السبت، 28 مايو 2011

تحت سقف واحد...الحلقة 6

اتفاجأت شيرين بالمكالمة غير المتوقعة دى
"بس انا خلاص صرفت نظر عن السفر... انا اسفة معلش"
"ارجوكى انا تحت امرك فى اى شروط بس انا محتاج اسافر ويكون بعقد مضمون... ارجوكى انا محتاج الشغل جدااا"
"طيب ادينى فرصة لبكرة وارد عليك لو لقيت لك شغل"
قامت شيرين وقعدت بعد المكالمة تفكر وتقول ياترى هو بيقول عليها ايه دلوقتى وايه اللى غير رأيه بالسرعة دى... هى بتفكر ليه هى خلاص قررت انها هتعتذر عن السفر
دخلت لها مروة
"ايه ده انتى صاحية...انا سمعت موبايلك بيرن دلوقتى واستغربت"
"ولو عرفتى اللى حصل هتستغربى اكتر"
وحكت شيرين لمروة كل اللى حصل
"امممم انا صاحبة الفكرة اه بس مكنتش متخيلة انك هتاخديها جد انا كنت بس عايزة ابين لك ان حسام فرصة متضيعيهاش ... بس ميكانيكى ياشيرين... وماما استحالة توافق على حاجة زى كده... بلاش السفرية دى... مين عارف اخلاقه ايه ولا يعمل فيكى ايه هناك... خليكى معانا احسن"
"اه معاكى حق... لو لقيت له شغلانة اقوله وخلاص"
راحت شيرين الشغل تانى يوم وهى مقررة الاعتذار عن الوظيفة ولما دخلت لرئيس الفرع
"ها ياشيرين قلتى ايه؟؟"
"انا اسفة يامستر على مش هقدر"
"خسارة ده انتى كنتى هتمسكى العلاقات العامة لل3الفروع اللى فى المغرب الفرصة دى مش بتيجى لاى حد"
وقت الكلام مابييجى عند شغلها بتحس انها مغيبة وعايزة تحقق اكبر نجاح فيه ولقت نفسها بترد بسرعة
"انا موافقة... بس عايزة شغل لجوزى وتحديد معاد السفر"
"معاد السفر هيكون الشهر الجاى يعنى قدامك حوالى 40 يوم من النهاردة بس ياريت تسرعى فى كتب الكتاب والاوراق بتاعتك وبتاعة جوزك روحى بيها لاحمد فتحى فى الدور التانى وهو هيخلص الاجراءات ويقولك على الشغل المناسب وكل التفاصيل"
"اوك ميرسى يامستر على... بعد اذنك"
قامت شيرين وهى فرحانة جدا بفرصة الشغل وفى نفس الوقت خايفة من الجوازة العجيبة والشخص الغريب ده... نزلت الدور التانى لاحمد المسئول عن السفر علشان تعرف ايه الشغل المناسب وعرفت منه ان الوظيفة المناسبة لياسر وعلشانها هتكون وظيفة ادارية ومرتبه مايعادل 7 الاف جنيه مصرى... طبعا ده اقل من مرتبها بكتير... بس حست انه اكيد محتاج اى شغل.. فاتصلت بيه وحددت معاه معاد بعد الشغل علشان يتفقوا على التفاصيل
وفى المعاد كان كل واحد منهم متحفظ فى كلامه مع التانى
"انا شفت لك شغل فى الشركة ومرتبك هيكون حوالى 7 الاف ...يناسبك؟؟؟"
رد بفرحة"طبعا يناسبنى جدا متشكر اوى... وبالنسبة للاقامة هعيش فين"
"الشركة ليها عمارة ولينا فيها شقة باعتبارنا زوجين... وعايزة احط معاك حدود الجواز ده هيكون ازاى... احنا هنكتب الكتاب بس علشان الشغل وعلشان ميبقاش حرام عيشتنا فى بيت واحد... انما مفيش اى حقوق ولا واجبات مترتبة على الجواز ده... لا انت ملزم بمصاريف تصرفها ولا انا ملزمة بخدمة واكل وغسيل ... كل واحد جوه البيت هيعيش فى حاله... متفقين"
"تحت امرك بس انا كنت عايز اعرف حاجات عن حضرتك"
"حاجات ايه"
"هو حضرتك سنك كام وكنتى متجوزة قبل كده وبالنسبة لاهلنا هنا هيعرفوا ولا ايه؟؟
"الاول حكاية متجوزة ولا لأ مش تخصك فى حاجة وسنى 32 وده كنت هتعرفه ساعة كتب الكتاب هو وموضوع الجواز قبل كده... ومسالة نقول لاهلنا معتقدش لها لازمة انك تقول لحد... على فكرة اقصى وقت للعقد 3 سنين وده نظام معروف عندنا فى الشركة... يعنى تقدر تكون نفسك وترجع تبدأ حياتك... انا بقى اقول لاهلى او مقولش برضه ميخصكش... نيجى بقى لنهاية الاتفاق اخر يوم للعقد يبقى اخر يوم للاتفاق ونتطلق بهدوء... وطبعا لو فكرت انك متطلقش انا اقدر اخلعك بكل سهولة...بس ياريت الامور متوصلش بينا للدرجة دى...هااااا قلت ايه"
"انا موافق على كل اللى تقوليه... وتحت امرك"
اتفقوا ان بينهم تليفونات لتحديد اى تفاصيل جديدة... ومشى كل واحد فى اتجاه... وكل منهم جواه احتقار للتانى
شيرين بتقول لنفسها... ادى اللى كان عامل فيها شريف ومحترم باع نفسه قصاد عقد ب7الاف جنيه ...عديم الشخصية والراى ...ازاى هتعامل معاه ؟؟؟
ياسر كان بيقول لنفسه...ست مفترية ومستقوية بفلوسها ومركزها... مستغلة...استغلت احتياجى للفلوس علشان تحقق مطامعها... مضطر اجاريها... هتعامل معاها ازاى دى...وهقدر استحمل غرورها؟؟؟

