السبت، 23 يوليو 2011

فوق احتمالى...الحلقة 6

الحلقة 6
وصلوا المطار وفضلوا يستنوا لحد ما ظهر شريف
سالى"شريف اهو...شريف شرييييف"
وخرج لهم شريف واترمت سالى فى حضنه وبعدين سلم على حازم
كانت هديل واقفة مش بتتحرك
سالى"ايه رايك فى المفاجاة دى...جبت لك هديل معايا"
شريف ومبانش عليه اى رد فعل لا فرح ولا زعل
"هى فعلا مفاجأة...ازيك يا هديل"
ومد ايده يسلم عليها فسلمت عليه وابتسمت له
ومشيوا سالى وحازم قدامهم...وشريف وهديل جنب بعض
"مقلتليش يعنى انك جاية مع سالى"
"مكنتش اعرف انها هتعملك مفاجاة وتيجى تاخدنى"
"طيب اناهعديها المرة دى...بس انا مبحبش المفاجأت اللى من النوع ده...بعد كده متروحيش فى حتة من غير ماتقوليلى"
وردت هديل بكل عفوية"حاضر"
"برافو عليكى...طول ماانتى بتسمعى كلامى كده هتبقى مبسوطة معايا"
"ان شاءالله"
ومسك ايدها فى ايده وبحركة لا ارادية منها شدت ايدها بعيد
"ايه مالك"
"مفيش... بس اصل احنا لسه مش مخطوبين"
"وفيها ايه يعنى لما امسك ايدك...هتنقص حتة"
"لا بس اختك وصاحبك يقولوا عليا ايه"
"يعنى المشكلة فيهم"
"معرفش بس انا اللى اعرفه ان ممكن خطيبى يمسك ايدى...لما نتخطب ونلبس دبل يبقى عادى"
"ماشى يا ستى...هسيبك براحتك"
ارتاحت هديل من الجدال مع شريف وكانوا وصلوا العربية
وقبل ما يركبوا كان حازم بيحط الشنط فى شنطة العربية
وبدأ شريف يساعده
"استنى لما اخد حاجة من الشنطة دى"
وطلع شريف علبة وقفل الشنطة وخلصوا وركبوا العربية
ركب شريف جنب حازم...وسالى وهديل جنب بعض
ولما اتحركت العربية
شريف"خدى يا هديل الموبايل ده"
هديل"ايه ..لالالا شكرا مالوش لزوم"
سالى"خديه يا هديل مفيهاش حاجة"
هديل"لا شكرا بجد مش محتاجاه"
شريف بضيق"انا جايبة علشان اعرف اكلمك عليه.. ولما اجيبلك حاجة متقوليليش لأ"
استغرب حازم من طريقة شريف اللى ممكن تحرج هديل... وشاور له بايده بمعنى مش كده...ولمحت هديل مشاورة حازم لشريف فتحرجت وكانت هتعيط غصب عنها
شاف حازم هديل فى المراية والدموع اللى بدأت تلمع فى عينيها
صعبت عليه...بس لقى سالى لحقت الموقف
"مبروك عليكى ياهديل...خديه والمفروض كمان يجيب لك خط دلوقتى"
ولاول مرة بيتكلم حازم معاها
"بصى انا هوديكى تختارى خط برقم مميز علشان ندبس شريف "
سالى"طيب دبسه فى حاجة اكبر هى الخطوط بفلوس "
حازم"طيب ندبسه فى ايه...ها قولى ياهديل"
استغربت هديل من ان حازم بيكلمها كده عادى كأنه يعرفها قبل كده...دول لسه بس من شوية كانوا مستغلسين بعض... معرفتش ترد
سالى"ودينا الاول ياحازم نجيب خط لهديل وبعدين على اشيك وافخم مطعم نتغدا فيه"
شريف"وماما اللى مستنيانا"
حازم"عايز تهرب من العزومة...ايه يابنات هتتنازلوا"
ضحكت هديل ضحكة خفيفة...شافها حازم وفرح انه قدر يبدل دموعها ضحكة... وردت سالى بسرعة
"لن نتنازل ابدا"
وراحوا جابوا خط وعلمتها سالى ازاى تستعمل الموبايل بعد ما سجلتلها الارقام...رقم شريف ورقمها ورقم مامتهم ورقم البيت ورقم حازم... واتصلوا بالامهات وقالوا انهم مش هيتأخروا بعد الغدا
لما ركنوا العربية مالت سالى على شريف
"خد بالك من كلامك مع هديل ومتحرجهاش تانى... دى لسه يدوب اول مرة تتعامل معاك وطبيعى انها تكون مكسوفة...خليها تاخد عليك واحدة واحدة"
"وانتى اللى هتنصحينى "
"منصحكش ليه مش بنت زيها"

