الخميس، 7 يوليو، 2011

ذكرى سارة...الحلقة 20


الحلقة 20
لما نزلت سوسن وهى بتعيط من كلام اختها مقدرتش توقف تاكسى وتروح على طول قالت تمشى شوية لحد ما تهدا وبعدين تروح
وهى ماشية تحت بيت سارة...رفعت راسها للبلكونة وهى بتقول
"ربنا يرحمك ياحبيبتى ويصبرنا كلنا على فراقك"
ولسه هتمشى شافتها ميرفت وام اسماعيل وهما خارجين من العمارة
"سوسن...يا سوسن"
"ميرفت انتى هنا"
"اه...مالك انتى كنتى بتعيطى"
"كنت عند رجاء وزعلتنى اوى"
"انا مش عارفة انتى مستحملاها ازاى..تعالى روحى معانا وابقى احكيلى فى البيت"
ركبوا تاكسى وطلعت سوسن مع ميرفت بيتها
"احكى مالك ياسوسن"
"رجاء طردتنى وبتتهمنى انى بعمل خطة عليها علشان تاخدوا منها ذكرى...كانت مش طبيعية ولما قلتلها نروح لدكتور نفسى قالت انى عايزة اطلعها مجنونة علشان تاخدوا ذكرى"
"انا عارفة انها اختك بس هى ظالمة اوى...ظلمت ابنى وحرمته من انه حتى يشوف بنته..وانا مش عايزة اقولك انى هموت واشوف ذكرى ومع ذلك مش بتكلم ولا بقول لان ابنى مش ناقص كفاية حاله المقلوب...ومتزعليش منى مش معقول حياته هتقف كده احنا كلنا كنا بنحب سارة بس خلاص نصيبها ونصيبنا كده...انا عايزاه يبدأ حياة جديدة..."
قاطعتها سوسن
"هو ادهم هيتجوز صحيح"
"مين قال كده"
"ماهى رجاء لما شافت الشقة مفتوحة اتصلت بيا وقالت انه هيتجوز واتصلت بيكى محدش رد"
"احنا كنا بننضف الشقة...وبينى وبينك انا فعلا عايزة افتح مع ادهم موضوع الجواز ...بس مش عارفة افاتحه فيه ازاى"
"طبعا حقه... بس هتبقى صعبة اوى على رجاء.. ربنا يصبرك يا رجاء يارب"
"انتى بتدافعى عنها بعد اللى عملته معاكى"
"رجاء طول عمرها وهى حظها قليل وظروفها صعبة...جوزها مات بدرى وكانت سارة صغيرة...مرضيتش تتجوز علشان بنتها ...بنتها ماتت فى عز شبابها...بجد انا عذراها فى اللى هى فيه وفى نفس الوقت زعلانة من اللى قالته...هسيبها كام يوم ولو متصلتش هتصل انا بيها...دى اختى الوحيدة وماليش غيرها ولازم اتحملها فى كل الظروف"
"ربنا يهديها"
"يارب...هقوم انا وابقى تعالى"

كانت ميرفت اتأكدت ان رجاء مش هتفرط فى ذكرى بعد فشل محاولات سوسن انهم يشوفوا البنت وهى قاعدة مع ادهم
"انا عايزة اتكلم معاك ياادهم فى موضوع مهم"
"اتكلمى ياماما...خير"
"لازم تغير حياتك شوية ومتستسلمش للحزن كده"
"اعمل ايه طيب"
"انت لازم تفكر تتجوز"
"اتجوز؟؟!!"
"ايوه ياادهم انت مش اول واحد مراته تموت ويتجوز غيرها...مش نهاية العالم والحياة لازم تستمر"
"بس سارة مكنتش مراتى بس...دى كانت كل حياتى"
"ياحبيبى انا مش بقول انساها ولا اكرهها...سارة خلاص كل اللى تقدر تعملهولها تدعى لها او تتصدق على روحها...انما تحرم نفسك من الحياة ده ميرضيش حد"
"مش عارف هقدر اعيش مع واحدة غيرها ازاى"
"فكر كويس... بس بعقلك ياادهم مش بقلبك"

