الاثنين، 11 يوليو 2011

ذكرى سارة...الحلقة 24


الحلقة 24
قفل ادهم مع فتحى وسألته ميرفت وحكى لها اللى حصل
"ماما انا مش قادر اقول لطنط سوسن وهى لازم تيجى معايا علشان تشوف اختها"
"يعنى هو متأكد انهم هما"
"لا...ويارب مايكونوا هما...على الاقل يبقى عندى امل ان بنتى ترجعلى"
"طيب ياادهم هتصل انا بيها واقولها"
اتصلت ميرفت بسوسن وحكت لها اللى حصل

طول الطريق ووادهم وسوسن قاعدين كل واحد سارح فى خياله
ادهم بيفكر يعنى طول المدة دى وهو مشتاق لها واول مايشوفها يلاقيها جثة...يارب ما تطلع هى
وسوسن بتفكر يعنى رجاء خدت البنت وهربت طول الشهور اللى فاتوا دول ولما يلاقوها تطلع جثة...يارب ماتطلع هى

كانت غادة فى البيت على نار...ربنا يستر ومتكونش خالتها وذكرى ماتوا فعلا...يعنى طول الفترة دى مش لاقيينهم ويظهروا قبل الفرح باسبوع بالضبط...لو هما فعلا اكيد كل حاجة هتتأجل...واضح ان نصيبها مش مع ادهم...بس بعد كل ده وبعد ماكل حاجة خلصت ... يارب ما يطلعوا هما

وصلوا للمستشفى...سوسن ماشية حاطة ايدها فى ايد ادهم لانها حاسة انها مش قادرة تخطى خطوة واحدة لوحدها...وادهم حاسس بيها وساندها ...ولما سألوا عن انهم جايين يتعرفوا على جثث من الحادثة...اخدهم ممرض على المشرحة
"هو حضراتكم تبع مين...الجثث الى فى الحادثة راجلين و2 ستات واحدة فى العشرينات وواحدة فى الخمسينات وطفلة صغيرة"
ادهم"احنا عايزين نشوف الطفلة والست الكبيرة"
"طيب بس معلش لوشمحتى يا حاجة جمدى قلبك علشان المنظر يمكن متقدريش تتحمليه"
ادهم"ورينا الطفلة الاول"
وفتح الممرض درج التلاجة وظهرت جثة طفلة
سوسن"لا اله الا الله..مش هى ..مش هى ياادهم...يارب صبر اهلها"
ادهم وعينه بتدمع"متأكدة يا طنط...انا مش عارف"
ميرفت"والله ما هى...انا متأكدة..مش شبهها خالص"
الممرض"هتشوفوا جثة الست الكبيرة"
ادهم"ايوه علشان اتأكد"
وفتح الممرض درج التلاجة وظهرت الجثة التانية وكانت بعيدة تماما عن رجاء
خرجوا من المستشفى وهما بيحمدوا ربنا ان الجثث مكنتش لرجاء وذكرى...واتصلت سوسن بغادة طمنتها واتصل ادهم بمامته وبعدين بباباه طمنهم

لما رجعوا كنا داخلين على الليل وشافتهم غادة وهما نازلين من التاكسى...شافت مامتها طالعة وادهم طالع على البيت
بعد ساعة اتصلت بيه
"ادهم انت مش هتيجى ننزل"
"لا مش قادر ياغادة"
"انت هتنام"
"اه هنام...عايزة حاجة"
"لا خلاص هكلمك بكرة"

قفل معاها ودخل اوضته كان عايز يقعد لوحده تماما...كان متضايق جدا ومخنوق ...ياترى ذكرى فين دلوقتى...وهيلاقيها ولا لأ
اخر مرة شافها كان اليوم اللى سافر فيه وحصلت فيه الحادثة
اللى ضايقه اكتر انه لما شاف البنت مكنش متأكد هى ولا لأ فات سنة واكيد شكلها اتغير...ياترى هيقابلها امتى...ولا مش هيقابلها خالص...ياترى كانت رجاء معاها حق لما قالت انه السبب فى موت سارة...لو مكنش قالها تسافر كان زمانهم دلوقتى عايشين مع بعض هما التلاتة...ياااااه سارة وحشته اوى...ازاى هيقدر يعيش حياته طبيعى تانى مع غادة...المفروض لسه ايام على جوازهم

تانى يوم نزلت غادة تجيب حاجات مع مامتها...وبعدين قرب معاد انتهاء شغله راحت له الصيدلية
"ايه ياغادة اللى جابك هنا"
"جيت علشان بعد ماتخلص نروح نجيب حاجة ليك"
"انا من الصبح هنا ومش هقدر اروح فى اى حتة وبعدين متصلتيش بيه ليه قبل ما تيجى"
"انا قلت اعملك مفاجاة...انت متضايق انى جيت"
"لا ابدا...نورتى...10 دقايق وهقوم معاكى"
"براحتك هستناك "
بعد ماخلص ركبوا تاكسى وراحوا على البيت
"ايه ياادهم بقولك عايزة اجيب حاجة وانت معايا"
"بعدين ياغادة...مش قادر النهاردة"
"طيب نروح دلوقتى وبعد ما تتغدا وترتاح ننزل"
"لا مش هقدر انزل النهاردة...وبعدين حاجة ايه اللى عايزانى معاكى فيها...خدى مامتك ولا ماما"
"مينفعش ياادهم...خلاص نخليها بكرة"

