الخميس، 14 يوليو 2011

ذكرى سارة الحلقة 26

الحلقة 26
سافر ادهم وغادة الغردقة زى ماكانوا متفقين وحاجزين
كانوا سعداء مع بعض ...بالرغم ان ادهم اول كام يوم كان كل مايقرب لغادة ويحضنها يغمض عينيه ويتخيلها سارة
بس حس بالذنب وكأنه بيخون غادة لما يفتكر سارة وهى بين ايديه...فكان كل مايشوف سارة قدامه يفتح عينيه ويبص فى وش غادة علشان يأقلم نفسه ويعترف ان غادة هى مراته دلوقتى مش سارة...بس غادة ملاحظتش اى حاجة من اللى بتدور فى دماغ ادهم بالعكس كانت شايفاه رقيق وحنين معاها...وبيعاملها بحب رغم ان كلامه ليها مش كلام الحب والرومانسية اللى ممكن يكون بين اى عروسين...بس هى كانت مستنية لما يحبها ويقولها كده من نفسه مش لما تسأله
فات الاسبوعين ورجعوا بيتهم وجالهم سوسن وميرفت يزوروهم وقعدوا معاهم شوية ومشيوا
"غادة انا بكرة رايح الشغل...ابقى صحينى ع الساعة 10"
"حاضر ياادهم"

صحا ادهم على صوت المنبه..وغادة جنبه بتصحيه
"ادهم...قوم يالا الساعة 10"
قام ادهم دخل الحمام وخرج وكانت غادة لسه على السرير
"غادة مش هتقومى نفطر"
"حاضر ياادهم"
"بصى ...ألبس ايه"
"مش عارفة ألبس اى حاجة تريحك"
وخرجت غادة من الاوضة وعملت فطار
"خلاص ياادهم فطارك جاهز"
"انتى مش هتفطرى معايا"
"لا انا مبفطرش اصلا...افطر انت"
وفطر ادهم لوحده ونزل ولما راح الصيدلية اتصل بيها
"ايه ياغادة بتعملى ايه"
"كنت نايمة...انت نسيت حاجة ياادهم ولا ايه؟"
"لا ابدا كنت بكلمك بس اشوف عايزة حاجة وانا جاى"
"لا شكرا"

