الثلاثاء، 5 يوليو 2011

ذكرى سارة...الحلقة 17





الحلقة 17
بص ادهم لسارة وقالها
"انتى فعلا تعبانة لدرجة انك مش قادرة تقومى معايا"
"انا تعبانة بس ممكن اقوم"
"لا ياحبيبتى خليكى ارتاحى انتى عند ماما ووقت ما تحسى انك قادرة ترجعى قوليلى"
"وانت هتعمل ايه"
"مش عارف هروح البيت او عند ماما"
كانت رجاء ساكتة لما اتطمنت ان سارة هتقعد عندها فمتدخلتش فى الكلام
قام ادهم راح البيت بعد ماقعد مع سارة واتغدى معاها عند رجاء

اول ما دخل البيت كان حاسس بالغربة وسارة مش فى البيت فتح التليفزيون وفضل يقلب فى القنوات بملل وفراغ رهيب واتصل بسارة
"حبيبتى بتعملى ايه"
"ابدا ولا حاجة ..وانت بتعمل ايه"
"وحيد وزهقان من غيرك ومش عارف اقعد فى البيت..شكلى هروح لماما"
"لا استنى نص ساعة واكلمك تانى اقولك حاجة"
وقفلت سارة التليفون مع ادهم واخترعت حجة لرجاء انها اتعودت على بيتها وعايزة ترجع وهتكون هناك مرتاحة اكتر...اعترضت رجاء بس سارة قدرت تقنعها انها كويسة ومش تعبانة وبعد اقل من نص ساعة كانت سارة بتفتح الباب واتفاجئ بيها احلى مفاجئة
"سارة انتى جيتى ازاى...انتى تعبانة"
"لا ياحبيبى انا كويسة..انا ابقى تعبانة وانا بعيدة عنك.. وبعدين انت ناسى ان بكرة الخميس عايز تضيع عليا خروجة السينما ولا ايه"


"هههههه وانا اقدر ... اقولك حاجة انا مكنتش عارف هنام ازاى وانتى مش جنبى"
عدت الايام وكل مابيعدى يوم سارة بتتعب اكتر بس بتدارى انها تعبانة علشان رجاء متاخدهاش عندها فى البيت وتسيب ادهم ... وكانت بتدارى على ادهم علشان مايتغيرش اى حاجة فى روتين حياتهم اليومى وفاتت الشهور ولما وصلت للشهر السابع كانت بتعانى من الضغط العالى وكانت دى مشكلتها مع الحمل بس الدكتور كان دايما بيتابعها وادهم كان بيقيس لها الضغط كل يوم وكانت ماشية على العلاج اللى يظبط لها الضغط

كانت غادة بتزور سارة كتير علشان تساعدها وتقعد معاها وهى تعبانة ده غير ان رجاء عندها كل يوم...ومكنش فيه اى حاجة بتغيرها مهما كانت تعبانة من تحضير الفطار لادهم لتحضير هدومه والقهوة وكل حاجة اتعودت تعملها لادهم...واغنيتهم "الا انت" كانوا مبيتغدوش فى البيت من غيرها...وحتى انها كانت كل يوم بتفتح الباب قبل ما يخبط كعادتها لما بتحس بيه وجه اليوم الموعود
وكعادة كل الولادات صرخت سارة صرخة مدوية الفجر وهما نايمين وكان المغص شديد وده طبيعى لانها فى نص التاسع اتصل ادهم برجاء وراحوا على المستشفى بعد ماكلموا الدكتور
بعد الكشف عليها قالهم الدكتور
"احنا مضطرين للولادة القيصرية لان الجنين مش فى الوضع الطبيعى"
رجاء"قيصرية ...ياحبيبتى يابنتى"
الدكتور"متقلقيش يا حاجة دى بقت حاجة عادية انا بعملها فى اليوم 3 او 4 مرات"
ودخلوا رجاء وادهم لسارة ولما عرفت انها هتولد قيصرى دمعت
"انا خايفة ياماما...انا خايفة ياادهم"
ادهم"متخافيش الدكتور لسه قايل انها بسيطة اسألى ماما"
رجاء"اه والله ياسارة ...متخافيش ياحبيبتى"


