الجمعة، 15 يوليو 2011

ذكرى سارة الحلقة 27

الحلقة 27
اتفاجئت سوسن وهى بتفتح الباب لغادة وهى بشنطتها
"ايه ده...مالك ومعيطة كده ليه"
"هحكيلك كل حاجة ياماما...بس انا عايزة اطلق"
ودخلتها سوسن ولما قعدت
"اهدى بس ياغادة واحكى وان شاءالله كل حاجة هتتحل ولا طلاق ولا كلام فارغ"
"بصى ياماما ادهم مش قادر ينسى سارة وانا مش عايزة ابقى نسخة منها..وده بعدنى عن ادهم وخلانا مش متفاهمين مع بعض هو عايز سارة تانية وانا مش هرضى بكده...انا عارفة انها غلطتى انى وافقت على الجواز منه وهو مش بيحبنى"
"ياحبيبتى كل المتجوزين بيبقى بينهم خلافات فى الاول لحد ما يتطبعوا بطباع بعض..مش انتوا بس"
"انا خلاص ياماما...مش قادرة اعيش معاه وانا عارفة ان جوزى فى قلبه واحدة تانية"
"انتى مش بتحبيه"
"بس هو مبيحبنيش"
"مين قال كده...يمكن..."
"يا ماما انا لما قلت له انى همشى...كأنه ماصدق ولا كان مستنى اقول كده"
"يا بنتى ده انتوا مبقالكوش 4 شهور متجوزين"
"اللى حصل حصل"
"وهقول ايه لابوكى ...بنتك العروسة عايزة تتطلق"
"وهو هيقولى اعيش غصب عنى"
"لا...بس هيزعل"
"ومين فينا فرحان...لو مش عايزة تقوليله هقوله انا"
"خلاص ...ادخلى ارتاحى انتى...يمكن ادهم ربنا يهديه وييجى يصالحك"
"حتى لو جه يصالحنى...مش هينفع ارجعله تانى ياماما خلاص"
ودخلت غادة اوضتها وبدأت تحط هدومها فى الدولاب

بعد ماغادة نزلت بشوية كان ادهم فى مكانه ومتحركش
بص حواليه وقال لنفسه
"هو ليه كل مابعمل بيت بيتخرب"
وقام خرج ورزع الباب وراه...فضل يلف فى الشوارع حوالى ساعتين وراح على مامته
اتفاجئت ميرفت بادهم وهو بيفتح
"اهلا ياحبيبى...ايه المفاجئة الحلوة دى"
"ازيك ياماما"
"الحمدلله...تعالى مجبتش غادة معاك ليه"
"غادة...انتى محدش قالك؟"
ميرفت بقلق
"قالى ايه؟...غادة مالها"
"كويسة...بس سابت البيت"
"يا ستار يارب...فيه ايه يابنى...امتى ده انا كنت عند سوسن الصبح ومكنش فيه حاجة"
"ماهو محصلش حاجة...احنا اتكلمنا ولقينا اننا مش نافعين مع بعض"
"هو بالسهل كده"
"اعمل ايه يعنى...هى حاطة سارة بينى وبينها وبتعمل كل حاجة عكس اللى كانت بتعمله سارة...وده خلانا نبعد عن بعض اوى"
"معلش هى معذورة...قوم تعالى نروح لهم وتتصالحوا وتروحوا تباتوا فى بيتكوا"
"لا ياماما...كده احسن..واضح انى مليش نصيب اتجوز واعيش بعد سارة...وبعد بنتى كمان"
"لاحول ولا قوة الا بالله...يابنى متقولش كده ربنا يهدى سركوا"

فات يومين وسوسن وميرفت متكلموش خالص على غير العادة
سوسن كانت مستنية ان ادهم ييجى يصالح غادة ولا ياخدها ولا يكلمها
وميرفت مش قادرة تتصل بسوسن لان ادهم مش عايز يصالح غادة بل بالعكس عايز يطلقها فعلا
فكل واحدة صدرت جوزها...واتصل الابوين ببعض وحددوا معاد فى بيت سوسن ...قعدة رجالة بس

