الجمعة، 10 يونيو 2011

تحت سقف واحد...الحلقة 18

الحلقة 18
بعد ماياسر قال لمامته انه موافق انها تطلب ايد منال... فعلا تانى يوم ندهت منال وهى رايحة السوق ومكنش ياسر فى البيت
"تعالى يامنال عايزاكى... انتى كنتى رايحة فين"
"كنت رايحة السوق ياطنط مش عايزة حاجة اجيبهالك معايا"
"لا ياحبيبتى ربنا يخليكى... انتى عاملة ايه فى كليتك"
"اهو الحمد لله هانت فاضل سنة"
"ومرات ابوكى عاملة معاكى ايه؟"
"زى ماهى انا بحاول مخليهاش تمسك عليا اى غلطة علشان الحياة تمشى من غير خناقات ونكد"
"احنا عايزين نيجى نخطبك لياسر بس قلت اسألك الاول قبل مانكلم ابوكى"
ظهرت على منال الفرحة الممزوجة بالكسوف ومردتش وطبعا ام ياسر فهمت ومرضيتش تحرجها
"ها يا منال نيجى ولا بلاش"
"تنوروا ياطنط بس تفتكرى طنط عايدة هتوافق"
"احنا مالنا بيها لو انتى موافقة ملكيش دعوة"
ضحكت منال "اقوم انا علشان متأخرش"
"طيب ياحبيبتى ولا كأنك تعرفى حاجة علشان متمسكهاش عليكى"
"حاضر ياطنط"
فى نفس اليوم بالليل كانت ام ياسر اتفقت مع ابو ياسر انه يقابل ابو منال فى القهوة ويكلمه ويحاول ياخد منه كلمة ويحددوا معاد الزيارة قبل مايروح وياخد راى مراته وممكن تاثر عليه وتخليه يرفض
وفعلا اللى حصل انه قابله واخد منه موافقة مبدئية ومعاد للزيارة علشان مراته تكون امام الامر الواقع... وفى الزيارة لقوها بتتعامل معاهم بكل ذوق وفرحانة وبين كل كلمة والتانية
"منال دى بنتى وانا نفسى افرح بيها"
وقرأوا الفاتحة وحددوا معاد يجيبوا فيه الشبكة... واتفقوا ان الجواز يكون بعد انتهاء عقد ياسر
كان ياسر بيحاول يكون سعيد وخصوصا ان كل اللى حواليه سعداء... وخصوصا منال كانت فعلا مفيهاش غلطة عاقلة ومؤدبة وجميلة وكل حاجة ممكن يتمناها... بس مكنش فرحان بيها وكان دايما بيفكر فى شيرين حتى كلامها وردودها العدوانية كان بيفتكرها ويعيش معاها فى احلام نومه ويقظته... ويوم جه تليفون من حسن وقاله ان ياسمين بتولد وهياخدها ع المستشفى وعايزه يجيب مامته ويقابلهم هناك ... وفعلا لما وصلوا كانت ياسمين فى العمليات وبعد شوية سمعوا صوت صراخ النونو... طلعت الممرضة بالطفل
"مبروك جابت بنت... حمدالله على سلامتها"
بعد خروج ياسمين من العمليات وبعد مافاقت
"عايزة اشوف البنت"
الام"اهى ياحبيبتى زى القمر شبهك وشبه ابوها...ربنا يخليهالكوا"
حسن"نسميها ايه ياياسمين"
ياسمين"مش عارفة.. شوف انت اسم يكون حلو"
رد ياسر بسرعة"ايه رأيكوا تسموها شيرين"
ياسمين"حلو ايه رأيك يا حسن"
حسن"حلو اوى علشان يبقى فى البيت ياسمين وشيرين"
الام"مبروك ياابو شيرين وتتربى فى عزك"
فرح ياسر بالاسم اللى اختاره... بس مش علشان اختاره.. لا علشان شيرين هيفضل يقول اسمها طول العمر... قرب لشيرين الصغيرة وشالها وخدها فى حضنه وباسها بكل حب وحنان

