الأحد، 26 يونيو 2011

ذكرى سارة...الحلقة 8


الحلقة 8
وقالت غادة
"استنى بقى لما نفرحه"
"هتعملى ايه"
"هتصل بيه"
واتصلت غادة بادهم
"ازيك ياادهم... انا مع سارة على فكرة"
"طمنينى الله يخليكى...ايه الاخبار"
"انا مالى...خد كلمها واسالها بنفسك"
واديت غادة التليفون لسارة... ومشيت كام خطوة لبعيد وهى مكسورة القلب
"ازيك ياسارة"
"الحمدلله...انت عامل ايه"
"انا هبقى كويس لو عرفت اللى مستنيه"
"اللى هو ايه"
"عايز اعرف بتحبينى زى مابحبك"
"احنا مشفناش بعض غير يدوب مرتين"
"انا حبيتك من اول مرة شفتك فيها"
"شكلك بتبالغ اوى"
"افهم من كده انك مش بتحبينى"
"مقصدش كده... بس احنا يعتبر اول مرة بنتكلم "
"لا تانى..ولا نسيتى"
"منسيتش بس برضه المرة اللى فاتت منعتبرش اننا لحقنا نتكلم"
"طيب ادينى رد... اقدر اتقدملك"
"لسه بس لما ناخد على بعض ونتأكد من مشاعرنا"
"انا عن نفسى متأكد...لسه انتى"
"طيب ممكن نبقى نكمل كلامنا بعدين علشان غادة لوحدها"
"براحتك بس ادينى رقمك"
وتبادلوا ارقام التليفونات وقفلت سارة...كانت مش عارفة هى ليه بترد عليه كده...خايفة تكون مش بتحبه ولا خايفة ان تكون غادة بتحبه... ومرت الايام وكل يوم فيه مكالمات بين سارة وادهم...مكالمات فى كل وقت لحد ماقربوا اوى من بعض وحست سارة هى بتحب ادهم قد ايه
وفى مكالمة من مكالماتهم بعد فترة قصيرة
"سارة انتى لسه مش عايزة تريحينى"
"وايه اللى مش مريحك"
"انتى لسه مردتيش الرد اللى مستنيه"
"يووووووه ده انا كنت فاكراك لبيب...وكل لبيب بالاشارة يفهم"
"ولو انك بتتهمينى بالغباء...بس ماشى غباء غباء وانا مش لبيب انا ادهم على فكرة"
"هههههههه وعايز ايه ياسى ادهم"
"بتحبينى"
"يعنى...هو انا بس بتلخبط لما بشوفك...وقلبى بيطير لما بسمع صوتك وبموت وانت بعيد عنى"
"اخيييييييرا ابو الهول نطق"
"هههههه ام الهول لو سمحت"
"قوليها بقى ياام الهول"
"بحبك ياادهم وعمرى ماكنت اصدق انى هحب حد كده"
"يا حبيبتى وانا اوعدك انك عمرك ماهتندمى على الحب ده...وطول ماانا عايش هحبك اكتر مابتحبينى...حتى بعد مااموت هفضل احبك برضه"
"بعد الشر عليك...ده انت روحى"
"وانتى حياتى كلها اللى انا عايش بيها وعلشانها...نفسى ياحبيبتى الايام تفوت بسرعة وتبقى معايا ومسيبكيش ابدا"
"ان شاءالله"
"طيب مش هتكلمى مامتك علشان اجى انا وماما وبابا ونتقدملك رسمى"
"ان شاءالله فى اقرب وقت"

 ومرة سألت غادة
"انا مترددة اوى ياغادة وخايفة اكون انانية معاكى علشان حبيت ادهم"
"انانية ايه بس؟...انتى نسيتى ان انا اللى اتوسطت له...بذمتك لو كان فى قلبى اى حب بجد ناحية ادهم كنت قدرت اتوسطت له"
"يعنى مش بتحبيه"
"لا طبعا بحبه بس زى اخويا مش هيبقى جوز اختى"
وده اللى بقت فعلا غادة تتعامل بيه مع ادهم...اخ وقريبا جوز اختها

