الأربعاء، 20 يوليو 2011

فوق احتمالى...الحلقة 2

الحلقة 2
لما راحت فايزة وسالى بيت هديل كان فى استقبالهم ناهد ونجوى وهديل وسالم ولما لقاهم سالم كلهم ستات استأذن وقام نزل
كان الكلام كله تعارف عام واتكلموا الاول فى مواضيع عامة
فايزة"بصى يا ناهد انا بالعربى كده جاية اتعرف عليكوا علشان هديل عجبتنى وعايزاها لابنى شريف"
ناهد"احنا نتشرف...بس مش المفروض العريس يشوفها وهى تشوفه الاول قبل اى حاجة"
كانت هديل مكسوفة فقامت
"ما انا جايالك اهو فى الكلام...انا ابنى عنده 28 سنة وجاى الشهر الجاى... وعايز يلحق يتجوز قبل مايسافر"
"ازاى بسرعة كده"
"بدل ما يقعد سنة كمان"
"بس ..."
وكانت ناهد بتفكر فى جوزها ازاى هيقدر يجهز بنت كمان فى شهر
"بس ايه يا ناهد ...كلمينى بصراحة"
"انا بقول نستنى لما يشوفوا هيعجبوا بعض ولا لأ"
"ما هو انا صورت هديل فى الفرح وعجبته"
"طيب مش البنت كمان تشوفه"
"اه طبعا...بصى انتى تيجى تنورينى بكرة انتى وهديل...وطبعا نجوى اهلا بيها... وعندى فى البيت سالى هتظبطلهم الكاميرا يشوفوا بعض ويتكلموا براحتهم...كانهم بيتقابلوا يعنى..بس نعرف بعدها راى العروسة..انما انا حافظة ابنى وعارفة هيقول ايه؟"
"طيب استأذن ابوها...اصل يعنى نيجى البيت عندكوا"
"وفيها ايه انا عايشة انا وسالى لوحدنا...عموما اسأليه وعايزة الرد النهاردة...خدى يانجوى رقم تليفون البيت والموبايل وكلمينى بالليل أكدى عليا انكوا جايين ان شاءالله"

لما رجع سالم وحكت له ناهد على المقابلة
"انا لسه بقولك مبقاش حيلتى تعريفة الاقى عريس جاى للتانية"
"يا سالم دى فرصة...مهندس وشاب والام شكلها طيبة وحبت البنت"
"بس دى بتقولك شهر"
"مش لما يشوفوا بعض الاول...ايه نروح ولا لأ"
"والله ماعارف ...روحى يمكن تيجى منهم علشان محسش انى ضيعت منها فرصة كويسة"

تانى يوم فى بيت نجوى وقبل ما تنزل زى كل يوم
"نجوى انا ظبطت الاجازة انها تبقى يوم الجمعة بالليل علشان ابقى موجود معاكى الجمعة كله"
"كويس اوى... لاحسن كده حاسة كأنى مسيبتش بيت بابا"
"انتى متضايقة من الوضع ده"
"انا عارفة ان مفيش قدامك غير كده"
"والله يا نجوى ايجار الشقة اكتر من مرتب الوظيفة...ولولا مرتب شغل بالليل مكنتش قدرت افتح البيت"
"يا حبيبى ولا يهمك ربنا يرزقك ويوسع عليك"
"ربنا يخليكى ياحبيبتى... وانا هحاول ادور على شغل تانى ميكونش طول الليل علشان نقعد فى بيتنا"
"متتعبش نفسك انا راضية باى حال من الاحوال المهم اننا اتجوزنا بعد 4 سنين خطوبة...بقولك انا رايحة النهاردة مع ماما وهديل عند ام العريس اللى خالتك قالت عليه"
"طيب يا نوجا خلى بالك من نفسك... مش عايزة حاجة"
"لا ياحبيبى ربنا يخليك...يالا بقى هتأخر...انا نازلة سلام"

