الأربعاء، 3 أغسطس، 2011

فوق احتمالى...الحلقة 16

الحلقة 16
اول ما فتحت سالى لحازم ...اتفاجئ بهديل...كانت مفاجئة حلوة طبعا...وساب ايده لسالى وهى بتشده جوه البيت
"تعالى ياحازم شوف اخر خبر"
"خير...ازيك يا هديل"
وسلم عليها حازم...سلام بكل شوق وحب وحنان
اما سلام هديل عليه...كان بارد بلا اى مشاعر
"مش هديل حامل...وشريف هيبقى اب..وانا هبقى عمتو"
تانى مفاجئة فى دقايق...هديل حامل...شعور غريب حس بيه
غيرة...ضيق...دهشة... مجموعة مختلطة من المشاعر
اخفاها بابتسامة وهو بيقول"مبروك"
فايزة"اخبار ماجدة ايه يا حازم"
حازم"الحمدلله ياطنط...ها قوليلى اجيب لك ايه"
فايزة"قومى ياسالى هاتى ورقة الطلبات من جوه"
وقامت سالى وكملت فايزة
"معلش ياحازم النهاردة الطلبات كتير شوية"
"ولا يهمك ياطنط انا تحت امرك"
ولما جت سالى بالورقة واديتها لحازم...مالت فايزة على حازم
"تعالى ياحازم عايزاك"
واخدته ودخلت المطبخ
"بص يا حبيبى معلش انا عايزة منك خدمة تانية...وانت نازل تاخد هديل توصلها بس قبل ما تروحها هكتب لك شوية حاجات تجيبهالها اصل الدكتور قال انها ضعيفة ومحتاجة غذا وانت عارف اهلها ظروفهم صعبة"
ورد حازم بفرحة...فرحة صحبته لهديل
"حاضر ياطنط انتى تؤمرى"
وكتبت فايزة ورقة تانية فيها ألبان وعصائر وعسل نحل وانواع مختلفة من الجبن ولحوم وكبدة وفاكهه

حازم كان فرحان اوى بوجود هديل جنبه فى العربية
ومع هزة العربية اكتر من مرة هديل حست بدوخة بس كانت مكسوفة تقول لحازم انها دايخة...ولقيت حازم ماشى فى طريق غير طريق البيت
"انت رايح فين ياحازم...انت نسيت البيت"
"لا منسيتش طبعا بس طنط فايزة قالت لى اجيب لك حاجات وانا بجيب طلباتهم"
"حاجات ايه"
"شوية حاجات علشان تتغذى وتبقى وكويسة والبيبى ييجى شديد وجامد ولا عايزة تجيبى بيبى تقاوى"
"انا بعمل كل اللى قالى عليه الدكتور وخصوصا ماما ونجوى مش سايبنى خالص"
"بالمناسبة...ازى اياد كبر ولا لسه"
"اه كبرشوية وبقى زى العسل ده خلاص بقى راجل قرب على 4 شهور"
"هههه ماشاءالله تصدقى نفسى اشوفه"
"خلاص تعالى معايا شوفه نجوى عندنا فى البيت واكيد هتنورنا"
حازم كان فعلا نفسه يشوف اياد... لانه بيعتبره اتولد على ايده

لما دخلوا المحل ...اخد حازم عربيتين للشراء...عربية يحط فيها حاجة فايزة وعربية يحط فيها حاجة هديل
كان حازم كل شوية يبص فى الورقة ويحط الحاجة المطلوبة فى العربية...وكل شوية يسأل هديل
"محتاجة حاجة تانية"
لفوا حوالى نص ساعة...هديل تعبت ومكسوفة تقول لحازم
بس فجأة حست ان كل حاجة حواليها بتتهز ومدت ايدها ناحية حازم
حازم ماشى جنب هديل...لما حس بايدها بتشده من دراعه
لما انتبه حازم كانت هديل قربت تقع على الارض
مسكها حازم بكل ثبات قبل ماتقع ...كانت فقدت الوعى بين دراعه
بسرعة الناس جابت كرسى...وقعد هديل عليه وحاول يفوقها
وناس كتير بتتكلم...فيه ايه...مالها...مفيش دكتور
وقربت واحدة ست ووقفت جنب هديل وفوقتها...وقالت لحازم
"انا دكتورة هى اول مرة يغمى عليها"
"مش عارف بس هى حامل"
"لا متقلقش عموما ربنا يخليهالك ويقومهالك بالسلامة...بس ياريت تخليها ترتاح وبلاش تنزل كتير بدل بتدوخ كده"
الكلام سرح فيه حازم بخياله...ياسلام لو كانت فعلا هديل مراته ومستنيين اول مولود ليهم...اكيد كان هيبقى فى منهى السعادة... لا اكيد كان هيبقى اسعد انسان فى العالم...بس فاق بسرعه من احلامه لما هديل قالت له
"هو احنا لسه هنشترى حاجات تانية"
"لا خلاص كفاية كده...لسه حاجات بسيطة لطنط فايزة هكملها لما اوصلك"

