السبت، 16 يوليو، 2011

ذكرى سارة الحلقة 29

الحلقة 29
اتأثر ادهم اوى بالكلام اللى قراه...اتأكد انه ظلم غادة
فكر انه يروح لها حالا ويطلب انه يرجعلها...بس خاف يظلمها تانى فقرر انه يقعد فى البيت كام يوم يفكر لوحده...وبعدين ياخد قراره
قعد 3 ايام فى شقته يدوب يروح الشغل ويرجع على البيت تانى
طول ما هو فى البيت كان بيفكر فى غادة...غادة بس
وقرر انه يكلمها

لما حست غادة ان ادهم مختفى ومش بتشوفه قلقت عليه وكانت عايزة تسأل مامتها يمكن تكون عارفة حاجة...بس اتحرجت ومسألتش... وفجأة سمعت موبايلها بيرن...وشافت رقم ادهم
اتطمنت انه كويس وقعدت تفكر ترد ولا لأ لحد ما الاتصال فصل
ارتاحت ان الاتصال هو اللى حسم القرار
بس الموبايل رن تانى...وردت
"الو"
"الو غادة ازيك "
"الحمدلله"
"انا اسف ياغادة"
"على ايه"
"على اللى حصل"
"لا قصدى اسف على ايه ولا ايه ولا ايه"
"اسف على كل حاجة...انا غلطت فى حقك وندمان"
"بس انا مش ندمانة...لانى مغلطتش فى حقك خالص"
"انا عارف...انا اللى غلطت...سامحينى"
"ممكن اسامحك بس بشرط"
"كل اللى هتقوليه هعمله"
"متكلمنيش تانى"
"مقدرش ياغادة...انا فى بيتنا بقالى 3 ايام ومش عارف اعيش من غيرك...انا بحبك ياغادة"
"يااااااه ياادهم...اخيرا سمعت منك الكلمة اللى بستناها من سنين"
"انا كنت مش شايف حقيقة واضحة قدامى... وهى انى حبيتك ومعرفتش كده غير لما سبتينى"
"وسارة"
سارة...معرفش ادهم يرد..الايام اللى فاتت مفكرش فى سارة كان بيفكر فى غادة بس... بس معقول هينسى سارة بالسرعة دى
"ياغادة اكيد كنت بحب سارة وهفضل فاكرها وفاكر بنتى...بس هما فين دلوقتى...انا بحبك انتى"
"انا خايفة منك ياادهم"
"منى انا؟... ليه"
"خايفة توجع قلبى تانى وانا اتحملت فى حبك كتير اوى"
"جربى... صدقينى مش هتندمى"
"سيبنى افكر كام يوم ...وانت كمان فكر تانى"
"انا مش محتاج افكر...بس فكرى وانا عارف انى مش ههون عليكى تسيبينى"
"ماشى ياادهم...سلام دلوقتى"
"خليكى معايا نتكلم شوية"
"مش قادرة خالص ...عايزة انام جدا"
"تنامى دلوقتى..ولو انه مش وقت نوم بس هسيبك براحتك...مع السلامة يا حبيبتى...اوعى تنسى تحلمى بيا"
قفلت غادة وهى فرحانة اوى من كلام ادهم...بس كانت عايزة تفكر ترجعله ولا لأ...وملحقتش تفكر ناااااااامت

كانت سوسن قلقانة على غادة ونومها الكتير ده... وراحت تصحيها تطمن عليها... قالت لها ان ادهم كلمها وفرحت سوسن بالكلام اللى دار بينهم
"خلاص يا غادة..ارجعوا بقى ياحبيبتى وربنا يبعد عنكم الشيطان"
"خايفة اتسرع..انا قلت لادهم يسيبنى افكر"
"طيب فكرى براحتك..ماتقومى تقعدى معايا"
"شوية كده وجاية"
لسه هتنام تانى سمعت تليفونها بيرن
"ازيك يا حبيبتى"
"الحمدلله ياادهم"
"وحشتينى"
"احنا لسه قافلين مع بعض من شوية"
"وايه يعنى..وحشتينى برضه...ممكن اطلب منك طلب"
"متستعجلنيش فى التفكير"
"لا انا عايز حاجة تانية"
"ايه"
"قومى اقفى فى الشباك اشوفك بس "
"انت مش كنت بتكلمنى من البيت"
"انا جيت بعد ماقفلت معاكى علشان اشوفك وهقعد هنا علشان احس انك قريبة منى ومش راجع البيت غير واحنا مع بعض"
"ربنا يقدم اللى فيه الخير"
وقامت غادة وهى بتكلم ادهم وقفت فى الشباك...شافته قاعد فى البلكونة بيكلمها اول ما شافها...شاور لها بفرحة
وفضلوا يتكلموا وهما شايفين بعض لحد غادة تعبت وقفلوا

كانت غادة فى منتهى السعادة...رغم انها عاشت مع ادهم فى بيت واحد بس عمرها ماحست انهم قريبين من بعض زى النهاردة
وقالت انها تاخد وقت للتفكير وكمان علشان تفضل فى السعادة اللى حاسة بيها مع ادهم رغم البعد

