السبت، 14 مايو 2011

الحلقة 25

لما سمعت كلمتها حسيت ان الدم هيضرب فى دماغى و100 فكرة بفكر فيها فى الثانية الواحدة...ازاى عملت كده وامتى وفين؟؟؟ طيب هتصرف ازاى؟؟؟ اضربها اموتها ؟؟؟ اموت انا من حسرتى...ابوها لما يعرف هيجراله ايه؟؟ اخوها ممكن يعمل ايه؟؟؟ لالالا مش لازم يعرفوا...مهما كانوا مضمنش رد فعلهم... مش لازم يعرفوا خالص...مش لازم ابدااااا
حسيت انى مشلولة التفكير مش عارفة انا كنت بعمل ايه ولا كنت ماسكة ايه؟؟؟مش شايفة البوتاجاز من التلاجة... خرجت من المطبخ وانا مش قادرة اتكلم ولا كلمة ومش قادرة ابص فى وشها...اعمل ايه ياربى؟؟ جريت ورايا حاولت تكلمنى...مشيت وقفلت اوضتى عليه وكتمت دموعى وبقول لنفسى فكرى فى اللى جاى مش اللى حصل.
لما جه يوسف واحمد لاحظوا عليه التغيير قلت انى تعبانة بس من شغل البيت واتصرفت كأن شئ لم يكن
وبالليل لما نزلوا دخلتلها
"انتى فى الكام"
"فى نص التانى"
"لسه عايز يتجوزك ولا طلع ندل"
"لسه بس والنبى متزعلى منى...يمكن لو كنتى وافقتى من الاول مكنش حصل حاجة وعلشان تطمنى اكتر انا معملتش حاجة حرام"
"انتى بتستهبلى...يعنى ايه اومال حلال"
"احنا اتجوزنا عرفى"
اديتها قلم على وشها"خرج بدون تفكير"
"عذر اقبح من ذنب وانا مش راضية عنك...ابقى خليه ينفعك... انا هتمملك الجوازة بس اوعى تيجى تقوليلى فى يوم عايزة اتطلق... اشربيه بقى..واوعى ابوكى واخوكى يعرفوا حاجة ليموتوكى"
مشيت وسيبتها...ولما جه يوسف
"يوسف انا فكرت فى حكاية اسماء وبقول نتمم الجوازة وخلاص"
"وايه اللى غيرك بسرعة كده"
"لا بسرعة ولا حاجة هفضل لحد امتى فارضة رايي عند وخلاص...طالما عايزاه خلاص اهو تتجوز ونفرح بيها"
"بس انتى شكلك مش فرحانة ولا حاجة"
"انا مش بحب اشرف ومكنتش اتمنى انها تتجوزه بس يمكن حبهم اقوى مننا"
"خلاص على خيرة الله...بس لما ييجى ونتفق هنعمل ايه والترتيبات وكده"
"انا عايزة اجوزها واطمن عليها قبل مانسافر..محدش ضامن الموت من الحياة نبقى سترنا البنت اللى حيلتنا...وبعدين كمان انت ناسى ان امه لسه ميتة قريب يبقى لا هنعمل فرح ولا زيطة"
"طيب خلاص بس يجيب عفش جديد ولا هتدخل على عفش امه"
"لا اكيد هيجيب جديد طبعا...هخليها تحدد معاه معاد وييجى بس ماتدققش معاه"
"حاضر"
لما حددت المعاد وجه انا مكنتش طايقاه وطبعا ولا جاب شبكة ولا رجع الفلوس اللى عليه وكل ده وانا ساكتة على مضض ومش عارفة انطق ماهو لاوى دراعى ببنتى...وبالعافية لما قال هيجيب اوضة نوم وداخلى فى سكة انا معاييش فلوس انا مزنوق انا ارزاقى وكل ده وانا مش قادرة اعترض وكل ماييجى يوسف يعترض.. ادخل له من مدخل عايزين نطمن عليها قبل مانسافر
وطبعا انا وجع القلب مش سايبنى لما احمد عرف اننا بنتمم الجوازة المنيلة دى قال ان هو كمان عايز يخطب مى... قلتله كل ده كوم ولا المطلقة بتاعة النت دى كوم تانى...لا يمكن ابدااااا
ودخلت فى دوامة فرش البيت وفى خلال اسبوعين كانت كل حاجة جاهزة وكتبنا الكتاب ووصلتها البيت وانا بتعامل قدام الناس بكل طبيعية كأى ام بتجوز بنتها الوحيدة...بس كل الناس ملاحظة عليه انى مش فرحانة وكنت بتحجج للناس انى زعلانة علشان كان نفسى اعمل لبنتى فرح كبير بس ظروف وفاة ام العريس مسمحتش انى اعمل فرح
لما وصلتها البيت مكنتش عايزة اطلع معاها... لقيتها مصممة انها عايزانى 5 دقايق بس وانزل بسرعة
طلعت معاها ويوسف واحمد بيستنونى تحت.. ولما دخلت البيت خدتنى اوضتها وقفلت انا وهى بس ولقيتها جابت مصحف
"ماما...والله العظيم انا لسه بنت ولا اتجوزت عرفى ولا حامل ولا حاجة من دى...انا حبيت اضغط عليكى علشان توافقى...والنبى ماتزعلى منى وارضى عنى"
اترمت فى حضنى وقعدت تعيط وانا بقيت مش عارفة افرح ولا اشتمها ولا امشى واسيبها...لقيت نفسى باخدها فى حضنى وبعيط معاها
وبعدين سألتها
"ازاى قدرتى تعملى فيه كده... وتفكيرك ازاى هداكى لفكرة شيطانية كده... انتى كان ممكن تشلينى فيها "
"سامحينى ياماما...ارجوكى متغضبيش عليه"
"انا متأكدة انها كانت فكرة الشيطان اللى انتى اتجوزتيه ده"
لقيتها بتبوس ايدى وبتعيط... قلبى وجعنى على حال بنتى العروسة الحزينة وعلى الحياة اللى داخلة عليها... اللى متطمنش ابدااااا.