لما راح حازم بيت هديل....استقبلوه ناهد ونجوى وسالم بكل ترحاب ...لانهم فعلا بيحبوه ويحترموه
حازم"انا اسف ياعم سالم انى جيت متأخر كده بس قلت اوصل هديل بالحاجات اللى بعتاها طنط فايزة..وكمان نفسى اشوف اياد"
سالم"يابنى انت تشرفنا فى اى وقت...هاتى اياد يانجوى"
وفاتت الساعة اللى قضاها حازم فى بيت سالم بسرعة وخفيفة على الكل..طول الوقت كان حازم شايل اياد ومش عايز حد ياخده وكل شوية يقولهم "انا بحبه اوى لانه اتولد على ايدى"

قبل ما ناهد تنام...كان لسه سالم صاحى
"سالم عايزة اتكلم معاك...بس وطى صوتك علشان البنات"
"مالك ياناهد...مالهم البنات"
"نجوى ورشاد فى ازمة"
"خير يارب"
"نجوى حكت لى ان رشاد هيمشوه من شغل الليل وانت عارف ان ايجار شقتهم لوحدها بيعدى مرتبه من الوظيفة...وشغل المصنع هو اللى كان بيسنده...وعمال ياحبة عينى يدور على شغل ومش لاقى وخلاص كلها ايام ويطلع من الشغل"
"يا خبر...طب وبعدين"
"والله ماانا عارفة...انا قلت احكيلك اهو لو تعرف حد يشوف له شغل ولا حاجة"
"ياريت ياناهد...انتى عارفة رشاد بالنسبة لى ايه"
"ياعينى يابنى...هيعمل ايه الجدع"
"بقولك ايه... مايسيبوا شقتهم وييجوا يعيشوا معانا هنا...واهو رزقنا ورزقهم على الله"
"هنا؟؟؟ هنا فين؟؟ مش هديل هى كمان قاعدة عندنا"
"يقعدوا الاتنين بيت ابوهم يساعهم...اومال ارمى بناتى يعنى"
"بس ازاى دى هديل ونجوى بيناموا فى سرير واحد ومفيش مكان نحط سرير تانى"
"وهو يعنى لو فيه مكان هتنام هديل فى نفس الاوضة معاهم"
"طيب هنعيش ازاى"
"نجوى وجوزها يقعدوا فى الاوضة التانية وانتى وهديل تناموا هنا...البنت حامل ولازم تنام مسترحة"
"وانت ياسالم"
"هنام على الكنبة اللى بره...المهم بناتى يبقوا مستريحين...ورشاد اللى وقف جنبى وفك زنقتى فى جوازة هديل مش ممكن مقفش جنبه فى زنقته...انا بكرة هقوله واتكلم معاه"
"ريحتنى ياسالم الهى يريح قلبك..من ساعة ما نجوى حكت لى وانا مبطلتش تفكير"
"يا ستى سيبيها على الله... متقلقيش كله هيتحل بإذن الله"

هناك 12 تعليقًا:

  1. ya 3eny 3alek ya 7azem :(

    ردحذف
  2. غير معرف
    مظلوم بقلبه ياعينى

    ردحذف
  3. صعبان عليا حازم والله :|

    ردحذف
  4. بنت من الزمن ده
    وياعينى الحب المستحيل

    ردحذف
  5. البيبى هيسقط
    وشريف هايطلق هديل
    وحازم هيتجوزها
    صح صح؟
    :)
    مبدعة كالعادة ياأستاذة

    ردحذف
  6. ولعىىىىىىىىىىىىىىىىىىىىىىىىىىىىىى فية يا دينا دة يستاهل محاكمة زى مبارك دة اصلا عار على الرجالة لا كدة كتير عليا انا النهاردة فطرت علية وبعدين حرام بقى حازم بيموت وهديل طالع عنيها ودة اصلا يعنى بصى حرام لو قلت علية راجل وبس بقى عشان احنا لسة مفطرناش موتية كدة كتير بقى د مقرف
    نونا احمد

    ردحذف
  7. الحقيقة وانا بقرأ الحلقات اللى ورا بعض قاعد بفكر ايه السبب فى تصرفات شريف
    ليه بيعمل كده اكيد فى سبب ومش معقول من الباب للطاق كده

    بس عاجبنى اوى انك كل سوية بتأكدى على تضحية حازم رغم انى مش متفق معاكى فى انك كل شوية بتظهرية بأنه عصبى ومخنوق وبيبان عليه ومحتاج يهرب اصل اللى بيخبى جوه قلبه بيحاول بكل قوته ان مفيش حاجة تبان عليه

    خلينا نتابع معاكى احداثك الجميلة ويارب نعرف ليه شريف كان بيعمل كده

    ردحذف
  8. طارق
    للاسف غلط غلط
    نحن نختلف عن التوقعات ههههههه

    ردحذف
  9. نونا
    هههههههههه شريف يستاهل كلامك كله وزيادة عليه
    اللهم انك صائمة بقى كفاية

    ردحذف
  10. حجاز
    اكيد طبعا فيه سبب او اسباب كمان
    وظهر بعضها وفيه لسه تفصيل للاسباب دى

    حازم بيكتم فى نفسه والدليل ان محدش حس بحاجة
    بس يوم الفرح ده الموقف اللى مقدرش يتحمله

    وميرسى للمتابعة"اتمنى تستمر"

    ردحذف
  11. alnas kolha f al ksa de koisen w m7trmen m3ada shref
    Tu2aa

    ردحذف

قول رأيك بلاش تقرا وتقفل من سكات...ارائكم تهمنى