الاثنين، 6 يونيو 2011

تحت سقف واحد... الحلقة 15

الحلقة 15
فضلت شيرين واقفة وماسكة الطقم فى ايديها وهى مستغربة... ايه اللى جاب ده هنا؟؟ ولمين؟؟ وبعدين قالت لنفسها" وانا مالى" وسابت الطقم مكانه وخرجت من الاوضة.
طول الليل مش عارفة تنام وصورة الطقم مش بتروح من بالها ياترى جايبه لمين؟ وامتى؟ وفين؟ ياترى يعرف واحدة مثلا طيب امتى وهى بترجع تلاقيه وبييجى قبل ماتنزل... ازاى معقول يكون فيه واحدة بتجيله هنا... ايه ... ازاى ... معقول
كانت دى الفكرة المسيطرة عليها والتفسير الوحيد اللى وصلت له
الصبح قبل ماتنزل سمعت ياسر داخل خرجت له
"ياريت متستقبلش ضيوف وانا مش موجودة"
"ضيوف مين؟؟صباح الخير الاول"
"اى ضيوف يكونوا بييجوا وانا مش موجودة "
"انا محدش بيجيلى واصلا ماليش اصحاب غير فى الشغل"
"اعتقد ان فيه حد كان موجود امبارح والاكل اللى كان معمول ده كان حد مهتم بيك عاملهولك"
"مالك ياشيرين ماتتكلمى بوضوح انا مش فاهم حاجة"
"بتكلم عن صاحبة الطقم اللى ع المكتب "
"اه .. انا جايبه فعلا لواحدة بحبها"
"انت حر المهم مفيش واحدة تدخل هنا ... على الاقل علشان سمعتنا واحتراما ليا قدام الناس"
قالت جملتها ونزلت بسرعة قبل مايلحق يرد عليها... كانت متضايقة اوى لما قالها انه بيحب وكانت ماسكة دموعها بالعافية... دموع مش عارفة سببها ركبت الباص ومسحت دمعتين نزلوا غصب عنها
فجأة جه جلال ولسه هيقعد جنبها وبيقول
"صباح الخير الجميل ماله"
صرخت فيه
"صباح الزفت على دماغك ياشيخ اوعى من وشى"
قامت بسرعة ونزلت من الباص وقالت للسواق انها مش رايحة الشغل النهاردة... واول مانزلت اتصلت بمساعدها فى الشغل وقالت انها مش جاية الشغل لسبب قهرى وقفلت بسرعة
مشيت وهى مش عارفة رايحة فين اهم حاجة متطلعش البيت ... كانت الدموع بتنزل من عينيها غصب عنها وحاولت تسأل نفسها كل ده ليه؟؟ علشان ياسر بيحب وايه المشكلة ماهو اكيد له حياته الخاصة مش يمكن كان بيحب من قبل مايشوفها... حتى لو بعد ماعرفوا بعض ... هى اللى قالت له ان هو حر فى حياته والاتفاق اللى بينهم وقت وهينتهى... حست بحد بيشدها من ايدها.. اتخضت... التفتت... اتفاجأت
"ياسر... ايه اللى نزلك دلوقتى"
"ايه اللى نزلك من الباص ورايحة فين كده... قلقتينى عليكى... ايه ده انتى بتعيطى... حد ضايقك؟"
"انت عرفت منين انى نزلت من الباص"
"طيب تعالى نرجع البيت ولا اوصلك الشغل"
"لا مش رايحة الشغل "
"طيب تعالى واحكيلى مالك"
مشوا فى اتجاه البيت"قولى انت الاول ايه اللى نزلك"
"انا كل يوم ببص عليكى من الشباك بعد ماتنزلى وافضل مستنى لحد ماالباص يمشى"
استغربت وبصت له
"ليه"
"ابدا علشان اطمن عليكى وعلشان محدش يضايقك"
"مالك وعنيكى شكلك معيطة... احكيلى في ايه"