هناك 33 تعليقًا:

  1. بكرههاااااااااااااااااااااااااااااااااااا

    ردحذف
  2. مش انا قلتلك هتطلع تمثليه هههههههههههه

    اولا انا ليا تحفظاااات على الحلقه كتيييييييييييير اوى بس بعدين عشان الاحداث زى ماقلتى هههههههههه

    تسلم ايدك .............ميرا

    ردحذف
  3. توتا
    اسماء وندى لحد دلوقتى كارهاهم صح هههههههه
    اوعى تكرهه ايمان

    ردحذف
  4. ميرا
    هههههههههه برافو عليكى
    ومكنتش قادرة اقولك امبارح
    خلاص بعد المسلسل نتناقش ان شاءالله
    بس اوعى تنسى الملاحظات بتاعتك

    ردحذف
  5. هى ازاى اتعاملت مع الكدبه دى اكنها كدبه عادية وعدت؟؟؟؟؟؟؟؟؟؟؟؟؟؟ موقفها مستفز الحلقه دى

    ردحذف
  6. داليا
    حسب توقعاتى بس مش توقعت انها هتوصل لحد الجواز

    ردحذف
  7. ايه
    لما اعترفت لها كان خلاص الجواز تم
    وهتعمل ايه؟؟فضايح ولا تقاطع بنتها الوحيدة
    قلب الام غلبها

    ردحذف
  8. داليا
    توقعك صح...ومكنش فيه حل تانى غير الجواز

    ردحذف
  9. توقعت كده والله بس بصراحة حركة وحشة اوى من اسماء نزلتها من نظرى اصلا

    امل

    ردحذف
  10. امل
    طبعا حركة وحشة بس كانت الوسيلة الوحيدة للضغط لما لقت القمصة والخصام مش جايبين نتيجة

    ردحذف
  11. حركة شيطانية مقتبسة من فيلم البحث عن فضيحة - لواحد صاحبى ما تعرفهوش

    ردحذف
  12. ابو تميم
    حركة شيطانية طبعا
    ههههههههههه بس هو فى الفيلم قالوا حمل
    والله مافاكرة

