الأحد، 29 مايو، 2011

تحت سقف واحد... الحلقة 7

قبل ماياسر يطلع البيت قابل صاحبه ابراهيم
"مالك ياياسر مهموم كده ليه؟؟"
"قرفان من نفسى "
"طيب اطلع استحمى ههههههههه"
"ماشى ياعم سلام"
"استنى بس انا بهزر معاك متزعلش وفك كده واحكى مالك؟"
"انا وافقت على العرض اللى حكيت لك عليه... صعب عليه حال ابويا واخواتى وخصوصا ياسمين"
"مش قلتلك وافق"
"بس الست دى فظيعة اوى ومتعجرفة كده وعمالة تدينى فى اوامر وانا مش بتاع كده وساكت علشان محتاج ومش عارف هفضل متحمل لامتى"
"هى جوازة على طول يعنى"
"لا الحمدلله جوازة ع الورق واقصى حاجة 3 سنين مدة العقد"
" مع انها غريبة بس اهو اى حاجة تجيب فلوس والسلام"
"ايوه معاك حق ...يالا انا طالع علشان افرح البت ياسمين اللى مقهورة من امبارح"
"طيب سلام وابقى انزل اسهر معايا بالليل"
"ماشى اما اشوف...سلام"
طلع ياسر البيت وكان كل اللى فى البيت قاعدين بيتفرجوا على التليفزيون... راح واقف قدام التليفزيون فجأة
"انا عندى ليكم خبر هيفرحكم"
ردوا كلهم" هااااا....خير"
"انا جالى عقد عمل فى المغرب وبمرتب كويس الحمدلله...واول حاجة هجهز ياسمين باللى هى عايزاه "
قامت ياسمين على ياسر وحضنته وهى فرحانة  وبتقوله
"ربنا يخليك يااحلى اخ"
والام الاب مازالوا متفاجئين وسأله باباه
"يعنى يابنى دى حاجة مضمونة "
"ايوه يابابا مضمونة ان شاءالله واحد صاحبى بيشتغل هناك وجابلى عقد معاه فى نفس الشركة"
"ربنا يوفقك ان شاءالله"

رجعت شيرين البيت وهى مازالت قلقانة من ياسر وخصوصا ان كل اللى عرفته عنه بيوضح قد ايه مفيش بينهم تكافؤ... وكانت كل حيرتها تقول لمامتها ولا متقولهاش... هتقولها ايه؟؟؟ هتقول رفضت جوازها من حسام ورايحة تتجوز واحد متعرفش عنه حاجة غير حاجات بسيطة والحاجات دى تقلق اصلا ولا تكافؤ اجتماعى ولا فكرى ولا حتى سنهم مناسب لبعض... يبقى متقولش لمامتها... ازاى تتجوز وتسافر من غير ماتقول حاجة لمامتها... تعمل ايه؟؟؟ تاخد رأى مروة يمكن تفيدها... اصلا مروة متعرفش التطورات الجديدة وانها اتفقت مع ياسر على الجواز... لازم تقول لمامتها مش هتقدر تخبى عليها حاجة زى دى
قررت انها هتقول لمامتها بس بطريقة تانية خالص
قعدت مع مامتها ومروة وقالت
"ماما انا عايزة اقولك حاجة هتفرحك"
"خير.. يابنتى"
"انا جايلى عريس"
الام"بجد والنبى ياترى مين وبيشتغل ايه؟"
مروة"اوعى يكون...."
قاطعتها شيرين فجاة وغمزتها
"اه يامروة العريس اللى كنت قايلالك عليه من يومين"
سكتت مروة خالص لحد ماتفهم
الام" يعنى اختك تعرف وانا لا"
"بصى ياماما هو اسمه ياسر من اسكندرية وشافنى فى الشركة لانه بيتعامل معانا واعرفه من فترة بس لما شاف انى فسخت الخطوبة اتقدملى وقال عايز ييجى يقابلك"
"اهلا وسهلا بيه بس انتى تعرفيه كويس"
"اه ياماما وعايزة اقولك حاجة كمان"
"هااا"
"انا جالى ترقية انى اسافر المغرب وهو هيسافر معايا... بعد موافقتك طبعا"
"وماله يابنتى بدل مع جوزك خلاص... الحمدلله انى هطمن عليكى... خليه ييجى اتعرف عليه ولو كويس نقرا الفاتحة"
"حاضر ياماما هشوفه فاضى امتى واقولك .. بس عايزين نكتب الكتاب بسرعة علشان السفر"
"يا بنتى لو كويس يبقى ربنا يتمم بخير"
قامت شيرين دخلت اوضتها ودخلت وراها مروة
"ايه ياشيرين... انتى مش قلتى هترفضى السفر"
"ايوه قلت بس مقدرتش... والولد شكله مالوش شخصية هقوله يمين يمين شمال شمال"
"وايه الفيلم اللى عملتيه على ماما ده"
"مقدرتش اقولها الحقيقة لانها اكيد كانت هترفض"
"طيب وانتى مش كده تبقى بتكدبى وده اللى سيبتى حسام علشانه"
وقفت شيرين وهى مش عارفة ترد على مروة.... مش هى كانت بتقول على حسام انه سقط من نظرها من كدبه... دلوقتى هى بتكدب... هتدافع عن نفسها ازاى ولا تصلح كدبها ده ازاى؟؟؟

