الجمعة، 13 مايو 2011

الحلقة 24

لما قالتلى ان اشرف عايز يرجعلها حاولت امسك نفسى...وقلت لها
"يعوز براحته ...طبعا انتى موافقتيش"
"ياماما انا فكرت وبقالى فترة اهو بكلمه وهو اتغير"
وانا على اخرى وقربت انفجر
"يعنى عايزة ترجعيله"
"ايوه ياماما انا حاولت انساه لقيت نفسى لسه بحبه"
"يخربيت الحب اللى بالشكل ده...انتى ايه معندكيش عقل تفكرى بيه انتى مش صممتى قبل كده ومنفعش ...بهدلك وشتمك واخد فلوسك...عايزة ايه تانى"
"ده اختيارى"
"اختيارك غبى ومش نافع"
"بس انا بحبه وعايزاه"
"انتى تقولى بحبه وعايزاه واخوكى جايبلى واحدة يقوللى بحبها ومش هتجوز غيرها...ده انتوا خلفة سودة ياريتنى ماشفتكم ولا خلفتكم عيشتونى فى مرار ربنا ينتقم منكم"
وحسيت انى مش طايقاهم ولا طايقة البيت لبست ونزلت روحت لنادية علشان احكيلها وافضفض معاها من خنقتى وكانت هناء مرات هشام هناك يااااااااه قد ايه مؤدبة وذوق ومقابلتها حلوة ومن ذوقها لما حست انى عايزة اقعد مع نادية استئذنت وطلعت عند مامتها وسألت نادية
"ايه هناء عاملة ايه معاكى"
"كويسة الحمدلله معاملتها معايا فى منتهى الاحترام وبتعاملنى كانى مامتها بالظبط"
قلت فى نفسى سبحانك ياربى دوام الحال محال نادية اللى عاشت طول عمرها فى تعب مع جوزها ربنا كرمها فى جواز ابنها وانا اللى طول عمرى عايشة سعيدة مع جوزى شايفة المرار مع ولادى اللهم لا اعتراض...حكيت لنادية الحكاية كلها
"بصراحة ياايمان انتى معاكى حق...وهى بتتكلم بقلبها بس من غير تفكير وده مينفعش يكون اساس جواز ناجح"
"انا مش عارفة اعمل ايه"
"طيب يوسف فين من كل ده"
"يوسف بيحب ولاده ومش بيحب يزعلهم مش مهم هما صح ولا غلط المهم ميزعلوش"
"وده ينفع"
"مينفعش وانا مش ناقصة مشاكل والواد ده مش نافع خالص"
قررت انى لازم اقف وقفة جامدة واسماء تعمل اللى تعمله تخاصمنى براحتها مش مهم
لما رجعت حكيت ليوسف وقلتله
"اوعى تقوللى معلش واختيارها والكلام الفارغ ده يعنى الولد يسمع كلامنا ويعمل لنا حساب وهى البنت عايزة تعمل اللى فى دماغها...استحالة والجوازة دى ابدا ماتتم"
وزى ماتوقعت خاصمتنى وبقت تتجاهل وجودى ومتاكلش معايا وبقت عيشتها فى اوضتها وانا محاولتش اكلمها وجمدت قلبى وحطيت عليه حجر وكل ده علشان مصلحتها لانه فعلا مينفعهاش ابداااا
بدأت احس ان يوسف مهموم شوية وكنت فاكرة علشان خاطر اسماء ولما اتكلمت معاه اكتشفت حاجة تانية خالص
"انتى مش عارفة انى هطلع معاش كمان اسبوعين"
"عارفة طبعا وكل سنة وانت طيب وناوية اعملك تورتاية علشان عيد ميلادك"
"ربنا يخليكى ليه...بس انا قصدى انى مش عارف هعمل ايه بعد المعاش...انتى والعيال هتبقوا فى الشغل و كل اصحابى بتوع القهوة كمان هيبقوا فى اشغالهم...وانا هبقى لوحدى "
"مااحنا ممكن نفكر فى حاجة تشغل بيها وقتك"
"زى ايه مثلا"
"انا مش فى دماغى حاجة معينة بس ياسيدى ولا تزعل لو حصلت انى آخد اجازة بدون مرتب علشان متبقاش لوحدك هآخدها ولا تشيل هم ابداااااا"
"ربنا يخليكى ...ومش ناوية تصالحى بنتك بقى"
"انا مش مخاصماها هى اللى بتتجنبنى وانا موضوع اشرف ده بالنسبة لى منتهى"
"ربنا يقدم اللى فيه الخير...عندى ليكى مفاجاة"
"خير "
"انا قررت لما اخد مكافاة نهاية الخدمة احجز فى موسم الحج الجاى انا وانتى"
"بجد انا مش مصدقة نفسى..ربنا يخليك ليه ويباركلى فيك ويهديلنا ولادنا يارب"
كان لسه على موسم الحج 4 شهور ولما يوسف طلع ع المعاش وخد المكافاة حجز فعلا وقال للعيال...لقيت اسماء بتقوللى وكنا يوم جمعة وبطبخ
"مبروك الحج ياماما"
"الله يبارك فيكى عقبالك"
"ولسه موافقتيش برضه على جوازى من اشرف"
"لا ومش هوافق"
"بس انا لازم اتجوزه وقبل ماتسافرى كمان"
سيبت اللى ف ايدى والتفت لها وانا برتجف
"ليه لازم...وليه قبل مااسافر"
"لانى...لانى...حامل"

هناك 13 تعليقًا:

  1. لكل اصدقائى متابعى المدونة
    اعتذر عن التأخير فى عرض الحلقة
    حيث ان السبب كان خارج عن ارادتى
    بسبب عطل فى خدمات بلوجر
    اتمنى عدم تكرار هذا العطل حتى نتمكن من التواصل

    ردحذف
  2. ولا يهمك يا قمر المهم قريناها حتى لو ف حته تانيه

    ردحذف
  3. توتا
    ربنا يخليكى ياحبيبتى
    انا كنت شايلة هم الناس المتابعين ومش عندى ع الفيس...قلت حرام يتعلقوا كده ياعينى

    ردحذف
  4. نعمممممممممممممممممممممممممممممممممممممممممممم


    امل

    ردحذف
  5. يالهووووووووووووووووووووووووووي

    ردحذف
  6. يا نهاااااااااااااااااااااااااااارها اسووووووووووووووووووووووود

    ردحذف
  7. يانهارها اسسسسسسسسسسسسسسسسسود ومنيل..ولا تكون حركة عاملينها؟؟ didi makky

    ردحذف
  8. ده بجد ولا بتشتغلها؟؟؟؟؟؟؟؟؟؟؟؟ الله يكون ف عونها بجد هيجيلها جلطة بسببهم

    ردحذف
  9. الست دى صعبت عليا اوى

    ردحذف
  10. الله يكون في عونك يا إيمان ..سلمت يداكي يا دينا ..تحياتي ..ماما زيزي

    ردحذف
  11. نهارك مش فايت يا اسماء
    و أله الست ايمان دى صعبانة عليا ايه العيال دول

    ردحذف
  12. حرام بجد اللى عيالها بيعملوا فيها و كمان حامل دا كده الست دى اخرتها تربة بجد

    ردحذف
  13. لا لا لا انا عندى والله الضغط عالى
    ايه ده فيه كده ضغطى علا زياده

    ردحذف

قول رأيك بلاش تقرا وتقفل من سكات...ارائكم تهمنى