الأحد، 10 يوليو، 2011

ذكرى سارة...الحلقة 23


الحلقة 23
كان الاتفاق ان يتم التجهيز للجواز باسرع وقت
وكانوا مرة قاعدين ميرفت وسوسن وغادة وادهم
ميرفت"المفروض نفضى الشقة قبل مانعرضها للبيع"
سوسن"هنعمل ايه فى الحاجة اللى فى الشقة"
ميرفت"نشوف اللى غادة عايزاه تاخده والباقى نتصرف فيه"
غادة"انا مش عايزة حاجة خالص"
سوسن"ليه ياغادة...شوفى لو حاجة تنفعك خديها"
غادة"لا ياماما...مش هقدر اخد حاجة كانت سارة بتستعملها"
ادهم"بس ياغادة احنا مش بنقولك خدى هدومها...يعنى الاجهزة كلها جديدة...والسفرة كنا جايبينها غالية ولو بعناها هتخسر كتير...الاوضة طبعا هتتغير حتى لو كانت ايه والصالون اغيرهولك"
غادة"خلاص اللى تشوفه ياادهم...هقوم اعملكم عصير"
وقامت غادة دخلت المطبخ وهى بتدارى دموعها
ميرفت"ايه يا سوسن...هى غادة زعلت"
سوسن"تقريبا كده"
ادهم"هو انا قلت حاجة غلط...انا مقصدتش ازعلها والله"
سوسن"انا عارفة يابنى...هقوم اشوفها"
ميرفت"استنى ياسوسن...ادهم يدخل يشوفها ويتكلم معاها"
ادهم"بعد اذنك ياطنط"
سوسن"قوم يابنى...ربنا يهدى سركم"

كانت غادة قاعدة فى المطبخ ومش بتعمل حاجة غير انها بتمسح فى الدموع اللى بتنزل من عينيها
دخل ادهم واتفاجئت بيه
"مالك ياغادة ...قمتى كده ليه"
"مفيش انا قمت اعمل عصير"
"بس انا شايفك قاعدة بتعيطى ومش بتعملى حاجة ...انا زعلتك فى حاجة"
"انت شايف ايه"
"انا مش عارف...كلمينى بصراحة مالك"
"احنا مش اتفقنا ان كل حاجة هتتغير...ليه بتغير كلامك دلوقتى"
"انا مغيرتش كلامى...كل اللى حصل اننا بنفكر مع بعض...يعنى هيحص ايه لو سبنا التلاجة ولا الغسالة ولا التليفزيون ولا السخان ده هيضايقك فى ايه...كل ده علشان سارة كانت بتستعمل لهم...انا قلت لك قبل كده مش هنسى سارة ولا ذكرى انتى عايزة تلغيهم من حياتى"
"انا..انا؟؟؟ لا طبعا انت ازاى تقول كده"
"ده اللى انا شايفة يمكن تكونى انتى مش حاسة بكده بس ده اللى واضح...الشقة وقلنا هتتغير لان انا كمان مش هقدر اعيش فيها والعفش حقك يتغير انما يعنى ارمى الاجهزة"
"خلاص ياادهم قلت لك اللى تشوفه"
"مش اللى اشوفه انا مش بجبرك ...انا بس عايزك تبطلى الحساسية اللى انتى فيها دى...مش كل شوية سارة"
"يعنى انساها"
"لا انتى تنسيها ولا انا انساها...بس بلاش تبقى بيننا"
"حاضر ياادهم ...انا اسفة انى زعلتك"
"انا اللى اسف انى زعلتك...بس ياغادة مش معقول كل وقتنا هنقضيه فى زعل وشرح اسباب...عايزين نركز فى حياتنا مع بعض بس"

