السبت، 9 يوليو 2011

ذكرى سارة...الحلقة 22


الحلقة 22
قامت غادة دخلت اوضتها وهى بتعيط...هى مش عارفة بتعيط ليه هى حاسة انها مخنوقة ومتضايقة...ياترى علشان افتكرت سارة ولا علشان ادهم فكر يتجوزها...لو كان طلبه ده جه من زمان...اول ماشافوا بعض اكيد كانت هتطير من الفرح ومش بعيد كانت عيطت من الفرحة...بس دموعها دلوقتى ياترى ليه
تكون علشان رفضته...وليه رفضته؟؟؟ علشان سارة
فين سارة...موجودة...فى قلبها وقلب ادهم كمان
قعدت طول اليوم فى اوضتها ومخرجتش منها حتى وقت الغدا
ومن كتر العياط نامت
حست بايد بتطبطب عليها وبتمسح لها دموعها...التفتت
"سارة"
"مالك ياغادة بتعيطى ليه"
"انتى وحشتينى اوى...انتى فين"
"انا مسافرة وقلت اباركلك قبل ماامشى"
"رايحة فين ..وتباركيلى على ايه"
"انا رايحة اتفسح فى مكان حلو اوى"
"اجى معاكى"
"لا خليكى...وخلى بالك من ادهم"
"ادهم...ادهم جوزك"
"لا انا مش متجوزة...ادهم جوزك انتى"

"غادة...ياغادة...انتى كويسة"
صحيت غادة وكانت سوسن بتصحيها وبتكمل
"يابنتى قلقتينى عليكى طول اليوم قافلة عليكى وبتعيطى كل ده ليه...انا مغصبتش عليكى فى حاجة...مش عايزة ادهم بلاش"
"انتى عارفة انا حلمت بمين دلوقتى"
"مين؟؟؟ادهم"
"لأ... سارة"
وحكت غادة لمامتها الحلم اللى شافته بالتفصيل
"وشايفة ايه ياغادة...متهيألى الحلم معناه واضح"
"قصدك ايه؟؟"
"بتوصيكى على ادهم وبتقولك اقبلى"
"بس ده حلم... ممكن يكون من التفكير فى الموضوع ده"
"يعنى ارد عليهم ولا هتفكرى ولا اعمل ايه"
فكرت غادة لحظات وكأنها خدت قرار
"استنينى شوية ياماما هعمل حاجة واقولك بعدها قرارى"
قامت سوسن وخرجت من الاوضة لانتظار قرار غادة

بعد خروج سوسن اتصلت غادة بادهم
"ازيك ياادهم"
"اهلا ياغادة ازيك"
"انا كويسة انت اللى مبتسألش بقالك فترة"
"لا ازاى انا مستغناش عنك..اخبارك ايه"
"اخبارى انى جايلى عريس ومش عارفة ارد اقول ايه"
"مش عارفة ليه"
"علشان فيه اسباب واقفة بينى وبينه...ده غير انى معرفش اذا كان هو عايز يتجوزنى ولا انا مجرد عروسة جايبينهاله"
"لا يا غادة انا عايز اتجوزك فعلا"
"انت مش كنت بتقول انى اختك"
"كنتى اختى...دلوقتى انا بتقدملك ومستنى ردك"
"يعنى دى رغبتك فعلا"
"اومال يعنى حد مكتفنى وبيقول اقولك كده"
"طيب وسارة...نسيتها"
"انتى تقدرى تنسيها"
"لا طبعا"
"ولا انا هنساها...ولا اقولك انى مكنتش بحبها...سارة كانت مراتى وحبيبتى بس راحت منى بامر ربنا...وذكرى انتى اكتر واحدة عارفة انا اتعذبت ازاى وبرضه مطمنتش على بنتى...تفتكرى افضل ابكى الماضى اللى مش هيرجع طول عمرى ولا ابدأ حياة جديدة...وانتى اقرب واحدة ليا...لو رفضتى مش هلومك"
"بكرة هتعرف ردى...سلام ياادهم"
"مع السلامة ياغادة"

خرجت غادة لمامتها وقالت لها انها موافقة وحكت لها على المكالمة وانها كانت خايفة يكون ادهم مكره على الجواز منها
واتكلمت سوسن مع جوزها وحكت له طلب ميرفت واللى حصل وبعد اخد ورد وكلام بينهم اتفقوا على الرد بالموافقة
وتانى يوم اتصلت سوسن بميرفت وقالت لها انهم موافقين
وحددوا يوم وجه فتحى طلب ايد غادة من باباها...واتفقوا انهم مش هيختلفوا على اى تفاصيل وانهم هيسيبوا ادهم وغادة يقرروا هما عايزين ايه...وقرأوا الفاتحة..ونزلوا يجيبوا الدبل
بعد ما جابوا الدبل ولبسوها من سكات...قالت لهم ميرفت يخرجوا مع بعض شوية...وقالت انها هتروح مع سوسن ويبقى ادهم يجيلها هناك

