الأحد، 31 يوليو 2011

فوق احتمالى...الحلقة 14


الحلقة 14
حازم كان راجع من بره لما لمح نجوى بتركب تاكسى وهى بتعيط
حاول يلحقها يسالها عن السبب...بس ملحقهاش

بعد نجوى ما نزلت وقفت هديل مش مصدقة اللى حصل...وقعدت تعيط...واترمت فى حضن ناهد تعيط
فايزة"ايه ده يا شريف اللى عملته"
شريف"ايه ياماما...انتى عجبك القرف ده"
ناهد"بس يا شريف مسيرك تخلف وعيالك يعملوا اكتر من كده ساعتها مش هنقول حاجة"
شريف"والله انا كده مبحبش حد يستعمل حاجتى"
ناهد"ومين استعمل حاجتك"
شريف"لما بنتك تنيم ابنها على سريرى ويوسخه يبقى ايه"
فايزة"يبقى حصل خير ومتوصلش لكده...متزعليش ياناهد واكيد شريف هيصالح نجوى"
شريف"انا مغلتطش فى حد ومش هصالح حد هى اللى قليلة الذوق"
هديل"متتكلمش على اختى كده"
شريف"اخرسى انتى"
ناهد"لا بقى انت مش عامل حساب لحد "
شريف"انا كده ونظامى كده واللى مش عاجبه ميقعدش فى بيتى"
قامت ناهد تمشى...مسكت فيها هديل وقالت
"استنى ياماما...خدينى معاكى"
فايزة"استهدوا بالله ياجماعة...استنى يا ناهد"
هديل"استنى ياماما"
شريف"تعالى هنا...خلاص بقى ياماما انتهينا"
سالى وماجدة كانوا قاعدين ساكتين خالص ومش لاقيين كلام يقولوه
فايزة مكسوفة من اللى ابنها عمله والسبوع اتقلب نكد
فايزة"بس يا هديل...معلش يا حبيبتى ساعة شيطان"
كانت ناهد نزلت فعلا ووراها ماجدة وفايزة وسالى
بعد ما فايزة حاولت تهدى الجو بين هديل وشريف

حازم لما طلع وحس ان الوضع على نار مخبطش عليهم
ولما ماجدة جت وحكت له...زعل على حال هديل

بعد ما الكل مشى كانت هديل قاعدة وبتعيط ومتحركتش من الصالون...قاعدة ومقرفصة فى بعضها ومتكومة بتعيط
دخل عليها شريف بعد ساعة وكان بيزعق
"انتى هتفضلى تنكدى كده...مبحبش النكد"
"عايزنى اعمل ايه يعنى بعد اللى عملته...اقوم ارقص"
وهجم عليها وشدها من دراعها
"انتى بتتريقى...طيب هتقومى تلبسى قميص انا اختاره وهتحطى ماكياج وهترقصى...ومشفش دمعة واحدة"
"انت بتقول ايه"
وشدها من دراعها من الصالون لحد اوضة النوم ورزعها ناحية الدولاب...خبطت فيه..وفتح الدولاب وطلع قميص نوم
"ألبسى ده...عندك اعتراض"
كانت هديل مرعوبة وخصوصا انها لوحدها معاه..غير ان دراعها وجعها من شدته ليها....لبست واتزينت زى ما امرها...ورقصت وهى مدبوحة
تانى يوم كان عندها شعور بالقرف من شريف... لانه مش بس مش بيراعى شعورها...ده اغتصب حقه منها ... رغم انه مستعملش القوة ولا انها قدرت ترفضه وتقوله لأ...بس هى اعتبرت اللى حصل اذلال ليها مش اى معنى تانى...حتى وهى بين ايديه مقالش اى كلمة تقربها ليه او حتى يعتذر ضمنيا عن اللى حصل
كانت عايزة تكلم مامتها وتصالح نجوى...استغلت نوم شريف ودخلت وقفلت عليها الحمام واتصلت بنجوى
"نجوى حبيبتى متزعليش منى"
"لا ياهديل انا مش زعلانة منك...وخلاص اللى حصل حصل عيشى واتطبعى بطباعه وخلاص وانا من ناحيتى مش هدخل بيته تانى"
"ليه يانجوى انتى كرهتينى"
"انتى اختى حبيبتى ومليش غيرك...ومفيش بينى وبينك حاجة وحشة بس مش عايزة اتعامل معاه تانى"
"فين ماما عايزة اكلمها"
واتلعثمت نجوى فى الكلام
  ..مم  .. ماما نايمة"
"نايمة ازاى لحد دلوقتى...هى مش عايزة تكلمنى"
"لا والله نايمة"
"طيب فيه حاجة...ماما كويسة...وحياة اياد قوليلى الحقيقة"
"ماما بالليل اغمى عليها وديناها المستشفى طلع عندها غيبوبة سكر"
"غيبوبة سكر ازاى...هى ماما عندها السكر"
"جالها امبارح يا هديل"
وعيطت هديل
"يعنى انا السبب"
"لا ده نصيب حرام تقولى كده"
"طيب انا هاجى اشوفها بالليل"
وقفلت معاها... وهى خايفة شريف مايوافقش

