الاثنين، 27 يونيو 2011

ذكرى سارة...الحلقة 10


الحلقة 10
وقفت سارة على الباب وهى شايفة ادهم نازل على السلم مع باباه ومامته ...كانت بتعيط وهى شايفة حبها بينتهى... كانت نفسها تجرى وراه وتقوله متسيبنيش...لكنها سمعت مامتها
"لو كان بيحبك مكنش راح ورا ابوه وامه"
ردت سارة وهى بتعيط وصوتها بيقطع من العياط
"وهما ايه اللى نزلهم كده مش انتى؟"
"انا برضه...الحق عليا انى عايزة أأمنلك مستقبلك "
"انا مستقبلى مع ادهم"
"وانا قلت حاجة...انا قلت طلباتى وهما اللى موافقوش"
"حرام عليكى ياماما تعملى فيا كده"
واتنرفزت رجاء بعد ماكانت بتتكلم ببرود
"انا عملت فيكى ايه...ده انا طول عمرى حاطاكى فى عينيا ...زهدت الدنيا كلها علشانك...جاى اول واحد يضحك عليكى بكلمتين تسيبينى وتجرى وراه...وهو ولا عاملك اعتبار"
"ايه ده انا مش مصدقة اللى بيحصلى...امى مستخسرة فيا افرح"
"افرحى ياختى روحى بوسى رجلين ابوه اللى سابنا ومشى علشان يجوزك ابنه الخيخة"
دخلت سارة اوضتها وقعدت تعيط وكان عندها امل ان ادهم يتصل بيها...ساعات ومش بيتصل ...معقول تكون دى النهاية... وكلام مامتها يطلع صح...ان ادهم مش بيحبها زى ما بتحبه وهيسمع كلام باباه...كانت عايزة تتصل بيه بس رجعت فى اخر لحظة...وقالت لو بيحبها هيكلمها..رن التليفون..جريت ترد لقيت رقم غادة..حست انها مش قادرة ترد ولا تحكى اللى حصل سابت التليفون يرن ونامت

طول الطريق وادهم وباباه ومامته راجعين محدش بيتكلم خالص واول ما دخلوا البيت
"بص ياادهم انت تنسى البنت دى خالص...ولو ع الخطوبة شوف اى واحدة تعجبك وانا موافق انما الست اللى هانتنى فى بيتها دى لا يمكن اناسبها ابدا"
"يابابا انا مش عايز اى واحدة تانية...انا بحب سارة"
"بلا حب بلا كلام فاضى..بكرة لما تتجوز هتعرف ان الجواز مش حب بس فى حاجات تانية اهم بكتير"
"اهم من الحب؟"
"ايوه لازم يكون فيه احترام وتفاهم بين الاسرتين...انتوا مش هتعيشوا فى الدنيا لوحدكوا"
"معلش يابابا سوء تفاهم ويعدى ان شاءالله"
"ابدا...انا مش موافق على البنت دى ابدا"
كانت ميرفت ساكتة ومش بتتكلم لانها بين نارين...هى موافقة على كلام جوزها وعارفة انه صح ومعاه حق... ومن ناحية تانية صعبان عليها ابنها اللى هى عارفة انه بيحب سارة اوى ومش سهل انه ينساها بكلمتين من باباه
لما لقى ادهم ابوه رافض تماما فضل انه يسكت لحد ما يهدى ويبقى يحاول معاه تانى... ودخل اوضته علشان يكلم سارة... سمع باباه ومامته بيزعقوا مع بعض
"انت لسه جاى النهاردة عايز تسافر تانى بسرعة كده ليه"
"عايز ارجع اشوف مصالحى"
"ولا عايز ترجع علشان الهانم اللى وحشتك"
"انتى هتتكلمى كانك لسه شابة صغيرة وبتغيرى"
حست ميرفت باهانة كبيرة
"عارفة انى مش صغيرة...انما انت اللى فاكر نفسك صغير ورايح تتجوز واحدة صغيرة تعيش معاها مراهقتك"
"انتى باين عليكى اتجننتى على كبر...ازاى تكلمينى كده"
"عمايلك اللى جننتنى وساكتة ومستحملة"
"يعنى عايزة ايه يا ميرفت"
"طلقنى يافتحى"
"حاضر..."
وقبل ما يكمل فتحى كلامه اتدخل ادهم
"ايه يابابا صلى ع النبى...ماما متستغناش عنك"
ميرفت"لا استغنى ...ماهو اللى استغنى الاول"
ادهم"بس ياماما"
فتحى"امك اتجننت خلاص"
ادهم "بس يابابا"
ميرفت"لما انا اتجننت ماتطلقنى علشان متبقاش مرات المجنونة"
ادهم"بس بقى ياماما...بابا تعالى معايا ننزل شوية"
واخد ادهم باباه ونزلوا علشان يهدى الامور بينهم...وفكر لو اتكلم فى موضوع سارة اكيد هييجى بنتيجة عكسية لان باباه متنرفز... ومعرفش يكلم سارة لانه اتلبخ بخناقة مامته وباباه

