الأربعاء، 18 مايو 2011

الحلقة 30 والاخيرة

واحنا راجعين من الخطوبة لقينا تليفون جه لنادية وصرخت
"ابنى ... مستشفى ايه... "
اتخضينا وسألناها فى ايه
"هشام عمل حادثة"
طبعا فرحتنا اتقلبت رعب واحنا مش عارفين ايه اللى حصل وروحنا على المستشفى اللى فيها هشام وسألنا عنهم عرفنا ان هشام ومراته فى العمليات وجنى سلموهالنا وقالوا لنا انها خرجت من الحادثة سليمة بدون اى خدش وعملوا الفحوصات اللازمة وحالتها مطمئنة جدا... وحالة هناء مرات هشام خطيرة لان اصابتها كلها فى المخ ... اما حالة هشام فهى مجموعة كسور وبيتركب له شرائح ومسامير فى ايده ورجله ... طبعا اهل هناء وصلوا وكانوا فى حالة لايرثى لها من خوفهم على بنتهم لانها الوحيدة الموجودة هنا بعد سفر اخواتها كل فى بلد وهى اللى كانت بتراعى مامتها المريضة ... خرجت هناء من العمليات والدكتور قالنا ان حالتها غير مطمئنة ... وبعدها خرج هشام والدكتور قال ان حالته هتاخد وقت وبعدين يتحسن ويبقى طبيعى ... كان الفجر بيؤذن وجنى كانت بتعيط كتير وكانت عاملة ازعاج فى المستشفى فقلت لاسماء واحمد ويوسف يروحوا وياخدوا البنت معاهم واسماء تراعيها وانا هفضل مع نادية.
تانى يوم كان هشام فاق وحكى وهو تعبان
"انا قلت اعملكوا مفاجأة واجى احضر معاكوا خطوبة احمد علشان كده مقلتش لحد واحنا راجعين فجأة لقيت العربية بتتقلب ومعرفش حصل ايه بعدها... جنى وهناء حصلهم ايه؟؟"
طمناه على جنى وقلناله انها فى البيت وهنجيبهاله يطمن عليها وقلناله ان هناء كمان كويسة وفاقت بس متقدرش تقوم من السرير مقدرناش نقوله انها دخلت غيبوبة ومحدش عارف هتفوق منها امتى؟؟
كنا كل كام يوم بنجيب له جنى ونقوله ان هناء بتتحسن والعكس صحيح... بعد 10 ايام فى الغيبوبة توفت هناء ومقدرناش نخبى عليه وكانت صدمة كبيرة بالنسبة له وخصوصا انه صاحب اقتراح الرجوع من اسكندرية وهى مكنتش موافقة ترجع بالليل.
اهل هناء كانت صدمتهم اكبر طبعا ومامتها حالتها الصحية ازدادت سوء واحنا كلنا حزننا على اللى راحت فى عز شبابها وملحقتش تفرح ببنتها اللى عندها يدوب كام شهر.
لماخرج هشام من المستشفى وانا استقريت فى البيت الى حد ما لقيت ان اسماء اتغيرت خالص وبقت منشرحة ومبسوطة رغم مود الحزن اللى احنا فيه والاكتئاب اللى كانت فيه ده اختفى تماما واتاكدت ان جنى هى سبب تحول اسماء بالسرعة دى للاحسن ... وكان ربنا بعت جنى لاسماء فى الوقت ده علشان تنسى الايام السودة اللى فاتت وكان كل يومها عبارة عن جنى والاهتمام بيها
وفى يوم لقينا مى بتتصل وبتقول ان قاتل اشرف اتمسك وكده يبقى احمد بره الموضوع تماما ولما سألناها عن القاتل قالت لنا
"البصمة الغريبة كانت الخيط اللى المباحث مشيت وراها ... وبالتحريات عرفوا ان اشرف كانت سمعته مش مظبوطة وان البنت جارتهم اللى كان واعدها بالجواز قبل مايتجوز اسماء كان بيهددها بصورمركبها للبنت مع ناس  كتير ويبتزها حتى بعد جوازه وكانت خايفة منه وبتسمع كلامه وكان دايما بيخليها تروح له البيت واسماء مش هناك وقبل القتل بكام يوم البنت اعترفت لامها باللى بيحصل والام معرفتش تتصرف وحكت لجوزها اللى نزل بعد الخناقة علشان ياخد منه الصور وطبعا اشرف كان لسانه طويل ومستفز فاتخانقوا وابو البنت هو اللى قتله وهو كان صاحب البصمة الغريبة"
الحمدلله يارب ان براءة ابنى ظهرت وقلت له يبدأ يجهز الشقة هو ومى بس هنستنى شوية على الجواز علشان وفاة هناء
عدت الشهور وبدأ هشام يرجع تانى زى الاول بيتحرك وبينزل ورجع شغله وجت نادية وقالت انها تقدر دلوقتى تاخد جنى... وكانت مشكلة كبيرة لما فعلا اخدوا البنت ... رجعت اسماء تانى لحالة الاكتئاب اللى كانت عندها وكنت اسمعها طول الليل تعيط وهى اخدة هدوم جنى فى حضنها مع ان نادية كانت مش اخدة البنت مننا اوى بس مش عارفة وحاولت كتير مع اسماء انى اقنعها ان البنت كان مسيرها ترجع لابوها ومفيش فايدة
احمد ومى جهزوا كل حاجة واستئذنت هشام انى اعمل فرح لاحمد ووافق ووحددنا معاد الفرح وكان مر على الحادثة حوالى 7 شهور
قبل الفرح باسبوعين جت نادية وقالتلى انها عايزة تجوز هشام لاسماء علشان كل واحد فيهم محتاج للتانى... وافتكرت لما طلبت منى اسماء المرة الى فاتت ...ياااااااه لو كانوا اتجوزوا وقتها مكنش حصلت فى حياتنا كل الاحداث دى... قلتلها هاخد رأى يوسف واسماء وطبعا اول ماقلتلهم يوسف فرح علشان بنتنا ربنا عوضها بانسان كويس واسماء فرحت علشان جنى راجعة تانى لحضنها
ويوم فرح احمد ومى جابت نادية الدبل لهشام واسماء وبعدها بشهر اتجوزوا.
النهااااااااااااااااااااااااااااية

