الأحد، 5 يونيو، 2011

تحت سقف واحد...الحلقة 14

الحلقة 14
اتضايقت شيرين من كلام جلال وطلعت وهى متنرفزة منه ودخلت البيت وهى قرفانة منه وبتمتم فى سرها
"راجل لا يطاق"
سمعها ياسر وهى بترزع الباب
"مين اللى لا يطاق"
"الزفت اللى اسمه جلال ده بجد بجح ووقح وقليل الادب"
"عملك ايه؟؟انا مش قايلك متتعامليش معاه"
"هو انا طايقاه هو اللى سخيف وبيتدخل فى حياتنا"
"قالك ايه منرفزك كده"
"اهو قليل الادب وخلاص"
"انا هوقفه عند حده"
وجرى ياسر ناحية الباب وعايز يروح يتخانق مع جلال علشان ضايق شيرين... مسكته شيرين بايديها الاتنين من ايده لانه كان مندفع وكانت محتاجة توقفه
"بلاش ياياسر "
"بلاش ايه ده لازم يتهزأ ويتضرب كمان ايه اللى يخليه يكلمك فى اى حاجة متخصوش"
"بلاش علشان خاطرى انا مش عايزة فضايح"
وقف ياسر عند كلمة علشان خاطرى ولف وبص لها
"انا علشان خاطرك راضى بحاجات محدش يرضاها ابدا...وعلشان خاطرك بتحمل حاجات محدش يتحملها.. وعلشان خاطرك برضه هسكت بس علشان خاطرى انا لو زودها معاكى تانى قوليلى"
سكتت شيرين وكانت مستغربة نبرة صوته اللى كأنها طالعة من القلب ومعرفتش ترد عليه غير
"حاضر"
"بمناسبة انى لحقتك قبل ماتجرى على الاوضة كالعادة عايز اقولك حاجة ومتكسفينيش"
"خير"
"انا طبخت النهاردة وعايزك تاكلى معايا زهقت من الاكل لوحدى"
ضحكت شيرين وهى بتقوله
"طبخت... ازاى"
"ابدا انتى بس بقالك كتير متكلمتيش معايا وعرفتى انى بقيت طباخ ولا احسن ست بيت"
مازالت شيرين بتضحك"ازاى وامتى"
"انا بقالى فترة زهقت من اكل السندويتشات فبقيت اتصل بامى واخد منها وصفات اكل واكتبه وانفذه.. مرة يشيط مرة يبقى مالح مرة يبقى دلع لحد مابقيت زى الست الشاطرة...هعمل ايه ماهو المضطر بقى لازم يتصرف..المهم هتاكلى معايا ولا آكل الاكل الحلو ده كله لوحدى"
"ههههههه هاكل معاك"
"يااهلا وسهلا بس اقولك حاجة... ضحكتك حلوة احسن من العقدة اللى بتعقديها على جبينك"
شيرين فجأة وكانها افتكرت انها لازم تكشر تانى قفلت بؤها اللى كان مبتسم وعقدت العقدة تانى وغيرت الموضوع
"انا داخلة اغير هدومى"
"ماشى بس برضه وحشة العقدة دى والضحكة احلى"
دخلت شيرين اوضتها واول حاجة عملتها بصت فى المراية لقيت شكلها مكشر صحيح وافتكرت كلامه وضحكت لقيت شكلها بقى احلى ففضلت انها تحاول لاتكشر ولا تضحك وتبقى عديمة رد الفعل... وراحت تتغدى معاه
وهما بينتهوا من الاكل
"تسلم ايدك الاكل حلو اوى"
"اول كلمة حلوة تقوليهالى من يوم مااتعرفنا...شكرا ياستى بس الاحلى انك اكلتى معايا خليتى للاكل طعم"
تجاهلت كلامه
"على كده بقى طبخت امتى وازاى انت يدوب تيجى تنام"
"ماهو مش كل يوم يعنى كل كام يوم كده لما اطبخ..وانتى بتعملى ايه"
"ساعات بجيب اكل جاهز او اعمل اى حاجة بسيطة مش طبخ يعنى"
"انا يدوب اقوم علشان الشغل مش عايزة اى حاجة"
"ميرسى"
"نفسى تتعاملى معايا على انى موجود وبلاش التجاهل ده وكل واحد فى جنب وبعيد عن التانى"
"معلش كده احسن مالوش لازمة اننا نتعود على وجودنا فى حياة بعض... لانها فترة وهتعدى وهننساها وكل واحد هيشوف حياته"
"اللى تشوفيه"
قام ياسر يلبس وهو حاسس ان شيرين قتلت فرحة جواه مجرد فرحة بلحظات قليلة شاركته فيها وبضحكة خفيفة شافها على وشها كانت مسبباله نوع من السعادة والارتياح... بس هو غلطان هو السبب انه نسى الاتفاق واتعامل معاها من قلبه مش بحذر