حازم طول الليل وهو سامع موسيقى وفهم ان شريف وهديل اتصالحوا وبيقضوا اوقات ممتعة
وقرر انه لازم ينسى هديل تماما ويتعامل معاها كأخت او مرات صاحبه وبس

هديل كانت مش طايقة شريف بس اتعاملت معاه عادى علشان يوافق انها تروح لمامتها...واحساسها كان صح...شريف رفض تروح لمامتها...وملقيتش قصادها حد تقوله غير فايزة
اتصلت بيها من وراه طبعا وحكت لها وفايزة طمنتها انها هتتصرف
بعد المغرب جت لهم فايزة وبعد ماقعدت شوية
"قومى يا هديل البسى"
شريف"ليه هتروح فين"
فايزة"هروح انا وهى نزور مامتها وانت جاى معانا طبعا"
شريف"لا طبعا مش رايح لحد"
فايزة"بس انت زعلتهم امبارح ولازم تعتذر"
شريف"ماما لو سمحتى انا مزعلتش حد ومش رايح فى حتة ومتخلينيش احلف ماهى رايحة هى كمان"
هديل"خلاص ياماما والنبى اروح يا شريف مع ماما ومش هتأخر"
شريف"قومى...بس مش عايز سيرتى تيجى هناك خالص"
هديل"حاضر.. طبعا طبعا"
وقامت هديل لبست بسرعة وراحوا بيت باباها...فايزة كانت متضايقة من تصرفات شريف ومش قادرة تعمل حاجة غير انها هتروح وتصلح الامور مع ناهد
كان واضح ان سالم ميعرفش تفاصيل اللى حصل...نجوى خافت تحكيله يزعل ويتعب زى ما حصل مع ناهد
فايزة كانت متوقعة مقابلة وحشة وعتاب وكلام...بس اتفاجئت بمقابلتها بترحيب من نجوى ...وناهد رغم انها كانت فى السرير بس كانت بترحب بيها
فايزة حست بالاحراج من معاملتهم الطيبة ومعاملة ابنها ليهم
بعد ما قعدوا شوية...ومقدرتش هديل تحكى اى حاجة من اللى عمله شريف بعد مانزلوا علشان مامتها متتعبش اكتر..قاموا يروحوا
وفايزة بتسلم على ناهد وهى ماشية...شدتها ناهد عليها
"والنبى ياام شريف...امانة عليكى خلى بالك من هديل واعتبريها زى سالى بنتك...حاولى تخلى شريف ميزعلهاش"

هناك 31 تعليقًا:

  1. لالالالالالالالالا دة انسان مش طبيعى بالمرة مالة بيتعامل لية كدة ياترى الايام مخبية اية لهديل

    ردحذف
  2. مارو
    بالطريقة دى اكيد فعلا مش طبيعى

    ردحذف
  3. كلب وابن كلب سوري يعني





    راضي

    ردحذف
  4. ده انسان اناني وهاجيله الي هايكسره هو مفكر الناس ايه بس مش معنى انه اتجرح مره يبقى الناس كلها تتحمل
    ربنا يهونها على هديل يااارب

    ردحذف
  5. لا بجد يا دينا حرام عليكى انا شكلى كدة حقضيها فطار لحد ما زفت الطين شريف دة يولع دة مينفعش يعيش اكتر من كدة دة انسان زبالة اصلا مينفعش يبقى انسان دة ازبل من الحيوانات لا دة لو ادامى كنت حدفتة باقرب ازازة دينا موتية احرقية خلى عربية تدهسة وتريحنا اية القرف دة بيتامر على اية دة معقد نفسيا وعايز الحجز علية دينا موتية بجد كدة كتير هو فاكر نفسة اية يعنى حرام وحازم يتعزب عشان حيوان وهديل يتحرق دمها لية يعنى ويتحرق دمى معاها سورى يا دينا لو كنت قلت حاجة غلط بس بجد كتير يعنى كدة بش كفاية وعموما سلم ايدك وبكرة اول يوم رمضان الرحمة حلوة

    نونا احمد

    ردحذف
  6. غير معرف
    ربنا يهونها عليها ياااااااارب
    وعلى حازم طبعا

    ردحذف
  7. نونا احمد
    انتى مقلتيش اى حاجة غلط
    وموت شريف مطلب جماهيرى
    كل سنة وانتى طيبة

