السبت، 9 يوليو 2011

ذكرى سارة...الحلقة 21


الحلقة 21
ايام وشهور عدت وسوسن بتدور على رجاء وذكرى ...اتصلت بكل الاقارب اللى من بعيد ومن قريب يمكن تكون رجاء عندهم ومفيش فايدة...راحت الشغل عرفت ان رجاء استقالت ومحدش من صحابها يعرف لها تليفون ولا عنوان
ادهم كان بيدور فى كل اتجاه ...سأل فى كل الموانى والمطارات عن طريق معارفه ومعارف باباه وخاف تكون رجاء خدت البنت وهربت بره مصر...بس للاسف موصلش لاى نتيجة... وعرف انه فقد بنته للابد زى مافقد مراته حبيبته...ومع مرور الوقت بدأ الامل يضعف انه يلاقيها
سوسن حالتها النفسية كانت وحشة اوى بعد اختفاء رجاء... لان رجاء اختفت وهى شاكة او متأكدة ان سوسن ضدها...ومتعرفش هى بتحبها قد ايه وخايفة عليها هى وذكرى
وبدأ الامل ان سوسن تلاقى اختها يضعف بمرور الوقت

كانت ميرفت قاعدة مع ادهم بعد حوالى 3شهور من اختفاء رجاء بذكرى
"معلش ياادهم انا عارفة انك مريت بظروف صعبة اوى... لازم بقى تبدأ حياتك من جديد وتكون اسرة وتستقر"
"تفتكرى هقدر"
"لازم تقدر...سارة خلاص الله يرحمها..ذكرى دورت عليها ومقصرتش...تعمل ايه؟؟هتفضل عمرك كله كده عايش فى ماضى سعيد ومستقبل ياعالم هيحصل فيه ايه"
"قصدك ممكن ملاقيش بنتى"
"الله اعلم يابنى... ربنا قادر يردهالك"
"يارب يا ماما"
"خلاص اشوفلك عروسة ولا تشوف انت"
"انا مش هشوف ولا هعرف اشوف اى واحدة....شوفى انتى اى واحدة وخلاص مش هتفرق"
"عايزها من هنا ولا من البلد"
"اللى تشوفيه مش هتفرق معايا خالص"
"هشوف كده وافكر فى واحدة نكون نعرفها وتناسبك...بقولك ايه؟ايه رأيك فى غادة"
"غادة!!!!... اخت سارة"
"اه غادة بنت خالة سارة مش اختها...فيه فرق"
"ايه الفرق ماانتى عارفة هى كانت بتحب سارة قد ايه؟معتقدش هتوافق"
"ماهو علشان بتحب سارة انا فكرت فى غادة...بص ياادهم عندنا فى البلد لما كانت واحدة بتموت ومعاها عيال وليها اخت بنت كان جوز الاخت بيتجوز البنت علشان تبقى ام لولاده...وحصلت كتير والناس عاشوا"
"ام لولاده...يمكن لو كانت ذكرى معايا كنت وافقتك على كلامك"
"ذكرى مسيرها ترجع لحضنك ان شاءالله...ها قلت ايه؟افاتحهم فى الموضوع"
"مش عارف ياماما...انا عمرى مافكرت فى غادة كزوجة"
"يعنى بتكرهها...او مش هتقدر تعيش معاها"
"لا غادة كويسة ومؤدبة وحلوة ..انا اللى مبصيتلهاش كزوجة قبل كده"
"يعنى اكلمهم ولا استنى"
"كلميهم وشوفى رأيها...مع انى عارف انها عمرها مافكرت فيا غير اخ...كلميهم وانتى هتعرفى ان كلامى صح"

فى نفس اليوم كانت ميرفت قاعدة على نار عايزة تفتح الموضوع مع سوسن باسرع وقت...وفكرت لو راحت لها مش هتعرف تكلمها لوحدها علشان غادة بتبقى فى البيت فاتصلت بيها وفى اخر المكالمة
"تعالى اقعدى معايا النهاردة شوية عايزاكى"

لما وصلت سوسن عند ميرفت وبعد ماقعدوا واتكلموا فى موضوعات عامة
"كنتى عايزانى فى ايه ياميرفت"
"بصى انتى عارفة انى بعتبرك زى اختى والموضوع اللى هكلمك فيه مهما كان رده انا مش عايزة يغير اللى بيننا"
"قولى ياميرفت ...انا دلوقتى ماليش غيرك بعد رجاء مااختفت"
"انا كنت قلت لك قبل كده انى عايزة ادهم يتجوز"
"ايوه...وانا قلت لك حقه...انتى فاكرة جواز ادهم هيزعلنى...لا والله بالعكس ادهم بحبه زى مايكون ابنى واتمنى له الخير والسعادة"
"طيب لو قلت لك انى عايزة غادة لادهم"
اتفاجئت سوسن مفاجئة كبيرة....كان كلام ميرفت مش متوقع تماما وحاولت ترد...بس ملقيتش كلام تقوله
"ايه يا سوسن...سكتتى ليه...لو مش موافقة قولى"
"انا اتفاجئت ...وعموما انا مش هقدر ارد عليكى...لازم اخد رأى غادة الاول حتى قبل مااقول لابوها"
"طبعا لازم تقوليلها...اتكلمى معاها براحتك..بس انتى ايه رأيك"
"انا لو فكرت فى ادهم كعريس لبنتى...مش هلاقى احسن منه...بس لو فكرت كجوز بنت اختى...قلبى هيوجعنى عليها "
"خدى وقتك ياسوسن وفكرى واتكلمى مع غادة وابقى ردى عليا"