مرت الاسابيع وشيرين متضايقة ونفسها الاجازة تخلص بسرعة علشان تشوف ياسر... كانت بتفكر تتصل بيه بس كانت كرامتها بتمنعها فى اخر لحظة... وقررت انها المفروض تحاول تقنع نفسها انها متستسلمش لاحساسها بيه... بس كانت بتشتاقله اكتر... لحد ما الاجازة قربت تخلص ففرحت اكتر مع انها المفروض هتسافر ويكون لسه على اجازته اسبوع االلى نزلته قبله ومكنتش عارفة هتقضى الاسبوع ده فى البيت لوحدها ازاى.

كان ياسر مستنى الاجازة تخلص بفارغ الصبر لاشتياقه لشيرين ولما كان فاضل اسبوع قرر يكلمها علشان يتفقوا ويسافروا مع بعض... وهو فى الحقيقة كان بيدور على حجة يكلمها بيها... كان كل يوم يؤجل المكالمة لانه خايف رد فعلها يضايقه... وقبل ميعاد السفر ب4ايام اتصل بيها وكان قلبه هينط من صدره وهوبيطلبها

كانت شيرين قاعدة كعادتها بتفكر فى ياسر وفجأة رن الموبايل ولما بصت كان قلبها هيقف من المفاجأة لما لقيت رقم ياسر
وبدقات قلبها اللى حست انها اعلى من صوتها"الو"
"الو ... ازيك ياشيرين"
"الحمدلله انت عامل ايه"
"كويس الحمدلله... بقولك هترجعى معايا ولا لوحدك زى ماجيتى"
"اكيد لوحدى مش انت اجازتك لسه عليها 10 ايام"
"لا انا نزلت وراكى فى نفس اليوم بس ملحقتش الطيارة"
فرحت شيرين لما قالها كده وانه حاول يراضيها
"كنت عايز تلحقنى بجد؟؟"
"ايوه علشان هنقول ايه لزمايلنا ..هنقول كل واحد نزل اجازة لوحده ليه"
"يعنى علشان زمايلنا بس"
"نبقى نتكلم بعدين... المهم هنسافر مع بعض ولا لأ"
"اوك هنتقابل فى المطار"
"لا هعدى عليكى بتاكسى زى المرة اللى فاتت ...هأكد الحجز وابقى اكلمك واقولك تجهزى امتى بالظبط"
عدت الايام اللى بعد كده كأنها شهور لحد المعاد اللى اتفقوا عليه... ولما نزلت شيرين من العمارة اخد منها الشنط وحطها فى العربية وسلم عليها واخد راسها بين ايديه وباسها وهو بيقولها بهمسات
"وحشتينى"

هناك 29 تعليقًا:

  1. بس ماهو هاينكد عليها كالعاده يعني ايه الرخامه دي

    ردحذف
  2. oh My God
    NOOOOOOOOOOOOOOOOOO COMMENT

    ردحذف
  3. ماينفعش تغيري رايك في الحلقة وتغيري موضوع الخطوبه دا

    ردحذف
  4. ايوه يا ودييييييييييييييييع.. اتنين لمووووووووون

    والله انتي اكتر يا تحت سقف واحد خخخ

    ردحذف
  5. دينا الاقيش معاكى رقم ياسر ههههههههههههههههههههههههههههههههه

    ردحذف
  6. انا مع راى ايناس قلبا وقالبا
    او اقولك فركشى الخطوبة بسرعة قبل ما منال تحبه هى كمان ...احنا مش عايزين نكسر قلب حد ...بلييييييييييييييييييييييييز

    ردحذف
  7. ايناس
    ياسر نكدى؟؟؟؟؟؟
    اومال شيرين تبقى ايه؟؟؟؟

    ردحذف
  8. لا مش قصدي نكدي بس قصدي ان الخبر دا هاينكد عليها وعلينا

    ردحذف
  9. هنودة وايناس
    يفركش الخطوبة ازاى والبنت مفيهاش غلطة
    مش حرام عليكم يا قاسيييييييييييييييين

