الاثنين، 30 مايو، 2011

تحت سقف واحد... الحلقة 8

الحلقة 8
شيرين اقنعت نفسها انها مضطرة ان تخفى الحقيقة علشان تحقق طموحها وشغلها اللى عايشة علشانه وهى مختلفة عن حسام اللى على طول بيكدب
اتصلت بياسر
"الو ياسر... انا قلت لماما على الجواز وعايزة تقابلك... فاضى بكرة"
اتفاجئ ياسر بكلامها
"ايوه فاضى بس اقابلها ليه واقولها ايه؟؟"
"هتقابلها كانك بتخطبنى بجد وبكرة عايزة اقابلك نروح مشوار وبعدين تيجى معايا ع البيت وهفهمك كل حاجة لما اشوفك"
"حاضر... الساعة كام وفين"
"هقولك وانا نازلة من البيت"
تانى يوم كانت الام فرحانة لما قالتلها ان ياسر جاى النهاردة وعمالة تستعد هنجيب كذا ونعمل كذا وشيرين عادى جدا وهادية خالص ولا كأن حد جاى والام فسرت هدوئها ده بانها علشان عارفاه واخده عليه مش متوترة خالص وقبل المغرب بشوية نزلت شيرين باعتبارها رايحة تجيب ياسر من السوبر جيت علشان مش عارف البيت ... انما فى الحقيقة رايحة تقابله بعد مااتصلت بيه وحددت مكان قريب من بيته هتاخده منه... وصلت له وركب معاها
"يا استاذة شيرين انا مش فاهم اقابل مامتك ازاى واقولها ايه"
"هتقابلها كانك تعرفنى من الشغل وانا كنا مخطوبة وانت اتقدمتلى بعد ما فسخت الخطوبة... وحاول متغلطش فى حاجة فى كلامك انت من اسكندرية ولما تسألك فين اهلك قولها باباك تعبان ومامتك مقدرتش تسيبه وتيجى معاك... وانا هحاول ألحقك... ربنا يستر"
"حاضر... ربنا يستر"
مشيت شيرين بالعربية ووقفت قدام محل شيك ونزلوا مع بعض... واتفاجئ ياسر بشيرين وهى داخلة محل ملابس رجالى وبتقوله "تعالى نقى معايا"
"انقى ايه حضرتك"
"نقى طقمين ليك ماهو مش معقول هتقابل ماما بهدومك دى"
"مالوش لازمة تكلفى نفسك"
"مش علشانك...علشان لازم تظهر قدام امى واختى بمظهر كويس"
كان متغاظ منها اوى وهى عمالة تتأمر وتتمنظر عليه كده وكان نفسه يديها قلم على وشها ويقولها فوقى واتكلمى كويس ويسيبها ويمشى... بس افتكر ياسمين وفرحتها بتحديد جوازها وافتكر امه وابوه واخواته وحالهم لو سافر وحالهم لو مسافرش
"طيب اتفضلى نقى حضرتك اللى تشوفيه وانا موافق"
قعدت شيرين تختار وتشوف اللبس المناسب وهو ماسك نفسه ع الاخر من طريقتها وبعد مانقوا طقمين
"خليك لابس الطقم ده"
وهو بيجز على سنانه"حاضر"
وخدته وراحوا على محل دهب وقالت للجواهرجى هات دبلتين
"بس انا مش هلبس دهب... لو فضة ماشى"
"خلاص خلاص طيب"
واشترت دبلة دهب ودبلة فضة وراحوا للبيت... وهى طالعة قالتله
"خد بالك مينفعش استاذة وحضرتك والكلام الرسمى ده... اتعامل معايا كاننا نعرف بعض من زمان... وخلى بالك من كلامك مع ماما"
وصلوا البيت ورحبوا بيه جدا ومامتها ومروة كانوا بيتعاملوا معاه بكل ود لما شافوه ذوق ومؤدب وطبعا كانت شيرين قايلة لمامتها متسألوش كتير لانه خجول جدا ومفيش داعى لاحراجه بالاسئلة
وعدت المقابلة على خير ولبسوا الدبل واتفقوا انهم يكتبوا الكتاب الخميس الجاى علشان يبدأوا التجهيز للسفر... وفى نهاية المقابلة قالت الام
"لو عايزين تنزلوا تخرجوا شوية انزلوا مع بعض"
فاضطروا يتظاهروا بالموافقة والسعادة ونزلوا فعلا...
"تعالى نستغل نزولنا ونروح نشوف بدلة لكتب الكتاب"
"مفيش داعى انتى النهاردة اتكلفتى كتير"
"يعنى انا لو مجيبتش انت هتقدر تجيب...انت ممكن ميكونش معاك 50 جنيه فى جيبك"
لسه هيرد عليها لقوا خبطة على كبوت العربية وحسام ظهر فجأة وفتح باب عربيتها وهو بيشدها من العربية
"مين ده يا انسة يا محترمة...هو ده اللى سيبتينى علشانه... كنتى بتضحكى عليه...تلاقيكى كنتى ماشية معاه وانتى مخطوبالى "
"انت اتجننت سيبنى ياحسام واتكلم كويس"
نزل ياسر بسرعة علشان يخلصها من ايده
"ايوه اتجننت ماانا كنت نايم على ودانى وانتى بتتسرمحى مع اللوح ده"
هجم عليه ياسر وخلصها من ايده.. وقاله وهو بيضربه
"اللى بتكلمها دى خطيبتى... واياك تتعرض لها تانى والا هتشوف اللى عمرك ماكنت تتخيله...غور من هنا"
رد حسام باستغراب
"خطيبته...امتى ده... ماشى يا شيرين انا هوريكى"
"قلتلك اياك تتعرض لها تانى"
بكل عصبية ركب حسام عربيته ومشى بسرعة... وجهت شيرين كلامها لياسر وهى بتقوله
"ميرسى ياياسر... ده انت طلعت راجل اهو"
"تصدقى انك صحيح مش محترمة انا مستحمل كلامك واهاناتك من ساعة مااتفقنا على الاتفاقية السودة دى... ملعون ابو القرش اللى ييجى بالذل... معطلكيش وشوفى لك شخشيخة غيرى تلعبى بيها"