بعد ماروحت سوسن قعدت تفكر فى كلام ميرفت... الكلام كان منطقى...بس ياترى غادة هتقول ايه؟
تانى يوم وهما بيحضروا الغدا
"عارفة ياغادة ان ميرفت امبارح كلمتنى عنك كتير"
"وايه الغريب...اوعى تكون فى العادى مبتجيبش سيرتى"
"لا بتجيب سيرتك طبعا...بس المرة دى الكلام مختلف"
"مختلف ازاى يعنى"
"عايزة تجوزك ادهم"
اتفاجئت غادة بكلام مامتها وافتكرت سارة وجريت الدموع على خدها
"وقلتى لها ايه ياماما"
"قلت لها لما اسألك الاول"
"وانتى فاكرانى نسيت سارة...ولا الحب اللى كان بين سارة وادهم... ازاى ممكن اتجوزه"
"بصى يا غادة...انتى لو اتجوزتى ادهم ده مش هيبقى خيانة لسارة... بالعكس انتى لو ذكرى رجعت مش هتربيها كويس كأنها بنتك...يبقى حافظتى على بنتها وراعيتيها"
"ذكرى انا بحبها ووحشانى من غير جواز من ادهم"
"طيب مااختلفناش.. بصى انا مش هضغط عليكى فكرى براحتك بس ادهم هيتجوز اكيد ان مكنتيش انتى يبقى هيتجوزاى واحدة تانية"
"هو حر...اى واحدة تانية مش هتكون عرفت سارة"
"يابنتى سارة خلاص راحت عند اللى خلقها...فكرى فى اللى عايشين...ادهم ميتعيبش وعارفينه وعارفين اهله...يعنى فكرى هو لو عريس متقدملك وارمل...هتوافقى ولا لأ"
"مقدرش انسى انه كان جوز سارة...مش هقدر"

هناك 14 تعليقًا:

  1. يا عينى يعنى بعد ما اتنازلت عن حبها فى الاول لادهم عشان سارة رجعلها دلوقتى وهى يا عينى خايفة تخون اختها وصاحبتها وبنت خالتها فى حد كدة فى الدنيا للاسف بيبقى الحقد والغيرة وما بتصدق انهم ينفصلوا ربنا يهدى الناس

    ردحذف
  2. فروتى
    غادة مخلصة اوى لسارة وبتحبها فعلا
    علشان كده خايفة تتجوز ادهم

    ردحذف
  3. انا عارفة والله وفى ناس كتير حب الاخوة والصداقة عندهم اهم من حب الحبيب عشان كدة الحب دة هو اللى بيدوم انا صعبان عليا احساسها هى وبشفق عليها اوى قرار صعب انها تفكر فيه

    ردحذف
  4. فروتى
    انا فاهمة قصدك
    ندعيلها بقى تاخد القرار الصح

    ردحذف
  5. مش قولتلك حتلف الايام وادهم حيتجوز غادة
    مرفوع عني الحجاب يا نااااااااااااس
    هههههههههههههههه
    بس جامده يا دودو بجد

    ردحذف
  6. شذى
    هههههههههههههههههه
    مش عارفة اقولك ايه هيتجوزوا او مش هيتجوزوا
    ان كان هيبان هههههه
    ميرسى يا قمرة

    ردحذف
  7. نوسه القاضى

    ياخبر يادينا دى مش قصه رومانسيه خالص

    بس على ما اعتقد زى ماقولت من 3 حلقات كده انهم هيتجوزا وبعدها رجاء هتظهر وهتخرب على دماغهم :)

    ردحذف
  8. نوسة
    ههههههههههههه
    شكلك ضد جوازهم

    ردحذف
  9. ياااااااااااااااااه يا دينا ...انتى كده هتجيبى لام سارة انهيار عصبى وهتخليها تتاكد ان اختها كانت ضدها

    ردحذف
  10. 3la fkra 3'ada de tyba awy mfesh zyha 5aals

    ردحذف
  11. yah s3b awiiii lma tgelk l7aga b3d ftra kberaa kda w tgelk b2lm w wg3 2lb 3la 7d bt7boooo

    allah y2weii ya 3'ada antii w adhm :(

    ردحذف
  12. غاده مخلصه اوي لساره .. بس انا رايي تتجوزا هي عشان هي اكتر واحده هتعرف تربي ذكري بحب لو رجعت اي واحده تانيه ممكن تعامل ذكري معامله وحشه :(

    ميس

    ردحذف
  13. من اوا سارة ما ماتت وانا عارفة ان ادهم هيتجوز غادة .. بس رجاء دى بجد مش طبيعية فيوزاتها ضربت مهما كان اللى حصلها بس هى دماغها راكبة شمال :/

    ردحذف

قول رأيك بلاش تقرا وتقفل من سكات...ارائكم تهمنى