الاثنين، 4 يوليو 2011

ذكرى سارة...الحلقة 16


الحلقة 16
رجعت سارة من تركيا على بيت مامتها وقعدت عندها يومين وده كان بالاتفاق والرضا بينها وبين ادهم
وبعد مارجعوا بيتهم وكانت اجازة ادهم طالت اوى ولازم يرجع الصيدلية تانى اتفق مع شريكه انه يشتغل فترة واحدة بس وفعلا اصبحت مواعيد ادهم من 10 صباحا ل6 مساءا
وكانوا فى عايشين فى قمة السعادة لان كل واحد فيهم بيتفنن فى اسعاد التانى...كانت لهم طقوس يومية واسبوعية مش بتتغير وخصوصا رجاء كانت بتقعد مع سارة كل يوم وفى نفس الوقت مش مسببة لهم اى مضايقة وده بسبب عقل سارة وحسن تصرفها... لما حست ان تواجد ادهم ورجاء مع بعض بيسبب مشاكل فبعد رجوعها من السفر وهى قاعدة مع مامتها
"عارفة ياماما انك وحشتينى اوى"
"بجد يا سارة ولا بتقوليلى كده"
"لا والله بجد وحشتينى ومقدرش يعدى يوم عليا من غير مااشوفك وانا عارفة انك مش بتستظرفى ادهم وجالى فكرة حلوة"
"ان جيتى للحق انا فعلا مش برتاحله"
"بصى ياماما انا مش هقولك ادهم كويس ولازم تحبيه مع انه بيحبك بس انتى حرة فى احساسك...ايه رايك ياماما ترجعى من شغلك عليا كل يوم ونقعد مع بعض براحتنا انا وانتى بس ولو تحبى تنزلى قبل ادهم ماييجى براحتك ولو تحبى تقعدى معانا طول اليوم تنورينا"
"لا انزل قبل ماييجى احسن...هو بيخلص شغله امتى"
"بيخلص 6"
"حلو اقعد معاكى من بعد الشغل ولو اخدت اجازة ابقى اجيلك من بدرى...وانتى مش هتيجى"
"لا طبعا اجيلك مرة انا مرة انتى كده المهم نبقى مع بعض"
وكانت الفكرة دى اللى ضمنت لسارة البعد عن المنغصات اللى كانت بتحصل بين رجاء وادهم
اول يوم بعد الاجازة قامت سارة قبل معاد ادهم وحضرت الفطار قبل ماتصحيه
"صباح الخير ياحبيبى"
"حبيبتى انتى صحيتى...يبقى احلى صباح"
"يالا علشان الفطار جاهز"
"حاضر يااحلى حاجة فى حياتى...هدخل الحمام ونفطر مع بعض"
بعد مادخل ادهم الحمام قامت سارة واختارت الطقم اللى هيلبسه ادهم وهو نازل وحضرته على السرير...بعد الفطار اتفاجئ ادهم بالهدوم على السرير
"ايه ده ياسارة"
"من النهاردة انا المسئولة عن كل حاجة تخصك...كل يوم انا هختار الهدوم اللى هتلبسها وهتلاقيها جاهزة بعد مانفطر مع بعض...ألبس لحد مااعمل القهوة علشان نشربها مع بعض"
"بس كده كتير...انا المفروض ادلعك"
"ماانت مدلعنى ومفرحنى ربنا يخليك ليا...يالا ألبس لحد مااعمل القهوة"
"مش مهم القهوة ياسارة ممكن اشربها فى الصيدلية"
"يعنى انت تشربها لوحدك وانا اشربها لوحدى ليه...انا عايزة اعملهالك بايدى"
وبعد مانزل ادهم ووصل الصيدلية اتصل بسارة
"حبيبتى بتعملى ايه"
"ولا حاجة قاعدة استناك"
"ههههه من دلوقتى"
"طبعا انت بتوحشنى بمجرد ماتغيب عن عينى...متتأخرش"
وقضت سارة يومها بين توضيب البيت وتحضير الغدا لحد مارجاء جت عندها الساعة 2 ونزلت 5ونص قبل وصول ادهم
كانت سارة بتستناه وقبل مايفتح الباب او يخبط فتحت هى الباب
"حمدالله ع السلامة ياحبيبى"
"الله يسلمك...انتى كنتى بتفتحى الباب ليه"
"بفتح لك"
"عرفتى منين انى جيت انا مخبطتش"
"حسيت بيك وعرفت صوت رجلك على السلم"
"شكلك بتسرحى بيا"
"مش مصدقنى...بكرة الايام تثبت لك انى بحس بيك من غير مااشوفك"
"ربنا يخليكى ليا...جبت لك الشيكولاته اللى بتحبيها"
"ميرسى ياحبيبى...وانت مجبتش لنفسك"
"ماانتى عارفة مش بحب الشيكولاته..انا جايبها لحبيبتى"
حضرت سارة الغدا وهما بيتغدوا شغلت CD
"بص ياادهم كل يوم واحنا بنتغدى هنسمع الاغنية دى...اغنيتنا انا وانت بس...عايزاك تحفظها لانى بقولك كل كلمة فيها"
وقعدوا يتغدوا على صوت نجاة وهى بتقول
إلا انت ...
فيها ايه الدنيا دية ... إلا انت؟ ... كل غالي يهون عليا ... إلا انت
وابتساماتي وآهاتي منك انت ... واللي حبيته في حياتي هو انت
فيها ايه الدنيا إلا انت؟
طول مانت جنبي روحي وقلبي ... في دنيا تانية ملهاش وجود
وإن غبت عني ... أحس اني لا ليا دنيا ولا وجود
إيه حياتي كلها من غيرك انت ؟... زكرياتي فيها ايه حلو إلا انت؟
إلا انت...
و اللي بسهر له ليلاتي برضه انت... واللي حبيته في حياتي هو انت
فيها ايه الدنيا إلا انت؟
عشت أيامي وأحلامي في حبك ... كل آمالي أعيش العمر جنبك
كل ثانية في عمري بتقولك بحبك ... كل قلبي لك ياريت ليه مكان في قلبك
طول ليلي ونهاري معاك ... يابشوفك يابستناك ... يابدور عليك وألقاك
إلا انت ...
فيها ايه الدنيا دية ... إلا انت؟ ... كل غالي يهون عليا ... إلا انت
وابتساماتي وآهاتي منك انت ... واللي حبيته في حياتي هو انت
فيها ايه الدنيا إلا انت؟
وبعد الغدا بيقعدوا يتفرجوا على التليفزيون او فيلم حلو على الكمبيوتر...واتعلمت سارة لعب البلايستيشن علشان تعرف تلعب مع ادهم...ويوم الخميس لازم بيروحوا السينما ويكون الفيلم باختيار سارة اما الجمعة يوم الاجازة بيروحوا يتغدوا عند ميرفت واخر النهار سارة بتروح لغادة وتقعد معاها وبعدين يتعشوا بره ويرجعوا على البيت...ده كان الروتين اليومى اللى استمر 3شهور مش بيتغير لحد مااصبح بيحصل اتوماتيك بدون اتفاق او ترتيب... وكانوا فى منتهى السعادة
فى يوم وسارة عند مامتها كانت تعبانة طول اليوم وكل ماتقوم تروح تقعد تانى لانها مكنتش قادرة تقف...واتصلت بادهم علشان ييجى ياخدها...ومقدرتش تقوم معاه...قلق عليها واتصل بالدكتور
واول ما كشف عليها قال لهم على الخبر السعيد
ان سارة حامل...كان ادهم هيطير من الفرحة واتصل بمامته يفرحها وبعدين بباباه وكانوا كلهم سعداء بالخبر حتى رجاء كانت طايرة من الفرحة...وبعد مااخدت سارة دواء للدوخة وقامت علشان تروح وقفت رجاء وقالت
"انتى رايحة فين"
"مروحة البيت"
"لا مينفعش والشهور اللى جاية كلها تعب انتى خليكى قاعدة عندى على الاقل فى الشهور الاولانية ولو كنتى لسه تعبانة اقعدى لحد الولادة"

