الثلاثاء، 5 يوليو 2011

ذكرى سارة...الحلقة 18


الحلقة 18
وقف ادهم مش مصدق اللى سمعه من الممرضة لحظات وكانه بيستوعب اللى سمعه وبعدين بص لذكرى وقعد يعيط زى الاطفال ويمكن اكتر كمان...مش مصدق انه مش هيشوف سارة تانى... سارة خلاص مش موجودة... وذكرى بقت يتيمة من قبل حتى ماتقول كلمة ماما...بس فى عز انهياره منساش يسأل عن مامته
"طيب واللى معاها فى الحادثة فين"
"فى العمليات بس معندهاش حاجة خطيرة مجرد جروح فى اكتر من مكان وبتتخيط لانها فديت الطفلة اللى كانت معاها والقزاز كله جه فيها هى"
كان ادهم مش فاهم الحادثة حصلت ازاى ومكنش قادر يسأل ولا يفكر لانه افتكر حاجة تانية مهمة... رجاء متعرفش بالحادثة هيقولها ازاى؟؟ لا مستحيل يقدر يقولها ان سارة ماتت
اتصل ببيت سوسن ردت غادة
"ازيك ياادهم...هما سارة وطنط ميرفت لسه موصلوش عندك"
"غادة فين ماما"
"مالك ياادهم فيه ايه؟"
"مفيش بس هاتى ماما بسرعة"
وجت سوسن ترد على ادهم
"مالك ياادهم"
"طنط لو سمحتى هاتى طنط رجاء وتعالى اصل سارة وماما عملوا حادثة بسيطة وانا رايح لهم اهو"
سوسن وهى بتصرخ"حد حصل له حاجة"
رد وهو بيكتم دموعه"انا لسه موصلتلهمش..متتاخريش عليا"
وقفل معاها بعد ماوصفلها عنوان المستشفى واسمها

وصلت سوسن وجوزها وغادة ورجاء للمستشفى... كانوا قلقانين لمجرد ان سارة تكون تعبانة هى او ذكرى... لما وصلوا كانت ميرفت فى غرفة عادية بعد خروجها من العمليات وادهم معاها وشايل ذكرى اللى مكنتش بتبطل عياط..هى وادهم
لما دخلوا الاوضة ولقوا ميرفت بس على السرير
رجاء"فين سارة"
سوسن"فين سارة"
وغادة واقفة ساكتة وعيونها دمعت قبل ما تسمع رد ادهم
ادهم حاول يتكلم ولكن دموعه ...مكنتش دموع صامتة...كانت بكاء عالى...وكان ده رد فهمه الكل
رجاء صرخت"بنتى فين... محدش يقولى جرالها حاجة"
وطلعت تجرى ناحية اوضة الممرضات وكانت غادة وراها وسوسن على باب اوضة ميرفت
"بنتى فين"
"بنتك مين يا حاجة"
"بنتى اللى كانت فى الحادثة مع اللى فى الاوضة اللى هناك دى"
"اه...شدى حيلك... الله يرحمها ويصبرك"
وقعت غادة من طولها واغمى عليها...جريت عليها سوسن وهى بتصوت... اما رجاء كانت بتصرخ بهيستيريا خلت كل ادوار المستشفى اتجمعت تشوف مصدر الصوت ده ايه
كانت فى حالة غير طبيعية بتصرخ وبتلطم"بنتى...بنتى"
وجريت على ادهم وهجمت عليه عايزة تضربه وتخنقه وهى بتقول
"انت اللى موَت بنتى...انت اللى قتلتها"
واتجمع موظفين المستشفى وخلصوه من ايدها بعد ما شدت منه ذكرى واخدتها فى حضنها وهى بتعيط وتقول
"يا حبيبتى يا بنتى...خلاص اخدك منى...موَتك وحرمنى منك"
كان ادهم مقدر احساسها بس هو كمان كان مصدوم صدمة كبيرة
بعد مافاقت غادة كانت بتعيط بهيستيريا وكانت سوسن بتحاول تتماسك علشان اختها وبنتها

