الاثنين، 13 يونيو، 2011

تحت سقف واحد... الحلقة 21

الحلقة 21
بعد ماياسر حس بصد شيرين ليه كان بيحاول انه يحب منال وينسى شيرين فكان بيكلمها كل يوم بالساعات وطبعا لانهم كانوا بيروحوا الشغل مع بعض وييجوا مع بعض فكانت شيرين ملاحظة بعد ياسر عنها وميله ناحية منال وكانت هتموت من الغيرة بس مش قادرة تعمل حاجة... لحد يوم وهى فى الشغل سمعت ان فيه قرار صدر من الفرع الرئيسى لكل الفروع فى الدول المختلفة... ومضمون القرار... ان اقصى مدة لاى عقد من دولة لاخرى سنتين غير قابلة للتجديد... لما شيرين عرفت بالقرار ده اتضايقت جدا... معنى كده ان فاضل شهور وينتهى اتفاقها مع ياسر ويخرج من حياتها للأبد
اما ياسر ففى الفترة اللى قرب فيها من منال حس بصعوبة حياتها مع مرات ابوها والمشاكل اللى بتفتعلها مع كل حركة وكلمة وكان اغلب كلام منال لياسر"انت جيت لى بعد ماكنت قربت ايأس من حياتى كلها... انت الوحيد اللى هتخرجنى من اللى انا فيه... بستنى اللحظة اللى اسيب فيها بيت بابا ونتجوز"
واول ما عرف بالقرار الجديد قال لباباه يشوفوا شقة معقولة ويجهزوها باللى تختاره منال علشان يتجوزوا بعد شهرين بالكتير من رجوعه من السفر وهو هيبعتلهم كل التكاليف