راحوا مطعم شيك...انبهرت بيه هديل بس من غير ما حد يلاحظ
كانت اول مرة تشوف المطاعم الفاخرة فى الحقيقة مكنتش بتشوفها غير فى التليفزيون بس
قعدوا وبعد ما طلبوا الاكل كان سالى وحازم بيفكروا فى اى حجة يسيبوهم مع بعض وشاوروا لبعض وقاموا لحد ما الاكل ييجى

وعلق حازم على اللى حصل
"شفتى شريف احرجها ازاى"
"والله انا لو منها كنت احرجته ورميته ف وشه كمان"
"باين عليها طيبة اوى"
"اوى اووووى...يابنى انا وماما حبيناها من اول مرة اتكلمنا معاها تحس انها حاجة كده مش موجودة دلوقتى"
"بس يارب شريف يقدرها"
"هو هيلاقى زيها فين"
"بس متنسيش انه كان بيحب رحاب اوى.. حب 8 سنين مش اى حاجة"
"ولما هو بيحبها من اول سنة فى الكلية ليه سابها علشان اسباب متدخلش دماغ حد عاقل"
"ماهو حبهم مكنش كفاية"
"انا شفتها انانية من شريف"
"بتقولى كده على اخوكى"
"ايوه رحاب كانت شاطرة اوى ومن حقها يكون لها طموحها وشخصيتها المستقلة اللى رفضها شريف...كان عايزها امينة"
"وتفتكرى ممكن يلاقى هديل امينة"
"افتكر كده... المهم بقى متنساش تبقى تكلمه فى موضوع تامر"

لما قاموا حازم وسالى بدأ شريف بالكلام
"انتى زعلتى ولا ايه"
"انا اتحرجت لما زعقتلى"
"انا مزعقتش واتمنى انك متوصلنيش اى مرة انى ازعقلك... انتى ضايقتينى لما عارضتينى...اللى اقولك عليه متناقشينيش فيه"
"حاضر"
"ايوه كلمة حاضر دى هتلاقينى معاكى احسن ماتتمنى"
"ان شاءالله"

عدت الايام بعد كده سريعة تانى يوم راح شريف ومامته وسالى وقرأوا فاتحة شريف وهديل وحددوا بعد اسبوعين معاد الشبكة وكتب الكتاب
كان حازم وشريف بيجهزوا للفرح من اتجاه حجز القاعة والاستوديو ولبس العريس وتجهيز الدعوات
وسالى وهديل ونجوى بيجهزوا فى اتجاه تانى من فستان العروسة وحجز الكوافير وكل مستلزمات العروسة
لحد ما جه يوم كتب الكتاب... واللى حصل....

هناك 20 تعليقًا:

  1. ياسلااااااااااااااام...ايه بقى ده يا دينا ...بقى دى قفلة دى ...ربنا يسامحك ...بلاش الحركات دى ...حبكت يعنى تكتبى اللى حصل ...ماشى يادينا

    على فكرة بقى انا لو مكان هديل كنت رميتله الموبايل فى وشه ...ووقفت العربية ونزلت اخدت تاكسى وروحت ...ومع الف سلامة اصلا ازاى يديها هدية ادام الناس كده ...ده بياكدلى انه انسان قليل الذوق وهيديها فوق دماغها

    ردحذف
  2. هنودة
    هههههههههه لازم تشويق
    شوفى انتى قولتى ايه...وسالى كمان قالت كده
    بس هديل شخصية مختلفة تماماااااااا