هناك 19 تعليقًا:

  1. ممممممممم غريبة الحكاية شوية واحدة فى المستوى دا وتتجوز كدا وميكانيكى كمان؟؟ مش دى اللى سايبه حسام عشان مبتحبوش واتنازلت عن كل مميزاته توافق دلوقتى بالميكانيكى ؟؟؟ مش مقنعة خالص

    ردحذف
  2. هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه آخرها هيحبوا بعض خخ

    تسلم ايدك والله فطست من الضحك وانا بتخيل منظرهم وهما بيشتموا بعض هههههههههههههههههههههههه

    ردحذف
  3. ايمان
    بصى ياستى مبرراتها
    حسام كان هيبقى جواز بجد مدى الحياة وهى مش هتقدر تعيش معاه...اما ياسر جواز مشروط ومدة العقد بس
    وهى مدمنة شغلها وبتضعف جدا قصاد طموحها

    ردحذف
  4. جاااااااااااامده يا دندن حلوة اوي ما ينفعش تنزلي كل يوم حلقتين واحده الصبح وواحده بالليل

    ردحذف
  5. توتا
    ههههههههههههههههه
    كل واحد قرفان من التانى بس فى سره

    ردحذف
  6. ايناس
    ههههههههههههه حرام عليكوا
    انتوا عايزىنى ابات ع الكيبورد
    يارب تعجبكم لاخر حلقة

    ردحذف
  7. حلوووووه جدا بدأت اتشد اكثر علشان اعرف باقى القصه
    بس اعتقد هيحبوا بعض أكثر وهيتقلب جواز بحد
    تسلم ايدك يا دينا

    يويااااااااااا

    ردحذف
  8. الله بجد جميلة بس شرين دي مجنونة بس انا منظرة الباقي

    ردحذف
  9. يويا
    الحمدلله انها عجبتك
    وهنشووووووووف اللى هيحصل

    ردحذف
  10. كنوز
    هههههههههه هى مش مجنونة اوى يعنى
    هى طموحة زيادة بس

    ردحذف
  11. مريوووووووووووووم25 يوليو 2012 في 10:17 م

    جامدة جدااااااااااا يا دندن

    ردحذف
  12. جامده اوى يا دودو اسفه انى متبعتهاش اول منزلت

    ردحذف
  13. مازلت في انتظار القادم المشوق جداً..تسلم ايدك يا دينا..ماما زيزي

    ردحذف
  14. ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه انا بقى اللى معلق معاية ان انا كمان اسمى مروة و كل ما اشوف اسم مروة مكتوب اضحك و انا مش عارفة بضحك على ايه

    ردحذف
  15. يااااه ادندن دول هبل اوووييييي

    ردحذف
  16. اهنى حضرتك على اسلوبك الجميل
    انا قريت قصة فى الاول ولقيت نفسى باقراء كل القصص اللى فى المدونة
    اسلوبك فى الكتابة شيق جدا
    تحياتى
    ماجد

    ردحذف

قول رأيك بلاش تقرا وتقفل من سكات...ارائكم تهمنى