لما خرجوا مع بعض راحوا قعدوا فى مكان هادى وقال ادهم
"انا عارف انك عايزة تفرحى زى كل البنات...بس انا مش عايز اعمل فرح كبير...ممكن تقولى اتعقدت"
"لا عادى ياادهم مش مهم...اللى تشوفه انا موافقة عليه"
"طيب قوليلى طلباتك ايه عايزة ايه؟؟؟اللى انتى عايزاه هعملهولك"
"انا مش عايزة اتجوز فى نفس الشقة ده طلبى الوحيد"
"بصى انا عشت فى الشقة دى احلى ايام حياتى...بس هعمل اللى انتى عايزاه...بس العفش كله جديد زى ماانتى عارفة"
"معلش ياادهم لا الشقة ولا حاجة من العفش يبقوا موجودين...مش هقدر تكون حاجة سارة واستعملها مكانها...صدقنى مش هقدر... مش عايزة شبكة ولا فرح ولا اى حاجة بس قدر احساسى"
"حاضر ياغادة...انتى تعرفى ان بابا عايز يعوضنى وقاللى انه هيتكفل بكل حاجة وكل اللى نعوزه هيجيبه"
"والله ياادهم انا مش عايزة حاجة كبيرة ولا طمعانة فى حاجة...لو هنعيش فى اوضة انا راضية...بس احس انها بتاعتى لوحدى وخاصة بيا انا"
"حاضر يا غادة اللى تشوفيه"
"وممكن اطلب منك طلب كمان"
قالت وبدأت دموع تلألأ فى عينيها وهى بتكمل
"حاول تحبنى ياادهم"
كان ادهم قاعد قصادها...قام قعد جنبها لما شاف دموعها والطريقة اللى قالت بيها جملتها كانت طالعة من قلبها...مسح لها دموعها واخد ايديها بين ايديه
"انا ماليش غيرك دلوقتى...وربنا يقدرنى واسعدك"
فرحت غادة وكانت فرحتها كبيرة اوى وحست انها عايزة تقول للدنيا كلها انها بتحب ادهم ...من زمان...من اول مرة شافته فيها.

هناك 18 تعليقًا:

  1. احنا منقدرش نقول اى حاجة غير انها جميلة جدا
    د

    ردحذف
  2. يا خرابى اه يا انا يا قلبى اللى وجعنى يارب يسعد كل الناس اللى بتحب

    ردحذف
  3. غير معرف
    ميرسى كتيييييييييييييير

    ردحذف
  4. فروتى
    سلامة قلبك
    ويااااااااااارب اسعد كل حبيب مع حبيبه

    ردحذف
  5. جميله اوي يا دندون....عجبتني اوي حلقه انهارده ، فيها شجن وكمية مشاعر رهيبه

    كريم مهران من غرب البلاد عبر احد الهواتف المحموله.

    ردحذف
  6. دلوقتي رجاء تظهر وتطين عشيتهم
    هههههههههههههههههههههههههههههههههههه
    اعتقد زهقتي من كلمة مبدعه دي خلاص بس بجد مش عارفة اقول ايه اكتر من الكلمه دي بجد انتي فنااااااااااااااااااانه

    ردحذف
  7. كريم
    حلوة المفاجأة دى
    ترجع بالسلامة ياااااااااارب
    وميرسى على كلامك الحلو دايما رافع معنوياتى

    ردحذف
  8. شذى
    هههههههه تغتكرى هتظهر؟؟؟؟؟؟؟؟
    وفيه حد يزهق من احلى كلمة

    ردحذف
  9. شكل الرومانسية هتبدأ من هنا ...انا قلبى حاسس....بليز يا دينا خرجينا من موود الحزن ده ...بجد الواحد فيه اللى مكفيه...بلييييييييييز

    ردحذف
  10. هنودة
    كفاية علينا حزن معاكى حق

    ردحذف
  11. دينا يا ريت تكملى بسرعة القصة تحفة بس رجاء دى حرقت دمى

    ام عائشة

    ردحذف
  12. ام عائشة
    منورااااااانى فى المدونة
    واهلا بيكى متابعة جديدة
    بصى ياستى انا كل يوم بكتب حلقة
    وعموما القصة داخلة على الاحداث الاخيرة
    وهتعرفى كل حاجة بسرعة

    ردحذف
  13. ولله انا عطيت من الحلقات للي قريتها ومكنتش عايزة اكمل القصة بس مش عرفة اية للي خلاني اكملها ممكن يكون فضول اني اعرف النهاية

    ردحذف
  14. rbna ygr7k ya 3'ada

    msh ymkn rbna 3ml kol da 3shan y722 l3'ada omnitha anha lma geh w 7b sara hia m3trdtsh bl3ks w2ft m3ahom

    ردحذف
  15. أكيد كل حاجه مش حلوه بتحصل لينا بيبقي فيها خير اكتر واحنا مش حسين

    ردحذف
  16. انا بجد والله القصة دية بقت روتين ليا لازم اقراء كل يوم قصتين منها او تلاتة

    ردحذف
  17. ادهم دا انسان خاين هو وغاده

    ردحذف

قول رأيك بلاش تقرا وتقفل من سكات...ارائكم تهمنى