هناك 48 تعليقًا:

  1. اخيييييييييييرا انتهت بسعاده الحمدلله
    سبحان الله مقدر الاقدار

    شيماء مصطفى

    ردحذف
  2. شيماء
    هههههههههه الحمدلله

    ردحذف
  3. انا قلت البت هتموووت

    النهايه حلوووه يابرنسس ومبرووووووووووك تسلم ايدك بس حاسه اننا اكروتنا هههههههههههههه

    .............. ميرا

    ردحذف
  4. هههههههههههههههههههه

    اااااااالله عليكي
    الشعب يريد الجزء التاني للقصة
    بجد مليون شكر ليكي علي المتعة الي منحتهالنا بالقصة الجميلة دي وحرقة الاعصاب من الفضول الي جننا ده

    تسلم ايدك يا برينسس ومن نجاااااح لنجااااح يااااااا رب

    فرج عبد الرحمن

    ردحذف
  5. ميرا
    ربنا يخليكى يارب
    وانتى توقعك كان صح

    ردحذف
  6. فرج
    ربنا يخليك يااااااااااااااارب
    وافرح بيك انت ودندن
    انت تعرف انى بفكر فعلا فى جزء تانى
    بس هشوف رأى الجمهور الاول

    ردحذف
  7. الحمد لله نهاية جميلة وسعيدة ....كنت هزعل اوى لو كانت نهاية على طريقة فيلم 45 يوم فاكراها؟!!
    على العموم مبروك على اتمام القصة بنجاح وان شاء الله تكون بداية لقصص تانية ويارب نشوفها فى التليفزيون قريبا ان شاء الله

    ردحذف
  8. كريم
    الله يبارك فيك يارب
    وانا بفضل النهايات السعيدة على فكرة
    وان كنت قد اضطر فى بعض الاحيان الى غيرها
    ويااااااااااااااااارب نشوفها كلنا ونفرح بيها مع بعض لان تشجيعكم هو سبب نجاح المدونة

    ردحذف
  9. هي نهاايه سعيده بس حسيتها سريعه اوي وزي توقعات سكينه

    الله يرحمك يا هناء..‏ عاوزه اطبق ف زمارة اسماء علشان لو كانت وافقت من البدايه ع الراجل ما كانش حصل كل ده..