وجت الممرضة وحضرت سارة للعمليات وكانت سارة خايفة وبتتوجع فى نفس الوقت وفضلت ماسكة ايد ادهم من ناحية وايد مامتها بايدها التانية وماسبتهومش الا وهى على باب العمليات
كان النهار طلع ووصلت سوسن وغادة وميرفت المستشفى وسارة فى العمليات...كانت رجاء قاعدة مش بتعمل حاجة غير انها بتقرا قران وبتدعى ربنا يقوم سارة بالسلامة...وادهم كان متلخبط خالص ورايح جاى فى المستشفى ويدعى ربنا ان سارة تقوم بالسلامة
وسمعوا صوت النونو اخدت ميرفت ادهم فى حضنها
"مبروك ياابنى...الف مبروك"
وخرجت الممرضة من العمليات بالبيبى
"مبروك يا جماعة جالكم امورة صغيرة"
خدتها ميرفت وهى فرحانة وجريت عليها غادة وشالت البيبى
"شوف ياادهم حتة من سارة ماشاءالله ربنا يخليهالكوا"
"ورينى ياغادة"
وشالها ادهم ورغم انها كانت لسه مش باين لها ملامح الا انها فعلا كانت تشبه سارة ولما شاف ادهم رجاء متحركتش من مكانها
"شوفى ياطنط...سارة الصغيرة اهى"
"حلوة...انت اطمنت على بنتك...انا عايزة اطمن على بنتى"
وفات مايقرب من ساعة وهما فى قلق لان محدش خرج من العمليات من بعد ماخرجوا البيبى
خرجت سارة من العمليات للاوضة وكانت لسه فى البنج بس الدكتور طمنهم انها بخير وفعلا ساعة وفاقت وارتاحت رجاء بعد مااتطمنت على سارة وادهم كمان وبدأوا يفكروا فى اسم المولودة
وكان الكل بيقترح وبعدين قالت سارة
"انا عايزة اسميها ذكرى...ادهم متقولش لأ"
"واقول لأ ليه...هو انا حاسس انه اسم حزين بس انتى عايزة كده خلاص مقدرش اقولك لأ"
وكان الكل فرحان بذكرى وعملوا لها احلى سبوع وحضر فتحى وصمم انه يدبح عجل فى سبوع ذكرى ويعمل ليلة ويجيب منشدين وجاب طباخين يعملوا فتة للناس اللى فى الشارع وده كان فى بيت ادهم وسارة لان سارة قالت انها عايزة تطلع على بيتها وراحت رجاء معاها وكانت ميرفت وسوسن وغادة بيزوروهم كل يوم
ولما بدأت سارة تتحسن وتقدر تدير بيتها زى الاول روحت رجاء
ورجعت سارة وادهم لكل السعادة اللى عاشوها من ساعة مااتجوزوا
حتى فى يوم وهما بيشربوا قهوة بعد الفطار
"سارة انا عايز اعترفلك بحاجة"
"اعترف ياادهم ...ربنا يستر"
"انا كنت فاكر بعد ماتولدى هتنسينى وتهتمى بذكرى بس"
"انا مقدرش انسى حبيبى...انت تقدر تنسانى"
"انا مبقدرش اتاخر عليكى ساعة لانك بتوحشينى...تقولى انساكى"
"يبقى متفقين..انا مش ممكن انشغل عنك لا بذكرى ولا بكل العيال اللى هنخلفهم بعد كده"
"ههههه خلاص اما نشوف بعد البيبى التانى والتالت هتعملى ايه"
"هنشوف ياادهم"
وكان فتحى بيزورهم كل شهر تقريبا وبعد 6 شهور من ولادة ذكرى اتصل ادهم بسارة كعادته بعد مابيوصل الشغل... بس المرة دى مش علشان يقولها وحشتينى زى كل يوم
"سارة انا هسافر الشرقية دلوقتى"
"ليه ياادهم فيه ايه؟"
"بابا تعبان مراته اتصلت بيه وقالت انه تعب وراح المستشفى وحالته صعبة اوى...انا هسافر دلوقتى خدى ذكرى وروحى لمامتك علشان انا مش عارف هرجع امتى"
"حاضر ياحبيبى خلى بالك من نفسك"
ونفذت سارة كلام ادهم واتصل طمنها لما وصل... وبعد العصر اتصل بيها تانى
"سارة بابا هيعمل عملية فى القلب بكرة الصبح وعايز يشوف ذكرى انا اتصلت بماما وهى جاية دلوقتى تيجى معاها؟؟"
"اه طبعا انا جاية"
"خلاص انا اتصلت بسواق معرفة هيعدى على ماما وبعدين هييجى ياخدك من البيت لحد عندى فى المستشفى"
واستعدت سارة وفضلت رجاء تعترض
"هو عند ابوه ياخدك انتى ليه..انتى مالك"
"ازاى ياماما مش حمايا وتعبان وكمان ذكرى مش تبقى حفيدته وهو عايز يشوفها افرضى لاقدر الله حصل له حاجة اشيل الذنب"
وسلمت سارة على مامتها ونزلت لما العربية وصلت

