انها اخر مرة"
"ايه ده يابنتى ومش بتحكيلى من اول مشكلة ليه"
"ياماما بخاف عليكى تزعلى وتتعبى وانتى مش ناقصة وغير كده بتكسف اقولك لانى انا اللى كنت مصممة وانتى قولتيلى بلاش"
"مكسوفة من امك ده انتى بنتى وحبيبتى وصاحبتى واختى ومهما يحصل مش هلومك ابدا انا انصحك بس وبعدين كان لازم تحكيلى علشان ابوكى واخوكى يقفوله من الاول مش يحس انك ملطشة ولا حيطة مايلة ويسوق فيها...احكى لى بقى ايه اللى خلاكى المرة دى تقوليله خلاص كده"
"بصى ياماما الاول فيه حاجة انتى متعرفيهاش"
"خير ياحبيبتى"
"من شهر تقريبا لقيته مهموم وزعلان وكل مااسأله ماله يقوللى مشاكل فى شغله وبعد كام يوم قاللى مش معاكى 5 الاف جنيه سلف فانا استغربت وسألته ليه..وطبعا انا شايفة انه مش بيعمل اى حاجة فى الشقة كنت قلت محتاج لهم للتوضيب مثلا..فقال ان عليه وصل امانة ب 10 الاف جنيه وصاحب الوصل عايز يقدمه للنيابة وده كان تمن اجهزة للسايبر وانه اتصرف فى نص المبلغ ومش عارف يكمله...طبعا قعدت شايلة الهم وفضلت اخفف عنه لحد ماقلت له انى هدبر له الفلوس...وعملت جمعية فى الشغل وقبضتها واديتهاله ومن ساعة مااخد الفلوس مش بيجيب سيرتهم خالص"
"وانتى عبيطة علشان تعملى كده "
"ياماما انا قلت هيرجعهم وكمان قلت لازم اقف جنبه قبل ماالراجل يبلغ عنه"
"طيب وبعدين كملى ايه اللى حصل النهاردة"
"بقوله انت هتخلص توضيب الشقة امتى ؟؟يعنى بتكلم معاه لقيته وهو فى السايبر يعنى حواليه ناس كتير قعد يزعق  ويتهمنى انى انانية ومش بفكر غير فى نفسى فقلتله لو كنت انانية مكنش اتصرفت لك فى الفلوس قام قعد يشتمنى شتيمة وحشة اوى يا ماما ومش انا وبس لا فيها شتيمة ليكوا كمان"
وانفجرت فى العياط وانا كنت هموت من الغيظ...الزبالة ده بيشتمنا احنا قال رضينا بالهم والهم مرضيش بينا...اتصل بيه ابهدله ولا اخلى يوسف يتصرف بس انا عارفاة مش بتاع مشاكل هيقوللى طالما بنتنا كويسة خلاص...اقول لاحمد ؟؟
انا اقولهم هما الاتنين ويتصرفوا...وسألت اسماء تانى
"يعنى خلاص يااسماء مش عايزاه"
"ايوه ياماما طالما مش بيحترمنى خلاص"
حكيت ليوسف واحمد الحكاية كلها ويوسف قاللى انه هيروح له ويطلب منه الفلوس وكل واحد يروح لحاله
وفعلا راح له والواد انكر موضوع الشتيمة خالص وقال انه اتعصب وزعق بس وقال ان الفلوس هيدبرها ويرجعها وانه كده خسر اسماء وانه زعلان علشانها وشوية كلام من المزوق ده وانا طبعا خذفته وانا بحكى لاسماء عن مقابلة يوسف واشرف
عدت الايام وانا حاسة ان بنتى زعلانة وبتحاول تخرج من ازمتها بنفسها لان فى الاول والاخر كان اختيارها وانا طبعا مكنتش بسيبها كتير لوحدها علشان متفكرش فيه كتير وتحاول تنساه
روحنا فرح هشام وكان فرح كبير وراقى جدا واتبسطنا فيه كتير ولسه نادية هتقوللى فيه واحد بيسأل على اسماء...صرخت وقلت لها محدش يجيب لى سيرة عرسان خاااااااااااااااااالص
كل يوم بيعدى اسماء بترجع تانى عادية زى الاول من غير حزن وكآبة وده طبعا بيسعدنى وقلت الحمدلله اننا رجعنا تانى نعيش حياة طبيعية من غير منغصات الشهور اللى فاتت وزادت فرحتى لما عرفت ان مرات هشام حامل وكانت نادية فرحانة جدا انها قربت تبقى جدة
وجه يوسف فى يوم وقاللى ان فيه عريس جاى لاسماء وقلت له طيب مفيش مانع انه ييجى وخصوصا ان موضوع اشرف خلص من ييجى 5شهور...وروحت اقول لاسماء
"ماما انا مش عايزة حد ييجى"
"ليه اوعى تكونى اتعقدتى ههههه"
"لا ياماما اصل الحكاية...."
"خير"
"انتى تعرفى ان مامة اشرف ماتت من شهر ونص"
"لا معرفش وانتى عرفتى منين"
"من زمايلنا فى الشغل راحوا يعزوا رانيا وقالولى"
"طيب ايه علاقتنا احنا بالموضوع ده"
" ا...ا..اصل من شهر كده رجع اشرف يكلمنى تانى وكانت نفسيته تعبانة بعد وفاة مامته"
"وانتى ازاى تديله وش وتردى عليه"
"اصله صعب عليه ده اتغير خالص والله وبقى حد تانى ... و ...و..وعايز نرجع لبعض تانى"

هناك 33 تعليقًا:

