السبت، 4 يونيو 2011

تحت سقف واحد...الحلقة 12

الحلقة 12
وقفت شيرين مذهولة من الطريقة اللى كلمها بيها ياسر وكانت لسه مقفلتش الباب ولقى شيالين بيحطوا حاجات جوه البيت... وشيرين بتقولهم"شكرا على تعبكم"
قفلت الباب ودخلت تجرى على اوضتها من غير ماتتكلم... وهى معدية من جنب ياسر لمح دموع فى عينيها... فدخل وراها قبل ماتقفل اوضتها عليها... وسألها بصوت هادى
"كنتى فين"
ردت بنشيج" انت بتزعقلى كده ليه وقدام الناس كمان"
"انا اسف كنتى فين وليه مقولتليش قبل ماتنزلى"
"انت لو كنت استنيت شوية كنت شفت انى نزلت اجيبلك سرير "
"متزعليش منى بس والله كنت هموت من القلق عليكى"
"وانت تقلق عليه ليه هو انا صغيرة"
"ايه البياخة دى... قلقان عليكى علشان احنا فى بلد منعرفهاش ومنعرفش المكان اللى احنا فيه امان ولا لأ... و100 فكرة جم فى بالى وبقيت قلقان اكتر... بعد كده متنزليش الا لما تقوليلى رايحة فين... وبطلى عياط وإلاااااا"
"هو انا يعنى هستأذن قبل ماانزل انا متعودتش على كده... وبعدين ايه وإلا دى انت بتهددنى؟"
"ياستى انا مش بهددك انا براضيكى... انا مستحملش اشوفك بتعيطى بسببى"
"متزعقليش كده تانى لو سمحت"
وهو بيمسح دموعها"حاضر بس برضه متنزليش من غير ماتقوليلى"
لسه هتتكلم حط ايده على بؤها "خلاص بقى الموضوع انتهى"
هزت دماغها معلنة موافقتها على كلامه... وكانت فى نفس الوقت متضايقة انها عيطت قدامه... ازاى حد يشوف دموعها مكنش لازم ده يحصل... اما ياسر كان متضايق انه اتسرع وعاملها بالشدة دى وهى كانت بتجيبله سرير... هو اتسرع ومكنش لازم يعمل كده
"قومى اغسلى وشك لحد ماادخل اعمل شاى ونشوف هنفطر ايه وبعدين نشوف مكان للسرير"
قبل ماترد عليه كان ياسر قام وخرج من الاوضة وفعلا فطروا وبدأوا فى اعادة تنظيم الاوضة بعد وصول السرير وهما بينظموا قرروا انهم يخلوا التليفزيون والكمبيوتر مع الصالون ويسيبوا الكنبة والمكتب والسرير فى الاوضة لحد مايجيبوا دولاب صغير يبقوا يشوفوا هيشيلوا ايه تانى... وبعد كام ساعة كانوا خلصوا.. والباب خبط... قام ياسر يفتح الباب
"سلامو عليكو.. انا جلال جاركم فى الشقة اللى جنبكم"
ياسر "اهلا وسهلا اتفضل"
دخل جلال البيت... وعرفه ياسر بيهم
"اهلا يااستاذ جلال انا ياسر ودى مراتى شيرين"
جلال"اهلا يامدام شيرين...تشرفنا"
شيرين"اهلا وسهلا فرصة سعيدة"
جلال"انا زميلكم فى الشركة وقلت بما اننا مصريين زى بعض فى الغربة نتعرف ونبقى اصحاب"
ياسر"طبعا طبعا منورنا... وحضرتك بقى فى قسم ايه"
"انا فى الحسابات... وعرفت ان مدام شيرين هتكون رئيسة العلاقات العامة لفروع المغرب... وحضرتك يااستاذ ياسر"
"انا موظف فى الادارة ان شاءالله"
"غريبة ان جوز رئيسة العلاقات العامة يبقى موظف عادى هاهاها"
اتضايقت شيرين من طريقته وخصوصا ان نظراته ليها اى واحدة تقدر تفسرها انها نظرات مش مريحة
"وحضرتك جيت لوحدك ليه؟؟ فين المدام"
بص لها ياسر وفهم انها اتضايقت زيه من الراجل الغتت ده وقال فى سره...اخيرا لسانها نفعنا بحاجة وكتم ضحكة خفية مظهرتش على وشه... ورد جلال