    الف مبروك يا دينا وعقبال ما نشوفها ع التلفزيون يارب

    ردحذف
  10. توتا
    هى فعلا كما توقعت سكيننة ههههههه
    ماهى لو اسماء كانت وافقت مكنش بقى فيه احداث درامية
    الله يبارك فيكى ياتوتا
    وقولوا يااااااااااارب

    ردحذف
  11. هههههههههههههههههههههههههههه انتو بتجيبوا فى سيرتى

    لا لا كده هنهز النجفه هههههههههههههههههههههههههه

    .............. ميرا

    ردحذف
  12. توقعت النهايه دي يا دودو
    القصه كلها حلوة اوي بس النهايه متوقعه جدا
    بس بجد مبدعه

    ردحذف
  13. تسلم ايدك ياقمر انا اتمتعت جدا بيها والحمد لله انى ماقعدتش على اعصابى 30 يوم
    لانى قريتها كلها فى 5 ايام بس الحمد لله
    ربنا يوفقك ياقمر ونتمنى المزيد

    ردحذف
  14. هاني ابوالخير19 مايو 2011 في 2:14 م

    بجد تسلم ايدك يابرنسس دينااااااااااااااااااااا
    بجد جميييييله أوي القصه ويارب من نجاح لنجاح يابرنسس

    ردحذف
  15. ميرا
    ههههههههه بلاش النجفة والنبى
    الدور الدور الدور الدور

    ردحذف
  16. شذى
    فعلا النهاية حسيت انكوا توقعتوها
    بس انا حبيت تكون النهاية سعيدة علشان الغم اللى عاشته ايمان

    ردحذف
  17. د.سارة
    كلامك ده وسام على صدرى
    وان شاءالله كل الكتابات الجاية تعجبك

    ردحذف
  18. هانى
    ربنا يخليك ياااااااااارب
    وميرسى للمتابعة
    نورتوووووونى جميعا

    ردحذف
  19. يااااااااااااااااااااه فعلا علي رأي المثل اجري يا ان ادم جري الوحوش ... ان كبر ابنك خاويه ههههههههههههههه تسلم ايدك يا كاتبتنا الموهوبه

    اسماء

    ردحذف
  20. ههههههههههههههههههههههه
    تسلميلى يا سمسمة

    ردحذف
  21. الحمد لله خلصت بعد الاحدااااث الكتيرة دى ...على فكرة انا سيبت مزاكرتى ومشروعى وقاعدة اقراء 30 حلقة متتالية ودى عمرها ما حصلت فى حياااتى خاااالص ...بس بجد ربنا يوفقك ياااارب ودايما للاحس ..بس ياااريت تقلقللى مود الحزن شوية ...قصة اكتر من راااائعة

    ردحذف
  22. القصة تحفةةةةةةةةةةةةةةةةةةةةةةةةةةةةةة

    ردحذف
  23. eng_20107
    انا اسفة انى مشفتش ردك بسرعة
    بجد انا سعيدة بكلامك ده بس يارب مكنش عطلتك عن اللى وراكى
    اتمنى تتابعينى دايما
    نورتييييييييينى

    ردحذف
  24. بيبو
    ميييييييييييييييرسى
    اتمنى دوام المتابعة

    ردحذف
  25. حلوة اووووووووووووووووووووووووووووووووووى

    ردحذف
  26. :)
    بس انا كنت مقتنع ان احمد هو اللي قتله
    لأني كنت هعمل كده فعلا لولا انهم كانوا مسافرين برا مصر

    ردحذف
  27. بس انا حاسة ان معظم قصصك فيها حوادث وموت لى ؟؟

    ردحذف
  28. عبده
    عصبى انت باين عليك

    ردحذف
  29. غير معرف
    هو مش كل القصص طبعا
    بس فيه قصص فيها حوادث زى الحياة مايبقى فيها