هناك 13 تعليقًا:

  1. حاجه تمخول المخ صحيح.. مافيش فرق بينها وبين حسام الوقت.. بس هي السكينه سارقاها ومتصربعه ع الترقيه والفلوس.. اخس عليها اخس هههههههههههههههه

    اضافه جميله ومستنيه الاضافه الجديده لو زودتيها شويه مش كان احسن.. اهو نعرف الواد ياسر هيقول ايه لما يعرف انه هيقابل اهلها خخخ

    ردحذف
  2. توتا
    انتى اهو حللتى شخصيتها صح
    ميرسى ياتوتا... وهنشوف بكرة ان شاءالله المقابلة

    ردحذف
  3. ياسر دا شكله هيطلع عليها القديم والجديد... بس البت شيرين دى طلعت ماديه اوووووى ومممكن تضحى باى حاجة عشان الفلوس

    ردحذف
  4. ايه
    هههههههه ياترى هيعمل ايه معاها
    ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    على فكرة هى مش رايحة علشان الفلوس
    المنصب الكبير هو اللى مزغلل عينها

    ردحذف
  5. الله ...القصة دخلت فى اطار الاثارة بسرعة جامدة ...انا بجد متلهفة اعرف ايه اللى هيحصل ...بس اتمنى تكون حاجات مش متوقعة

    ردحذف
  6. د.هنودة
    انا سعيدة انها دخلت فى التشويق
    وهنشووووووووووووووووف ويارب تكون مش متوقعة لانى مش عارفة انتوا متوقعين ايه؟؟؟

    ردحذف
  7. اعتقد بجد الجوازه ديه هتبقى ناجحه جدااااااا
    واعتقد انهم فعلا هيحبوا بعض اووى

    بس اللى مضيقنى منها انها كدبت على مامتها مبقاش فى فرق صح بينها وبين حسام
    مستنيه الحلقه الجديده وابقى طولى شويه يا دينااااا


    يويااااااااااااا

    ردحذف
  8. يويا
    هنشوف هتبقى جوازة ناجحة ولا فاشلة
    اقولك سر يايويا
    انى بطول فعلا وانتوا مش بتاخدوا بالكوا ههههههه

    ردحذف
  9. ماهي اكيد ماكنتش حتقدر تواجه مامتها بالحقيقة..بس الافضل ليها كانت ترجع لحسام قبل ماتورطنفسها في كدة ومع الوقت ممكن كانت تبطلهاله..لا ريلي قصة شيقة جدااااااااااااا وممتعةوانا منتظرة المزيد

    ردحذف
  10. كنوز
    هى متاكدة ان الكذب طبع وصعب حسام يبطله
    وميرسى للمتابعة ورأيك الجميل ده

    ردحذف
  11. كدب عن كدب يفرق ده بيكدب ع اى حاجة ولاتفهه الاسباب
    هى كدبها لسبب كبير يعنى

    ردحذف
  12. هو الغلط دلوقتي مش في الكدب الغلط في الجواز المشروط دا حرام اصلاً انه يتحدد بميعاد ..مع تحياتي ..ماما زيزي

    ردحذف
  13. حلوة بس شيرين دي مادية حقيرة..😂

    ردحذف

قول رأيك بلاش تقرا وتقفل من سكات...ارائكم تهمنى