فى المعاد المحدد راح ادهم وفتحى البيت عند غادة...كانت سوسن وغادة فى الاوضة لما وصلوا...وكانت غادة مأكدة على باباها انها مش هترجع لادهم...ولو قال يقابلها مش هتخرج تقابله
واستقبل باباها ادهم وفتحى
الاب "اهلا وسهلا اتفضلوا"
فتحى"ازيك يا حاج وازى الجماعة"
الاب"بخير الحمدلله...ازيك ياادهم محدش شافك ولا سمع صوتك من يوم ما غادة جت"
ادهم"انا محبيتش اضغط عليها واحترمت رغبتها"
فتحى"والله ياحاج احنا بنحب غادة وبنعتبرها زى بنتنا...بس مش عارف ايه الشيطان اللى دخل وسطهم ده"
الاب"مش عارف والله...كنت عايز اسمع رأى ادهم هو هيعمل ايه؟"
ادهم"اللى غادة عايزاه هعمله"
الاب"يعنى لو قلت لك انها عايزة تتطلق"
ادهم"خلاص يبقى اطلقها احتراما لرغبتها"
الاب"واضح انها رغبتك انت كمان ياادهم"
كان عايز يقوله ايوه رغبتى بس محبش يحرجهم فسكت
فتحى"واضح ان النصيب اتقطع لحد هنا...كل حقوقها هتاخدها ولو عايزة اى حاجة تانية انا تحت امرك"
الاب"مش هنختلف على حاجات بسيطة...نقوم نروح للمأذون بدل خلاص اتفقنا"
قام الاب دخل وقال لسوسن وغادة يلبسوا علشان يروحوا للمأذون
اخدت سوسن غادة فى حضنها وعيطوا هما الاتنين...وخرج الاب يستناهم لما يلبسوا
حاولت غادة انها ميبانش عليها انها كانت بتعيط لما خرجت من اوضتها وهى ماسكة فى ايد مامتها وكأنها بتحتمى بيها
فتحى"ازيك ياغادة يابنتى"
غادة"الحمدلله كويسة"
ادهم"ازيك ياغادة"
دورت وشها بعيد ومردتش عليه...ونزلوا كلهم مع بعض
كانت لحظات قاسية عند المأذون...لما نصحهم يفكروا سكتوا ومحدش رد عليه...وتردد ادهم شوية...وبص لغادة
"تفكرى تانى ياغادة"
"لأ..فكرت خلاص"
قالتها من ورا قلبها بس كرامتها كانت هى اللى بتتكلم لانها اتأكدت ان ادهم مش بيحبها...بعد ماتمت اجراءات الطلاق مقدرتش غادة تمسك نفسها وقعدت تعيط فى حضن مامتها
صعبت على ادهم...كان عايز يقولها اى حاجة...بس لقى ان مفيش كلام مناسب للموقف ده فسكت...وخرج من عند المأذون
فتحى"بص ياحاج..البيت بيتها وقت ما تحب تروح تاخد حاجتها تروح هى ومامتها بس يبقى حد يدينى خبر او حتى تقولوا لميرفت علشان نبقى عارفين بس...ربنا يصلح حالها ويعوضها خير"
الاب وهو عيونه مدمعه
"شكرا يا حاج فتحى...هنبقى نديكوا خبر اكيد"

هناك 19 تعليقًا:

  1. فعلا هى غلطانه من الاول انها وافقت على الجواز
    وده رد فعل طبيعى ومتوقع جدا ............
    تسلم ايدك يا دينا