تانى يوم فى جنازة سارة كان ادهم واقف ياخد العزا ودموعه الصامته مش بتتوقف مهما حاول يكتمها... وبعد الجنازة راح يطمن على باباه بعد العملية ورجع على المستشفى اخد مامته ورجعها البيت بعد ما اتفق مع واحدة من البلد انها تيجى تقيم معاها لخدمتها
اما رجاء من وهى فى الجنازة وبعد مارجعت البيت وهى ساكتة مش بتنطق ولا بترد كل اللى بتعمله انها ماسكة فى ذكرى ومش بتسيبها من ايدها...بتقوم تغيرلها وبتقوم تحضر لها الرضعة وترجع تقعد تانى وهى برضه ماسكة فيها
غادة منهارة انهيار تام من حزنها على توأم روحها سارة كانت اختها وصاحبتها وكل دنيتها
بعد العزا راح ادهم على بيت رجاء علشان يطمن على ذكرى وعلشان يواسى رجاء كمان مع ان صدمته كبيرة ومحتاج اللى يواسيه
اول ما رجاء شافته داخل من الباب... وكان البيت مليان ستات
"انت جاى هنا ليه"
وقف ادهم وهو مش مصدق ان رجاء بتوجهله الكلام ده هو استحملها امبارح وقت سمعها الخبر لانه عذرها انما النهاردة وقدام الناس بتحرجه
"أ..أ..انا جاى اشوف بنتى"
"بنتك مين...ملكش بنات عندى"
"ياطنط انتى بتقولى ايه...ذكرى تبقى بنتى"
"انسى بنتك دى خالص"
"انسى ازاى...انتى بتقولى ايه"
"انت مش حرمتنى من بنتى...انا لازم احرمك من بنتك علشان تحس بالنار اللى قايدة جوايا...انت السبب فى موتها كانت قاعدة فى امان انت اللى قلتلها تعالى...ياريتك انت اللى مت ولا روحت فى داهية...يا خسارتك يابنتى ...يا خسارة شبابك...ياللى مالحقتى تتهنى ولا حتى سمعتى كلمة ماما من بنتك...امشى اطلع بره واوعى تيجى هنا تانى"
كان كلام رجاء زى ما بيقتلها بيقتل ادهم كمان... حاولت سوسن تهدى اختها بس ولا قدرت لان كلامها كمان اثر فيها وقعدت تعيط
واخدت ادهم بره الباب
"معلش ياادهم...رجاء محروقة على بنتها وهى معذورة"
"ياطنط انتى متعرفيش انا حزنى على سارة قد ايه"
"عارفة يابنى والله ربنا يصبرك"
"طردتنى ومخلتنيش حتى ألمس بنتى او ابوسها...انا حتى ملحقتش اشوفها"
"معلش ياادهم استنى انت بس متجيش كام يوم لحد ما رجاء تهدا وابقى تعالى شوف ذكرى براحتك"
"اشوفها يعنى ايه؟هى ذكرى هتقعد هنا"
"اومال هتروح فين...البنت لسه صغيرة ومحتاجة رعاية"
"ماشى مقلتش حاجة تبقى بينى وبين طنط رجاء وبالنسبة لمين يراعيها ماما لما تشد حيلها وكمان جبنا واحدة من البلد هتقعد على طول...يعنى فيه 2ستات يراعوها مش واحدة"
"معلش لسه بدرى على الكلام ده...انا هبقى اكلم رجاء بس مش دلوقتى خالص لما تتعايش مع اللى حصل لانها لسه مصدومة"

كان كل يوم بيعدى غادة بتحاول تتماسك اكتر وكانت بتروح لخالتها كتير علشان ذكرى... وبدأت رجاء تصدق اللى حصل وتتعايش معاه... وكانت بتهتم بذكرى كل الاهتمام والرعاية والحب والحنان
فتحى بعد العملية بفترة اتحسن وخرج من المستشفى وبدأ يرجع لحياته الطبيعية
ميرفت بدأت تتحسن ورجعت الزيارات بينها وبين سوسن زى الاول وكان كل الكلام بيتركز على ذكرى وان ادهم مش عارف يعيش من غير مراته وبنته اللى فقدهم فى لحظة
ادهم كان فاقد اى احساس بالحياة وكان يدوب بيروح شغله على امل ان ذكرى ترجع له او تعيش معاه يومين فى الاسبوع وعند رجاء باقى الايام... وكان يدوب عايش على الصور اللى بتصورها غادة بالموبايل لذكرى وده طبعا من غير ما رجاء تحس
وكل ماتحاول سوسن مع اختها انها تسمح لادهم يشوف بنته
"ابدا مش هيشوفها...زى ماحرمنى من بنتى لازم احرمه من بنته... انا مبظلموش..العين بالعين والسن بالسن والبادى اظلم... وهو اللى قتل بنتى"

