الجمعة، 24 يونيو 2011

ذكرى سارة...الحلقة 7


الحلقة 7
اتصل ادهم بغادة
"الو..غادة؟ انا ادهم"
ووقع التليفون من غادة لما اتفاجئت بصوت ادهم ومكالمته اللى مستنياها بقالها ايام...ومسكت التليفون بسرعة
"ازيك ياادهم عامل ايه"
"انا الحمدلله كويس... انتى اخبارك ايه"
"الحمدلله...انا مستنية مكالمتك دى من زمان"
"معلش كنت كشغول شوية...اخبار سارة ايه"
"الحمدلله كويسة"
"عارفة ياغادة انا بكلمك لانى حسيت انى اعرفكوا من زمان انتى وسارة... ولما احتجت اتكلم مع حد ملقيتش غيرك"
فرحت غادة بالكلام ده واعتبرته مقدمة لكلام هى مستياه
"طبعا ياادهم انت تكلمنى فى اى وقت... ومش هتلاقى حد يسمعك زيي"
"ده العشم برضه... وعايزاكى تعتبرينى اخوكى لو احتجتى اى حاجة كلمينى فى اى وقت"
اتفاجئت غادة...اخويا ايه..بس حاولت ميبانش عليها...يمكن يكون بيجس نبضها الاول
"اكيد ...ربنا اعلم بمعزتك عندى"
"يعنى لو عايز اتكلم معاكى فى موضوع ومحتاج لك هتقفى جنبى"
"اكيد...بس موضوع ايه"
"فاكرة اول يوم شفتك فيه انتى وسارة... يوم العصير... من يومها وسارة دخلت قلبى ومش بفكر غير فيها...انا بحب سارة "
كانت صدمة غادة كبيرة اوى واكبر مما تتخيل او تتوقع ...كانت دموعها بتجرى شلالات على خدها وحاولت ترد عليه لكن صوتها كان مخنوق ومخرجش صوتها لما حاولت تتكلم
"غادة انتى معايا"
"ايوه ...بسمعك... ادهم معلش التليفون هيفصل منى...هكلمك تانى"
وقفلت غادة وانهارت على سريرها وهى بتعيط بحرقة من صدمتها ...طيب سارة بتخدعها ولا متعرفش بحب ادهم ليها... بتخدعها ازاى وهما مش بيسيبوا بعض خالص ... هيكون صارحها بحبه امتى وفين... معقول يكون ادهم سبب البعد بينها وبين سارة
لازم قبل ماتحكم على سارة تفهم من ادهم الحب ده وصل لايه ... لازم تكلمه تانى زى ماوعدته... واتصلت بيه
"ازيك يا ادهم معلش التليفون كان هيفصل وحطيته فى الشاحن... انت بتقولى بتحب سارة...هى سارة تعرف؟؟"
وحكى ادهم لغادة عن مقابلته لسارة ورد فعلها الغريب لما قالت له مينفعش ومش ممكن... وكمل
"انا مش فاهم قصدها ايه" وبما انك اختى واختها مفيش غيرك اللى تقدر تكون الوسيط بيننا وتعرفى هى شعورها ايه من ناحيتى... وعلى فكرة انا مش داخل اتكلم فى صحوبية ... انا عايز اعرف هى موافقة ولا لأ علشان اتقدملها... انا كلمت ماما عليها... ومستنى بس اشوف منها قبول وموافقة"
"اختارتنى انا اكون الوسيط بينكم... ونعم الاختيار"
قالتها غادة وهى كلها الم وحسرة ومفهمهاش ادهم
"طبعا مفيش اقرب منك ليها... ولا ليا دلوقتى...ها طمنينى هتقفى جنبى ولا لأ"
"طبعا ياادهم...متقلقش اختك جدعة"
"ربنا يخليكى ليا...هستنى ردك"
"اوك...بس بكرة مش هينفع النهاردة"
وقفلت غادة مع ادهم وهى بتحاول تقنع نفسها انها لازم تتصرف كأخت ليهم ومتخيبش امله فيها... وخصوصا بعد ما فهمت رد فعل سارة كان ليه... كان علشانها طبعا...يعنى سارة قدرت الاخوة اللى بينهم... وقررت انها بكرة لازم تتكلم مع سارة... ومقدرتش تنام طول الليل من حرقة قلبها والدور اللى لازم تقوم بيه رغم صعوبته
انها تكون وسيط بينهم.
واتقابلوا سارة وغادة تانى يوم كعادتهم... وبدأت غادة
"تعرفى ياسارة ان ادهم كلمنى امبارح"
"والله... وبعدين"
قالتها سارة بلامبالاة مفتعلة علشان تدارى غيرة بدأت تتسلل لقلبها
"انتى ليه مقلتليش ان ادهم جه وراكى عند البيت"
وبرقت سارة عينيها من المفاجأة
"مقلتش علشان استحالة حد يدخل بيننا...انتى عندى اهم من اى حد"
"وليه يدخل بيننا...علشان بيحبك يعنى"
"لا علشان انتى بتحبيه"
وضحكت غادة وقلبها بيبكى
"يا عبيطة هو ده حب...تقدرى تقولى انا كنت مستنية او نفسى احب ابن الجيران وبالصدفة كان ادهم ابن الجيران...يعنى حبيت الحب او حبيت انى اعيش قصة حب مع ابن الجيران... ايا كان مين وجه ادهم...بذمتك ده حب بقى"
وبدأت الراحة تظهر على ملامح سارة
"بجد ياغادة  ولا بتقوليلى كده بس علشان تفرحينى"
"اعترفتى اهو...فرحتى ليه"
"لا انا قصدى يعنى..."
"يابت قولى علشان انا دلوقتى بكلمك بصفتى اخت ادهم وجاية اطلب ايدك"
"ههههههههه اخت ادهم مرة واحدة"
"اختك واخته كمان...قولى بقى الواد واقع لشوشته فيكى..وانتى ايه الاخبار"
"اخبار ايه"
"قولى بصراحة مفيش حاجة كده ولا كده فى قلبك...يعنى كيوبيد غزك فى قلبك ولا ايه"
"هههههههههه يخربيت تعبيراتك... تقريبا غزنى"
"مفيش تقريبا اعترفى"
"بصى ياغادة انا فعلا حاسة بحاجات ناحية ادهم مش عارفة دى ايه... بس مكنش ينفع افكر فيه علشانك"
"انسى علشانى دى لانى بحس بالعبط من اوهامى...بتحبيه صح"
وابتسمت سارة بكسوف وهزت راسها بالموافقة على كلام غادة.