    ردحذف
  8. آآآآآآآآآآآآآآآآآآآآآآآآآه يا ناريــــــــــــــــــي من التييييييييييييييييييت دة اخ اخ هولع حرام عليكي يا دينا ارحمينا يا شيخة انا هولع يعني هتبقة القصة و الزمن عليا؟؟؟ حراااااااااااااااااااااام دة احنا حتي لسة ف بداية شهر كريم الهي يا رب ..... ولا خلاص عشان بس الواحد مش عايز ذنوب ف اولها آآآآآآآآآآآآآآآآآآآآه يا ناريييييييييي دة بني ادم الكلمة مش عايزة اكتبها عشان حرام بلاش البني ادم دة كفاياه لازم يمزت بكرة لااااااااااااااااااااااااااااااااااااااااااااازم لو مامتش مش هفتح القصة تاني هه شوفيلك حل لا و كمان يموت موته ما بعدها موتة يعني يتحرق تخبطةه عربية تقطعة مليون حتة او يترمي من الدور ال10000 ماشي :@@

    ردحذف
  9. اسراء
    انا قلبى رهيف ومقدرش اكتب الموتات البشعة دى
    هتقدرى متتابعيش القصة ولا تعرفى حصل ايه لحازم
    لو تقدرى ماشى ههههههه

    ردحذف
  10. تامر عبد الجواد

    سيبوه يتنطط براحنه الدنيا دوارة وزى ما القرأن الكريم بيقول يعز من يشاء ويزل من يشاء
    بكره هنعرف هيحصلوا ايه وساعتها الشماتة للصبح

    ردحذف
  11. ......................................
    ..............................................
    .............................
    kol deh shteema lshiko bs elreqaba temna3 hhhhhhhhhhhhhhh
    nona

    ردحذف
  12. تامر
    ايه ده كلامك كده هادى وعاقل وراسى
    انت تامر تامر اللى اعرفه ولا تامر حد تانى
    ههههههههه مش متعودة منك على كده
    عارفاك عصبى ونرفوز...انا قلت هتجيب شريف من قفاه
    وبرضه هنشوووووووف هيحصله ايه

    ردحذف
  13. نونا
    يالاااااااااااااهوى
    كل دى شتيمة

    ردحذف
  14. لو علي القدرة انا هستحمل علي فكرة مش مشكلة بالنسبالي

    ردحذف
  15. ده انسان مريض بجد انجرح فتوحش وبقا مش طبيعي
    تشي

    ردحذف
  16. ايه الغباء ده
    ده اكيد مجنون

    ردحذف
  17. لا يا جماعه الى زى شريف ده عدى مرحله الجنون من زمان ده اخد الناقه وشرخ الى زى ده عاوز اتوبيس سياحى فاخر من ابو دورين يكون سواقه اعمى يهرسه ونخلص ده معندوش اى دم يا دينا نفسى انام مش محروق دمى ابوس ايدك
    ayaa mahran

    ردحذف
  18. دينا ..فين باقى الحلقات ؟؟؟ و لا هما 14 بس؟؟؟ بليز الرد بسرعـــــــــــة
    بس بجد قصة حاوة اوى
    keep it up b2a
    تغريد

    ردحذف
  19. تغريد
    الحلقات كلها موجودة 30حلقة
    دوسى على رسالة احدث اللى تحت وهتجيبلك اللى بعدها

    ردحذف
  20. dinaa ana 3aiza a3rf 7kaet r7aab de
    Tu2aa

    ردحذف
  21. انا هعيط والله مينفعش كدا

    ردحذف
  22. هو بيطلع عقده من البنت اللي سابته علي هديل الغلبانه
    حرام عليه دا متخلف
    توتا

    ردحذف
  23. انتي مبدعه
    bassant

    ردحذف
  24. اسماء محمد
    انا مش عارفه اقول ايه غير ان شريف ده بنى ادم زباله اوووى هو اصلا حرام يتسمى بنى ادم
    ربنا يخليكى يا دينا انا مش عايزه اعيط اكتر من كده

    ردحذف
  25. اصعب رواية قراتها ليكى لغاية دلوقتى يارب الاحداث تكون احلى

    ردحذف
  26. شريف دا عايز مصحة نفسيه يتعالج فيها مش طبيعى خالص

    ردحذف
  27. تحفة .. شريف ده مش طبيعي فعلا والله .. اكيد مجنوون اصلا محدش كده ابداا :/

    ردحذف
  28. انا بكرررررررررررررررررررررررررررررره شرررررررررررررررررررررررررررررررررريف هى اما تنتحر او تنتحر

    ردحذف
  29. القصة تحفه جدا
    تسلم ايدك يا دينا
    بس انا اتضايقت من شريف ومعاملته مع هديل

    ردحذف
  30. انتي مبدعة رائعة
    وكل المدح صراحه قليل في حقك وانا من أشد المعجبين بكل القصص اللي تنزلها
    مشكورة غاليتي
    وعلى فكرة في ناس كثير شبه شريف وعندي منهم

    ردحذف

قول رأيك بلاش تقرا وتقفل من سكات...ارائكم تهمنى