الأربعاء، 10 أغسطس، 2011

فوق احتمالى...الحلقة 23

الحلقة 23
يوم عيد ميلاد سيف كان بيت هديل مليان
مامتها وباباها ونجوى واياد ورشاد
فايزة وسالى وماجدة
حازم كان متفق مع محل الحلويات يبعت التورتة والجاتوه فى معاد معين... وفعلا وصلوا وحازم لسه مجاش
هديل مستنية حازم...وخصوصا كل ماحد يقولها
"هتطفى الشمع امتى"
ترد بكل تلقائية
"لما حازم ييجى"
واتصلت هديل بحازم اكتر من مرة...التليفون غير متاح
قلقت وسألت ماجدة ان كانت تعرف هو فين...بس مكنتش تعرف
وصل حازم واول هديل مافتحت
"كنت فين ياحازم كل ده"
"كنت بجيب مفاجأة سيف زى ماقلتلك"
والتفت على السلم وكان معاه ناس واجهزة... عرفت انه جايب مصور فيديو وفرقة djاطفال وبدأوا يجهزوا ويحطوا الاجهزة
سالى"ايه ده كله يا حازم"
هديل"ايه المفاجأة الحلوة دى"
حازم وهو شايل سيف"ايه ياجماعة سيف اول فرحتنا كلنا وكمان اول عيد ميلاد له... مش عايزنى اعمل له حاجة تفرحه"
سالى"ياريت شريف كان هنا"
وسيرة شريف قتلت اللحظة الحلوة... بس السبب عند هديل غير السبب عند حازم
هديل بتخاف من شريف ومش بتحس انها حرة حتى فى حركاتها او كلماتها فى وجوده
حازم لما افتكر شريف بعد عن هديل كام خطوة... وكأنه افتكر المسافة اللى المفروض تكون موجودة بينهم...وهى علاقته بشريف
عيد الميلاد كان حلو اوى...كلهم استمتعوا بيه
واخر الحفلة... المصور قال لحازم
"عايز اصور سيف معاك ومع مامته بس"
ردت فايزة"ليه"
المصور"انا عايز اصور سيف مع مامته وباباه لوحدهم"
فايزة"بس باباه مش هنا...ربنا يرجعه بالسلامة"

فايزة متوترة وعصبية بعد ماروحت بيتها
"مالك ياماما...كنتى كويسة وبعدين حاسة انك اتغيرتى ف اخر عيد الميلاد"
"متهيألى اخوكى لازم يرجع بقى ويستقر هنا"
"بس ياماما هو مش بيجيب سيرة رجوع خالص"
"لازم اتكلم معاه فى الحكاية دى... وانتى هتردى على تامر بكرة تقوليله ايه؟"
"انتى شايفة ايه ياماما... انا بجد قلقانة من انى ابقى لوحدى"
"روحى يا سالى معاه... وانا اللى هبقى لوحدى بعد ماكل واحد فيكوا بقى فى حتة"
"خلاص بلاش اروح وخلينى معاكى"
"لا يابنتى ربنا يهنيكوا ويسعدكوا ...ده انتوا ملحقتوش تقعدوا مع بعض وكل واحد فيكوا فى حتة"
"ربنا يسهل بقى انا مش مستريحة"
"واما اكلم اخوكى اشوف هيعمل ايه وهييجى ولا لأ"
"بس انتى اشمعنى النهاردة عمالة تقولى كده"
"مفيش ...مفيش"

سالى ردت على تامر وقالت له انها موافقة تروح معاه
تامر حاول فى اسرع وقت يبيع شقته ويشترى شقة مناسبة فى السويس علشان يستقر فيها هو وسالى
وطبعا فى العزال وفرش البيت كانت فايزة مع سالى خطوة بخطوة
وبعد ما سالى استقرت رجعت فايزة... ورغم انها كانت بتزور هديل وماجدة وهما بيزوروها الا انها كانت حاسة بالوحدة بعيد عن ولادها

وقبل فايزة ماتنشغل بالعزال مع سالى اتصلت بشريف
"عامل ايه يا شريف"
"كويس ياماما مطحون فى الشغل"
"ربنا يعينك يا ابنى... اختك هتسافر تعيش فى السويس مع جوزها ...مش هتيجى انت بقى وتقعد هنا"
"لا ياماما مش هينفع ارجع هنا خالص...انا مستقر فى شغلى ومينفعش اسيبه"
"ومراتك وابنه"
"مالهم....هما ناقصهم حاجة..انا ببعتلها المصروف لحازم على البنك كل شهر"
"وهو المصروف كل حاجة... مراتك شابة صغيرة ولازم وجودك جنبها"
"صغيرة ايه وكبيرة ايه؟؟ مالك ياماما هى اشتكتلك"
"لا مشتكتش والله... بس المفروض تبقى معاها...طيب خدها عندك"
"مينفعش تيجى هنا وبعدين انا مرتاح كده... هو فيه حاجة"
"لا مفيش بس اللى بيحصل ده غلط"
"هو ايه اللى غلط... انتى شايفة عليها حاجة مش مظبوطة"
"لا اعوذ بالله مراتك محترمة ومؤدبة ومتربية... بس فكر ترجع او تاخدها عندك... على الاقل علشان ابنك يتربى قدام عينيك"
"ربنا يسهل ياماما"
وقفل معاها بعد ماخرج كلام مامته من دماغه

