الجمعة، 22 يوليو 2011

فوق احتمالى...الحلقة 5

الحلقة 5
نجوى وهى بتتغدا مع رشاد كان باين عليها الهم والحزن
"مالك يا نوجا"
"متضايقة اوى يارشاد علشان بابا رفض عريس هديل"
"ليه انتى مش قلتى الناس كويسين وعجبها وعجبته"
"ايوه بس عايز يتجوز لما ييجى فى الاجازة وفاضل اقل من شهر وييجى...وبابا زى ماانت عارف وشايف ميقدرش يجهز اى حاجة دلوقتى"
"وهديل"
"زعلانة لانه كان فرصة وهى ارتاحت له ومامته واخته حبوها وهى حبيتهم"
"معلش ربنا يقدم اللى فيه الخير"
من تانى يوم تعارف هديل وشريف وشريف بيكلم هديل يوميا على البيت بس كلها مكالمات قصيرة يدوب 3 او 4 دقايق بالكتير كلها بيسألها عن يومها قضته ازاى ومع مين
كانت اغلب ايامها فى البيت ولو خرجت بيكون مع مامتها او نجوى
بعد ما عرفت رد باباها فى موضوع شريف كانت عايزة تقطع المكالمات دى...بس اتكسفت تقوله وتحرجه...وقالت لنفسها ان اكيد لما مامته تقوله هيقطع مكالماته
كان فات اسبوع على تعارف شريف وهديل لما اتصلت ناهد بفايزة
"ازيك ياام شريف..اخبارك ايه وازى سالى"
"اهلا ياناهد ...الحمدلله كويسين واخبار عروستنا ايه"
"انا مش عارفة اقولك ايه"
"خير"
"خير ان شاءالله بس لما اتكلمت مع باباها قالى اعتذرلك"
"ليه ان شاءالله هو شريف يتعيب"
"بالعكس ده انا بكلمك وانا حزينة من قلبى...هو فيه ام مش عايزة تفرح ببنتها وخصوصا مع ناس زيكم"
"اومال ايه طيب"
"ماهو على يدك فرح اختها مبقالوش 3 اسابيع وابوها خارج من الجوازة محتاج يقف على رجله على ما يجهز التانية"
"يعنى دى بس المشكلة"
"اه والله دى بس"
"طيب انا جالى فكرة وكل واحد ييجى على نفسه شوية"
"خير"
"انا هكلم شريف ان الاجازة دى يتخطبوا ويسافر خلال السنة انتوا تجهزوا وييجى يتجوز السنة الجاية..اظن كده سهلة"
"خلاص اللى يقسم بيه ربنا هيكون"
"انا هكلم شريف على كده"

وبعد مناقشات ومداولات مع شريف ورفضه فى الاول ان اهلها يمشوا كلامهم عليه..وافق ان الاجازة دى تبقى شبكة وكتب كتاب والاجازة الجاية يتجوزوا
وده طبعا بعد ما اقنعته فايزة ان الافضل انه يستنى للسنة الجاية افضل لحد مايدور على شقة ويفرشها ويكون مستقر هو ومراته فيها

ناهد لما اتكلمت مع سالم فى الكلام الاخير اللى قالته فايزة
"يعنى اعمل ايه ياناهد اجيب منين"
"يعنى الناس متمسكين بيها وشاريينها وانت مش عايز"
"انا كنت فاكرها هتشتغل لها 3 او 4 سنين زى اختها وتساعدنى فى جوازها"
"يعنى احنا كنا نعرف اللى هيحصل...النصيب جه كده "
"واجيب منين"
"لا بقى ياسالم انت مزودها اوى...رزق البنات ورا الباب...مالك معقد الدنيا كده"
"انا خايف مقدرش اجهزها"
"سيبها لله والارزاق على الله...انا رايحة افرح البنت"
"فرحيها...ربنا يقدرنى"

لما ناهد قالت لهديل على موافقتهم فرحت اوى
واستمرت المكالمات بينها وبين شريف لحد ماقالها على ميعاد رجوعه وانه بعدها هييجى يخطبوها رسمى فى اقرب وقت
وقبل مايرجع شريف ب5 ايام ظهرت نتيجة هديل ونجحت بمجموع كبير يؤلها لتكملة دراستها بس الموضوع كان محسوم بالنسبة لها
وخصوصا بعد ما هتتخطب يبقى مالوش لزوم التكملة