بعد ماياسر نزل فضلت شيرين قاعدة تستعيد كل كلمة قالها ياسر وكل حركة وكل لفتة وكل ماتفتكر كلمة حلوة تضحك بارتياح وسعادة وفى نفس الوقت ارتاحت للكلمتين اللى قالتهم فى الاخر علشان مش لازم يتعودوا على بعض ويشيلوا الفوارق اللى بينهم بالسهولة دى
وافتكرت كلام جلال استاءت منه اوى وقلبت شفتيها قرفا منه بس فكرت... يقصد ايه بكلمة الراجل لو حس انه مراته بعيدة عنه يبص بره... بس هى مش مراته... لا مراته قدام الناس
يكون جلال شاف حاجة وعايز يلفت نظرها ليها... هى مالها حتى لو بص بره ده يضايقها فى ايه؟؟؟ لا لازم يحترمها ويحترم شعورها... وفجأة قامت دخلت اوضته... اغلب الهدوم فى شنط وفيه هدوم على الكنبة.. مفيش حاجة غريبة يعنى... لمحت كيس على المكتب لوحده بعيد عن هدومه ...لفت نظرها وجالها فضول انها تشوف ايه اللى فى الكيس... راحت فتحت الكيس ... اتفاجئت... ايه ده؟؟؟ طقم نوم حريمى

هناك 20 تعليقًا:

  1. يسلام يا دينا لازم التشويق اللي في الاخر ده هههههههههههههههههههه بس حلوه الحلقه
    Eman Osama

    ردحذف
  2. ههههههههههههههههههه كملى يا دينا لازم تعلقينا كده لبكره
    بس حلقه جميله اووووووى
    تسلم ايدك

    يوياااااااااااااا

    ردحذف
  3. ههههههههههههههههههههههههههههههههههههههههههههههههههههههههههههههههههههههههه انا عاوزه من ده يا حزومبل

    انا ابتديت احب الواد الياسر ده هههههههههههههههههه

    بس والله النهارده قصيره اوي المفروض تمديها لبكره او لبعت ما تقعد تستنى رجعته خخ

    ردحذف
  4. ايمان
    يخليكى ليا ياااااااااااارب

    ردحذف
  5. توتا
    معدش فيه من ياسر ده
    فى الاحلام والروايات بس هههههههههه

    ردحذف
  6. طب ما تسيبيني احلم.. لازم تفوقيني من حلمي يعني..

    اييييييييييييه دنياااااااااااا

    ردحذف
  7. بجد يا دينا جامده جدا...بصراحه انا كنت حاسه ان القصه الجديدة مش هتبقى زى يوميات حماه بس بجد طلعت زيها ويمكن احلى ربنا يوفقك يا قمر وديما تمتعينا بقصصك التحفه دى

    ردحذف
  8. توتا
    هههههههههه احلمى ياحبيبتى يمكن تحصل المعجزة وتلاقى زى ياسر

    ردحذف
  9. يا لهووووووووووووى انا لسه هستنى لبكره هههههههههههههههههههههههههههه

    ردحذف
  10. ايه
    ربنا يخليكى يارب وعايزة اقولك انى كنت فاكرة استحالة اى قصة تتطلع زى يوميات حماة بس الحمدلله كلامكم بيشجعنى

    ردحذف
  11. اسيرة الاحزان
    افرح طيب واعتبره ادمان للقصة هههههههه
    ولا عندى تهيؤات وبلاش افرح

    ردحذف
  12. هههههههههههههههههه
    ليكون جايبهولها
    ده يبقي راجل وحش موووووووت
    هههههههههههههههههههههههه

    ردحذف
  13. شذى
    اخص عليكى ماتقوليش على ياسر كده
    ده عسل خالص هههههههههه

    ردحذف
  14. اه يا حبيبتى اعتبريه ادمان براحتك بس زودى شويه عشان كده هيجيلنا جفااااااااااااااف ههههههههههههههههههههههههه

    ردحذف
  15. مبرسى يا دينا حلقة انهاردةحلوة اوى sad angel

    ردحذف
  16. هههههههههههههههههههاى اكيد جايبه لاخته

    ردحذف
  17. اهو ده الى محتاجه اى بنت الرجوله والحنان في نفس الوقت

    ردحذف
  18. انا تانى مره بقراء القصصص بتعتك علشان عجبنى بجد وليه مش بتفكرى تعملهم مسلسل دول كلهم جامدين انا قرتهم كزلهم وبعيدهم تانى

    ردحذف
  19. هههههههههههههههههههههههههههههههههه الغيرة ظهرت

    ردحذف

قول رأيك بلاش تقرا وتقفل من سكات...ارائكم تهمنى