حازم يوميا قبل مايخلص شغله بيتصل بهديل يشوفها عايزة ايه وهو جاى... ويوميا خارج الطلبات بيجيب لسيف كيس الحاجات الحلوة اللى بيحبها... سيف اتعلق بحازم وكأنه باباه وساعات بيشبط فيه ويقعد معاه بعد مايرجع من شغله
ولما حازم يتأخر فى اتصاله اليومى بتتصل بيه هديل
واتعودت قبل ماتنزل تكلمه ولما بتكون عند مامتها بيروح ياخدها من هناك علشان مترجعش لوحدها
ومرة كان مستنيها وهى فى بيت باباها... وهى نازلة قابلت جارة قديمة ليها قدام العربية... وقفت تسلم عليها وتتكلم معاها
وفى نهاية الكلام...جارتها قالت لها
"اسيبك بقى علشان جوزك عمال يبص علينا.. ربنا يخليهولك ده كل الحتة بيقوله انه بيحبك وبيخاف عليكى ومش بيسيبك لوحدك ابدا"
كانت هديل هترد عليها وتقولها ان حازم مش جوزها... بس هى مش عارفة ليه سكتت ومقدرتش ترد
ولما جت تفكر فى الكلام.. لقيت ان حازم كان بيتعامل كده مع سالى وفايزة ... هو بيحب كل الناس

بعد استقرار سالى فى السويس مع تامر... كانت حياتهم مستقرة
ورجع الحب والود والتفاهم يبقى هو الجو العام فى بيتهم
بس الوحدة اللى كانت سالى حاسة بيها هى اللى مضايقاها
وخصوصا لما عرفت انها حامل وكانت تعبانة جدا... ومع ذلك كانت بتتحامل على نفسها وتقوم بواجباتها فى البيت
وفى يوم رجع تامر من شغله لقى سالى واقعة فى الارض ...وبعد ما فاقت اتصل بالدكتور ... ولما سألها الدكتور عن اللى حصل
"انا فجأة حسيت انى دايخة ومحستش غير بتامر بيفوقنى"
وبعد ما كشف عليها... قال
"الحمدلله الوقعة اللى وقعتها كانت ممكن تؤثر على الجنين بس ربنا ستر... هى لازم تنام على ضهرها الشهور الاولى ومتقومش غير للضرورة"
سالى"يعنى يادكتور مينفعش اسافر"
الدكتور"لالا سفر ايه...انتى حتى مينفعش تنزلى السلم"
وبعد الدكتور ما مشى... اتصل تامر بفايزة وحكى لها اللى حصل وقالها انها لازم تيجى تقعد مع سالى طول فترة الحمل... وبعد تردد من فايزة... مقدرتش تقول لأ

هناك 8 تعليقات:

  1. شكل الست حست على حازم.. يارب استر وما تعملش مشاكل قدام

    ردحذف
  2. توتا
    ربنا يسترررررررر

    ردحذف
  3. الله يرحمك يا شريف حتوحشناا كمان حلقتين غلاااسة اهلك يااا وااااطي

    شريف ربنا حياخده ويريحنا منه صح؟؟؟؟؟

    هو انتي مفيش فايدة فيكي حتفضلي تلعبي باعصبنا كده ههههه

    تسلم ايدك يا برنسس روووووووعة كعادتك

    ردحذف
  4. غير معرف
    "شاكة انك ميرا"
    ههههههههه الشعب يريد موت شريف
    تسلميلى يارب
    وكلها حلقات قليلة وتبان

    ردحذف
  5. جميله اوى الحلقات بس هو لازم تقفليها على حاجه مشوقه كده علشان نستنى اللى بعدها

    انا شايفه ان حازم احسن بكتير اوى من شريف وياربت يطلق هديل وحازم يتجوزها

    ردحذف
  6. تسلم ايدك بس ابقى كترى من سيرة حازم وهديل بالقصة لحسن بيعجبونى

    ردحذف
  7. هو يعنى يا دينا مينفعش حلقة من غير سيرة هباب الطين دة النا بش عارفة متجلوش مصيبة وتشيلة خالص وتريحنى لية حموت واشوف هديل وحازم متجوزين بقى وبعدين شريف دة عامل زى خيال الماتة ملوش اى لازمة لا لما كان هنا ولا لما شافر وبجد بقى حرام يعنى حازم كدة وهديل دى اية يعنى حتى لو كانت قفل هى ست مفيش ست مبتحسش مهما كانت خبرتها زيرو
    وبعدين كان فى مقولة حلوة اوى لاحسان عبد القدوس بتقول ان الزواج عقد بلا حب والحب زواج بلا عقد
    وبجد انا شايفة ان حازم محترم جدا طب بجد بقى لو حازم غلط انا ممكن اديلة العذر لكن استاذ نطع دة لو اتشقلب بش حبطل اكرهة دينا صححى بقى الاوضاع سى زفت دة لا عامل حسابة ان مراتة ست ولا حاسس بابوة ناحية سيف ولا همة غير زكيبة الفلوس دة راجل دة

    وسلم ايدك يا قمر على كتباتك اللى دايما بتعجبنى

    ردحذف
  8. تسلم ايدك يا دينا الاحداث رووووووووووعة

    ردحذف

قول رأيك بلاش تقرا وتقفل من سكات...ارائكم تهمنى