وصلوا لبيت فايزة...كانت بتستقبلهم هى وسالى
احلى حاجة فيهم انهم اجتماعيين ومقابلتهم حلوة
اول ما دخلوا البيت-هديل ونجوى وفايزة- اتبهروا بالبيت
البيت كان مستواه راقى جدا توضيب وعفش حاجة غير بيتهم خالص مع ان المنطقة اللى ساكنين فيها عادية
دخلوا وقعدوا واتكلموا فى مواضيع عادية...وخبط الباب
فتحت سالى"اهلا ياحازم اتفضل"
بصوت واطى"ايه انتوا عندكوا ضيوف"
"اه...شريف مقالكش حاجة"
"قال ايه؟؟ماتقولى انتى"
"بعدين بقى"
وبصوت اعلى شوية"طيب شوفى طنط عايزة ايه اجيبهولها"
"ماماااااا... تعالى كلمى حازم"
وجت فايزة...عند الباب
"ما تيجى ياحازم"
"معلش ياطنط ...عايزة اجيبلك ايه وانا جاى"
"هات عيش بس"
ونزل حازم ورجعوا فايزة وسالى يقعدوا مع ناهد وهديل ونجوى
فايزة"خدى ياسالى هديل جوه فى اوضتك وعرفيها على شريف"
سالى"تعالى ياهديل"
ودخلت هديل اوضة سالى وانبهرت اكتر واكتر
سالى ليها اوضة خاصة بيها وشكلها حلو اوى
سرير شيك ودولاب كبير...واضح ان عندها لبس كتير واضح من مستوى لبسها...ولا الماكياجات والبرفانات
ومكتب وكمبيوتر...اتحرجت هديل
"اوضتك حلوة اوى يا سالى"
"ميرسى يا هديل... يعنى احلى من اوضتك"
"انا ماليش اوضة لوحدى...يعنى اوضتى انا ونجوى مع بعض"
وسرحت فى اوضتهم...السرير اللى بيتقاسموه هى واختها والدولاب الصغير لضيق المكان يدوب علشان يكفى يتحط فى الاوضة تليفزيون وترابيزة صغيرة للمذاكرة او الاكل عليها
"شريف فاتح اهو..ثوانى افتح لك الكاميرا"
كانت هديل مكسوفة وهى بتقعد وسالى بتخرج وتقفل وراها الاوضة
"ازيك يا...معلش اسمك ايه"
"اسمى هديل ... الحمدلله كويسة"
"اسمك حلو اوى"
"ربنا يخليك"
"وامورة كمان"
اتفاجئت واتكسفت ووطت وشها تبص فى الارض
"لا.. بصى لى عايز اشوفك... كلمينى عن نفسك"
"ا ...ا..مش عارفة اقول ايه اسألنى وانا اجاوبك"
"انتى خلصتى مدرسة السنة دى صح... هتكملى؟؟"
"لا"
"حتى لو جبتى مجموع"
"لا مش هكمل...مش حابة انى اذاكر تانى"
"انتى اتخطبتى قبل كده"
"لا جالى عريس السنة اللى فاتت وبابا رفض علشان الدراسة"
"حبيتى قبل كده"
"لا والله"
"ومالك اتخضيتى كده... قولى متتكسفيش"
"لا والله ما حبيت خالص"
"ليه هو الحب عيب"
"مش عيب بس انا اعرف ان الحب يعنى مقابلات وخروج ومكالمات بين الاتنين وانا مقدرش اعمل كده...انما الحب اللى اعرفه اللى يبقى فى النور والناس كلها بتحترم الحب ده انما لو اتنين بيحبوا بعض فى الضلمة يبقى حاجة انا مش مقتنعة بيها"
"كلامك عجبنى... بس طبعا انا عايز اكلمك  تانى...اكتبى ايميلك"
"معنديش ايميل"
"طيب موبايلك"
"معنديش موبايل"
"ازاى يعنى... لا موبايل ولا ايميل"
"ايوه اصل ظروفنا على قدنا شوية...مستورين يعنى الحمدلله "
"ليه هو باباكى بيشتغل ايه؟"
"كهربائى"

هناك 21 تعليقًا:

  1. انا مستغربه طريقه الجوازه دى
    بس شكل الموضوع كبير
    فى انتظار الباقى يا دينا :))

    ردحذف
  2. بنت من الزمن ده
    بصى طريقة الجواز فيه اغرب من كده
    والموضوع طبعا كبيييييييير ههههه
    ميرسى للمتابعة ياقمر