ولاحظت رجاء المكالمات الكتير اللى بتتكلمها سارة
"سارة انا ملاحظة انك بتتكلمى كتير اوى على الموبايل الفترة دى"
"اه ياماما انا عايزة احكيلك بس كنت مكسوفة"
"مكسوفة ليه... اوعى تكونى بتكلمى محمود زميلك"
"لا ياماما ده ادهم"
وحكت سارة لرجاء على كل تفاصيل علاقتها بادهم وانه مستنى منها تحدد معاد ييجى يخطبها...وبانت علامات الاستياء وعدم الفرحة على رجاء وردت بكل برود
"خطوبة ايه ياسارة دلوقتى...احنا فين والكلام ده فين"
"فين ايه انتى لسه ياماما شايفانى صغيرة"
"لا ياحبيبتى انتى كبيرة وبقيتى عروسة وزى القمر...بس مش احنا كنا اتفقنا انك تكملى دراسات عليا وبعدين تعملى ماجستير ودكتوراه كمان"
"احنا قولنا بس مش اتفقنا...يعنى انا فاكرة كويس انى يوم مااتكلمت فى الموضوع ده قلت ممكن بعد مااخلص الجامعة بدل مااقعد فاضية اكمل لحد الدكتوراه...وبعدين نسيت الموضوع كله"
"بس انا منسيتش...ده انا ضيعت شبابى عليكى ومفرحتش بحاجة ابدا مستخسرة فيا افرح انى اشوفك دكتورة"
"طيب ماتفرحى بجوازى احسن"
"عايزة تتجوزى وتسيبينى ياسارة"
"هو انا هسيبك ...لا طبعا هبقى اجيلك كل يوم"
"خلاص انا موافقة بس مفيش خطوبة دلوقتى ...ممكن الخطوبة بعد الدبلومة والجواز بقى لما تاخدى الماجستير"
"ماما انتى بتهزرى صح؟"
"لا طبعا بتكلم جد...وده اخر كلام عندى"

هناك 9 تعليقات:

  1. طب مافيش كسوف ولا حاجه ف الحوارات مع بعض وخصوصا لما سألها عن مشاعرها..المونولوج مش عارفه الديالوج محتاج تضبيط حبتين ههههههههههه.. انا مش متقبلاه ومش حساه استحمليني بقا خخ

    امتى هيخلص المسلسل ده.. لسه كتير عليه؟؟ انا مسافره بكره يا دندن وماعرفش هتبقى ظروف النت معايا ازاي

    ردحذف
  2. توتا
    كسوف مين يابنتى دلوقتى
    الايام دى الحوارات بتبقى سريعة يعنى ممكن اول مكالمة يفكروا هيخلفوا كام عيل ههههههههههه
    المسلسل لسه بدرى عليه...تروحى وترجعى بالسلامة ان شاءالله ويارب يكون فيه نت فى المكان اللى هتبقى فيه

    ردحذف
  3. ههههههههههههههههههههههههه
    لا جامده مامتها بجد
    كده ادهم طفش بالثلث
    وشكبه حبرجع لغادة الممزقه
    مهو لازم حد يتمزق في الليله دي
    هههههههههههههههههههههههههههههههههه

    ردحذف
  4. هههههههههههههههههههه هى حلوه اوووووووى بس مامتها بتحبها حب امتلاك كده شكلها هطفش ادهم وتطيره من ساره
    ربنا يهدى الاهالى ياااااااااارب ويبطلوا حب الامتلاك ده ومنهم بابا ياااااااارب

    يوياااااااااا

    ردحذف
  5. شذى
    ههههههههههههههههه ياعالم بقى مين اللى هيبقى ممزق
    سارة
    غادة
    ادهم
    اهو كلهم فى الهوا سوا

    ردحذف
  6. يويا
    هى فعلا بتحبها حب امتلاك
    ربنا يهدى كل اللى كده ياااااااااااااارب

    ردحذف
  7. ياه هو لازم يطلع من كل مكان عفريت ..يارب يهدي الحال ..تحياتي ليكي يا دندونة

    ردحذف
  8. القصة جمده اوي

    ردحذف
  9. مامتها دي رخمه اووووي هي عشان بتحبها تقف قدام حبها ومستقبلها ��

    ردحذف

قول رأيك بلاش تقرا وتقفل من سكات...ارائكم تهمنى