"مراتى من ساعة ماخلفت التوأم مى وملك وهى مش فاضية لحاجة خالص ولا حتى انا... بكرة تجرب ياياسر هاهاها"
ياسر"ان شاءالله"
"وهتنزلوا الشغل معانا فى العربية مش كده العربية بتيجى الساعة 9 الا ربع... على فكرة ياياسر ده فيه شيفت بالليل لموظفين الادارة وبيبقى مرتبه ازيد... اكيد هيعرضوا عليك"
"ربنا يسهل"
شيرين كانت مش طايقة جلال وحست انه هيفضل قاعد فقامت وقفت ووجهت كلامها لياسر
"اجيب الشنطة ياياسر انت جاهز مش كده"
رد ياسر بعد مافهم انها بتوزعه"اه جاهز"
وفعلا جابت شيرين شنطتها لما لقت جلال لسه قاعد ومش بيتحرك
"فرصة سعيدة يااستاذ جلال معلش ملحقناش نقعد معاك المرة دى علشان نازلين"
"رايحين فين ممكن ادلكوا على اللى انتوا عايزينه"
كان ياسر فاض بيه من غلاسة جلال
"لا شكرا يعنى احنا 2 عرسان جداد رايحين نتفسح شوية ومحتاجين نقعد مع بعض لوحدنا ولا ايه؟؟"
"اه طبعا يالا استئذن انا وابقى اجى فى وقت تانى"
شيرين"نبقى نشوف حضرتك فى الشغل بقى علشان احنا النهادرة وبكرة بنتفسح ومش جايين البيت غير متأخر"
قام جلال وهو ماشى وياسر بيوصله مال عليه ووشوشه وقاله
"انتوا صحيح عرسان جداد.. لما معاك عروسة حلوة زى دى تخرجوا ليه؟؟ انا لو منك مسيبهاش من حضنى"
رد ياسر بعصبية
"ماتحترم نفسك انت ايه اللى حشرك فى الكلام ده"
اتفاجئ جلال بالرد" ههه انا بهزر معاك يالا سلامو عليكو"
قفل ياسر الباب ورزعه وراه
"انت زعقت له ليه"
رد وهو مازال منفعل"راجل بارد وقليل الادب متتعامليش معاه"
"ليه  ويعنى ايه متعاملش معاه"
"كده علشان مش محترم... وبعدين ايه اللى قعدك معانا طول ماهو هنا كنتى ادخلى اوضتك"
"ليه يعنى ماانا كل شغلى مع رجالة ايه الجديد"
"الجديد انك مراتى وانا محبش ان مراتى حد يبصلها"
"انت مش ملاحظ انك بتزعقلى تانى "
"لو سمعتى الزبالة ده قال ايه هتعذرينى"
حست شيرين بفرحة خفية من انفعال ياسر ومكنتش متضايقة لان جلال فعلا كانت نظراته ليها وقحة وممكن يقول اى حاجة
"هيقول ايه يعنى؟"
"خلاص مالوش لازمة بس ياريت متتعامليش معاه تانى"
"حاضر"
"ياسلام عليكى وانتى بتقولى حاضر كده...والنبى ماتردى بكلام بايخ تانى"
كانت طريقته لطيفة وتقبلتها شيرين بدون رد بايخ زى ماقال واكتفت بابتسامة ونزلوا فعلا...راحوا اتغدوا وحاولوا يتعرفوا على البلد وهما ماشيين فى الشارع كان فيه زحام حست بيه شيرين بيمسك ايدها وبص لها
"علشان الزحمة"
الغريب ان سابت ايدها تغرق فى ايده وحست انه ماسكها بقوة وحنان فى نفس الوقت احساس ان حد خايف عليها ده كان مخليها فى سعادة من يوم ماتوفى باباها وهى فى الكلية وهى محستش انها مسئولة من حد كانت حاسة ان هى اللى مسئولة عن امها واختها... دلوقتى وهى حاسة انها مسئولة من ياسر مخليها سعيدة... عقلها فكرها ان مينفعش تستسلم حتى لو كانت حاجة بسيطة زى انه يمسك ايديها... طردت الافكار من عقلها وسابت نفسها مستسلمة للسعادة على الاقل الفترة البسيطة اللى هما خارجين فيها مع بعض.