هناك 12 تعليقًا:

  1. ههههههههههههههههه ....اعتقد الاغنية دى ماثرة فيكى ...انا بحبها جدااااا على فكرة ...ذوقك حلو فاختيار الاغانى ...خصوصا انها مش م الجيل الجديد ...
    شكل المنافسة عالبيبى بدات بدرى اهوه ...شكلها هتعمل زى عادل امام فى عريس من جهة امنيه
    شغاااااااااااااال يا دوندون

    ردحذف
  2. لييييييييييييييييييه يابرنسس القفله دى الواحد كان عايش فى الاغنيه وااااااااااااااااء
    ............ ميرا

    ردحذف
  3. ههههههههههههههههههههههههههههه لا والله حلقة جامدة ومالهاش حل وخصوصا الست دى اللى اسمها رجاء زهقتنى انا شخصيا

    ردحذف
  4. هنودة
    هههههههههههههه
    والله اغنية لقيتها بالصدفة وحسيت انها مناسبة جداااا

    ردحذف
  5. ميرا
    ههههههههه معلش اذا حضرت رجاء قفلت الحلقات

    ردحذف
  6. فروتى
    رجاء زهقتنا كلنا
    ربنا يصبرك ياادهم

    ردحذف
  7. يارومانسي انت يا جااااااااااااااااامد
    بس البيبي جه اهو وحتبدا المنغصات مره تانيه اهو
    ربنا يسترررررررررررررر

    ردحذف
  8. شذى
    ههههههههه شفتى الرومانسية
    ومعاكى حق ربنا يستررررررر

    ردحذف
  9. اااااااااااااااااه رجاء ...ونبتدى حلقات جديدة من القفش اللى مالوش اى لازمة ....

    ردحذف
  10. محمد
    رجاء اساسا موجودة للقفش
    ده العادى بتاعها

    ردحذف
  11. الحلقه حلوه اوي .. بس رجاء دي بتستفزني :D

    ميس

    ردحذف
  12. الحلقه جميله جددا ...بس القصه دي شكلها هتقلب

    ردحذف

قول رأيك بلاش تقرا وتقفل من سكات...ارائكم تهمنى