اتصل شريف بحازم وحدد معاد وصوله ويومها اخد حازم اجازة من شغله علشان يروح يجيب شريف من المطار قبلها بيوم ظهرت نتيجة سالى ونجحت فى سنة تانية وتامر كمان نجح واتخرج
كان حازم بيلبس علشان يروح يجيب شريف لما شاف سالى فى البيت
"ازيك يا حازم...ايه جاهز"
"اه جاهز...ليه"
"علشان جاية معاك"
"جاية معايا فين ..انا رايح اتفسح"
"يالا بس علشان منتأخرش"
"انتى ايه...مسمعتنيش...انا هروح اجيبه لوحدى زى كل سنة"
"المرة دى مختلفة...هات مفتاح العربية وهستناك تحت"
واستسلم حازم واداها المفتاح لحد ما يخلص لبس ...ونزل واول ما ركب العربية
"هنروح مشوار سريع الاول"
"مفيش وقت ياسالى واحنا راجعين اوديكى زى ماانتى عايزة"
"مينفعش خاااالص...ودينى بس ويارب اقدر اعمل اللى فى دماغى"
"اللى هو ايه"
"هنروح عند هديل واحاول استأذن مامتها ان هديل تيجى معانا المطار"
"هديل مين"
"خطيبة شريف...يالا بس وانا هقولك العنوان"
واستغرب حازم وسمع كلامها ووصل عند البيت هى طلعت وهو وقف يستناها
وراحت سالى لبيت هديل ومكنش فيه حد فى البيت غير ناهد وهديل ورحبوا بسالى ولما قالت انها عايزة هديل معاها المطار رفضت ناهد وقالت انه مينفعش وميصحش...ومع اقناع سالى بدأت ناهد تقتنع انها مجرد مفاجأة حلوة لاخوها وكمان علشان يشوفوا بعض حقيقى قبل الخطوبة ووافقت وقامت هديل لبست بسرعة ونزلوا
"معلش ياحازم اتأخرت عليك"
"استنى ياسالى...مين ده"
"ده حازم تعالى اعرفك عليه"
"استنى احنا هنروح معاه ...لالا مينفعش اركب مع واحد معرفوش كده انا راجعة"
"يابنتى استنى ده زى اخونا انا وشريف بكرة تعرفيه وتتعودى على وجوده وسطنا"
كان حازم شايف كلامهم وفهم من طريقتهم ان هديل معترضة وقال فى نفسه "هى من اولها كده هترسم العادات والتقاليد"
"مش يالا بقى ولا امشى انا"
اتضايقت هديل مين ده اللى بيهددهم كده مايمشى وهى مالها
"خلاص ياحازم هنركب اهو"
ركبت هديل ورا سالى وهى بتفكر ياترى هتتصرف مع شريف ازاى وتتكلم تقول ايه وهو هيستقبل المفاجأة ازاى ويقول ايه وسمعت سالى وهى بتأكد على حازم
"اوعى تنسى ياحازم تكلم شريف علشان خاطرى"
ففهمت هديل ان حازم واضح انه مش مجرد اخ ليهم انما واضح ان فيه ارتباط بينه وبين سالى
وكملت هديل تفكيرها فى شكل اللقاء بينها وبين شريف لحد ما وصلوا المطار

هناك 16 تعليقًا:

  1. مش عارفه ليه حاسه ان شريف هيضايق لما يقابل هديل

    لا وممكن يجى بعد كده فى كلامهم وتقوله ان حازم معجب بسااالى وتبقى نيلت الدنيا ههههههههههههه

    حلوه الحلقه بس سريعه يابرنسس وقصيره اوووووووووووى

    ميرا

    ردحذف
  2. ميرا
    ههههههههه كل دى توقعات
    والله والله الحلقة ما قصيرة
    انا بفرح لما تفتكروها قصيرة
    لان معناها انك استمتعتى وانتى بتقريها
    صح صح اوعى تقولى غلط هههههه

    ردحذف
  3. ههههههههههههههههههه صح طبعااا القصه دى مشوقه من اولهاااا

    بس ربنا يستر من توقعاااااتى هههههههههههههههههههه

    بس ليا طلب صغنون خالص مالص بلاش نكد زى ساره الله يخليكى واااااااااااااااااااااااء

    ميرا

    ردحذف
  4. ميرا
    هههههههههههه هحاول الجرعة تكون قليلة شوية
    اعتقد اننا استكفينا من النكد فى ذكرى سارة
    متعيطيش بقى

    ردحذف
  5. والله بتعجبني قصصك جدا يا دينا واسمي علي اسمك كمان انا اتوقع انه هيقابلها ببرود جدا وشكله كدة هيتنك عليها ربنا يستر

    ردحذف
  6. mmmmmm wallahi 7sa en 7azem w hadil hy7ebo b3d
    nona

    ردحذف
  7. ههههههههههههههه حلوة حلوة ....والله هديل انا مستخسراها فى شريف ...شكله واد قلبه جمد من علاقته الاولى والبنت طيبة وفحالها بجد

    ردحذف
  8. المفروض المتخلفة هدير فى السنه دى تدخل الكليه وتخلى شريف هو اللى يصرف على تعليمها اصلى حاسس ان الجوازة دى مش حتم تبقى قلبت شريف وطلعت منه بحاجهوياريت يادينا عشان نعيش فى القصة وننسجم فيها تحطى رقم تليفون البيت بتاع هدير

    ردحذف
  9. دينا
    ميرسى ليكى وتسلميلى وتسلم متابعتك
    وتوقعك ده هيبان فى حلقة النهاردة
    نورتيييييييييييييييييييينى

    ردحذف
  10. نونا
    اممممممممممم
    احساسك غريب شوية؟؟؟؟؟؟؟؟؟؟؟

    ردحذف
  11. هنودة
    والله متفقة معاكى جدااااااااااا
    فى رايك فى هديل

    ردحذف
  12. حمدى
    تفتكر واحدة بدماغ هديل
    لا ليها فى التخطيط ولا التدبير
    ولا تعرف خبايا البشر
    وصغيرة فى السن
    هتفكر كده؟؟؟؟؟؟؟؟؟؟؟
    هستأذن شريف فى موضوع تليفونها وارد عليك
    هههههههههههه

    ردحذف
  13. على الفكرة فى حد ذاتها هايلة بعيدا عن إيه اللى هايحصل بس عجبتنى بحييكى

    ردحذف
  14. حجاز
    ميرسى كتيييييييير
    كلامك وسام على صدرى

    ردحذف
  15. men tamer w men rasha
    TU2aa

    ردحذف

قول رأيك بلاش تقرا وتقفل من سكات...ارائكم تهمنى