بعد معرفة شيرين بالقرار كانت على وشك الاكتئاب من مجرد تفكيرها ان علاقتها بياسر هتنتهى بعد شهور وخصوصا انها سمعته مرة وهو بيكلم مامته فى التليفون وبيسالها عن الشقة اللى جابوها وعن رأيها فيها ورأى منال... فتوصلت شيرين لقرار
طالما الفراق جاى لا محالة يبقى تقضى الوقت اللى فاضل وهى بتستمتع بقربها من ياسر مش ببعده عنها... بس من غير ماتدوس على كرامتها
وبدأت فعلا فى يوم بعد مارجعوا من الشغل ...وكانوا الفترة اللى فاتت بيتجنبوا حتى انهم يتغدوا مع بعض وكل واحد بيدخل اوضته او ينزل بالليل شوية... ففى اليوم ده خبطت شيرين على ياسر
"انت صاحى"
"ايوه فيه حاجة"
"لا ابدا... بس انا لقيت البيت محتاج شوية حاجات قلت لو فاضى تنزل معايا نشتريهم مع بعض"
"ماشى... هتنزلى امتى"
"ادخل ألبس وننزل"
نزلوا مع بعض وكانت شيرين مستنية يمسك ايديها زى زمان ولكن خاب املها لما لقيت ياسر ماشى جنبها عادى وفعلا راحوا اشتروا حاجات للبيت وكان ياسر بيفك فى التعامل واحدة واحدة... هى عارفة ان قلبه ابيض ومش بيقسى عليها... مش بيقسى عليها ولا هو طبعه مش بيقسى على حد خالص... مش مهم المهم انهم يتعاملوا مع بعض كتير وعن قرب... وهما ماشيين جنب محل ملابس
"شيرين تعالى بصى كده"
"اه.. حلو اللبس اللى هنا عايز تشترى حاجة لاختك ولا لخطيبتك"
"تعالى ندخل وانا اقولك"
كانت متضايقة لانها حست انه هيشترى لخطيبته... يشترى هو حر... بس مش هى اللى تنقى الهدوم اللى هتلبسها له
"شيرين ايه رأيك فى الطقم ده"
"شيك اوى مبروك عليها"
"الله يبارك فيكى بس لما تدخل تقيسه الاول...يالا ادخلى مااشوفه عليكى ليكون كده ولا كده"
"مين دى انا؟"
فرحت شيرين اوى انه بيجيب لها حاجة ايا كانت الحاجة دى بس انه فكر يجيبلها حاجة دى كانت كبيرة اوى بالنسبة لها... دخلت تقيس الطقم وكانت فرحانة اوى وياسر كمان ابتسم لها وقالها
"حلو اوى عليكى"
رجعوا البيت وهى فى منتهى السعادة وبتحاول تتناسى اى حاجة ممكن تضايقها... ورجعوا يقربوا من بعض تانى وكل وقتهم مع بعض بيخرجوا مع بعض ويقعدوا يتفرجوا على التليفزيون مع بعض ويروحوا الشغل مع بعض وييجوا مع بعض
كان ياسر مستمتع جدا بالوقت اللى بيقضيه مع شيرين... وكذلك شيرين بس كان اللى مضايقه احساسه بالتمزق بين شيرين ومنال... هو متأكد انه بيحب شيرين بس حب من طرف واحد وكان محتار فى تفسيره للمعاملة الطيبة اللى بتعاملهاله شيرين وخاف لو لمح لها تانى تصده ويرجعوا يبعدوا عن بعض تانى... وكانت منال بتتعلق بيه اكتر واكتر وكانوا فى مصر ماشيين فى التجهيزات للجواز علشان اول مايرجع يكون البيت جاهز
فاتت شهور وكانت الاجازة قربت يعنى لسه تقريبا شهر ونص ويرجعوا .... وفى يوم وهما نازلين الشغل ملقاش شيرين جاهزة زى ما هو متعود فراح لها
"شيرين انتى لسه نايمة"
كانت شيرين فى سريرها فعلا
"مش قادرة اقوم"
"مالك"
وقرب ياسر منها ولمس وشها بحنية
"ايه ده انتى سخنة اوى"
ولما لقى ياسر ان الوقت بدرى على مواعيد العيادات
"شيرين تقدرى تقومى معايا اوديكى مستشفى... اكيد مفيش دكاترة دلوقتى"
شاورت له شيرين بالموافقة ورفعت نفسها من على السرير وياسر بيسندها ويدوب حطت رجلها على الارض ووقفت لقيت نفسها بتدوخ وبتقع على الارض لولا ان ياسر كان ماسكها كويس فوقعت فى حضنه بدل الارض ... اتخض عليها ياسر اكتر واكتر ونيمها تانى فى السرير ... كانت مش قادرة تتكلم .... بقى ياسر مش عارف يتصرف... فكر ان ربما حد من زمايله المغاربة يكون معاه رقم دكتور ممكن يجيلهم البيت وفعلا كلم زميله واتصل بدكتور ساعة وكان الدكتور عنده
بعد ماكشف عليها قاله انها عندها برد ودرجة حرارتها40 وده سبب هبوطها ولازم كمادات لتنزيل الحرارة والدوا تاخده فى مواعيده المحددة
بعد الدكتور مانزل دخل ياسر وقعد جنب شيرين وفضل يعملها فى كمادات وكان اتصل بصيدلية قريبة جابت الدوا واداهولها
كانت شيرين نايمة يدوب تقوم تبص له بس وتنام تانى وهو مش قادر يقوم من جنبها... حتى فى المعاد اللى المفروض  يكلم منال فيه نسى انه يكلمها وكان كل تركيزه مع شيرين بيتأملها وهى نايمة كالملاك وبالليل كانت الحرارة بدأت تخف شوية ... كان قاعد جنبها على السرير وكل شوية يجس ايدها او راسها وسند ظهره على السرير ولف ناحيتها وايده على شعرها وناااااام
قلقت شيرين من نومها الفجر لقيت ياسر نايم جنبها وايده على شعرها فقامت بكل هدوء علشان ميصحاش ودخلت الحمام
وهى فى الحمام صحى ياسر من النوم وملقاش شيرين جنبه اتخض... اتجنن... هى فين؟؟؟
ونادى بأعلى صوته
"شيرين"
كانت شيرين راجعة من الحمام
"ايوه ياياسر مالك"
"انتى فين "
"كنت فى الحمام"
" خضيتينى عليكى يا حبيبتى"
لمعت عين شيرين من الفرحة والدهشة وبصت لياسر
"حبيبتك"
"ايوه حبيبتى وروحى وحياتى كلها انتى يا شيرين"
قرب منها ياسر وقربها منه وخدها فى حضنه
رمت شيرين نفسها بين دراعه واستسلمت لاحساسها ودفنت راسها فى صدره وهى بتقوله بصوت رقيق
"وانت حبيبى"

هناك 37 تعليقًا:

  1. يسلالالالالالالالالالالالالالالالالالالالام علي الرومانسيه بس اوعي تقولي بعد كده انه حلم هيكون فيها زعل

    Eman Osama

    ردحذف
    الردود
    1. تعليقاتك جمييييييييييييييييييييله هههههههههههههههههههههههههه

      حذف
  2. يس يس يس هو ده يا وديييييييييع ايوة كدة فرحينا بقى يا شيخة

    ردحذف
  3. لولولولوولولولوولوللوولولولللللللللللللللللللللي
    اخييييييييييييييييييييييييييرا فهمت يا وديـــــــــــــــــــــــــــــــــع ايوة كده يا عم ,, طب ومنال !!!
    اوبااااااااااااااااااا ,, ايه بقي ؟؟؟