قامت غادة من النوم براحتها وحضرت الغدا وقعدت تستنى ادهم
لما جه ادهم كانت غادة بتتكلم فى التليفون ولما خبط اول مرتين كانت قايمة تفتح لما لقيته بيفتح بالمفتاح
"ايه ياادهم..انت خبطت على الباب ليه مفتحتش على طول"
"كنت فاكرك مستنيانى وهتفتحيلى الباب"
"مستنياك طبعا بس هفتح الباب ليه مش انت تدخل على طول...ثوانى هحضر الغدا بعد مااقفل مع ماما"
وهما قاعدين بيتغدوا
"غادة مش هتشغلى اى اغنية واحنا بنتغدا"
"لو عايز ماشى...تحب تسمع مين"
"اختارى على ذوقك"
وقامت غادة شغلت اغانى من الكمبيوتر...كانت مجموعة اغانى متنوعة حديثة...قام ادهم وغير الاغانى..ودور على اغانى لنجاة بس ملقاش على الكمبيوتر...مسكتش ولا راح يكمل اكل الا لما حملها من على النت وشغلها...اغنية الا انت
كانت اهتمامات ادهم وغادة مختلفة كتير...ادهم كان بيحب يتفرج على القنوات الرياضية ومباريات كرة القدم...اما غادة كانت بتحب الافلام والمسلسلات العربى
فكان الوقت اللى بيجمعهم فى البيت كل واحد بيقعد يتفرج فى حتة على اللى بيحبه...وبدأ ادهم يخرج بعد الشغل يقضى وقته مع صاحبه فى الصيدلية حتى فى غير وقت شغله...ويرجع بالليل على النوم...اما يوم الاجازة فكان بيقضيه هو وغادة عند مامته
مر على الحال ده 4 شهور وفى يوم بعد مارجع من الشغل
"ادهم انت مش ملاحظ اننا مش بنقعد مع بعض خالص...انا زهقت"
"اقعد اعمل ايه...لما بقعد بتدخلى تتفرجى على التليفزيون فى الاوضة وبتسيبينى قاعد لوحدى"
"طيب ياادهم نقعد مع بعض نعمل اى حاجة"
"يا غادة انتى اللى بتبعدى عنى...الفطار بفطره لوحدى اى حاجة بحبها انتى مبتحبيهاش"
"طيب نتفق على الحاجات اللى نحبها احنا الاتنين"
"من غير اتفاق دى حياة مش هينفع تعيشى بضغط ولا غصب عنك وتعملى حاجة مش بتحبيها"
"نجرب"
"خلاص لازم كل حاجة نبقى مع بعض...واهتمى بيا شوية... وحسى بيا اكتر من كده"
"احس بيك ازاى ...هو انا مش بحس بيك"
"بصى ياغادة سارة كانت بتحس بيا وانا طالع على السلم تفتح لى الباب...كانت بتحضر لى كل حاجة حتى الهدوم اللى هلبسها... مكنتش بتخلينى افكر اخرج من البيت لانها بتعمل كل حاجة كنت بحبها وتشاركنى فيها وده لانها كانت بتحبنى مش اتجوزتنى وخلاص"
كان كلام ادهم جارح لغادة
"انا اتجوزتك وخلاص...انت مش عارف حاجة"
"عارف ايه؟"
"انا بحبك ياادهم من قبل ما سارة تحبك ولا تحبها...انا بحبك من قبل حتى ما تعرفنا...انما انت عمرك ما حسيت بيا...ولما فكرت تتجوزنى كنت عايزنى سد خانة واملا فراغ سابته سارة...كنت فاكر اننا علشان كنا قريبين من بعض اننا نسختين متطابقتين...لا ياادهم احنا طول عمرنا طباعنا واهتماماتنا مختلفة ...عرفت بقى مين اللى اتجوز وخلاص"
"انا مقصدتش تبقى نسخة منها...بس كمان متبقيش النقيض"
"بص ياادهم انت مش قادر تنسى سارة ولا حبك لها...بدليل ان من يوم ما جينا البيت وانت بتشغل اغنيتكوا...الا انت...انت كنت فاكرنى مش فاهمة...سارة كانت حاكية لى ان دى الاغنية اللى بتشغلوها كل يوم وانتوا بتتغدوا...كل يوم بقول هينسى ولا مش هيشغلها ولا حتى هتراعى شعورى وانت ولا على بالك انت مفيش فى عقلك ولا قلبك غير سارة...وانا مش هقدر اعيش مع نص جوز"
"يعنى ايه نص جوز"
"يعنى جوزى قدام الناس...وبينى وبينك مجرد اشباع رغبة بالحلال انما احساس وشعور وقلب يحبنى انا مش لاقياه خالص"
"انتى كده بتبالغى"
"متحاولش تنكر..احنا الاتنين مش سعدا مع بعض فخلاص ياادهم مفيش داعى اننا نقعد ننفخ فى اربة مقطوعة"
"يعنى عايزة ايه"
"انا هروح اقعد عند ماما كام يوم لحد ما تتم اجراءات الطلاق"
"طلاق ليه...طيب نفكر شوية"
"فكر انت انا خلاص اخدت قرارى ومش قادرة اقعد ساعة كمان فى البيت"
ودخلت غادة حضرت شنطة هدوم...وادهم قاعد حاسس ان كل كلامها صح وهى مغلطتش فى حاجة...مش عارف يحبها
مرت غادة وهى بشنطتها على ادهم وهو قاعد...كانت نفسها ينكر اللى قالته او يمنعها انها تنزل...حتى لو بالقوة...باللين بأى حاجة
بس يتمسك بيها...ادهم قاعد مكانه مش بيتحرك وضهره ليها...بصت له وهى وراه وكانها بتودعه...ونزلت منها دموع صامتة داريتها بسرعة وهى خارجة من الباب...وهو لسه مكانه
خرجت بشنطة هدومها وقفلت الباب وراها ودموعها على خدها
وادهم ولا اتحرك من مكانه حتى بعد ما شافها وهى خارجة.