هناك 24 تعليقًا:

  1. ااااااااااااااااه ياقلبى احساااااااااس جامدد بجد انا عنيا دمعت ههههههههه

    تسلم ايدك ياست الكل جامده بجد

    ........... ميرا

    ردحذف
  2. ميرا
    ربنا يخليكى
    وسلامة قلبك الف سلامة

    ردحذف
  3. اموت انا فى الراجل الحمش ^_^

    ردحذف
  4. ايوشه
    ههههههههههههه
    وهو حمش حمش مش اى كلام

    ردحذف
  5. دِينـآ للأسفْ مَقريتهاشْ من الأولْ ..

    هحاولْ أرجع أقراها وآجيلكْ تانِيْ .. :):)

    يـآربْ بَسْ ألحق أخلصها قبل الفصل الجديدْ ..:DD

    ردحذف
  6. حباية بندول
    تنورينى وان شاءالله تلحقى تقريها
    علشان اعرف رأيك وتتابعينى ان شاءالله
    اسمك حلو اوى على فكرة

    ردحذف
  7. يسلالالالالالالالالالالالالالالالالالام يسلام ايوه كده يا دينا ايه الحلاوه دي بدانا بقي الرومانسيه علي اصولها ابقي زودي الجوعه شويه هههههههههههههههههههههه
    جااااااااامده الحلقه
    Eman Osama

    ردحذف
  8. ايمان
    ميرسى يا حبيبتى على كلامك اللى بيرفع معنوياتى
    والرومانسية دى شكلها هتيجى فوق دماغنا
    من وجع القلب هههههههههه

    ردحذف
  9. ههههههههههه هو فى حد حمش كده الايام دى

    انا خلصتها كلها بجد رووووووووعه تسلم ايدك

    مستنيه الباقى

    ردحذف
  10. اسيرة الاحزان
    تسلميلى ربنا يخليكى
    وسعيدة انها عجيتك وفى انتظارك فى الحلقات القادمة ان شاءالله

    ردحذف
  11. يا سلااااااااااام يا سلاااااااااااام على الرومانسيه يا أستاذ ياسر لاء بجد عسل اووووى
    عجبنى الراجل الحمش الرومانسى فى نفس الوقت ده
    لاء حلقه جامده جدا تسلم ايدك يا دينااا

    يوياااااااااااا

    ردحذف
  12. يويا
    ربنا يخليكى يايويااااااا

    ردحذف
  13. هع لا شديد ياياسر فيك شبه منة ههههههههههه :))

    ردحذف
  14. مساء الخير \ دينا... انا ضفت صفحتك عندى على الفيس .. لى رجاء عندك كنت عايز اسالك سؤال ضرورى ومهم ممكن؟

    ردحذف
  15. لأ معلش كده كتير اوي يعني ...ياكلو مع بعض و يمسح دموعها ويخرجو مع بعض ومن اول يوم كمان !!!!!!!!!!!! طب اجلي شويه ,,, فين الاتفاق وكل واحد في حاله والجو ده !

    ردحذف
  16. احساس جميل اوووووووووووووووووى بجد

    ردحذف
  17. بجد تحفه تسلم ايدك:)

    ردحذف
  18. عسل ياسر دا ربنا يرزقنى بواحد زيوا هههههههههههههههههههههههه :)

    ردحذف
  19. ااااااااااااااااااااااااااااااااااه يا قلبى حرام بقي راعو احساسسنا شويه

    ردحذف
  20. ايه الرومنسايه ديه يا قلبى انا كنت متخيلهم اوى
    بجد انتى تجنينى

    ردحذف
  21. حلو كتييييييييييييييير ف تقدم

    ردحذف
  22. الحلقة ١٠ مش موجوده

    ردحذف

قول رأيك بلاش تقرا وتقفل من سكات...ارائكم تهمنى