الأحد، 14 أغسطس 2011

فوق احتمالى...الحلقة 27

الحلقة 27
"بص يا شريف انا ليا شروط علشان اوافق... انا عايزة شقة فى مكان يليق بمستوايا وتكتبها باسمى علشان اطمن...وتطلق مراتك"
"بس انا لو طلقت هديل مش هيبقى معايا فلوس تكمل حق شقة لانها هتاخد الشقة علشان حاضنة"
"خلاص اعتبرنا متقابلناش"
"ازاى اعتبر متقابلناش... انا بحبك اوى يا رحاب وخلاص مقدرش استغنى عنك بعد مااتاكدت ان حياتى من غيرك مالهاش طعم"
"خلاص نفذ لى شروطى"
"والله لو اقدر مش هتأخر... بس منين"
"دى مشكلتك وانت تحلها... ولحد ما تقرر ياريت متكلمنيش"
"مقدرش مكلمكيش... هتصرف"

رجعت فايزة من السفر على بيتها
كان شريف بيروح لها كل يوم... ساعات بهديل وساعات من غيرها
وكان عايز يفاتحها فى موضوع رحاب... بس كان كل تفكيره انه عايز يطلق هديل من غير مايخسر الشقة...علشان لو باعها وكمل عليها فلوس من معاه هيقدر يجيب شقة لرحاب زى ما طلبت
التفكير كان هيجننه.. وقرر انه يشارك حازم سره زى ما هو متعود دايما...وبعد كذا يوم مش عارف يتلم فيهم على حازم... شافه راجع من الشغل... وراح له على طول
"ازيك يا طنط... حازم فين"
"جوه فى اوضته..ده لسه راجع"
"طيب انا داخل له"
ولما دخل له
"ايه ياعم حازم من يوم ماجيت مش عارف اقعد معاك"
"معلش يا شريف الشغل انت عارف.. وبعدين انت كمان مش قاعد يعنى فى البيت كتير"
"اه معاك حق... انا محتاجلك اوى ياحازم...فيه موضوع مهم ومش عارف اتكلم فيه مع حد غيرك"
"خير احكى"
وحكى شريف لحازم اللى حصل من ساعة ما بدأ يكلم رحاب على النت لحد ماقابلها والشرط اللى حطته للجواز
ولما قارن حازم بين اخلاص هديل لشريف وندمها على الغلطة اللى حصلت بينهم وافتكر بالظبط الكلمة اللى قالتها"لما يرجع هعيش تحت رجليه علشان اكفر عن ذنبى" قارن بين نيتها ونية شريف
وازاى انها حتى مسمحتلوش انه يعبر لها عن احساسه ولا تسمع منه اى كلام... وبين شريف اللى كان طول الوقت بيفكر فى رحاب واول ما شافها ضحى بهديل وبسيف وكمان عايز ياخد حقها
وكمان جاى له علشان يفكر معاه ازاى يسيبها من غير ما يخسر حاجة... هنا مقدرش حازم يتحكم فى اعصابه... وثاااااااار وزعق
"انت ايه....انت مش بنى ادم"
"فى ايه...بتزعق كده ليه"
"علشان انت ظالم ومش وش نعمة"
"انت بتقول ايه انت اتجننت"
"انا اللى اتجننت ولا انت اللى خاين ومعندكش ضمير"
وجت ماجدة تجرى
"ايه ياولاد...مالكوا بتزعقوا كده ليه"
ومحدش فيهم رد عليها... واستغرب شريف من رد فعل حازم
"انت محموق كده ليه"
"علشان انت مش مقدر النعمه اللى فى ايدك... الملاك اللى راميها وهى ساكتة ومش بتشتكى لحد ولا بتراعى مشاعرها ولا انها انسانة... واحد غيرك كان حاطها فى عينيه وقلبه ومسابهاش ابدا"
"واحد غيرى زى مين... زيك مثلا يا حازم مش كده"