كانت سوسن كل يوم بتتمنى ان رجاء تتصل بيها ومش مهم تعتذر لها المهم انها تحس انها ظلمتها وغلطت فيها... سوسن عايزة تتصل باختها ومش قادرة لانها جرحتها اوى... فات اسبوع ومفيش اى اتصال ولا مكالمة بين سوسن ورجاء وكانت غادة عارفة ان مامتها متقدرش على خصام اختها
"ماما انتى مش هتكلمى خالتو"
"بعد اللى قالته مش قادرة ابدأ انا...نفسى هى اللى تتكلم"
"طيب ايه رأيك اتصل بيها انا...يعنى كانى بسأل عادى ونشوف هتتكلم ازاى"
"طيب قومى كلميها"
اتصلت غادة على البيت محدش رد...الموبايل مقفول
"ايه القلق ده ياغادة...انا قلقت"
"يمكن نزلت تجيب اى حاجة وممكن يكون تليفونها فاصل ولا هى فى حتة مفيهاش شبكة"
"ربنا يستر..شوية كده ونجرب تانى"
فات ساعة وجربوا تانى وكانت نفس النتيجة...ساعة كمان ونفس الحكاية بتتكرر
"انا قلقت اوى ياغادة...ماهى لو مش عايزة ترد علينا كان تليفونها رن وقفلت لما شافت الرقم... طيب وتليفون البيت مبتردش ليه"
"يمكن ياماما يكون عطلان ولا حاجة"
"التليفون والموبايل؟؟ لا انا هقوم اروح لها"
"احنا الساعة11 بالليل"
"والنبى لو الفجر ...انا عايزة اطمن على اختى وعلى ذكرى كمان"
قامت سوسن لبست بسرعة وكان جوزها لسه مجاش اتصلت بيه يروح معاها..وغادة كمان راحت معاها
وصلوا للعمارة وبصوا من الشارع على الشقة كان البيت كله مضلم...طلعوا يخبطوا على الباب... محدش بيفتح ...القلق زاد سوسن بقت تخبط وتنادى
"يارجاء...افتحى...رجاء"
اكيد محدش موجود لان مسمعوش اى صوت لذكرى...خبطت سوسن على الشقة اللى جنب رجاء...ام سعيد تعرف سوسن
"ازيك ياام سعيد...مشفتيش رجاء وذكرى"
"تعالى ياسوسن اتفضلى"
"لا معلش...رجاء فين؟"
"ده انا اللى عايزة اسألك هى راحت فين"
"ليه هى بقالها كتير مش باينة"
"انا سمعت صوت دوشة ودق فى الباب اول امبارح...طلعت لقيت ناس معرفهمش بيدقوا فى الباب...لما سألتهم انتوا مين وبتعملوا ايه؟ قالوا احنا اشترينا الشقة من الست رجاء وبنظبط حاجات فى الباب"
"يعنى رجاء باعت الشقة ومشيت...راحت فين هى والبنت...اعمل ايه يارب...ادور عليها فين؟"

هناك 13 تعليقًا:

  1. هييييييييييييييييييييييييييه
    انا اول كومنت
    مش بقولك اتجننت رسممممممممممممممممممي
    ربنا معاها انا عذراها وتقريبا حتعم حاجة في نفسها و حد قرب من ذكرى
    الاسم ده حزين اوي على فكره

    ردحذف
  2. ااااااااه على المفاجاه دى
    الحلقه جميله اوى اوى يا دينا بجد

    ردحذف
  3. شذى
    ههههههههه اول كومنت
    هى الصدمة تقريبا جننتها خلاص

    ردحذف
  4. سهى
    ميرسى ياجميل
    يارب دايما المفاجات تعجبك

    ردحذف
  5. لالالالالالالالالالالالالالالالالالالالالالا....لا حول ولا قوة الا بالله...دى هربت ...عشان محدش ياخد منها ذكرى ...اوباااااااااا ....يبقى زى ما توقعت ابوها مش هيشوفها الا لما تكبر وعلى نغمات نفس الاغنية اللى بتسمعهالوا سارة ....

    ردحذف
  6. هنودة
    هههههههههههههههههههههه
    الاغنية مأثرة فيكى اوى ياهنودة

    ردحذف
  7. طلعت المجنونه بتفكر جامد.. واحنا عمالين نقول مجنونه.. دي طلعت احسن عني وعنكم.. عرفت ازاي تتصرف وتحرم الاب من بنته نهائي.. ربنا يستر عليها وعلى ذكرى.. انا قولت ماتت الاول ما توقعت تكون باعت الشقه وهربت هههههههههههههههههههههههه

    ردحذف
  8. توتا
    هى مجنونة بحب ذكرى اللى حل محل حبها لسارة
    مع الانتقام من ادهم بحرمانه من ذكرى
    يعنى هى بالنسبة لنا مجنونة
    بالنسبة لها...عندها اسبابها للى بتعمله

    ردحذف
  9. 7asbeya allah w ne3ma elwakeel
    nona

    ردحذف
  10. والهي انا بجد بقالي حلقتين دموعي موش سيباني في حالي

    حرام عليها رجاء دي

    وهي فعلا اتجننت علي كلامكووووو ههههههههه
    hadell

    ردحذف
  11. الحلفه جامدة .. بس رجاء دي مجنونـــــــــــــه !! :D

    ميس

    ردحذف
  12. انا شاسفا ان ادهم ياخد نته بامر قانونى من اول يوم زعلانة والست كيرة وكل حاجا براحتها بس متوصلش لكدا
    يعنى غصبا عن الكل كان المفروض باخد بنته بامر قانونى لو فى عصلجه مع الست زى ما بيحصل

    ردحذف
  13. انا بصراحه مع رجاء لانها مخسرتش شقه ولا عربيه ولا حته قصر دي خسرت بنتها يعني ليها حق انها تاخد حفيدتها بس طبعا ادهم ليه حق في بنته بس المفروض يسيب رجاء كام شهر تهدى

    ردحذف

قول رأيك بلاش تقرا وتقفل من سكات...ارائكم تهمنى