    ردحذف
    الردود
    1. ربنا يوفقك يا دندونا يارب انتى بجد طريقتك فى الحكايات بتحسسنا انها حاجة حقيقية

      حذف
  3. الجوازه شكلها اتفشكلت بس ان ابوها كهربائي

    ردحذف
  4. غير معرف
    امممممممممم
    يمكن اه ويمكن لأ
    وهنا يكمن التشويق هههههه
    نورتنى

    ردحذف
  5. ليه بس كده ما كنتي تكملي الحوار ما بينهم الله.. كده الراجل هيخليها كل يوم تيجي تكلمه ولا ايه خخخ ولا هيجيب لها موبايل ولا هتخلي باباها يجيب ولا تجيب انترنت يه الحاله دي ياربي خخ

    ردحذف
  6. توتا
    ههههههههه هى المشكلة دلوقتى هيجيب ولا لا
    ولا المشكلة هيرضى بيها ولا لا
    بعد ماعرف الفرق الكبير فى المستوى الاجتماعى

    ردحذف
  7. ولضح اوي ان الفرق الاجتماعي كبير مووووووووووت
    مش عارفة ازاي ام شريف شافت انهم مناسبين لبعض الفقر مش عيب طبعا بس الفروق الاجتماعيه والتعليميه والفكريه ممكن تعمل مشاكل في الحياه بعد كده

    كالعاده مشوقه موووووووووووت يا دودو

    ردحذف
  8. la2 sherief da estafzeni moooooooot bakrah eltare2a deh bgaaaaaad
    nona

    ردحذف
  9. شذى
    فعلا فيه فرق اجتماعى وتعليمى كمان
    وام شريف عجبتها هديل
    اكيد لان ليهااسبابها

    ميييييييييييييييييييرسى ياقمر على احلى كلام

    ردحذف
  10. نونا
    وضحيلى ايه بالظبط استفزك فى كلامه

    ردحذف
  11. الجوازة دى كلها غلط فى غلط الولد مهندس وهى دبلوم وباباها كهربائى وواضح ان مستواها اقل منه كتير اوى يعنى هى مختلفة عنه فى كل حاجهيعنى لو هى مستوى تعليمها كان قريب من تعليمه كنا عدينا موضوع الفرق بين مستوى عيلته وعيلتها لا وكمان هى عندها 18 سنة وهو 28 الجوازة دى مش لازم تتم ياريت حد يدينى تليفون هديل عشان اقلها ههههههههههههههههههه

    ردحذف
  12. حمدى
    ههههههههههههههههههههه
    هديل معندهاش موبايل للاسف كنت اديتك الرقم
    واضح ان فيه كلام كتير عايز تقولهولها ههههه

    ردحذف
  13. ههههههههههههههههههههه يادينا انا قصدى اوعى البنت الولد دا لو اتجوزها حيزلها والله ويقلها شوفتى انا اتجوزتك رغم انك اقل منى فى كل حاجه متحوليش البنت حتتبهدل لازم اكلمها
    بس بجداسلوبك جميل فى الكتابه وعشان كدا انا حقرا قصة ذكرى سارة كمان

    ردحذف
  14. حمدى
    ههههههههه انا قلت حاجة غير كده
    طبعاعايز توعيها هههههههه

    ربنا يخليك ياحمدى ده من ذوقك
    بس انا ارشحلك لو هتقرا
    اقرا تحت سقف واحد الاول
    مختلفة عن كل القصص

    ردحذف
  15. أنا قصدي على الكروتة دي و ياريته صالونات كمان ده واحد عايز يتجوز و خلاص و قاعد يتفرج عليها كده و يسألها اسئلة أنا مبحبش الطريقة دي بتستفزني موووت موت موت
    نونا

    ردحذف
  16. نونا
    ااااااه فهمت قصدك

    ردحذف
  17. الحب اللي في النور الناس بتحترمه عجبتني :)

    ردحذف
  18. حلوه اووووووووووى

    ردحذف
  19. باين انها حكايه حلوة زى بقينا عيلة انا بحيكى يا دينا :)

    ردحذف

قول رأيك بلاش تقرا وتقفل من سكات...ارائكم تهمنى