السبت، 18 يونيو 2011

ذكرى سارة...الحلقة 1

الحلقة 1
رجعت سارة من الكلية واول مافتحت الباب سمعت  مامتها
"سارة انتى جيتى"
"ايوه ياماما"
وجت تجرى من المطبخ
"اتأخرتى كده ليه"
"متأخرتش ولا حاجة انا جيت فى معادى"
"لا اتأخرتى ...انتى بتوصلى 4ونص دلوقتى 5 الا ربع... وموبايلك مقفول كمان"
"لا والله ياماما مش مقفول تلاقى بس الشبكة ولا حاجة ... وبعدين هى الربع ساعة تأخير"
"يابنتى حرام عليكى ...بكرة لما تبقى ام هتعرفى انا بقلق عليكى ازاى... يالا غيرى هدومك على ما احضر السفرة"
كانت دى الحياة اللى بتجمع سارة ومامتها رجاء فى البيت لوحدهم... فسارة كل حياة رجاء ورجاء كل حاجة لسارة
هما مش مجرد ام وبنت لأ .. دول اختين وصاحبتين كمان
بعد ما بيتغدوا بيقعدوا يحكوا لبعض كل واحدة يومها كان ازاى
رجاء تحكى عن الشغل وصاحبتها فلانة قالت كذا ... ولما راحت السوق اشترت ايه... وتحكى كمان لما اتكعبلت وهى طالعة الميكروباص وكانت هتتشقلب بره لولا ربنا ستر
وتضحك سارة على حكايات مامتها وتحكى هى كمان عملت ايه من ساعة مانزلت الصبح لحد مارجعت البيت بالتفصيل الحاجات المهمة وغير المهمة.
دى حياتهم من سنين من وقت وفاة باباها وهى فى ابتدائى ورجاء معتبرة سارة روحها اللى متقدرش تفارقها ابدا.. وعلشان كده رفضت اى عروض جواز مهما كان العرض مناسب كان ردها واحد بس
"انا منشغلش عن بنتى بأى حد تانى"
وهما قاعدين يحكوا فجأة قالت رجاء
"سارة تصدقى خالتك وحشتنى"
"ايه ياماما انتى لحقتى مش كانت هنا من كام يوم"
"وايه يعنى مش اختى الوحيدة... ماتقومى نروح النهاردة الخميس وبكرة ماوراناش حاجة"
"لا ياماما خليها بكرة لان غادة النهاردة مش موجودة... وانا هروح اقعد مع مين"
"ليه رايحة فين"
"رايحة خطوبة واحدة صاحبتها"

غادة وسارة بنات خالة انما هما علاقتهم ببعض كأختين فهما مع بعض فى الكلية وكمان مش بيسيبوا بعض فى اى وقت تانى
وطبعا علاقتهم دى قريبة اوى من وهما لسه اطفال بحكم ان كل واحدة فيهم وحيدة ابويها... فكانوا لبعض اقرب من اخوة الدم
بس سوسن اخت رجاء تختلف عنها كتير... هى كوووول خالص تحب ان بنتها تخرج وتتفسح وتعيش سنها طالما هى عارفة بنتها فين ومع مين من صاحباتها خلاص مفيش مشكلة
على عكس رجاء تماما اللى يدوب بتسيب سارة تروح الكلية بالعافية انما اى حتة تانية فهى معاها
يعنى اختلاف اسلوب تربية مش اكتر
انما فى النهاية البنتين محترمتين ومؤدبتين والكل يشهد لهم بكده

تانى يوم راحوا سارة ورجاء بيت سوسن وكالعادة كل اختين بيقعدوا مع بعض
و كانت سارة وغادة قاعدين بيسمعوا اغانى
"سارة انتى فكرتى"
"فكرت فى ايه بس... احنا مش قفلنا الموضوع ده"
"اعمل ايه محمود مزهقنى مكالمات من امبارح وكل شوية يقوللى كلميها تانى"
"يعنى ايه تكلمينى تانى... هو اتكلم معايا وانا قلت له انى مش بفكر فى ارتباط علشان محرجوش واقول انه مش بحبه "
"تلاقيه فاكرك بتتقلى عليه ههههههه"
"لا ياستى لا تقل ولا حاجة بس ميزهقنيش فى الكلية كل شوية الاقيه طالعلى معرفش منين.. يخنق اوى"
"ااااااه بيحب يا اوختى... بيحب"
"غيرى الموضوع وبلاش خنقة"
وفجأة سمعوا صوت فرملة فى الشارع وفتحوا الشباك بسرعة يشوفوا فى ايه.....
واتفاجئوااااااا

هناك 18 تعليقًا:

  1. لالالالالالالالا يتفاجؤوا كده من غير مانفهم ايه الحكايه ماينفعش خااااااااااالص..‏ احنا لسه يادوب بنعرف الشخصيات..‏ شكله المعجب بالبت بيستعرض ههههههههههه



    بس قصير اوي كبدايه لازم تمدي فيها علشان نشرب القصه من اولها خخخ

    ردحذف
  2. هههههههههههههههههههه
    تلاقيه فارس الاحلام فرم على قطه ولا حاجة
    مبرووووووووووووووووك القصة الجديده وانا متشوقه اوي اوي اوي لاخداث القصه
    ربنا معاكي ياقلبي
    يارب ابقي اول كومنت بقي

    ردحذف
  3. توتا
    انتى عايزة تطويل كده من اول حلقة هههههههه
    انتى عايزة الناس تزهق ومتكملش؟؟
    ماهو البداية كده فى قصصى...كام حلقة للشخصيات وتعريف بيهم وبحياتهم

    ردحذف
  4. شذى
    هههههههههههه
    فارس احلام مين فيهم؟؟؟؟؟
    الله يبارك فيكى ومتحرمش منك ابدااااا

    ردحذف
  5. من اولها مفاجئات كده .... يا مفاجئاتك يا دندوووون ...

    ردحذف
  6. estooooooooooor ya raaaaab
    bdaya gameela :)
    nona

    ردحذف
  7. من اولها كده مفجأأه لالالالالالالالا ماتفقناش على كده

    انا خلصت واعده بقى هههههههههههههههههههههه

    ............. ميرا

    ردحذف
  8. نونا
    مش لازم اعمل تشويق من اولها ههههههههه

    ردحذف
  9. ميرا
    هههههه بالنجاح يارب

    ردحذف
  10. اتفاجئوا ان محمود كان معدي وعمل حادثه :d

    بدايه رائعه انا اول قصه اتابعها

    ردحذف
  11. غير معرف
    اهلا بيك وان شاءالله تبقى متابع دائم

    ردحذف
  12. مريوووووووووووووم5 يوليو 2012 في 2:40 م

    تحفة فظيعة بس قصيرة يا دندون بس باين عليها انها مشوقة اوووي و لا مسلاسلات التليفزيون قصص احي و بحس اني شايفة الشخصيات في دماغي


    بجد بتمنالك دوام التوفيق

    ردحذف
  13. جميييييييلة قوي

    ردحذف
  14. ههههههههههههه جميلة اووي

    سترك يارب

    ردحذف
  15. كالعادة يا مفاجئاتك يادندون ..حلوة ومشوقة ..انا بصي ممكن اقراها كلها مرة واحدة لكن انا بأدي نفسي فرصة تشويق اكتر وباقرا حلقة بحلقة واعلقلك وكأني لسة باشوفها في ميعادها الأصلي ..تسلم ايديكي وعينيكي ..

    ردحذف
  16. Enty kssk tgnnn bgd msa 3leeky

    ردحذف

قول رأيك بلاش تقرا وتقفل من سكات...ارائكم تهمنى