السبت، 14 مايو 2011

الحلقة 26

نزلت من عند اسماء وانا فرحانة ان بنتى سليمة ورفعت راسنا مش جابت لنا العار زى ماكنت فاكرة... بس قلبى حزين عليها البنت زى ماتكون مش فى وعيها والزفت اللى اتجوزته هو اللى بيمشيها...ازاى مسلمة له عقلها كده وماشية وراه... ياعينى عليكى يا بنتى ربنا يسترها معاكى ويطلع ظنونى مش فى محلها
نزلت ليوسف واحمد وروحنا
لما روحنا لها فى السبوع انا ونادية وهناء لقيناها مبسوطة وفرحانة حمدت ربنا وقلت يارب يسعدها وتبقى كويسة... نزلنا واحنا نازلين من عندها لقيت واحدة بتسلم على نادية وهناء وعرفونى عليها انها صاحبتهم من النادى وسألتهم كانوا عند مين فى العمارة اللى هى ساكنة فيها... فحكت لها نادية ان بنتى العروسة الجديدة فى العمارة... لقيت الست وشها اتغير وقالت لنادية
"انتوا ناسبتوا اشرف"
"اه.. ماله؟؟"
بارتباك" لا لا مفيش حاجة ربنا يهنيها يارب... وابقى اسالى يانادية واشوفك يوم الخميس فى النادى"
الست قفلت فى الكلام بسرعة حسيت ان فيه حاجة تعرفها ومرضيتش تقولها...واحنا فى الطريق قلت لنادية
"بقولك ايه يانادية...ملاحظتيش حاجة على صاحبتك لما جبنا سيرة اشرف"
"اه حسيت انها كانت هتقول حاجة وسكتت"
"طيب لما تشوفيها حاولى تعرفى هى كانت هتقول ايه"
"اكيد من غير ماتقولى"
طبعا كل يوم اسماء بتكلمنى وكل مااسألها انتى عاملة ايه تقولى كويسة جدا..مبسوطة اوى...الحاجات دى
وبدأ الحماس اللى فى كلامها عن السعادة يقل لما رجعت شغلها تانى ولما اسالها عن حالها تقوللى ارهاق من الشغل
كل ده وانا فى انتظار مقابلة نادية وصاحبتها اللى اتعطلت ومتقابلوش لاكتر من خميس لكذا سبب
وفى يوم وقبل ماتكمل شهر جواز لقيتها بتكلمنى فى التليفون وبتقوللى
"ماما انا عايزة اجى اقعد عندك كام يوم"
"انتى متخانقة مع جوزك"
"لا خالص انا بس تعبت من مسئولية البيت مع الشغل فعايزة ارتاح شوية من المسئولية"
"انتى تيجى اهلا وسهلا وده بيتك... بس مفيش عروسة تسيب جوزها وهى لسه متجوزة جديد"
"خلاص ياماما يعنى مش عايزانى آجى"
"لا تعالى بس متكونيش غضبانة"
"غضبانة ايه بس لا طبعا واشرف هييجى معايا"
"ييجى معاكى فين؟؟؟"
"ييجى عندكوا...خلاص ماشى ياماما سلاااام"
ايه التدبيسة دى هو انا طايقاه فى الكام ساعة اللى بشوفه فيها كل فترة لما ييجى يقعد عندى وتانى يوم لقيتها جاية هى والبارد اللى قعد كأنه بيت ابوه...وقاعد ياكل ويشرب وينام فى بيتى ونفسى اطرده... ويوسف كمان بقى مش طايق بروده لحد ماقلت لاسماء
"اسماء خدى جوزك وروحى بيتك"
"ليه ياماما...انتى مش عايزانى"
"يابنتى انا مش عارفة اقعد براحتى فى بيتى وراجل غريب طويل عريض معايا فى البيت"
"يعنى نمشى"
"ايوه قوليله اى حاجة بس مينفعش ييجى يقعد كده"
وفعلا فى نفس اليوم روحت بيتها ومفيش 3 ايام ورجعت تانى وقالت مش هييجى غير ع الغدا بس...استحملت وانا هموت من الغيظ... وقعدت البنت عندى يوم ورا يوم واسبوع ورا اسبوع بحجة الشغل وكانت تروح يوم الاجازة بس
وانا كل مااسأل نادية عن صاحبتها تقوللى ماقبلتهاش..مروحتش النادى...لما روحت هى مجيتش
واقترحت على اسماء تسيب الشغل وتستقر علشان تستقر فى بيتها لقيتها رافضة خالص...وجالى شك انه يكون هو اللى بيخليها تشتغل علشان الفلوس... ليه لا ماهو مش بيصرف عليها حاجة... واتجوز جوازة ببلاش...قلت لها...طيب لو اديتك المرتب اللى بتاخديه تقعدى من الشغل.. لقيتها مترددة... قلتلها فكرى... وفعلا لما جه قعدوا مع بعض شوية ويومها بالليل لقيتها بتقوللى
"ماما انا هسيب الشغل زى مااتفقنا"
"والله احسن...بس انا مش هقدر اديكى المرتب لانى اخدت اجازة بدون مرتب ودخلنا كله بقى معاش ابوكى بس"
وسيبتها ...وطبعا الفكرة ولا كانها اتطرحت اصلا
وجه وقت الحج واتحدد معاد السفر وقبل مانسافر باسبوع... اسماء تعبت وروحنا للدكتور وقالنا انها حامل
وكانت تعبانة فعلا  وكانت تقوم برضه تروح شغلها علشان متاخدش اجازة بالخصم... وكل مااسألها جوزك عامل ايه معاكى... تقوللى كويس وانا متأكدة انها بتكدب ومش عايزة تقول... يوم السفر قلت لها خدى اجازة وارتاحى وانا هسيب لك مصروف مع اخوكى واقعدى متروحيش.. واكدت على احمد ياخد باله من اخته وميسبيهاش ابدا لما تحتاجله... ووصيتهم على بعض ووصيت نادية عليهم لو جرالنا حاجة تعتبرهم زى هشام
وسافرنا  لاحلى مكان فى الدنيا ... ورميت كل حاجة ورايا ومفكرتش غير بس انى عايزة اوصل للكعبة فى اسرع وقت حتى لو هموت هناك .