رن تليفون ادهم وهو فى المستشفى
"الو ..ا\ادهم...انا مستشفى الشفاء فيه جماعة عملوا حادثة على طريق الشرقية...ياريت تيجى حالا"
اتصدم ادهم صدمة كبيرة واخد عنوان المستشفى وطار على هناك وهو هيموت من القلق...ياترى حادثة ايه وازاى؟؟ياترى حد حصله حاجة؟؟ كلهم بيحبهم مامته ومراته وبنته طول الطريق وهو بيقول
"يارب استر...يارب نجيهم"
وصل للمستشفى واول ما دخل الاستقبال
"لو سمحت فى حد اتصل بيه من هنا وقالى ان اسرتى عملوا حادثة"
"اه الحادثة اللى لسه جاية ...اطلع الدور التانى"
طلع ادهم وهو بيجرى وبينط السلالم...شاف ممرضة شايلة ذكرى وبتحاول تسكتها من كتر العياط...جرى عليها وشالها
"لو سمحتى دى بنتى...هى كويسة...فين اللى كانوا معاها"
"الطفلة كويسة ومفيهاش حاجة البقاءلله فى السواق وواحدة من الستات... والست التانية فى العمليات"
اول ما سمع ادهم كلمة البقاء لله كان هيموت من القلق والحزن
"مين فيهم اللى توفت ومين اللى فى العمليات"
"اللى توفت...الشابة الصغيرة...شد حيلك"

هناك 22 تعليقًا:

  1. يا لهوييييييييييييييييي انا كنت متأكدة بجد زعلت جدااااااااااااااااااا عليها :(((((((((((((

    ردحذف
  2. كدة برضوا يا دينا يعنى استنى الحلقة كل دة وبعدين تنهيها على الخبر دة محدش كان يتوقع ان دة يحصل ابدا ربنا يصبر ادهم على الصدمة واكيد على موقف مامت سارة منه
    ويارت متاخريش الحلقة اوى كدة ولا انتى كنتى خايفة من رد فعل الناس وقلتى تنزليها والناس نايمة :) :)

    مى

    ردحذف
  3. اسراء
    انا كمان زعلانة والله

    ردحذف
  4. ديناااااااااااااااااا
    ربنا يسامحك بجد

    ردحذف
  5. مى
    معلش انى زعلتك قبل ماتنامى
    والتاخير والله لما بنزل ده بيعطلنى فبنزلها لما ارجع البيت..وانا مش بنزل كتير متقلقوش
    وربنا يستر فى اللى جاى
    لسه رجاء معرفتش