هناك 24 تعليقًا:

  1. ههههههههههه
    طيب وبعدين حيحصل اية كل التوقعات اتقلبت

    ردحذف
  2. ya 3eny 3leky ya 3'ada bs aked elmwdo3 kda mantahash ytara eh elly hy7sal....
    nona

    ردحذف
  3. مارو
    هههههههههه
    ماهو لازم تشويق وحيرة

    ردحذف
  4. نونا
    غادة طلعت اخت جدعة اوى بس على حساب قلبها ياعييييييييييييييييييييينى

    ردحذف
  5. ههههههههههه
    ماشى يا دينا شوقيناااا

    ردحذف
  6. مارو
    ههههههههه لااااااااازم

    ردحذف
  7. هههههههههههههههههههههههههههههه زي ما توقعت.. ربنا يكون ف عونك يا غاده لو كنتي اتشطرتي من الاول وما جريتيش كان كيوبيد غزك انتي مش غز ساره هههههههههههههه





    اما نشوف آخرتها

    ردحذف
  8. اوبااااااااااااااااااا
    دلوقتي اتمزقت غادة
    ياعيني عيكي يا غاااااااااااادة
    مبدعة يا دودو والله الغظيم مووووووووووووووت

    ردحذف
  9. توتا
    ههههههههههههههههههههه
    الغز نصيب

    ردحذف
  10. شذى
    يالاااااااااااهوى على كلامك الحلو

    ردحذف
  11. يااااااااااااااااااااه يا دينا ...والله قطعتى قلبى ...على فكرة هو كلام غادة اللى من ورا قلبها صح ...لانها فعلا كانت عاوزة تحب ابن الجيران وخلاص....بس برده ادهم ده بيفكرنى بادهم صبرى ...هو مش متسربع حبتين ؟؟ولا انا بيتهيالى
    عموما شكل الاحداث غير متوقعة بالمرة ...ربنا يستر

    ردحذف
  12. اااااااااااااه نسيت اقولك...الحلقة دى فكرتنى بحلقة عايزة اتجوز ..لما ايمن جه كلم علا على صحبتها نهى ....هههههههههههههههههه ...بس التانى كان كوميدى للركب

    ردحذف
  13. بس اعتقد غاده مش حبته لدرجه كبيره يعنى ممكن يكون اعجاب لكن مش حب هى مش شافت منه حاجه علشان تحبه يعنى
    فعلشان كده سهل تقاوم احساسها بسرعه

    تسلم ايدك يا دينا حلقه روعه فعلا وفيها تضحيه عاليه اوى ربنا يعوض غاده بقا ويكمل لساره فرحتها

    يويااااااااااا

    ردحذف
  14. هنودة
    مااحنا اتفقنا ان ادهم داخل جد اوى
    وطبعا بتتكلم وهى موجوعة بس بتدارى
    وان شاءالله غير متوقعة خااااااااااااالص
    هههههههههه سارة تختلف عن نهى الصفرا

    ردحذف
  15. يويا
    ده اللى سهل الامور عليها ان مفيش بينهم اللى يشجعها على الحب ده
    تسلميلى يا يويااااا

    ردحذف
  16. غاده طلعت كويسه وجدعه اوى
    لما نشوف هيحصل ايه تانى :))

    ردحذف
  17. بنت من الزمن ده
    هنشوف ان شاءالله
    ياترى هيحصل ايييييييييه؟؟؟

    ردحذف
  18. بجد تحفه جدااااااااااا ما شاء الله بس صعبة اوي علي غادة ازاي تقدر تشوف حبيبها مع اختها و هيقضلوا قدام عينيها :( :(
    israa

    ردحذف
  19. اسراء
    ربنا يخليكى وشكلك متابعة جديدة
    نورتيييييييييييييينى
    وطبعا صعبة جدا على غادة بس حبها لسارة
    كان اقوى من انانية الحب وخصوصا ان ادهم مش حاسس بيها خالص

    ردحذف
  20. ياحبيبتى ياغاده :(

    ردحذف
  21. طارق أبوخضرة7 يوليو 2011 في 11:30 ص

    حلوة شخصية غادة

    ردحذف
  22. 3'ada de tyeba awii w isA rbna hikrmhaaaa

    ردحذف
  23. فعلاً شخصية غادة فيها قدر كبير من المرونة بس على حساب قلبها ..ان شاء الله ربنا يعوضها خير ..شدي حيلك يا دينا مستقبل البنت بين ايديكي ..

    ردحذف
  24. انا بعشقك يا دينا وبخلي خطيبي يجبلي رواياتك اول ما تنزل فالقاهره وبتبقي احلي هديه منه ليا هي روايه ليكي بحبك ❤❤

    ردحذف

قول رأيك بلاش تقرا وتقفل من سكات...ارائكم تهمنى