هناك 16 تعليقًا:

  1. مش كفايه البارح عياط كمان النهارده عياط.. وااااااااااااااء

    الست ايمان دي واجعالي قلبي اوي واسماء تستاهل رغم اني بقولها من ورا قلبي

    ردحذف
  2. اييييييييييييييه يابرنسس الهم ده هههههههههههه هى اسماء هتفضل مجوزه اللطخ ده علطول هههههههههههههه

    ياخوفى ايمان ترجع تلاقى احمد اجوز هههههههههههههههههههههههههههههه

    .................ميرا

    ردحذف
  3. توتا
    انا كمان موجوعة علشان اسماء اووووووووى

    ردحذف
  4. ميرا
    مفيش حاجة مستبعدة على العيال دى

    ردحذف
  5. الواد اشرف ده حارق دمى اوى على فكرة .. ربنا ياخده فى الحلقة الجاية يا رب لما تدعى عليه عند الكعبة

    ردحذف
  6. تامر
    هههههههههههههههههههههه
    انا ميتة من الضحك على كومنتك
    واكيد وهى هناك هتتدعى طبعااااااااااا

    ردحذف
  7. ياتري في ايه انا متشوقه قوي ررنا يسترها ع كل بنات المسلمين
    ام زيااااااد

    ردحذف
  8. ام زياد
    ربنا يسترررررررررر يارب
    تصدقى وانا عايزة اكتبهم كلهم علشان ارتاح

    ردحذف
  9. ياريت تكتبيهم بسرعة الله يخليكى احسن انا لو معرفتش النهاية قبل ما امشى ممكن يجرالى حاجة فيها

    وبجد اسماء صعبانة عليا والواطى ده شكله مشغلها وممرمطها عشان الفلوس وتلاقيه بيلعب قمار ولا بيشرب ولا حاجة ومضيع فلوسها كمان عشان كده كانوا بياكلوا عند ايمان هههههههههههههههههههههه انا مالى بقيت خيالى واسع كده ليه

    امل

    ردحذف
  10. امل
    هتلحقيهم ان شاء الله
    وانا هحاول اكتبهم علشان انا مكتئبة جدااا من اللى بيحصل فى اسماء

    ردحذف
  11. حاسس ان نادية عرفت مصيبة عن اشرف الكبنش ده ومش عايزه تقول
    ربنا يستر
    لان البت اسماء دى لسه صغيرة ومش فاهمه البشر
    واكيد لما خبرتها بالناس تبقى اكبر من كده - هتفهم اشرف على حقيقته وهتندم على اختيارها
    ربنا يستر بس والمصيبة اللى هتقولها نادية تبقى مصيبة صفيرة عشان البت الغلبانة اسماء

    ردحذف
  12. ده حيذلها ذل وهي حتحط لسانها جوا بوقها وتسكت تستاهل كل اللى يحصلها
    اللى يعمل كده في اهله عشان حد غريب يستاهل بجد
    وروعه ومبدعه كالعاده بقيت افتح المدونه قبل ما اشوف الشغل عاجبك كده
    هههههههههههههههههههههه

    ردحذف
  13. ابو تميم
    وصفك لاسماء صح لانها فعلا غلبانة
    وربنا يسترررررررررر من اللى جاى

    ردحذف
  14. شذى
    اسماء مغيبة وهو ممشيها
    وربنا يخليكى يارب ع الكلام الحلو ده
    بس مينفعش كده لازم تشوفى شغلك
    بعد المدونة طبعا هههههههههه

    ردحذف
  15. مسلم ايديكي يا دينا ..ماشاء الله القصة محبوكة تماماً ومسترسلة .تسلم ايديكي ..ماما زيزي

    ردحذف
  16. قلبى وجعنى على اسماء بس ارجع و اقول هى اللى عملت فى نفسها كده

    ردحذف

قول رأيك بلاش تقرا وتقفل من سكات...ارائكم تهمنى