    ردحذف
  2. ده الصح كان لازم يطلقو



    راضي

    ردحذف
  3. ااااااااااااااااااااااه يا قلبي ياااااااااااااني

    انتي متاكده انها رومانس.. انا شايفاها دراما ونكد ووجع قلب

    ردحذف
  4. سهى
    تسلميلى يارب
    هى كانت بين نارين ياعينى

    ردحذف
  5. راضى
    وهى عملت الصح ياعينى

    ردحذف
  6. توتا
    سلامة قلبك
    هههههه ماهى كلها حب اهى تبقى رومانتيكية خاااااالص

    ردحذف
  7. مش هي اللي كانت عايزة كدة خلاص تتحمل نتيجة دة و بصراحة أكبر ريحتتتتتتت بجد و كدة احسن لاددهم بس هو عمل كدة علي اساس اي؟ مراته و ماتت و بنته ميعرفش عنها حاجة !!! يا ربي انا مش بحب النكد افففففففففف
    تسلمي يا قمر الحلقة حلوة بس يا ريت بلاش لحد الاخر كدة نكد مش بحبووووووووووووووووو

    ردحذف
  8. ايه اللخبطة دى بقى ....ناوية على ايه يا دندن ....بس حلوة الحركة دى غير متوقعة ...شغااااااااااااااااال

    ردحذف
  9. اسراء
    الموقف صعب وخصوصا انها بتحبه
    هو بقى طلقها لانه مش مبسوط معاها
    بعد السعادة اللى كانت مع سارة
    لقى غادة العكس تماما

    ردحذف
  10. هنودة
    لازم حركات غير متوقعة
    اومال التشويق اجيبه منين ههههههههه

    ردحذف
  11. اووووووووووو ايه يادينا ده انتى عامله زى امتحانات الثانويه العامه خارج كل التوقعات ... انتى شكلك بتقرأى التوقعات وبعد كده بتكتبى الحلقه عكس كل التوقعات ههههه ... بس ايه النكد ده انا متعاطفه جدا مع غاده ونفسى تفرح وهو اللى ستين غلطان ياعنى ياتلغى شخصيتها وتعد تقلد واحده ماتت علشان الاستاذ يتقبلها يا اما خلاص هو لازم ينسى وما هيعذبش نفسه ويعذب اللى بتحبه معاه . مش عارف ينسى ساره خلاص خليه اعد كده لاخر العمر وبعدين يادينا كفايه نكد القصه دى دراما اوى انا تعبت (بس حاسه هيحبوا بعض فى الاخر برده ههههههه )

    ردحذف
  12. رودينا
    ههههههههه لا والله انا بحدد الاحداث من بداية القصة
    واحيانا التوقعات بتتشابه مش بغيرها خالص
    ومعلش بقى الدراما والنكد للحبكة الدرامية
    وتوقعك الاخير ده هنشوف صح ولا غلط
    هههههههه ومش هقول طبعا

    ردحذف
  13. صعبانه عليا اووى غاده
    هى غلطانه انها وافق على الجوزاه دى
    و ادهم غلطان اكتر منها انه ماحاولش يحبها
    فى انتظار الباقى يا دينا
    وتسلم ايدك

    ردحذف
  14. طب وغـادة اللى متبهدلة فى الاول والاخر دى صعبانة عليا والله :(

    ردحذف
  15. بنت من الزمن ده
    تسلمى ياقمر

    ردحذف
  16. محمد
    غادة ياعينى بتحب
    والحب بهدلة

    ردحذف
  17. انا كل ما افتكر سارة اعيط اه يا قلبي

    ردحذف
  18. f3lan mknsh ynf3 lgwaza de ttm :(

    hia 3'ada de mktob 3leha el7ozn !!

    ردحذف
  19. ادهم وغاده غلطانين اووي
    بس بجد انتي حد مش موجود ايه دا بجد انا حاسه اني عايشه معاهم دا انا عيطت على ساره زي ما تكون اختي ههههه
    Merna

    ردحذف

قول رأيك بلاش تقرا وتقفل من سكات...ارائكم تهمنى