الأحد، 15 مايو 2011

الحلقة 27

كان كل دعايا لولادى ان ربنا يسعدهم فى حياتهم وان ربنا يرجع لكل واحد فيهم عقله ويعرف الحق من الباطل
وف يوم وانا بصلى فى الحرم وبدعى لولادى بنفس الدعوة واول ما خلصت صلاة لقيت واحدة جنبى طبطبت عليه وقالتلى
"اللى جاى صعب وبعده الفرج... ان مع العسر يسرا ان مع العسر يسرا"
واختفت فى الزحمة قبل ماارد عليها وكلامها خوفنى ... لسه ايه اصعب من اللى شايفينه الايام اللى فاتت دى ...بس قالت بعده الفرج
ياااااااااارب فرج كربنا
ولما حكيت ليوسف عن الموقف ده قاللى انها اكيد سمعتنى وانا بدعى وعرفت انى متضايقة فقالت بعد العسر يسرا عادى يعنى
ادينا الحج الحمدلله ورجعنا للبيت ... مفيش جديد اسماء موجودة وقعدت من الشغل  وجوزها بييجى  ويروح بالليل واحمد زى ماهو بين الشغل واصحابه وبرضه مى ...بس احلى حاجة ان هناء ولدت وجابت جنى بنوتة امورة وجميلة ونادية فرحانة بحفيدتها وكانت لسه يدوب البنت مكملة 10 ايام
ويوم مارجعت قعدت مع اسماء وقلتلها
"انتى مرتاحة يااسماء"
"الحمدلله"
"بس شكل حياتك كده مش طبيعية.. فيه ايه؟؟"
"مفيش ياماما.. انا بس تعبانة من الحمل مش اكتر"
"وقبل الحمل ماانتى برضه كنتى قاعدة هنا؟"
"مفيش بس بتوحشينى وببقى عايزة اقعد معاكى"
"يا حبيبتى لو فيه حاجة احكيلى ... هو انتى عندك حد تانى تحكيله"
"ياماما مفيش حاجة"
ورجعنا تانى لنفس الحياة غير الطبيعية ايام عندى ويوم ولا اتنين فى بيتها
وفى يوم كنت لوحدى فى البيت واسماء فى بيتها ويوسف بيجيب حاجات للبيت واحمد فى شغله وف عز الضهر لقيت موبايلى بيرن
"البسى وانزلى بسرعة ياايمان انا جيالك فى الطريق"
"مالك يانادية فيه ايه؟؟"
لقيتها بتزعق
"البسى ف دقيقة علشان نروح نجيب بنتك"
صرخت  وانا هموت من الرعب ودموعى بتسبقنى
"بنتى مالها؟؟ جرالها ايه"
"متخافيش...انا صاحبتى جارة اسماء اتصلت بيه وقالتلى ان اشرف مبهدل اسماء وفيه صوت صراخ ومحدش قادر يتدخل... اخلصى بسرعة بقى وبعدين نتكلم"
قفلت معاها وانا هموت لتكون بنتى حصل لها حاجة وهى بتخبى عليه.. ولا لما اوصل يكون المجرم ده عملها حاجة... يارب استرها معاكى يابنتى وينجيكى يارب
ف دقيقة كنت لابسة وواقفة فى الشارع لنادية ودقايق كنا على باب اسماء فضلت اخبط واصرخ واقوله افتح قبل مااجيب لك بوليس النجدة... ولقيت اسماء فتحت لى الباب ووشها ازرق ... ابن ال .... ضارب البنت ومخرشمها... مقدرتش امسك نفسى وهجمت عليه اضربه اخنقه اعمل اى حاجة افش غللى ... بس من قلة ادبه شتمنى وشتم بنتى والجيران بتتفرج علينا وطردنا بره الشقة
انا حمدت ربنا ان بنتى فى حضنى واخدتنا نادية ووصلتنا للبيت
وقلت لنفسى مستحيل ترجعله تانى ولازم يطلقها... يطلقها ... اللى انا كنت مش مصدقاه انه حصل مع مى اللى بيحبها احمد اهو حصل مع بنتى ...ياترى انا السبب  وربنا بيعاقبنى ببنتى علشان رفضت جوازهم مش يمكن البنت كويسة ؟؟
ولما طلعنا البيت كان لسه محدش جه لا يوسف ولا احمد
لقيت نادية بتقول لاسماء
"متهيألى يااسماء مينفعش ترجعيله تانى"
"لالالا خلاص يا طنط انا بكرهه"
وقعدت تعيط من الوجع... ربنا ينتقم منه ده مكسر عضم البت خالص ومشوه وشها من الضرب ...ياحبيبتى يابنتى اخدتها فى حضنى وقعدنا نعيط مع بعض
لقيت نادية بتقوللى
"على فكرة ياايمان صاحبتى قابلتنى فى اول اسبوع زى ماقالت.. ولما قعدت اسألها عن اشرف قالتلى عنه كلام مقدرتش اقولهولك وقتها... قالتلى ان سمعته وحشة ولسانه طويل وكل الجيران بيتجنبوه لانه غاوى مشاكل وكان معشم واحدة جارتهم بالجواز وكل الجيران كانوا عارفين انه هيتجوزها لكنهم اتفاجئوا بجوازه من اسماء"
"وليه مقولتليش"
"يعنى كنت اخرب على البنت وهى عايشة وساكتة"
التفتت لاسماء
"ايه اللى حصل النهاردة علشان يعمل فيكى كده ... واول مرة يضربك ولا كان بيضربك ومش بتقوللى"
"انا هحكيلك ياماما على كل حاجة بالتفصيل"