كانت سوسن قلقانة على غادة لانها على غير طبيعتها وقالت لجوزها بعد ماحكت له ان ادهم كلم غادة وهى بتفكر ترجعله
"انا خايفة على غادة"
"مالها..مش بتقولى ان ربنا هيصلح الحال بينهم"
"لا مش قصدى...البنت صحتها مش عجبانى ونايمة على طول ومفيهاش حيل تقوم من السرير"
"وانتى ساكتة ليه...وديها للدكتور نطمن عليها"
"هاخدها واروح بكرة ان شاءالله... ربنا يستر"

تانى يوم راحت غادة وسوسن للدكتور وكانوا قاعدين مستنيين الدور...لما رن التليفون
"ازيك يا حبيبتى..انتى كنتى نايمة"
"لا انا مش فى البيت...انا عند الدكتور"
"ليه ماما تعبانة"
"لا انا تعبانة شوية وجاية اكشف"
"سلامتك ياحبيبتى...قوليلى عنوان الدكتور بسرعة"
"ليه ياادهم "
"علشان اجيلك حالا"
وحاولت غادة تفهمه ان الامر بسيط بس هو صمم وفعلا بعد وقت بسيط كان عندها فى العيادة
لما دخلت تكشف ...كان داخل معاها.. بس سوسن وقفته
"استنى ياادهم مينفعش تدخل معاها الكشف انت دلوقتى مش جوزها"
وقف ادهم وهو قلقان ومتضايق انها مش مراته...بس قعد يستناها لما تخلص كشف...10دقايق وشافهم خارجين...ومبتسمين      
"خير طمنونى...غادة كويسة صح"
سوسن"غادة حامل فى التانى ياادهم...مبروك يا حبيبى"
وقف ادهم مش مصدق اللى سمعه ...كان فرحان اوى ...اخد ايد غادة وقعد يبوسها...الناس اللى كانوا قاعدين استغربوا... اتحرجت غادة "الناس ياادهم"
"هنرجع يا غادة...صح...مش هتحرمينى من ابنى زى مااتحرمت من ذكرى"
دمعت عيون غادة وسوسن
"هنرجع ياادهم...وهنعيش مع بعض انا وانت وابننا"
"دلوقتى...هنروح على البيت...هكلم باباكى ونروح للمأذون واردك هناك ونروح بيتنا مع بعض"
"مع بعض يا حبيبى لاخر العمر"

هناك 21 تعليقًا:

  1. اييوووووووووووووووووووة يا دودو بجد فظييييييييييعة تسلم ايدك اوى اوى انا فرحانة جدا

    ردحذف
  2. اهئ اهئ انا اتاأثرت


    رااااااضي

    ردحذف
  3. فروتى
    ربنا يخليكى ياحبيبتى
    ياااااااارب يفرحك كمان وكمان

    ردحذف
  4. راضى
    هههههههههه
    دى دموع فرح صح؟؟؟

    ردحذف
  5. يعني مواضيع الهم والنكد تاخد لها ايام والمواضيع الي تفرفح القلب تكروتيها.. مااااااااااااااااشي

    ردحذف
  6. توتا
    هههههه اكروت ايه يابنتى
    دى كل الحكاية يوم وتانى يوم رجعوا لبعض
    عايزة تفاصيل اللحظات هههههههههههه

    ردحذف
  7. مش بقولك لازم تذلل شويتين تلاته كده
    بس حلقة ممتعه مووووووووووووووووووووووووووت يا دودو

    ردحذف
  8. شذى
    اهو اتذلل اهو
    ميرسى يا حبيبتى
    يارافعة معنوياااااااتى

    ردحذف
  9. ايوة كدا .يسلم ايديك الحلقة جميييييييييييييييييلة

    ردحذف
  10. بيبو
    ميييييييرسى
    وجودك نورنى

    ردحذف
  11. ياسلااااااام بقى
    ايوه كده
    حلوه اوى النهارده
    تسلم ايدك

    ردحذف
  12. بنت من الزمن ده
    هههههه عجبتكوا رومانسية النهاردة
    تسلميلى يا قمرة

    ردحذف
  13. جمييييييييييييييييييييييلة الحلقة يا دينا

    ردحذف
  14. هنودة
    ميرسى ياحبيبتى ربنا يخليكى

    ردحذف
  15. آخـيرآآ موقف حلو فى ايوا كدآآآ

    يـآآآه الواحد نسى رجـآء اللى كانت بتغمنى كل حلقة

    ردحذف
  16. محمد
    ههههههههههههههههه
    رجاء اكبر نسبة كره فى شخصيات جميع القصص

    ردحذف
  17. حلوه اوي الحلقات (: فمه المتعه مع القراه تسلمي

    ردحذف
  18. yaaaaaaaaaaaaaaaaaaaaaaaaaaaaaaaaaaaaaaaaaah a5eraaaan ana kont 7sa anha 7aml mn kotr nomha da ;)

    ردحذف
  19. رووووووووووووووووعة
    بجد تسلم ايديكي

    ردحذف
  20. القصة حلوة كنت عارفة انها حامل بس كان نفسى متكنش حامل و يسيبو بعض و يلاقى بنته

    ردحذف

قول رأيك بلاش تقرا وتقفل من سكات...ارائكم تهمنى