    ردحذف
  10. توتا
    خليهم 3 لمون علشان اشرب معاهم ههههههههه

    ردحذف
  11. اسيرة الاحزان
    طيب لو جبتلك رقم ياسر
    هتنافسى شيرين ومنال
    العدد عنده مكتمل ههههههههه

    ردحذف
  12. يوووووووووة مليش دعوة بقى ...شيرين متتجرحش

    ردحذف
  13. و كمان بيسمى بنت اخته على اسمها ...هو فى كده يا ناااااااااااااااااااااااااااس

    ردحذف
  14. ايناس
    الخبر نكد علينا احنا خلاص
    لسه شيرين ياعينى

    ردحذف
  15. هنودة
    ايوه كده محدش علق خالص على الحتة دى
    برافو عليييييييييييكى

    ردحذف
  16. يااااااااااااااااااااااااااه لا فظيعة واخر حتة حركة جامدة وجريئة منه..بس ايه ده هي الحلقة الصغيرة دي بس ..بس انا زعلانة علشان حيخطب واحدة تانية بتمني انه يفركش الخطوبة دي بس بقول حرام البنت ذنبها ايه..يلا مستنية الباقي بفارغ الصبر

    ردحذف
  17. كنوز
    هى حركة جامدة بس طلعت باحساسه مش بتفكيره
    وللاسف هو خطب خلاص ربنا يستر من اللى جاى

    ردحذف
  18. انا الاول كنت بكره شيين دى بسبب قله ذوقها معاه ..دلوقتى بجد صعبانه علياا ممووووووووووت
    بس الحركه الاخيرة دى جامدة جامدة يعنى...ياريت بقى يا دندن تفركشى الخطوبة دى بكره

    ردحذف
  19. ايه
    لا شيرين دى غلبانة وطيبة وكانت بتعامله كده لانها خايفة انها تحبه
    وبقى يعنى انتى يرضيكى يفسخ الخطوبة والبنت معملتش حاجة حرام احنا ولاياااااا هههههههه

    ردحذف
  20. بجد مبدعة يا دينا بجد انا بستمتع وانا قاعدة اقرى التفاصيل وبحس بيها بس مش تتاخرى بقى فى كتابة الحلقة الجديدة

    سلمى

    ردحذف
  21. يا ساااااااااااااااااااااتر يا رب
    يا دينا ده انتى عبال متكتبي حاجة ترد الروح قلبنا بيقع في رجلينا والله ,, بس انا مضايقة من اللي هو عمله مع منال ده ,, بس مش عارفة ربنا يهديكى يا شيرين يا رب وتفرحوا قلبنا بقي :D :D :D

    ردحذف
  22. سلمى
    ميرسى رينا يخليكى وان شاءالله مش هتأخر فى الحلقات

    ردحذف
  23. امنية
    هو معملش حاجة غلط هو فاكر شيرين مش بتحبه وبالتالى قال يعيش حياته طبيعى

    ردحذف
  24. يا بختهم نفسى اعيش كل حاجة بصدق و حنية كدةsad angel

    ردحذف
  25. ياااااااااااه حلوة اوووووووووووووووووي الحلقة ايوة كدة خليها كلها حلوة

    ردحذف
  26. ياه على تصاريف القدر ..بس لسه مش عارفين إيه مخبي ..يارب تكون الأيام الجاية احلى .زماما زيزي

    ردحذف
  27. ممممممممممممممممممممممم

    ردحذف
  28. ياجماعه انا بنت واسمي رانيا انا عاجبني ياسر الصراحه مفيش رقم ولا حاجه ابثي منافسه بين شرين ومنال وايناس

    ردحذف
  29. هو ايه معندوش كرامة خالص كدا
    ازاي بعد كل دا بيبوسها ويقولها وحشتيني
    مش منطقية الحتة دي :[
    عصام الدين

    ردحذف

قول رأيك بلاش تقرا وتقفل من سكات...ارائكم تهمنى