    ردحذف
  13. دمى محروووووووووووق يخربيت دول عيال

    ردحذف
  14. لالالالالالا
    رده فعل ايمان للجواز والحمل طبيعيه بس رده فعلها للكدبه مش طبيعيه خالص يا دينا لانها كذبه ذلت فيها اهلها وخلت واحد ما يسواش يحط اهلها تحت ضرسه
    لازم في عقاب حتي لو بنتها الوحيد لان اللى عملته ده مش كدب ده ذل

    ردحذف
  15. هاني ابو الخير14 مايو 2011 في 1:47 م

    البت دي بتستهبل وعايزه ضرب الجزمه عشان ذلت أمها وخالت واحد معفن يتحكم فيهم ويفرض شروطه ____ بس انا طلع عندي حق أنه حوار :D:D:D:D:D:DD

    ردحذف
  16. ايه ده ايه ده ايه ده
    انا مذهوله ايه العيال دي
    ام زياااد

    ردحذف
  17. ايمان
    معلش كل يوم العيال حارقين دمنا
    ربنا يهديهم

    ردحذف
  18. شذى
    عاطفة الامومة غلبت ع العقاب وخصوصا انها شايفة بنتها ندمانة
    ومتنسيش انها مش قادرة تاخد اى رد فعل لان محدش يعرف السر اللى بينهم ده خااااااااالص

    ردحذف
  19. ام زياد
    عيال موجود منهم كتير
    ربنا مايحكم علينا بعيال زيهم

    ردحذف
  20. والنبي انا لو مكانها اجرها من شعرها وامرمطها ايه البت دي لا يا دينا انا مش موافقه البت دي الواد اللي اتجوزنه دا هايطلع كل دا على عينها وهس اللي تستاهل بقى

    ايناس

    ردحذف
  21. ايناس
    ههههههههه ماهو مينفعش اللى داريته تفضحه
    ايمان اتورطت غصب عنها
    واكيد طبعا الولد مش كويس وبدأ فى فرض سيطرته عليها

    ردحذف
  22. لا يا دودو ما فهمتنيش انا قصدي رد فعل بينها وبين بنتها يعني ما ترجعش تكلمها زي الاول تقاطعها مده كده كنوع من انواع العقاب مش يعدي الموضوع بالساهل حتي يحس سي اشرف ده اللى مش اسم على مسمي خالص ان في حاجة حصلت بسبب الحركه دي
    فهماني؟؟؟

    ردحذف
  23. شذى
    ايوه فاهمة قصدك بس ايمان باحساسها وخبرتها عرفت ان بنتها رمت نفسها فى نار... علشان كده اشفقت عليها علشان كده مخدتش موقف ضدها
    وبرضه فرحت ان بنتها حافظت على نفسها

    ردحذف
  24. لا يا دينا
    :(
    قلبتيها هندى على تركى على سورى
    سمك لبن تمر هندى

    ردحذف
  25. خالد
    ؟؟؟؟؟؟؟؟؟؟؟؟
    ؟؟؟؟؟؟؟؟؟؟؟؟

    ردحذف
  26. والنبى ايمان دى صعبت عليا

    ردحذف
  27. اسيرة الاحزان
    ايمان غلبانة باللى صاب ولادها

    ردحذف
  28. الله يخرب بيت ده راجل..لا ده مش راجل ابدا...وهي كمان معقول عبيطة للدرجة دي؟ وفين التربية؟؟؟ didi makky

    ردحذف
  29. الله يعينها على كل الأحداث دي ..حتى الأحداث الحلوة بتجيلها بطعم المرارة ..ماما زيزي

    ردحذف
  30. لا البت اسماء دى مجنونة رسمى تشرب باه سى اشرف و عمايله

    ردحذف
  31. بصراحه الله يعين الام دي فعلا انا بقرأ من خرج الموضو وحسه ني حتخنق من لضغوط لي على لام الغلبانه دي

    ردحذف
  32. فعلا فكره شيطانيه من شيطان والحياة معاه ما تطمنش ......... انا استغربت فعلا اذاي قدرت تقول كده على نفسها ما خافتش انه امها تموت فيها ..... ايه ده للدرجادي الحب اعمى ....... بس يرب يفضل اعمى وما يفتحش على واقع مؤلم

    ردحذف

قول رأيك بلاش تقرا وتقفل من سكات...ارائكم تهمنى