هناك 32 تعليقًا:

  1. الله الله الله ...والله العظيم راجل بجد ...ايوة كده يا دينا خلينا نشوف الناس اللى انقرضت دى .......خلتينى اتفائل تانى ....ومتتعبيش نفسك فى الرد عالتعليقات عشان ايديكى متتعبش ....والف سلامة عليكى يا مظبطانا

    ردحذف
  2. ههههههههههههههههههههههههههههههههههههههه والله العظيم جدع انا كده هحب الواد ياسر دا

    ردحذف
  3. هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

    حمش.. دي مستفزه اوي.. كل شويه بتذله.. خليه تتذلل الوقت بقا خخ.. تسلم ايدك يا دندن

    ردحذف
  4. د.هنودة
    ايه
    توتا
    الحمدلله ان الحلقة عجبتكم والواد اهو طلع شخصية
    متحرمش منكوا ولا من متابعتكوا ابداااااااااااا

    ردحذف
  5. ايوة كده يا ياسر
    راااااااجل يا ياسر

    ردحذف
  6. ياسر بقاله شعبية كبيرة هنا ههههههههههه

    ردحذف
  7. هههههههههههههههههههههههههههههه ايوه كده خليها تاخد على قفاها الهبابه دى انا لو منه كنت كلتها بسنانى ههههههههههههههههههه
    تسلمى يابرنسس جامده الحلقه
    ............... ميرا