هناك 22 تعليقًا:

  1. هاني ابو الخير15 مايو 2011 في 10:40 م

    تستااااااااااااااااهل

    ردحذف
  2. لالالالالالالالالالالالالالالالالالالالالالالالا ما اتفقناش على كده خااااااااااااالص.. انا عاوزه اعرف التفاصيل وااااااااااااء


    دي آخرة الي مش بيسمع كلام اهله وبيعمل الي ف دماغه..

    ردحذف
  3. هانى
    الله يسامحك
    علشان انا زعلانة اوى علشانها

    ردحذف
  4. توتا
    بكرة ان شاء الله التفاصيل
    وجملتك دى المغزى من الجوازة

    ردحذف
  5. أنا ضغطى عالى و الحيوان ده بيطلعه فى السما على فكره

    ردحذف
  6. خالد
    سلاااااااااااااامتك

    ردحذف
  7. انا اكتئبت وبجد زعلانة عشانها اوى

    امل

    ردحذف
  8. امل
    وانا كمان زعلانة والله

    ردحذف
  9. الواااااااااااااااااااااطى الى ينشك فى قلبه

    بس عشان تحرم ماتسمعش كلام امهااا

    وشكلها كده هتجوز احمد لمى

    ردحذف
  10. الواد ده دزمه وابن دزمه

    ردحذف
  11. غير معرف
    طبعا لازم كل بنت تتعظ
    وبالنسبة لاحمد هنشوووووووف

    ردحذف
  12. مصطفى
    معاك حق بس زود عليهم 59 دزمة ههههههههه

    ردحذف
  13. هو كل يوم اكتئاب اكتئاب مفيش فرح واااااااااااااااااء
    حرااااااااااااااام كده :(((((((((

    شيماء مصطفى

    ردحذف
  14. شيماء
    بعد العسر يسرا
    والحدق يفهم هههههههه

    ردحذف
  15. وادي جزات اللي ميسمعش كلمه ماما تقولهاههههههههههههههه صعبانه عليا اوي اسماء صحيح مرايه الحب متكسره ههههههههههههههه
    Eman Osama

    ردحذف
  16. ايمان
    فعلا والله اللى مايسمع كلام والديه
    ياما يجرى عليه

    ردحذف
  17. دندونتي ..حلقة في منتهى الإثارة ..الله ينور ..ماما زيزي

    ردحذف
  18. بصراحة تستاهل كل اللى حصلها

    ردحذف
  19. طب والله كنت حاسه ان ناديه قابلت صاحبتها دي في النادي بس ما ردتش تقول

    تسلم ايدك :)

    ردحذف
  20. تستاهل عشان تبقي تعاند امها اوي

    ردحذف
  21. القصة جميلة عاوزين نعرف النهاية و ربنا يستر على ايمان من كتر الهم

    ردحذف
  22. القصة جميلة عاوزين نعرف النهاية و ربنا يستر على ايمان من كتر الهم

    ردحذف

قول رأيك بلاش تقرا وتقفل من سكات...ارائكم تهمنى