الأحد، 5 يونيو 2011

تحت سقف واحد...الحلقة 13

الحلقة 13
لما رجعت شيرين كانت ندمانة انها بدأت تتساهل مع ياسر فى بعض التصرفات وكانت خايفة انها تبدأ فى التنازلات وقررت انها لازم ترجع تتعامل معاه بحزم زى الاول

ياسر كان سعيد ومش مصدق التحول اللى حصل فى تعامل شيرين معاه على الاقل الايام تمر بدون مشاكل وحرق دم من كلامها اللى زى الطوب

كان متبقى يوم واحد قبل بدء الشغل فى اليوم ده لما صحى ياسر كانت شيرين مازالت فى اوضتها قعد يستناها لما تصحى براحتها علشان يفطروا مع بعض او يشوفوا هيقضوا اليوم ازاى... اتأخرت واتأخرت ولما قلق عليها خبط الباب بشويش علشان ميزعجهاش  وعلشان يطمن عليها...فقامت فتحت له
"ايه يا شيرين انتى لسه نايمة"
"ايوه"
"طيب مش هتقومى نفطر وننزل شوية"
"لا مليش نفس ومش هنزل النهاردة... عايزة اقعد لوحدى لو انت عايز تنزل براحتك انا مش نازلة"
"مالك فيه ايه؟؟"
"مفيش حاجة محتاجة ارتاح وانام براحتى علشان الشغل بكرة اكون فايقة ومستعدة"
"طيب براحتك"
دخلت شيرين وقفلت على نفسها الاوضة وحست براحة انها اتعاملت معاه كده... وفعلا متقابلوش غير تانى يوم وهما نازلين الشغل... وهما خارجين من الباب قابلوا جلال هو كمان خارج من بيته... ومد ايده يسلم على شيرين
"يا صباح الخير بالعرسان"
فجأة دخل ياسر فى النص ومد هو ايده للسلام على جلال وهو بيرد التحية وقبل مايدى اى فرصة لجلال بالكلام كان مسك بايده التانية ايد شيرين ونزلها قدامه وهو فى النص بينها وبين جلال وبيقولها
"يالا ياحبيبتى علشان منتأخرش"
نزلوا وركبوا الباص جنب بعض وسألها ياسر
"مالك ياشيرين متغيرة من امبارح"
"مفيش حاجة.. وبعدين انت عارف طبعى منين علشان تقولى متغيرة مش يمكن ده الطبيعى بتاعى"
"بس اليوم اللى نزلنا فيه مكنتيش كده"
"قصدك ايه؟؟ كنت ازاى يعنى"
"كنتى بتتعاملى معايا احسن من كده"
"انا معملتش حاجة تضايقك انا بتعامل معاك عادى"
"ماشى اللى تشوفيه"
لما وصلوا الشغل ماتقابلوش خالص غير وهما راجعين وكان كل واحد بيتجنب الكلام مع التانى ولما وصلوا البيت دخلت شيرين على اوضتها
"استنى ياشيرين قبل ماتنامى او تقفلى عليكى اوضتك عايز اقولك حاجة"
"ها"
"زى ماجلال قال عرضوا عليا شيفت بالليل وانا وافقت ايه رأيك"
"رأيى فى ايه انت حر...وبعدين احسن علشان كل واحد يقعد فى البيت براحته ومحدش يضايق حد"
قالت الكلمتين ودخلت اوضتها ووقف ياسر متضايق من كلامها قد كده هى متضايقة من وجوده وما صدقت انه يبعد عنها... اومال يعنى انت كنت فاكر ايه؟؟ رد عليه صوته الداخلى.. كنت فاكرها هتقولك بلاش تقبل؟؟ اه ليه لأ..كان بيتمنى انها تقوله بلاش يقبل شيفت الليل وهو كان هيرفضه حتى بالزيادة اللى هو محتاجها كان مستعد يتنازل عن فرق المرتب لو كانت قالتله بلاش تسيبنى لوحدى.. مالك ياياسر فوق انت بتحلم هى كانت واضحة معاك من البداية وقالتلك ان فيه فروق بينكم مستحيل تتنسى... فضل فى حوار طويل بينه وبين نفسه وحس انه اتخنق نزل من البيت

لما شيرين دخلت اوضتها كانت متضايقة انه هيشتغل بالليل ويسيبها لوحدها معنى كده انها هتقابله قليل هى شغلها من 9 ل6 مساءا وهو من 8 بالليل ل8 الصبح... وصوتها الداخلى رد عليها وانتى زعلانة ليه مش ده اللى انتى عايزاه... قالت كده احسن