    ردحذف
  4. مفيش تعليق غير ااااااالله عليكي

    فرج عبد الرحمن

    ردحذف
  5. الله اخيراااا دي شيرين دي متعبه اووووووي

    ردحذف
  6. ايمان
    هههههههههههههههههههه
    تفتكرى ممكن

    ردحذف
  7. سلمى
    فرحتك اهو هههههه

    ردحذف
  8. اللـــــــــــــــــــــــــه بجد تحفة ...هو الحب حلو كده بجد يابنات ....انتى كده هتفتحى نفسى

    ردحذف
  9. امنية
    فعلاااااااا اوبااا بقى

    ردحذف
  10. ايووووووووووووووووووة كده يا دينا يا جااااااااااااااااااااااااااااااامد

    ردحذف
  11. ايناس
    يعنى شيرين متعبة وياسر لا
    الاتنين جننونااااااااا

    ردحذف
  12. هنودة
    دى لحظة ياعالم بقى اللى جاى ايه؟؟

    ردحذف
  13. ايه
    ربنا يخليكى يامصيتانى ههههههههههه

    ردحذف
  14. ياه يا دينا اخيرا ختمتى الحلقة بحاجة تفرحنا بدل الزعل والقلق فى الايام اللى فاتت يارب ياسر وشيرين يقربوا من بعض ويقولوا لبعض مشاعرهم ومتهالى ان ياسر ممكن يوضح لمنال موقفه من غير مايجرحها

    مى

    ردحذف
  15. مى
    الحمدلله انكوا فرحتوا بالحلقة
    منال دى بقت مشكلة فعلا

    ردحذف
  16. هيطلع حلم ف الاخر هههههههههههههههههههههههههههههه
    بس سريع ف سريع كده حبيبتي وحبيبي مش قادره اصدق خخخ

    فكرتيني بالروايه الي قريتها البارح كانوا زي البشوات الي هنا عاوزين حد يزقهم هههههههههههههههههههه

    تسلم ايدك يا دندن.. ده وديع تعب من كتر ما شال اللمون خخ

    ردحذف
  17. توتا
    هههههههههههههههههه
    انا عينى هتطلع على اللمون ده
    وسريع ايه يابنتى دول بقالهم سنتين مع بعض
    وجايين ينطقوا اخر شهر

    ردحذف
  18. هبعتلك مرسي بشجرة لمون ولا تزعلي هههههههههههههههه

    ردحذف
  19. ههههههههههههههههه
    ابعتيه علشان بكسل اعمل لنفسى

    ردحذف
  20. يااااااااااااااااااااه على الجمال بجد
    اخيراااااااااااااااا تحفه بجد

    يوياااااااااااااااا

    ردحذف
  21. يويا
    انتى اللى جميلة بكلامك الحلو ده

    ردحذف
  22. يعني هو لازم حد يعيا او يحصله مصيبه يعني
    يااااااااااااااااااااااه اخيرا بقي
    بس ياترى حيتجوز منال بردو ولا ايه ولا يكونش حيجوزها لصاحبه ابراهيم ده اهو يبقي ليه دو فعال في الحكايه
    هههههههههههههههههههههههههههه

    ردحذف
  23. شذى
    ماهو لما بيحصلهم مصيبة بيكونوا اقرب لبعض
    وهنشوف هيعمل ايه فى منال

    ردحذف
  24. أوبااااااا .. أخيراً بقى .. :DDD

    إخفِي منال خالص بقى .. مش وقتها .. :DD

    ردحذف
  25. حباية بندول
    ياترى الاعتراف نهاية ولا بداية لوجع القلب؟؟
    علشان منال

    ردحذف
  26. أخــيرآآآآآآآآآآ بعد سنتين ايه دا دا لو جبل كان حس

    ردحذف
  27. هو كان حاسس
    بس مش مصدق

    ردحذف
  28. هههههههههههههههههههههههههههههههههههه ايوة كدة بقى sad angel يا رب اوعدنا يا رب

    ردحذف
  29. ايوووووووووووووووووووه كده تعبتونا معاكم

    وعد العيون

    ردحذف
  30. ايه الرومانسية دى ياريتنى كنت انا شرين ياه
    ايمته الاقى الحب والحنان ده ميرسى يادندونة

    ردحذف
  31. الله عليك يا استاذة دينا :)

    ردحذف
  32. مازلت مستمتعة ومستنية النهاية السعيدة ..الله ينور يادندونة

    ردحذف
  33. رؤى

    ايوووووووووووووه بقااااااااا اخيرااااااااااا <3

    ردحذف

قول رأيك بلاش تقرا وتقفل من سكات...ارائكم تهمنى