    ردحذف
  6. سهى
    متزعلوش منى والنبى
    وانتظروا احداث جامدة

    ردحذف
  7. انا بردو قولت اسم ذكرى ده وراه حاجه مش ولابد :((((((

    ردحذف
  8. بنت من الزمن ده
    برافو عليكى

    ردحذف
  9. انا زعلت جدا بجد الحلو مابيكملش هيا لو كانت ساره وحشه معاه كانت زمانها فضلت اعده على قلبه .... انا اتوقع انه هيتجوز غاده

    ردحذف
  10. كنت عاااااااااااارفه
    والله كنت متاكده ان كل ده حيحصل عشان بعد كده غادة هي اللى تربي ذكرى مهو اكيد لازم يبق ليها دور في الحكايه دي
    بس صعب اوي هو ليه كل حاجة حلوه لازم تنتهي كده
    انا بدأت اخاف والله
    بس حلوة اوي يا دودو

    ردحذف
  11. انا كنت حاسه ان دى هتكون النهايه انا حسيت ده من اسم القصه "ذكرى ساره" يعنى ساره هتموت بس انا كنت بقول لنفسى يارب ما تكونش دى النهايه بس هى ديما كده الحاجات الحلوه لازم تنتهى كده

    تسلم ايدك يا دينا

    ردحذف
  12. غير معرف
    ههههههههههه فعلا لو كانت وحشة كانت قعدت على قلبه
    امممممممم هنشوف التوقع صح ولا غلط

    ردحذف
  13. شذى
    امممممممم توقعك قد يكون صح وقد يكون غلط
    وكل حاجة حلوة عمرها قصير زى ماقال حمادة هلال
    ميرسى يا شوشو على كلامك الجميل

    ردحذف
  14. اميرة
    انا فعلا كنت موضحة من اسم القصة
    بس كنت بدى ايحاء ان ممكن الحب يفشل وتبقى ذكرى حب سارة بس دى مش النهاية لسه كتيييييييير
    تسلميلى ياقمر

    ردحذف
  15. رودينا (صاحبه رد غير معروف السابق )5 يوليو 2011 في 3:15 م

    صح انا كنت فاكره ان الحب ده مش هيكمل بس هيفضل يحبها ويسمى بنته ساره على اسمها وكنت برده حاسه انه هيتجوز غاده ... انا بجد عيطت واتصدمت دى رجاء حاسه انها ممكن تولع فى ادهم وابوه

    ردحذف
  16. رودينا
    يعنى انا نجحت فى الايحاء باسم ذكرى سارة ان القارئ يتخيل انه مش هيتجوزها
    رجاء المرة دى بقى معذورة فى اى رد فعل
    بس ياترى رد فعلها هيكون ايييييييييييييه

    نورتييييييييينى على فكرة

    ردحذف
  17. ليه عملتى كده
    ranosh

    ردحذف
  18. حرآآآآمـ يا أستاذة ليه كده

    ردحذف
  19. اهئ اهئ اهئ :((((( ،، بضايق انا عشان بتأثر بالقصص

    2T_^

    ردحذف
  20. ايه ده :( :( .. الرواية هتكمل ازاي من غيرها !! اهئ اهئ :(

    ميس

    ردحذف
  21. حرام ساره تموت ليه

    ردحذف
  22. انا كنت حاسس انها هتموت ف الوﻻدة و هتبقى ذكرى سارة و كدة ..
    بس فرحت لما مماتتش تموتيها بردو ف آخر الحلقة. :(
    .
    .
    .
    عبدالله

    ردحذف

قول رأيك بلاش تقرا وتقفل من سكات...ارائكم تهمنى