    ردحذف
  30. بصراحة القصة جميلة اوووووووووى وعجبتنى وهى رساله لكل الناس
    تسلم ايدك

    ردحذف
  31. بجد القصة دي روعة من اجمل القصص الي ممكن اكون قراتها او سمعتها انتي بجد متميزة جدااا ربنا يوفقك ويزيدك نجاح بجد يسلمو ايديكي ودماغك

    ردحذف
  32. اللهجميلة اوووووووووووووي القصة وعجبتني حتة الست اللي في الحج اللي قالتلها ع اللي هيحصل didi makky

    ردحذف
  33. الحمد لله .. اييييييييييييييييييييييييه ده انا اعصابي باظت والله و اتشحتفت عليها والله دي شافتت الوييييييييييييل و ايييييييييييييه كميه الحوادث دي !!! دي عايزالها جايزة والله ههههههه بس والله قصه جميييله جدااا .. انا عارفه تعليق جاي متأخر بس حبيت قبل ما ابدأ الجزء التاني اكون قرأت الاول .. اتمنى تكون التانيه عند حسن ظني و منتظريين المزيييييييد ;)

    ردحذف
  34. nhaia s3edaaa zy ay ksa lekii ya dndnnnnnn

    ردحذف
  35. قصه حلوه كتييييييييييييييير بالتوفيق ان شاء الله :)

    ردحذف
  36. جميييييييييييييييله اوي يادينا

    ردحذف
  37. مش انا لوحدي اللي مستنية النهاية دي ..نهاية جميلة وسلم ايديكي ونتنقل بقى على القصة اللي بعدها والحمد لله فيه ناس تانية اهه معلقة في فبراير 2013..تحياتي ماما زيزي

    ردحذف
  38. نهااااااااااااااااية حلوة وربنا بيعوض وفعلا إن بعد العسر يسر

    ردحذف
  39. حلوة الحلقة
    هروح اقرا الجزء التانى

    ردحذف
  40. تعبتيني والله :D
    بس كويس انهم ف الاخر اتجوزوا وفرحوا الله يسامحك :D
    نكدتي عليا يا شيخه :D
    بس بجد تسلم ايدك قصه تحفه تحفه تحفه

    ردحذف
  41. احلى قصة كتبتيها بجد ! :)

    ردحذف
  42. الحمد لله انها انتهت نهايه سعيده لان الام تستاهل النهايه السعيده دى لانها تعبت كتير قوى و ماكنتش الحماه المفتريه لا كانت الام المغلوبه على امرها بجد ام عظيمه انها استحملت كل ده

    ردحذف
  43. الحمد لله ! فعلا علي راي الست اللي شافتها في الحج .. ان بعد العصر يسرا

    طبعا مش محتاجه اقول انك مبدعه ده بفي معروف يعني! :D

    ردحذف
  44. قصة اكتر من رائعة يعنى لو كانت اسماء اتجوزت هشام من الاول كانت الموضوع خلص بس حكمة ربنا انه يوضح لمامتهم ان مى فعلا كويسة وتستاهل احمد . بجد يا دينا انا بقالى ساعتين بقرأ القصة بستمتاع هيلة كالعادة سلمت يداكى وربنا يباركلك :)

    ردحذف
  45. مجدي فريد حسن21 سبتمبر 2014 في 9:16 ص

    قصة في منتهي الروعة .. خفة دم
    مواقف مضحكة جدا .. بصراحة
    من اجمل ماقرأة للكاتبة

    ردحذف
  46. ايمان دى ربنا يعينها واسماء دى غبية جداااااااااااااااااااااااااااااااااااااااا
    بس النهاية

    ردحذف
  47. انت بجد اعظم كتابه انا تابعتلك R و بين نارين و ليست عذراء ويوميات حماه بجد كل قصصك تحفه وانا مكمله معاكى لحد ما اخلاص قراءه كل قصصك



    ردحذف
  48. تسلم ايدك��

    ردحذف

قول رأيك بلاش تقرا وتقفل من سكات...ارائكم تهمنى