الأربعاء، 13 يوليو 2011

ذكرى سارة 25

الحلقة 25
ال3 ايام اللى كانوا فاضلين على الفرح كان كل واحد فيهم بيحاول يحس بالتانى اكتر من نفسه
ادهم بدأ يفكر بواقعية اكتر انه لازم يعرف ان الماضى انتهى وغادة هى الحاضر والمستقبل
غادة حاولت انها متضغطش على ادهم وسابته براحته وكانت مقتنعة انه لو مكنش عايزها مكنش طلب يتجوزها... وحاولت تلتمس له العذر لان اللى مر بيه كان صعب اوى

كانت غادة عروسة جميلة اول مرة ادهم يشوفها بالجمال ده
كان فرحان فعلا وهو بياخد عروسته من الكوافير والناس حواليهم بتباركلهم...وبعد كتب الكتاب لما روحوا على البيت محدش من اهلهم طلع معاهم غالبا افتكروا اللى حصل يوم فرحه مع سارة فكل واحد طلع حجة ووصلوهم لحد العمارة بس وسابوهم ومشيوا

كانت غادة فرحانة ومكسوفة فى نفس الوقت بس فرحتها كانت اكبر معقول الحب الوحيد اللى فى حياتها...وكان حب من غير امل ...لدرجة انها جه عليها وقت وكانت نسيت ان ليها قلب حبت بيه ادهم..ومقدرتش تحب حد تانى...معقول ادهم بقى جوزها
"مبروك يا عروسة"
"الله يبارك فيك يا عريس"
"احنا هنسافر بكرة المغرب ان شاءالله النهاردة اتصلت بشركة السياحة وعرفت المعاد بالظبط"
"طيب كويس"
وقامت غادة دخلت اوضتها...ودخل وراها ادهم وقعدت قدام المراية وبدأت تفك الطرحة من شعرها
"انتى بتعملى ايه...استنى"
"ايه ياادهم...استنى ايه"
"استنى لما انا افك لك الطرحة"
وجه ادهم وقف وراها وبدأ يفك الطرحة وسرح بخياله ليوم فرحه على سارة لما قالتله ان العروسة بتحب عريسها يفك طرحتها
كانت غادة فرحانة اوى بالخطوة دى من ادهم ومقدرتش تخبى
"ادهم انا فرحانة اوى...تعرف انك فاجئتنى بحكاية انك تفك لى الطرحة...هى حاجة بسيطة بس بتفرح اوى"
"انا عارف انها بتفرح...سارة اللى قالتلى كده"
وكأن ادهم وهو واقف وراها طعنها بخنجر لما قال سارة...الفرحة اللى كانت على وشها راحت وبصت لادهم فى المراية باستغراب
"سارة"
وحس ادهم انه غلط لما جاب سيرة سارة...بس غصب عنه
"انا اسف ياغادة"
ومردتش غادة كل اللى عملته انها بعدت عن ادهم وغيرت هدومها ودخلت الاوضة التانية تنام فيها
كان ادهم مش عارف يعمل ايه...هو غلط بس غلطته مش مستاهلة رد الفعل اللى اخدته غادة...هى عايزاه ينسى سارة خالص وكانها مدخلتش حياته ...مستحيل ينساها
كان هيروح وراها بس حس انها كمان غلطت فى رد فعلها ده...غير هدومه ونام فى اوضته

صحا ادهم وكانت غادة مخرجتش من اوضتها..تجاهلها ادهم تماما لحد ما جم سوسن وميرفت علشان يباركلهم
اول ما سوسن وميرفت دخلوا البيت حس ان فيه امر مريب ووضع مش طبيعى...وخصوصا لما شافوا غادة خارجة من الاوضة التانية مش من اوضتها وكان باين عليها انها صاحية من النوم
الامهات الاتنين بصوا لبعض بتعجب واستغراب
سوسن"انتى مكنتيش نايمة فى اوضتك"
ميرفت"حصل ايه ياادهم"
وقعد كل واحد فيهم يحكى اللى حصل...وكل واحد فيهم يتهم التانى انه هو اللى غلطان
وواخدت سوسن غادة على جنب...واخدت ميرفت ادهم فى جنب تانى

سوسن وغادة
"على فكرة ياغادة انتى غلطانة ومحدش يعمل كده...فيه عروسة تخاصم جوزها ليلة دخلتها"
"وهو ياماما يقوللى سارة "
"وفيها ايه...انتى نسيتى سارة ولا ايه؟"
"لا والله ياماما...بس انا اتضايقت لما حسيت انه لسه فاكرها"
"انتى عارفة انه مش هينساها...قبلتى تتجوزيه ليه"
"علشان بحبه ياماما"
"خلاص يبقى تحافظى على جوزك وتخليه يحبك...ولما يحبك وتبقى انتى اللى قدامه مش هيجيبلك سيرتها...انما انتى كده بتطفشيه"
"ماهو جرحنى اوى"
"يقصد ولا غصب عنه"
"غصب عنه"
"خلاص اتعاملى مع جوزك بعقل واكسبيه"
"حاضر ياماما"