"مفيش انا بس مخنوقة شوية ماما ومروة وحشونى اوى"
ملقتش حاجة تقولهاله غير كده ... كانوا طلعوا البيت
"على فكرة انتى نزلتى بسرعة وكنت عايز اكمل كلامى معاكى"
"انت مش قلت اللى عندك وانا قلت اللى عندى خلاص"
"لا انا كنت عايز اؤكد لك ان مفيش حد ممكن ييجى هنا وخصوصا زى ماانتى فاكرة تعالى اوريكى حاجة"
خدها من ايدها على اوضته وهى مستسلمة وماشية معاه
"شوفى كده الشنطة دى"
ووراها شنطة فيها هدوم مش كتير كلها حريمى
"ايه ده"
"دى شنطة قلت هبعتها لياسمين اختى مع سليم زميلى اللى مسافر كمان 3 ايام... ياسمين فرحها كمان اسبوعين وكنت عايز اجيب لها شوية هدوم من هنا يعنى هدوم عرايس على هدوم للخروج... واتضح انى فاشل نزلت كذا مرة ومجيبتش غير حاجات بسيطة وكنت عايز اقولك تنزلى معايا يوم الجمعة بس خفت تحرجينى كالعادة فسكتت"
"انا احرجك... ليه"
"كل مااتعامل معاكى عادى الاقيكى بتعاملينى وحش اوى"
"لا طبعا مقصدش اعاملك وحش"
"انا عايز اطمنك انا مش ناسى ومش هنسى الاتفاق اللى بيننا بس نفسى نتعامل كاننا اخوات على الاقل مش اعداء"
"لالا اعداء ايه؟... طيب نستغل انى اجازة وادخل نام لحد ماالمحلات تفتح وننزل مع بعض نجيب احلى هدوم لياسمين"
"بجد ياشيرين... هتنزلى معايا"
كان ياسر فرحان بمعاملة شيرين وموافقتها على النزول معاه بس اللى كانت فرحانة اكتر شيرين لانها اتأكدت ان شكوكها مش صح
وقعدت تستناه لحد مايصحى وقررت انها تتعامل معاه بشكل احسن شوية هو ماضايقهاش فى حاجة يبقى بلاش تضايقه تانى بكلامها البايخ... وخلاص هو اكد لها انه مش هينسى الاتفاق... وطبعا هى مش هتنسى يبقى المعاملة الطيبة الودودة مش هتخسَر
بعد كام ساعة صحى ياسر ونزلوا وقضوا يوم مع بعض من احلى الايام... زى اول يوم نزلوا فيه مع بعض كان ماسك ايدها طول ماهما ماشيين ولو فيه زحمة كان بيخاف عليها كان يحاوطها بدراعه من كتفها ويرجع يمسك ايدها تانى... لفوا على محلات كتير واشتروا حاجات كتير منها هدوم خروج ومنها لوازم للعروسة... واتغدوا بره ورجعوا البيت قبل ميعاد شغل ياسر بساعة
بعد ماياسر نزل كانت سعيدة اوى كل ماتفتكر حطت ايده على كتفها كانت بتحسسها بالامان والحنان والسعادة... قامت اتصلت بمامتها وسألتها على طريقة اكل حلو... اخدت الطريقة وسهرت تطبخ لاول مرة فى حياتها... والصبح قبل ماتنزل لما قابلت ياسر بعد رجوعه من الشغل
"ياسر ياريت متدخلش المطبخ وتطبخ اكلاتك الشهية النهاردة"
"ليه"
"علشان انا اللى طابخة النهاردة واستنانى نتغدى مع بعض"
كانت مبتسمة وهى بتكلمه على غير العادة... كان ياسر فرحان بيها وبمعاملتها اللى بدأت تتحسن ودعها بابتسامة
وهى بتركب الباص رفعت عينيها للشباك لقيت ياسر واقف يطمن عليها وشاور لها وشاورت له وركبت واتحرك الباص متجها للشغل.