اول كام يوم كانت شيرين خايفة تنام وياسر مش فى البيت وبعد كده اتعودت وحصل ان فى اكتر من مرة جه ياسر بدرى ع الساعة 5الفجر وعرفت منه ان الشغل لما بيكون قليل مجموعة بيمشوا بدرى والباقى بيستنى المعاد الرسمى وهكذا بيبدلوا مع بعض
كان جلال كتير بيحاول يكلمها فى اى حاجة بره الشغل وكانت بتصده وبترد عليه كلام يحرجه وهو مفيش فايدة وكانت مش بترتاح لنظراته ليها ومر شهرين ونص على الحال ده مش بتشوف ياسر الا قليلا وبالتالى مفيش تعامل بينهم الا فى اضيق الحدود ويوم الاجازة بتقفل اوضتها عليها علشان متتعاملش معاه وهو حس انها بتتجنبه ففضل انه ميبقاش تقيل عليها واحترم رغبتها دى
و فى يوم وهى راجعة من الشغل قعد جنبها جلال فى الباص
"اخبار ياسر ايه"
"كويس الحمدلله"
"تصدقى ان حياتكم غريبة"
"غريبة ازاى يعنى"
"يعنى انتوا لسه متجوزين من كام شهر ولسه مخلفتوش ولا حاجة وانتى بتشتغلى طول النهار وهو بيشتغل طول الليل... يبقى بتقعدوا مع بعض امتى"
"وانت دخلك ايه؟؟ والله انت اللى حاجة غريبة بتتدخل فى خصوصيات غيرك ليه"
"انا بنصحك بس"
"متشكرين يا سيدى وكل واحد حر فى حياته"
"انا بس مستغرب هو ازاى سايب الجمال ده كله ويبات فى الشغل ويسيبك لوحدك"
"لا بقى انت زودتها اوى قوم من جنبى لاوريك مقامك قدام الناس"
"خلاص خلاص قايم الحق عليه انى بنصحك واعرفك ان الراجل لو حس ان مراته بعيدة عنه لازم يبص بره"
قام جلال من جنبها وقعد فى مكان تانى قام بعد ماسابها تغلى من كلامه الوقح... وتدخله فى مالا يعنيه... بس معنى كلامه ده ايه؟؟؟

هناك 10 تعليقات:

  1. فرج عبد الرحمن5 يونيو 2011 في 1:13 ص

    معني الكلام انه محتاج 143 قفا علي سهوة عشان يخليه في حاااااااااالة
    ااااااااااالله عليكي يا دينا تسلم اااااايدك بجد انا قريت من الحلقة الثانية مرة واحدة وفيه حلقات قريتها اكتر من مررررررة رووووووووووووووووعة ومن نجااااح لتفوووق دائما يا رب

    ردحذف
  2. فرج
    انا اتخضيت افتكرت قصدك ياسر
    قلت يالااااااااهوى فيه حد يكره ياسر
    تسلم يافرج ربنا يخليك يارب

    ردحذف
  3. تستاهل والله حد يعمل فى ياسر كده :(((((( والله ياسر دا صعبان عليا

    ما توزدى الجرعه شويه قصيرررررررررررررررره اووى دى D:D:

    يلا نزلى حقله كمان بقى

    ردحذف
  4. اسيرة الاحزان
    هى بتعمل كده فى ياسر خايفة تحبه
    بس هو ياعينى ميعرفش كده
    هههههه والله الحلقة طويلة
    والحلقة الجديدة بكرة ان شاء الله
    اكون كتبتها

    ردحذف
  5. ياااااااااااااااااااه دانت رخم يا شيخ اقصد جلال يعنى مستفز كده
    بس الحلقه جميله جدا تسلم ايدك

    يويااااااااااااا

    ردحذف
  6. اما اللى اسمه جلال ده سقيل بشكل ايووووووووووووه عليه بجد
    بس الحكايه جميله ومشوقه , ليا ملاحظة فكريني اقولهالك بيني وبينك
    رووووووووووووعه يا دودو بجد

    ردحذف
  7. يويا
    مستفز وحراق دم ورخم يابااااااااى عليه

    ردحذف
  8. شذى
    ربنا يخليكى على رايك ومتابعتك
    مستنية الملاحظة

    ردحذف
  9. جلال رخم اوى






    shosho saleh

    ردحذف
  10. ايه يادينا ده هو انتى لازم تدخليلنا الراجل الغتت ده فى النص
    بس بصراحه ردود ياسر وشرين عليه بتضحكنى
    علشان بحس انه عبيط

    ردحذف

قول رأيك بلاش تقرا وتقفل من سكات...ارائكم تهمنى