ميرفت وادهم
"ايه ياادهم فيه حد يعمل كده"
"وانا عملت ايه ياماما...انا مأجرمتش لما جبت سيرة سارة"
"لا ...جرحت مراتك لما تجيب سيرة مراتك الاولانية وامتى...يوم جوازكوا...والنبى فى حد عاقل يعمل كده"
"والله ماكنت اقصد ده الكلام جه على لسانى غصب عنى...وبعدين هى عارفة انى مش هنسى سارة ولا ذكرى لازم تعرف كده"
"انا مقولتش انساهم بس عايز تفتكر سارة افتكرها بينك وبين نفسك...عايز تتكلم عنها تعالى اتكلم معايا مش مع مراتك"
"انتى نسيتى هما الاتنين كانوا ايه لبعض"
"منسيتش...بس دلوقتى غادة مراتك وطبيعى انها تغير عليك"
"تغير من واحدة ماتت ومعدتش موجودة"
"كلامك عنها بيخليها موجودة...اتعامل مع الواقع ياادهم...وغادة هى الواقع بتاعك ولازم تتكيف معاه"
"واللى عملته صح لما تغضب وتنام فى اوضة تانية"
"انت لو كنت روحت وراها وراضيتها وحايلتها بكلمتين كان كل حاجة خلصت...انت غلطت ياادهم ولازم تصالحها"
"حاضر ياماما"

وجابت سوسن غادة ...وجابت ميرفت ادهم
ميرفت"بوس راس مراتك ياادهم"
سوسن"اعتذرى لجوزك ياغادة"
ادهم راح اخد غادة فى حضنه وباس راسها"متزعليش"
سندت غادة راسها على صدر ادهم"متزعلش انت منى"
ومالت ميرفت على سوسن
"متهيألى مالناش لازمة خالص دلوقتى...قومى بينا ونبقى نكلمهم قبل مايسافروا...ولا حتى منتكلمش خالص"
ضحكت سوسن"قومى ياختى...احنا كده هنبقى عوازل...ربنا يهديهم ويسعدهم يارب"

هناك 13 تعليقًا:

  1. هههههههههههههههههههههههههههههههههههههههه عرسان خايبه

    ردحذف
  2. توتا
    ههههههههههههههه
    ربنا يهديهم

    ردحذف
  3. الحلقة جميلة قوى يا دينا وعجبنى قوى موقف سوسن وميرفت

    ودلوقتى بقى جه دور غادة هى دلوقتى تعتبر فى تحدى بينها وبين نفسها انها لازم تخلى ادهم يحبها وميشوفش فى الدنيا الا هى

    طبعا حبه لساره مش هيقل بس هيبقى ذكرى جميلة بينه وبين نفسه بس خلاص طبعا معدش يقدر يجيب سيرتها قدام غادة


    لازم ادهم يعيش الواقع وزى ما بيقولوا الحى ابقى من الميت ولازم يحب غادة بجد عشان لما ذكرى ترجع تقدر غادة تربيها بحب هى كمان وتحس انها بنتها ومتشوفهاش على انها بنت سارة اللى بتاخد منها ادهم حتى بعد ما ماتت

    بس تعرفى يا دينا انا بحب سارة اكتر من غادة

    ام عائشة

    ردحذف
  4. هههههههههههههههههههه
    ربنا يهديهم

    ردحذف
  5. هههههههههه اما نشوف شكله كده هيلاقى حماته و بنته فالسفرية دى يا مسهل

    ردحذف
  6. هههههههههههههه والله الامهات دى زى العسل :))

    ردحذف
  7. feha e lw kant rga2 kman kdaaa !!

    rbna ykrmnii b7ma zy merft wla sawsn kda :D :D

    ردحذف
  8. القصة مسلية جدا بس حزينة

    ردحذف
  9. الستات دووووول بيعرفوا يضحكوا وقليهم موجوع وحياتهم متلخبط ويسليروا حياتهم عادي بجد ...فعلا المراة دي كيان
    اروى

    ردحذف
  10. ساره صعبانه اوى عليا فعلا متضايقه من موتها

    ردحذف
  11. ايه الهبل ده يجيب سيره ساره تقوم دي زعلانه من حجات تافه

    ردحذف
  12. كلهم نسيوا ساره جتى ادهم بحس انو بيفتكرها بس تاديه واجب
    لو حبها كان غعلا عاش على ذكراها كان افتكرها كل ثانيه مش لما يكون لوحده بس زي ما قالت ميرفت بجد ادهم غلط اووي في حق ساره اووي
    Merna

    ردحذف
  13. ههههههههههههههههههه

    ردحذف

قول رأيك بلاش تقرا وتقفل من سكات...ارائكم تهمنى