هناك 32 تعليقًا:

  1. يا سلاااااااااااااااااااااااام ولا كان ف بالنا انها هدوم لاخته.. اخس علينا اخس ههههههههههههههههه


    مافيش جرعه تانيه من الاضافه دي ههههههههههههههههههههههه.. عجبتني اوي بس والله قصيره.. فكي كيسك وبحبحيها شويه يا دندن الله

    ردحذف
    الردود
    1. هههههههههههههههههههههههههههههههههههههههه اخس علينا فعلا

      حذف
  2. يالهوى عالرومانسييية بجد بجد بجد كل حلقة بتبقى اجمد من اللى قبلها... تسلم ايدك

    ردحذف
  3. بجد كل يوم الاحداث بتشد اكتر وجو الرومانسية اللى فيه شد وجذب دة حلو اوى بجد احساسك عالى اوى يا دينا

    مى المدثر

    ردحذف
  4. انا عايزه واحد زى ياسر مليش دعوه بقى :((((((((((

    والنبى يا دينا شيلى التدقيق عشان كده هيجيلى جفاف وشلل بسببك هههههههههههههههههه

    ردحذف
  5. توتا
    هههههههههههههه مش راضية تقتنعى انها طويلة فعلا
    وبمقام حلقتين من يوميات حماة

    ردحذف
  6. ايه
    ربنا يخليكى يا حبيبتى

    ردحذف
    الردود
    1. بجد احلي قصه شوفتها انا شوفتها الساعه 2بالليل في صفحه ع الفيسبوك بس مش لاقيت الحلقه 11 لحد 14 وكنت متشوقه اوي اعرف االلي حصل فدورت عليها ع النت ولا قيتها
      ومش هنام الا لما اخلصها عشان مش هقدر انام الا لما اكملها
      ياريت لو كاتبه قصص تانيه تقوليلي اسمائهم لان اسلوبك جميل اوووووووي

      حذف
  7. مى
    ميرسى ياجميل كلك ذوق ويارب تتابعينى دايما

    ردحذف
  8. اسيرة الاحزان
    احب اطمنك واقولك ان زمن المعجزات انتهى

    اشيل ايه؟؟مش فاهمة
    قوليلى علشان اشيله ميرضينيش يجيلك الحاجات دى ههههههههه

    ردحذف
  9. دِينـآ جَبتها مُقتطفاتْ من الأول وكِده ..
    بس فِوهمتها يعني والحمدلله .. :DD

    جَميله جداً بجدْ .. حلوه خالص خالص ..

    كِده اقدر اتابعها معاكي تمام ..:):)

    ردحذف
  10. كنت عارفة انها لياسمين
    شكلها قلب رومانتيكي خااااااااااااااالص
    مقدرش انا على كده خااااااااالص

    ردحذف
  11. حباية بندول
    ممكن تجيبى الحلقات بالترتيب من الارشيف شهر مايو هتلاقى الحلقات بارقامها
    علشان اللى جاى اقل بكتير من اللى فات
    وان شاءالله تتابعينى فى كل اللى جاى
    نورتيييييييييييييييينى

    ردحذف
  12. شذى
    انا قلت نغير وجع القلب اللى شفناه مع ايمان وولادها
    لشوية الرومانتيكيات دى

    ردحذف
  13. الراجل جلال ده رخم ومستفز عامل زي الراجل الي طلع في عمر وسلمي2 الي بيحشر نفسه في كل حاجة..بس روعةواثرت فيا وفي بعض كلام كنت بقراه وببكي..جميلة جدااااااااااا

    ردحذف
  14. كنوز
    منورة بقالك كام يوم مش باينة لعل المانع خير
    وميرسى انها عحبتك ومتزعليش منى علشان ابكيتك

    ردحذف
  15. لا ياقمر مش زعلانة منك ولا حاجة بس هي فعلا روعة ومؤثرة في بعض المواقف

    ردحذف
  16. أنــا لو عندى جـار زى جلال دآآ وربنا هانفخـه لا يطــاق
    أحدآآث رائعة
    أستاذة دينا انتى متميزة

    ردحذف
  17. ربنا يخليك يامحمد ده من ذوقك

    ردحذف
  18. ايه الجمال ده كلهsad angel

    ردحذف
  19. ايوة كدة يادينا خليها كلها حلوة كدةانا اكيد حبقا متابعة معاكي علي طول

    ردحذف
  20. بجد بتجنن اوى انا عيطت معاها احساس رائع تحيه ليكى
    وعد العيون

    ردحذف
  21. حلوة اوى يا دينا رائعة بجد بتذلعينى من جو الاكتئاب و بترجعينى لزمان بالرغم من انى مش كبيرة بس الدنيا بتغييرنا
    سلمى

    ردحذف
  22. رووووووووووووووووووعه بس والنبي اعملي نهايات حلوووووووووووه

    ردحذف
  23. ابوس ايدك ما تصدمينى كمان شويه وخلى النهايه حلوه والنبي والنبي والنبي :)

    ردحذف
  24. بجد بجد بجد بجد...دى قصة فوووق الروعة وجمييلة جدا

    ردحذف
  25. حلو جداااااااااااااااااااااااااااا

    ردحذف
  26. بجد الحلقة تحففففففففففففففففة بالتوفيق دايما

    ردحذف
  27. انتى راااااااااااائعة يا دينا باتوفيق والنجاح دايما

    ردحذف

قول رأيك بلاش تقرا وتقفل من سكات...ارائكم تهمنى