    ردحذف
  3. طب ما هو كلامها ده هيخليها تصعب عليه اووووووووووى ...لان بعد كده هيديها فوق احتمالها ...وانتى معترفه باسم القصة اهوه

    ردحذف
  4. شكلو الكلا هيحلو قوى دائما رائعة

    حسن عبده

    ردحذف
  5. الاضافه دي ناقصه 10 سطور عن القصص لباقيه.. يالا كملي هيحصل ايه ف كتب الكتاب وبلاش نخنصر ف الاحداث تاني

    ردحذف
  6. حسن
    كلامك الاروع
    ميرسى كتيييييير

    ردحذف
  7. توتا
    هههههههه ابدا والله مش قصيرة ولا حاجة
    بكرة ان شاءالله كل شئ هينكشف ويبان

    ردحذف
  8. بجد يا دينا انتى كل مرة تبهرنى باسلوبك والتشويق اللى بتعمليه فى كل حلقة رغم ان شريف دة شخصيته استفزتنى بجد انتى بجد شاطرة اوى علشان فعلا للاسف بقى فى رجال كتير بيفكروا بطريقته يعنى عايزين واحدة مش بتفكر مثلا علشان يترحوا معاها وفى نفس الوقت تكون ذكيه علشان تقدر تفهمه ولعلمك انا لاحظت كدة فعلا فى كذا مهندس للاسف

    مى

    ردحذف
  9. حلوة مع اني مش كنت فاهمة حاجة في اول القصة بس برافو عليكي لحقتي الموقف مني لاني بصراحة كنت مستغلساها و شكل يوم كتب الكتاب مش هيبقي تمام و علي فكرة كان عندي ملحوظة ان هما حتي لو مخطوبين مش من حقو يمسك ايديها لان هو مبقاش اي حاجة رسمي كل ما في الموضوع انه ناوي بس دة مجرد ملحوظة بس يا ريت مكنش دايقتك

    ردحذف
  10. نعم نعم نعم؟؟؟؟؟؟؟؟؟؟!!!!!!
    يعني ايه اللى حصل دي ؟؟؟
    لالالالالالالالالالالا اتعلمتي الساسبنس التقيل يا كبيره وبقيتي بتشوقينا زياده وزياده
    خقولك توقعاتي على الوول بتاعك اوك

    ردحذف
  11. مى
    ميرسى كتير على كلامك الحلو
    وللاسف فيه شخصيات كده زى شريف
    حتى لو مكنش مهندس فيه بيبقى اخد فى نفسه الم على الفاضى
    ربنا يكفينا شرهم

    ردحذف
  12. اسراء
    طيب الحمد لله كده الامور وضحت وفهمتى القصة
    انا عارفة ان كثرة الشخصيات ممكن تلخبط
    بس بالمتابعة هتعرفيهم وتفرقى بينهم
    لا طبعا متضايقتش من ملحوظتك
    وانا الموقف ده قصدت بيه حاجة معينة فى شخصية كل واحد فيهم
    ليها مردود بعد كده

    ردحذف
  13. شذى
    ههههههههههه حلو التشويق
    والمناقشة رديت عليها هناك خلاص

    ردحذف
  14. وقفتتتتتتتتتتتتتتتتتتتتتتى ليه بس :( :(
    بجد بجد هايله تحفه جامدا فة انتظار الجديد
    salma

    ردحذف
  15. لا لا لا ماينفعش كده ابدااا تيجي لاهم يوم وتعملي كده
    بس طريقتك مبهره جداا في طريقه سردك وكتابتك ماشاء الله عليكي
    بس سؤال فين مامتها وبابابها سابوا هديل كده هي صغيره وطيبه هما كبار المفروض لما اتصلت عليهم يخلوها تيجي
    متابعه معاكي

    ردحذف
  16. ياعم حازم ماتكلمه عن موضوع تامر ربنا مايوقفلك المراكب السايره ياشيخ ههههههههههه

    ردحذف
  17. مش عارفه ليه حاسه انى هديل وحازم هيحبوا بعض

    ردحذف
  18. حاسة ان حازم هيحب هديل

    ردحذف

قول رأيك بلاش تقرا وتقفل من سكات...ارائكم تهمنى