حست غادة ان ادهم متغير معاها وخصوصا ان المكالمات بينهم لاتتعدى دقيقتين تلاتة...وفات 4 ايام على كده...ومش فاضل على جوازهم غير 3 ايام
وراحت غادة البيت لادهم
ميرفت"اهلا ياغادة...سوسن فين"
"ازيك ياطنط..ماما فى البيت...بس انا جيت علشان عايزة ادهم"
وجه ادهم واتفاجئ بيها
"ازيك ياغادة...خير "
"مفيش انا جيت اتكلم معاك شوية"
وقامت ميرفت بحجة انها وراها حاجات فى المطبخ علشان تسيبهم
"انت متغير معايا كده ليه"
"متغير ازاى يعنى"
"انت مش حاسس ياادهم ان الكام يوم اللى فاتوا دول متقابلناش ومش بنتكلم الا بسيط "
"انا مش فاهم...نتقابل ليه واحنا كمان كام يوم هنبقى مع بعض فى بيت واحد"
"انا مش بقول نتقابل علشان نتدلع ولا نتفسح...انا كنت عايزة اجيب لك هدية ولازم تقيسها...ده كل الموضوع"
"شكرا ياغادة...كانك جبتيها"
"ياادهم طريقتك دى وحشة اوى"
"طريقة ايه عايزانى اعمل ايه"
"اللامبالاة اللى بتعاملنى بيها دى"
وبدأ صوت ادهم يعلا
"انا اللى لامبالاة...ولا انتى اللى مش حاسة بحاجة خالص"
"وانت حكيت لى حاجة وانا محسيتش بيها"
"المفروض تقدرى احساسى...انا معرفش هشوف بنتى تانى ولا لأ وحاسس بالذنب من موت سارة"
وجت ميرفت على صوت ادهم
"مالكوا ياولاد"
غادة"واضح ان ادهم بدأ يندم يا طنط...الحمدلله اننا لسه على البر"
ادهم"اندم...شفتى ازاى مش حاسة بيا"
غادة"انت اللى مش حاسس بيا...انا عايزة افرح بجوازى زى اى بنت ومع ذلك رضيت بكل اللى انت قلت عليه"
ادهم"ماانا كمان غيرت كل اللى انتى قلتى عليه"
ميرفت"صلوا ع النبى ياولاد...محصلش حاجة لكل ده"
ادهم"انا مخنوق ومحدش حاسس بيا"
غادة"ياادهم انت لو بتفضفض معايا وتقولى كل اللى بيضايقك اكيد هترتاح...وساعتها لو انا محسيتش بيك زى مابتقول يبقى انا غلطانة"
ادهم"انا اسف ياغادة...بس غصب عنى"
غادة"ولا يهمك...روق انت بس...ولو تحب نأجل شوية انا مش زعلانة"
ادهم"لالالا منأجلش كل حاجة فى معادها ان شاءالله"
فرحت غادة لما حست ان ادهم مش عايز تأجيل ومعنى كده انه عايزها زى ما هى عايزاه...بس ياترى بيحبها زى مابتحبه؟؟

هناك 12 تعليقًا:

  1. امممممممم.. لسه كلاكيع ف الحكايه.. ربنا يعدي الايام الجايه على خير خخ

    ردحذف
  2. توتا
    ماهو حتى بعد ما رجاء مشيت
    سابت لغز اختفائها كلكوعة كبيرة

    ردحذف
  3. انتى كدة بتشوقينا قوى يا دينا

    وغادة دى كمان مش مقدرة اى حاجة وكل اللى هيا عيزاه انها تعيش قصة حب مع ادهم ومش حاسة بيه ولا ازاى انه قلقان وخايف على بنته

    الممفروض غادة وافقت على ادهم وهيا عارفة انها مش هتاخد مكان سارة فى قلبه بين يوم وليلة لان دة مش هيجى غير بالعشرة

    دينا ارجوكى طمنينا على ذكرى انا حاسة انها بنتى انا

    ونسيت اقولك ان الحلقة حلوة قوى زى كل مرة

    ام عائشة

    ردحذف
  4. ام عائشة
    انتى كلامك على غادة صح
    بس برضه احنا كستات عندنا غيرة ممكن توصل لانانية فى الحب فهى لها اسبابها

    بصى طالما ادهم موصلوش خبر وحش عن ذكرى تبقى كويسة
    انما هى فين؟؟؟اممممم هيبان اكيد

    وبجد كلامك اسعدنى جداااااا
    ربنا يخليكى ويفرحك بعائشة

    ردحذف
  5. على فكره
    معتقدش ان ادهم حيقدر يحبها زي ساره يمكن بعد وقت حيبقي تعود او عشره لكن حي معتقدش خالص

    ردحذف
  6. بصراحه انا لو منها كنت اجلت شويه او لغيتها خالص

    نوسه القاضى

    لانه فعلا الظاهر انه مش حاسس بيها
    هى كمان اكيد بتقطع من جواها ..واحده عايزة تفرح بحبها وبجوزها

    اينعم كتر خيره هو كمان ...بس على الاقل مايكسرش بخاطرها دا هو اللى قال هتجوزها مش هى اللى خلته يتجوزها

    ردحذف
  7. آآآآآآآآآآآآآآآآآآآآآآههههههههههههههههه يا قلبي لي اللي بيحصل ادهم عمرو ميقدر ينسي سارة و غادة بدأت تبقي انانية و انا حاسة اني مش طايقاها ربنا يصبرك يا ادهم و يعينك
    و بجد تحفة كملي يا قمر

    ردحذف
  8. نوسة
    ماهى دى المشكلة ان كل واحد فيهم ممزق بين احساسه وتفكيره
    "ممزق بتاعة شذى" هههههههههه

    ردحذف
  9. اسراء
    سلامة قلبك
    بس الاتنين معذورين وكل واحد عنده اسبابه المقنعة

    ردحذف
  10. هههههههههههههههههههه
    رجعنا للتمزق تاني اهو

    ردحذف

قول رأيك بلاش تقرا وتقفل من سكات...ارائكم تهمنى