اتفقوا انهم يروحوا يفضوا الشقة علشان يبيعوا العفش...مع الاحتفاظ بالاجهزة والسفرة زى ماقال ادهم
راحوا كلهم الشقة...كانت لحظة صعبة اوى عليهم كلهم بس كان كل واحد بيحاول يمسك نفسه
سوسن اول مادخلت مقدرتش تمسك دموعها وخرجت بسرعة على البلكونة...كانت بتبص على شقة رجاء وبتقول لنفسها
"الله يرحمك ياسارة ...الله يرحمك ياحبيبتى...ياترى انتى فين يارجاء...سيبتينى وروحتى فين"
دخلت وراها ميرفت
"سوسن امسكى نفسك شوية...خلينا نخلص اللى احنا جايين علشانه بسرعة ونمشى...مش عايزين ننكد على العيال كفاية اللى شفناه"
مسحت سوسن دموعها ودخلت مع ميرفت..وقالوا لسارة انهم يبداوا بسرعة فى لم الهدوم ويفضوا الحاجة علشان يخلصوا بسرعة
دخلوا فضوا المطبخ...ولموا السجاد...ولاحظت غادة انها مش شايفة ادهم ...بدأت تدور عليه فى البلكونة وبعدين الاوضة الصغيرة...وبصت شافت اوضة النوم مقفولة
راحت سألت ميرفت
"هو ادهم نزل؟؟"
"معرفش بس مسمعتش الباب"
راحت على باب الاوضة وفتحته...شافت ادهم قاعد على السرير واخد صورة سارة وهدومها فى حضنه وبيعيط
كان بيعيط ومش حاسس بحاجة حواليه...لدرجة انه محسش بغادة لما فتحت الباب ووقفت حوالى دقيقتين وقفلت الباب تانى
اتضايقت اوى من اللى شافته...وحست بالغيرة...من سارة
هى حبت ادهم الاول ومع ذلك حبها لسارة خلاها تقتل الحب ده وتسلم بحبه لسارة...حتى بعد موت سارة..لسه واقفة بينهم
احساسها مش كره لسارة بس اتحول لتحدى...لازم تخلى ادهم ميفكرش فى سارة تانى ابدا...لازم يحبها هى..ببساطة لانها هى اللى موجودة معاه...دخلت كملت معاهم ولما جه الدور على انهم يفضوا الاوضة...قالت لميرفت
"طنط ...شوفى ادهم فين ليكون نام ولا حاجة لان الاوضة مقفولة وهو تقريبا جوه"
دخلت ميرفت الاوضة لادهم وبعدين خرج ادهم وعينه باين عليها العياط...دخل غسل وشه بسرعة
"انا نازل اجيب العربية اللى هتشيل العفش وباقى الحاجة"

كانت كل حاجة بعد كده ماشية بسرعة...لان مكنش فيه وقت يدوب اشتروا الشقة ووضبوها واشتروا العفش وفرشوها...وحددوا معاد الجواز...كانت الايام بتعدى بسلام
لان غادة قررت انها هتخلى ادهم يحبها ...ومن ناحية تانية انها فعلا عملت زى ماادهم قال...متخليش سارة بيننا

رغم انهم مش هيعملوا فرح الا انهم اتفقوا ان غادة من حقها انها تلبس الفستان الابيض اللى بتحلم بيه كل بنت فى كتب الكتاب
وفعلا جابت احلى فستان وحجزوا اسبوعين فى الغردقة يبدا من تانى يوم جوازهم

قبل كتب الكتاب باسبوع...اتصل فتحى بادهم
"ازيك ياادهم ...مش ناقصك حاجة"
"الحمدلله يابابا كله تمام...متحرمش منك"
"انا عايز اقولك حاجة بس معلش حاول تتقبل اللى هقوله"
"خير يابابا...قلقتنى"
"انا طول الفترة اللى فاتت دى وانا مش ساكت ومكلم اكتر من حد يدور على ذكرى"
"ها يابابا طمنى لقيتها"
"بص يابنى انا مش عارف بس حصلت حادثة ميكروباص اتقلب فى اسيوط وفى 5جثث مجهولة...منهم طفلة تقريبا سنة ونص وست فى اوصاف حماتك"
"اسيوط...وجثث"
"يابنى ان شاءالله متطلعش هى بس خد حماتك وروح مستشفى اسيوط العام..علشان تتعرفوا عليهم"