    ردحذف
  8. فرحانين فيها انتوا ههههههههههههههههه
    تسلميلى ياميرا

    ردحذف
  9. ايوه كدا يا ودعدع هو دا الشغل اللي على حق حلقه تجنن يا دينا بس ياريت تطولي في الحلقه لانها بتبقى قصيره جدا يعني مختصره على حدث او اتنين بالكتير اوي

    بس بجد تسلم ايدك

    ردحذف
  10. ايناس
    يدوب ياايناس كده علشان الحق اكتب يوميا
    وانتوا عارفين دى كام ورقة؟؟ورقتين ونص تقريبا
    انتوا بس علشان متابعين الاحداث بتفوت بسرعة

    وتسلميلى على رايك الحلو يانوسة

    ردحذف
  11. ايوه كده تستاهل البت المغرورة دى.مع انى حاسة انها هتحبه ف الاخر

    ردحذف
  12. نونا
    منورة المدونة
    ونتابع ونشووووووووووف هيحصل ايه ههههههه

    ردحذف
  13. أنا حسه ان كلام ياسر ده بيقولوه بينه وبين نفسه مش ليهااااا لشرين خالص مش مصدقه ان ياسر نطق بجد والله
    بس حلقه جامده جداااا ومستنيه الجديد
    متشوقه اعرف النهايه اوووووى

    يوياااااااااااااا

    ردحذف
  14. اديلواااااااااااااااااااااا تستاهلي ولسه هتشوفي كتير من ده قلبي بيقولولي كده هههههههههههههههههههه
    جامده الحلقه بجد يا دندونه

    Eman Osama

    ردحذف
  15. ههههههههههههههههههههه
    لا فعلا مستفزه اوي شيرين بقي الراجل يتخانق ويزعق وفي الاخر تقوله طلعت راجل اهو
    ايه قله الذوق دي
    بس جددددددددددددع مووووووووووووووت

    ردحذف
  16. يويا
    هنشووووووووووف يمكن يكون بيقول فى سره؟؟؟؟؟؟
    ههههههههه حتة تشويق

    ردحذف
  17. ايمان
    هههههههههه فرحانة فيها كده ليه
    دى طيبة خالص هههههههه

    ردحذف
  18. شذى
    الواد فاض بيه منهاهههههههههههه

    ردحذف
  19. تامر عبد الجواد
    ايوه كده يسلم بقه اخيرا نطق وافتكر انه راجل وليه كرامة وربنا يستر بقى عليه لحسن دى مجنونة اوى

    ردحذف
  20. تامر
    ههههههههههههه عجبتنى مجنونة اوى دى
    ربنا يستر ونشوف هيسافروا ولا لأ

    ردحذف
  21. you have a great talent .....mashaa allah

    ردحذف
  22. كريم
    ربنا يخليك ومتحرمش منك ابدااااااااااااا

    ردحذف
  23. سعيدة بالتعرف على مدونتك وان شاء الله من المتابعين ..

    دمت بخير وتقبل خالص تحيتي وتقديري ..

    ردحذف
  24. وجع البنفسج
    اهلا ومرحبا ووجودك فى المدونة اسعدنى

    ردحذف
  25. ايه ده بجد حبيت انا ياسر ده أووووووووي
    نونا

    ردحذف
  26. نونا
    ولسسسسسسسسسه
    هتحبيه اكتر واكتر

    ردحذف
  27. والله شرين دى هبله






    shosho saleh

    ردحذف
  28. هههههههههههههههههههههههههههههههههه ايووه بقى اخيرااااااااا اكلمت يا ياسر

    ردحذف
  29. راااااااااااااااااااااااااااجل

    ردحذف
  30. الله الله جااااااااااااااااااااااااااااامدة اوووووووووووووووي

    ردحذف
  31. دينا والنيييييعمة انا بحبك اد كدة هوووووووووووة :D

    ردحذف

قول رأيك بلاش تقرا وتقفل من سكات...ارائكم تهمنى