هناك 20 تعليقًا:

  1. ياحول الله يارب انا والله بكيت يادينا
    بس هو برضو المفروض مايفكرش ياخد البنت من جدتها دى كانت روحها ف بنتها
    يعنى ياربى كلهم مساكين
    مش بعيد يتجوز غاده بعد كده
    نوسه القاضى

    ردحذف
    الردود
    1. بس دى بنته ومن حقه ان هوا يا خدهاؤمن جدتعا ايناس عبداﻷه

      حذف
  2. deh set msh mo2mena 7'ales mafesh sadma t3mel kda fy bany2adam ananeya gedan w m3ndhash Eman ana krehtaha fe3lan w msh 3zraha abadaaaan!!!!!!
    nona

    ردحذف
  3. ربنا يصرهم هما الاتنين هي عندها حق الي حد ما و هو مشافش بنتو دي مشكلة كبيييييييييييييييييييييييييرة جدا و مأظنش انها هترضي تخليه يشوفها بس بجد تسلم ايدك

    ردحذف
  4. نوسة
    معلش انى عيطتك
    وهما كلهم طبعا حالتهم صعبة لان حرام هو كمان يتحرم من بنته

    ردحذف
  5. نونا
    ربنا يكفينا الشر اللى هى فيه صعب جدا
    اما حكاية بتكرهيها فهى اصلا شخصية غير سوية من الاول

    ردحذف
  6. اسراء
    هو مشفهاش يوم العزا بس
    انما قبل كده كانوا عايشين فى البيت عادى
    تسلميلى يارب

    ردحذف
  7. والله انتى نكدتى عليا لولا اختى جنبى كنت عيطت :((((

    اعتقد ان غاده هتتجوز ادهم وبكده هتتحقق امنيه غاده وفى نفس الوقت البنت مش هتتربى مع حد غريب

    ردحذف
  8. اسيرة الاحزان
    اسفة للنكد ياجماعة والله بس الحبكة الدرامية
    امممممم هنشوف

    ردحذف
  9. ليه بس كده؟؟؟؟؟
    انا كده زعلانه اوى ومش مبسوطة خااااااااالص ...و نفسى اتسدت

    ردحذف
  10. هنودة
    لالالالالالالالا اوعى تزعلى
    تابعى الاحداث ومش هتزعلى

    ردحذف
  11. بجد مش عارفة اقولك ايه انا مش عارفة ابطل عييط
    انى اقل حاجة اقولها انك فنانة... هند

    ردحذف
  12. مريوووووووووووووم7 يوليو 2012 في 2:38 م

    لالالالالالالالالالالالا يا دندون انا كدة زعلت منك هي بجد قصة جمييييييييييييييلة و مشوقةبس موثرة وانا بتاثر بسرعة وحاسة ان سارة ديه كانت عايشة معايا و عيط بس بجد بهنيكي علي الجمااااااااااال و الابداع في القصص الروعة ديه

    ردحذف
  13. Bgad 7ram ana anhart awii wmsd2a elmawdo3 wmokt2baaaaa :( :'(
    Farida

    ردحذف
  14. فراق صعب اوى ربنا ما يحكم ع حد بيه

    ردحذف
  15. انتي خلتيني ابكي اووووووووووووووي لان الحلقه دي تتعتبر زي اختي الله يرحمها وسابتلنا فريده بنوته عسوله هي الي مصبرانا

    ردحذف
  16. انا هعيــــــــــــط :( .. ايه الحزن ده .. انا الصراحه عاذره رجاء شوية بس بردوا هو ما قتلهاش بالقصد .. يارب يحصل ي حاجه تفرح بقي :(

    ميس

    ردحذف
  17. انا شايف ان رجاء مزودها عن اللزوم وكمان مش مؤمنة بقضاء ربنا

    ردحذف
  18. انا زعلت اوي ونهرت بجد القصة كانت روعة انا مش ادره اكمل من غير ما تكون سارة في القصة مفرود تكون النهاية سعيد مش حزينة انا مش هيجيلي نوم بعد الحصل

    ردحذف

قول رأيك بلاش تقرا وتقفل من سكات...ارائكم تهمنى