هناك 11 تعليقًا:

  1. ايوووووووة بجد جاااااااامدة موت لا مش هينفع كدة الشحتفة دى لازم اعرف اية اللى هيحصل

    ردحذف
  2. فروتى
    هههههههههه هتعرفى كل حاجة ان شاءالله
    فى الحلقات الجاية

    ردحذف
  3. حاسه ان هتكوه ذكرى ورجاء هما فعلا اللى عملوا الحادثه دى وماتوا علشان تنتهى اى حاجه فى حياتهم تفكرهم بساره او اى حاجه ليها علاقه بساره وتبقى ساره مجرد ذكرى حلوه فى حياتهم كلهم ويبدأ حياتوا من اول وجديد مع غاده ... وعسى ان تكرهوا شىء وهو خير لكم بالنسبه لادهم ممكن يعيش قصه حب احلى مع غاده وبالنسبه لغاده ربنا يعوضها خير على حبها ليه اللى قتلتوه فى قلبها علشان خاطر اختها وحبيبتها وماشلتش فى قلبها اى حقد واتألمت لان الحب ده ادهم ماحسش بيه ... وبجد انا تعبت من العياط الحلقات اللى فاتت دى كفايه بقى نكد اصلا الواحد مابيصدق اى حاجه ويعد يعيط عايزنها تبقى بمبى شويه زى ما بنتمنى دايما فى حياتنا

    ردحذف
  4. رودينا
    انا بجد اسفة ان جرعة النكد فى القصة دى كانت كبيرة شوية...ومين عارف اللى جاى هيكون ايه
    وتحليلك وتوقعك عجبنى اوى...بس مش هقدر اقولك صح ولا غلط بالنسبة للاحداث الجاية
    تشوييييييييييييييييييق

    ردحذف
  5. هي العيله دي تخصص حوادث ولا ايييييييييييه؟؟؟؟
    لا اعتقد ان ممكن رجاء وذكرى في الحادثة بس ممكن رجاء هي بس اللى تموت وذكرى لا , وبكده ذكرى تنجو من حادثتين وهي اقل من سن سنتين , الطفله المعجزة
    هههههههههههههههههههههه
    حشوف بكره حتطلع انا صح ومكشوف عني الحجاب ولا غلط:))
    بس جميله الحلقة يا دودو وبجد انا معجبه اوي باخلاص ادهم لساره وبروح غاده اللى بجد نادر ما تلاقيهم هم الاتنين في الاوقات دي
    حستني حلقه انهارده بفاااااااارغ الصبر

    ردحذف
  6. شذى
    هههههههههههههههههههههه
    الطفلة المعجزة حلوة اوى دى
    هنشووووووووف صح ولا غلط
    وميرسى للمتابعة ياحبى

    ردحذف
  7. دينا الحلقة جميلة قوى
    احسن ان رجاء ماتت بس انا مش حاسة ان ذكرى هتموت

    عشان هيبقى حرام قوى ان ادهم يتحرم منها للابد كدة

    مستنياكى

    ام عائشة

    ردحذف
  8. ام عائشة
    ميرسى على كلامك الجميل
    وهيبان كل حاجة النهاردة مين مات ومين عاش
    نورتيييييييييينى

    ردحذف
  9. انتى بجد محصلتيش يادينا انا فعلا متاثره جدا باللى بيحصل مع ادهم وبجد محديش يقدر يرجع كلمة حب ممكن تكون خرجت من حبك بجد وانت حسيتها بجد بس ادهم ممكن يتجوز ويخلف بس عهمره ما هيحب غير ساره لانى المشاعر بتتعاشى اول مره وبعجد كده بتبق كلام مفيش احساس وديه وجهة نظرى

    ردحذف
  10. يلهوى على القصة انا قربت ادمع و الله

    ردحذف
  11. دينا بجد بجد انا عايزه حق المناديل اللي خلصت على العياط دي اهئ اهئ اهئ
    Merna

    ردحذف

قول رأيك بلاش تقرا وتقفل من سكات...ارائكم تهمنى