بعد ما سارة دخلت اوضتها فضلت رجاء قاعدة ومدخلتش وراها وقالت لنفسها تزعل شوية وخلاص... وبعد فترة رن تليفون البيت
"الو ...ازيك ياخالتو..هى سارة مبتردش على موبايلها ليه"
"ازيك ياغادة..معرفش يمكن نامت"
"وعملتوا ايه قريتوا الفاتحة "
"فاتحة ايه... ده ابوه راجل فظيع"
"ليه بس...انتوا اختلفتوا ولا ايه"
وكانت سوسن جنب غادة وهى بتتكلم ولما حست ان الامور مش على مايرام شدت السماعة من غادة
"ايه يارجاء...متفقتوش ليه"
"ياختى الراجل النتن مش عايز يكتب قايمة ولا يكتب مؤخر ولما بقوله ع القايمة والمؤخر اتريق عليه وقالى بضمان...انا عديتهالوا هو فاكر بنتى معيوبة ولا ايه"
"لو على كلامك يبقى معاكى حق ازاى مش عايز يكتب قايمة ومؤخر"
"ده انا كمان وفرت له حق الشقة وقلت يسكنوا معايا...يقوموا يستخسروا"
"انا مش فاهمة اومال هو كان جاى يعمل ايه...هيخطب لابنه بلوشى"
"انا اعرف...والواد مالوش كلمة ابوه قاله قوم راح قايم"
"وسارة عملت ايه"
"زعلانة وبتقولى ان انا السبب...لو كان شاريها كان وافق على طلباتى"
"ربنا يهدى الاحوال وحاولى تطيبى خاطر سارة"
"ربنا يهديها ويبعدها عن الواد ده"
وقفلوا مع بعض وسوسن مصدقة الكلام بالطريقة اللى حكيتها رجاء
وفضلت رجاء جاية على نفسها ومش عايزة تدخل لسارة... بس قلبها اكلها عليها لما حست انها بقالها اكتر من 3ساعات مخرجتش من الاوضة ولا سمعت لها صوت...ودخلت تطمن عليها وتراضيها بكلمتين...لقيتها نايمة فمحبتش تصحيها وقربت منها تغطيها...... صرخت وهى بتصحيها لما لقيت المخدة كلها دم...وفضلت تصحيها وتهزها جامد...وسارة مش بتصحى ولا بترد.

هناك 20 تعليقًا:

  1. اممممممممممم
    ليه كده بس يا دينا .... مش عايزه اعيط ارجوكى هههههههههه
    تسلم ايدك ياقمر

    ردحذف
  2. lala msh msada2a enha 7awlet tanta7er!!!
    nona

    ردحذف
  3. سهى
    لالالالالا مش عايزين عياط
    تسلميلى ياحبيبتى

    ردحذف
  4. نونا
    امممممممممم
    نوكومنت منى النهاردة على الكام سطر الاخير

    ردحذف
  5. مُوتِيها يا دينا ؟ :(((((((

    .. مَتخليهاش تِموت دلوقتي !

    لما يتجوزو حتى ! :(

    :(:(

    ردحذف
  6. انا عجبتني اوي الحلقه يا دينا تحسيها كدا واقعيه صعبت عليا اوي ساره نحدش بيفكر فيها ربنا معاها بقى بس اقولك هي جدعه انها انتحرت كده احسن بلا وجع دماغ

    ردحذف
  7. حباية بندول
    اممممممممممممم
    برضه مش عارفة ارد غير بعد حلقة بكرة ان شاءالله

    ردحذف
  8. ايناس
    ميرسى يا نوسة انها عجبتك
    وبرضه هرد بتفاصيل اكتر بكرة ان شاءالله

    ردحذف
  9. افففففففففففففف انا زحلانة جدااااااااااااا علي سارة امها بتتكلم علي اساس انها مش غلطانه و هي اصل الغلط يلا ربنا معاها و يهدي الاحوال ان شاء الله و يا ريت بكرة الحلقة متبقاش نكد و ميرسي علي الحلقة :( :(
    israa

    ردحذف
  10. اسراء
    طبعا رجاء بتتكلم من وجهه نظرها وكمان مش بتحكى الحكاية على بعضها زى ماحصلت
    ربنا يستررررررررررررررررررر
    وميرسى يا قمر نورتينى

    ردحذف
  11. زي م انا اتوقعت ان فيه حد هيموت اعتقد ان ساره ماتت فعلا ومامتها هتشيل ذنبيها بسببب الانانيه بتاعتها والله اعلم برده



    راضي

    ردحذف
  12. راضى
    اممممممممممممممم
    يمكن !!!!!!!!!!!
    نووووووووووورتنى

    ردحذف
  13. تامر عبد الجواد
    احسن عشان تحرم الإنانية دى تستاهل بجد

    ردحذف
  14. مممممممممممممممممممم
    ممكن من كتر الزعل منخيرها نزفت دم مثلا ولا ايه؟؟؟
    ربنا يستر يا دودو
    احنا نشوفو مركب رايحه ايطاليا نرمي عليها رجاء وابو ادهم ونخلصو منهم جمعاااااااااء
    ههههههههههههههههههههه
    مبدعه يا دودو كالعاده

    ردحذف
  15. تامر
    رجاء تستاهل
    بس سارة وادهم يا عينى ذنبهم ايه

    ردحذف
  16. شذى
    اممممممممممم
    كل شئ هينكشف ويبان فى الحلقة الجديدة
    وحلوة فكرة ايطاليا هههههههههههههههه
    ميرسى يا قمراية

    ردحذف
  17. امها هى السبب فى اللى بيحصلها ده ومش حاسه بالذنب
    لما نشوف ساره هيحصلها ايه بقى :((

    ردحذف
  18. بنت من الزمن ده
    اكيد طبعاامها مش حاسة بالذنب
    ربنا يسترررررررررررررررررررر

    ردحذف
  19. امها لو جرالها حاجة حاتعيش بذنبها العمر كله ..في انتظار الغد ..تحياتي

    ردحذف
  20. انا اتعرضت لنفس المشكلة بس بسبب امه الحرباية عايزة تعمل راسها براس ابويا

    ردحذف

قول رأيك بلاش تقرا وتقفل من سكات...ارائكم تهمنى