  1. هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه مش معقوله ايمان دي.. بجد ربنا بيوريها ف عيالها واحد ورا التاني.. هي عملت ف دنياها ايه علشان كل يوم حد يشلها بعمايله.. دول مش ناويين يجوبوها لبر ابدا.. تسيبهم يولعوا احسن لها

    ردحذف
  2. توتا
    ههههههههههههههههه
    عادى ياتوتا ده الجيل الحالى

    ردحذف
  3. العيب بأهه ان جاى متأخر وفاتنى الحلقات اللى فاتت بس مش عارف ليه انتى حظك مع وﻻدك كده كل يوم تعب ووجع قلب
    بس والله برافو عليك انا حاسس انك بتحكى قصة حقيقية مية مية مش من تأليفك وﻻ حاجة
    برافو عليكى يامبدعة ومعلش مش متابع بس ان شاء الله انتى لما تخلصيها تجميعها كلها فى فايل واحد وتسبينا ننزلها ونقراها

    ردحذف
  4. ارحمننننننننننننني يا ارحم الراحمين
    ياربي نخلصو من احمد وغباه تطلعلنا اسماء بعبطها
    وانا اللى كنت فكراها العاقله
    لا بجد ايمان دي ليها الجننننننننننننننه

    ردحذف
  5. م.حجاز
    كلامك والله فرحنى جدا وولا يهمك عدم المتابعة انا عارفة انك مشغول ربنا يعينك
    وان شاءالله لما تخلص تقراها وتقولى رايك فيها ككل
    وجودك اسعدنى جدااااااا

    ردحذف
  6. شذى
    ربنا يهديهم لها ههههههههههه

    ردحذف
  7. هههههههههههههههههههههههههههههههههههههههههههههههههههههههههههه بجد لا تعليق المرة دى

    ردحذف
  8. يالهووووووووووووووووووووووى يالهوووووووووووووووووووووى البت طلعت العن من ندى ياختى ايه ده الست خلاص اجننت عيال ايه دى الى تقصف العمر

    هههههههههههههههههههههههه جامده يابرنسس

    ..................... ميرا

    ردحذف
  9. ايه
    هههههههههههههههه
    نو رد

    ردحذف
  10. ميرا
    هههههههههههههههه ربنا يصبرها عليهم

    ردحذف
  11. تلاقيه مزنوق فى 5000 جنيه تانيين هههه

    ردحذف
  12. والله دي قله ادب انا اتضايقت
    ام زياد

    ردحذف
  13. محمد
    يا عاااااااااالم هههههههه
    هنشوووووووف الحلقة الجاية

    ردحذف
  14. ام زياد
    كده وبتشتم كمان الله يسامحك
    ههههههههه بهزر يارمضان طبعا

    ردحذف
  15. ياشيخه ايه العيال دي والله انا لو امها لكنت هرستها
    انتي قولي يوميات ام مطحونه مش يومياه حماه
    ام زياد

    ردحذف
  16. ام زياد
    هو فعلا فى تفكير لتغيير اسم القصة

    ردحذف
  17. ههههههههههههههههههههه
    الست دى ياما هيجلها جلطة ياما سكتة قلبية

    ردحذف
  18. غير معرف
    او ممكن مستشفى المجانين ومن العيال دول
    هههههههههه

    ردحذف
  19. هاني ابو الخير12 مايو 2011 في 3:12 م

    جميل جداااااا يابرنسس دينا يارب من نجاح لنجاح
    بس ليه يوسف كده شايل ايده في مواقف كتير ___ بس دووول لو ولادي انا كنت علقتهم ههههههههههههههههههههههههههههههههههههههههههههه

    ردحذف
  20. هانى
    ميرسى ربنا يخليك ويكرمك يارب
    انتوا ليه ظالمين يوسف ده زوج رائع والله
    هو بس هادى شويتين هههههههههه
    ربنا يكرمك ويزرقك بالذرية الصالحة

    ردحذف
  21. امممممممممم....وبعدين بقى ؟؟؟ انا رايى ديل ال... عمره مايتعدل

    ردحذف
  22. د.هنودة
    ياريت اسماء تقتنع بكده
    اما نشوف هتعمل ايه النهاردة

    ردحذف
  23. ايوشا
    ربنا يخليكى
    وانا بجد سعيدة جدا بوجودك
    نورتييييييييييييييييييينى

    ردحذف
  24. حال اسماء حال نص البنات على فكرة ههههههههههههه
    بالذات البؤ الحونين اللى فى الاخر ده بتاع ده اتغير والله وبقا واحد تانى

    امل

    ردحذف
  25. امل
    معاكى حق والله
    اغلب البنات كده مش نصهم بس

    ردحذف
  26. يالهوي ده انا قلت انها حرمت من الموقف اللي فات..وهي دي حاجة الواحد بيتغير فيها..اللي متعود ع الشتيمة و العصبية هيتغير ازاااااااااااي didi makky

    ردحذف
  27. هههههههههههههههههههههههههههههه يا عيني عليكي يا ايمان

    ردحذف
  28. ايوة يادينا كلنا في تشوق للقادم من الأحداث ..ماما زيزي

    ردحذف
  29. لا اسماء دى هبلة رسمى

    ردحذف
  30. أزال المؤلف هذا التعليق.

    ردحذف
  31. يخرب بيت كده!! :O , انا لو من ايمان اقتلهم واستريح :D

    بس تسلم ايدك حلوه اوووي

    ردحذف
  32. يا حوستي ياخراب بيتك يا ايمااان يالي خيبتك في ولادك موردتش علي حد ابدا يياااا ختاييي

    ردحذف

قول رأيك بلاش تقرا وتقفل من سكات...ارائكم تهمنى