هناك 16 تعليقًا:

  1. حلوة التطورات بس ادهم المفروض يحاول ينسي سارة شوية لانها ماتت و بردو غادة المفروض تبطل انانية هي عايزة تخلع سارة من حياتو و فب الحالة دي يبقي هتخلع قلب ادهم معاه و هي كمان تحاول تتقرب ليه مش بكل سهولة تقوله طلقني هو لعب عيال !!! هي قالت انها هتخليه يحبها بس هي مش ساعية لكدة خاااااااااااالص مش بتحاول و شكرا ليكي كتييييييييييير علي الحلقات الحلوة دي

    ردحذف
  2. lalala mkontesh motawake3a kda 7'aaaaales
    nona

    ردحذف
  3. اسراء
    زى ماقلتى غادة مش بتسعى انه يحبها
    وهو مش عارف ينسى سارة
    انا اللى ميرسى ليكى على المتابعة والكومنت
    مييييييييييييييييييييرسى

    ردحذف
  4. نونا
    نحن نختلف عن التوقعات هههههههههه

    ردحذف
  5. لا جامده بجد الحلقه دي
    بصي الغلط في الاتنين الصراحة , هو مش ناوي اصلا ينسي ساره هو اكيد مش حينساها دي حب عمره بس مش بيعمل اي مجهود انه يحب غادة وانه يعرف ان دي مراته خلاص ويبطل يقارن بينهم لان خلاص حياته اتغيرت 180 درجه لا وكمان ماحاولش يمنعها تنزل زتسيبه زي ما تقولي ماصدق اهي جت من عندها

    غادة بقي اللى غايظني فيها انها عارفة اللى كانت ساره بتعمله معاه وعارفة انها موضوع الاغنيه والحاجات دي , مش بقي تحاول تتفوق عليها , لا دي مديها طناش بجد غيظاني مووووووووووووت

    مبدعه جدا جدا جدا جدا جدا جدا جدا جدا جدا

    ردحذف
  6. نوسه القاضى

    والله انا قولت من الاول مش هينفعوا
    هو فعلا مش حاسس بيها خالص

    تسلم ايدك يادندوووووون

    ردحذف
  7. شذى
    ميرسى جدا جدا جدا جدا جدا جدا
    وطبعا تحليلك صح

    ردحذف
  8. نوسة
    تسلميلى ياقمر
    هماالاتنين كل واحد فى وادى

    ردحذف
  9. انا مصممه انهم حيحبوا بعض و هيعيشوا قصه حب جميله وشكل غاده هتطلع مش بتخلف و هتظهر ذكرى وهتربيها زى بنتها..... بس كل المشاكل اللى حاصله دى علشان انتى يادينا عايزه تثيتى ان ادهم كان بيحب ساره جدا وانه مخلص فى حبه ومش هينساها بالساهل زى الرجاله اللى مش عندهم دم

    ردحذف
  10. اااااااااااااااااه ...طبعا ملحقش يفوق من حب سارة ...غادة اللى غلطانة انها اتسرعت فالجواز كان لازم تخليه يقرب منها الاول مش بعد الجواز ...ذكرى هى الحل الوحيد اللى هيربطهم ببعض

    ردحذف
  11. رودينا
    امممممممممم
    هنشوف توقعك صح ولا غلط

    ردحذف
  12. هنودة
    فعليا كلامك صح
    بس متنسيش ان قلبها هو اللى خلاها توافق

    ردحذف
  13. ادهم مش هيقدر ينسا ساره والمفروض غاده تعرف كده كويس اوي وادهم المفروض يعامل غاده علي انها غاده مش ساره

    ردحذف
  14. لا انا اصلا شايفة ان ماينفعش ادهم بتجوز لان هو وسارة كانو قصة حب كبييرة

    ردحذف
  15. هو المفروض مكنش ليهم زواج من اساسه

    ردحذف

قول رأيك بلاش تقرا وتقفل من سكات...ارائكم تهمنى