وسكت حازم ودور وشه بعيد... واتفاجئت ماجدة من معنى كلامهم الاتنين
وهجم شريف على حازم ومسكه من هدومه
"ايه اللى بينك وبين مراتى"
وخلص حازم نفسه من شريف وهو بيزقه
"انت مجنون...مفيش حاجة بينى وبينها"
وخرج شريف يجرى ودخل على بيته
"هدييييييييييييييييييييييييييييييييييييل"
جت هديل تجرى عليه من قوة صوته
"ايه اللى بينك وبين حازم"
وهرب الدم من عروق هديل واصفرت وشحبت وصوتها مطلعش وهى بتحاول ترد... وكل اللى جه فى دماغها ان حازم حكى لشريف على اللى حصل بينهم على السلم علشان يوقع بينهم
"هو قالك ايه"
ولمعت الفكرة الشيطانية فى دماغ شريف... انه يكبر الموضوع علشان يهدد هديل ويطلقها بدون خساير... لانه مش فارقة معاه اذا كانت على علاقة بحازم او لأ... المهم يحقق شرط رحاب
"حازم قاللى على كل حاجة... يا خاينة"
ولطشها قلم من قوته وقعت ع الارض... كانت حاسة ان ربنا بيعاقبها على غلطتها... وشدها من الارض وكمل
"بقالكوا قد ايه بتستغفلونى وعلى علاقة ببعض"
"مفيش حاجة بينه وبينه...انت ازاى تقول كده"
كانت بتعيط وسيف شافها بتعيط قعد يعيط...خدته فى حضنها
"اومال اقول ايه... وتلاقى الزفت ده ابنه مش ابنى"
صرخت هديل
"لااااا...اوعى تقول كده... والله ماخنتك وولا عمر راجل لمسنى غيرك"
وشدها من شعرها... وهو بيحاول يخنقها
"انا لازم اقتلك علشان اغسل عارى"
كانت بتصرخ من الرعب... ومن الظلم اللى حست بيه
سيف بيعيط... الباب بيخبط
"طبعا اكيد عشيقك جاى يخلصك من ايدى"
"متقولش كده... موتنى ولا تتهمنى بالخيانة"
"عايزانى اسيبك...امضى لى تنازل عن كل حقوقك وانا اطلقك من غير فضايح... ولو فكرتى تتطالبى باى حاجة هفضحك واتهمك بالخيانة وانكر نسب سيف"
"همضى على اللى انت عايزه"
كان الباب لسه بيخبط...راح شريف ناحية الباب ولما شاف ماجدة وحازم ع الباب...فتح جزء صغير من الباب
"لو سمحتى ياطنط خدى حازم من هنا قبل ماارتكب جريمة"
"يا شريف يابنى اهدا بس ونتفاهم"
"خلاص هديت بس سيبونى فى حالى"
ورزع الباب فى وشهم... ورجع لهديل كانت اخدة سيف فى حضنها وبتعيط... وخايفة ومرعوبة
بعد ماكتب شريف اوراق تنازل عن الحضانة وعن كل حقوقها
"لمى هدومك وهدوم ابنك...وهننزل ع المأذون علشان تبرينى من كل حقوقك... انا عارف اشكالك مالهاش كلمة"
وفعلا نفذت كل اللى قال عليه... وهما نازلين شافهم حازم.. خاف عليها.. نزل وراهم
"انت اخدها ورايح فين"
"وانت مالك هى مراتك انت...انت زودتها اوى"
وخبطه بوكس فى وشه... ورد عليه حازم بوكس تانى
والناس اتلمت تخلص الخناقة... ووقف شريف تاكسى وزق فيه هديل وسيف

دخلت هديل بيت ابوها وابنها على كتفها ووشها وعينها وارمين من الضرب والعياط... وبعد ماحكت لهم على اللى حصل
"متخافيش انا هقف له واجيبلك حقك"
"بلاش يابابا والنبى... ده بيتهمنى بالخيانة وانا معرفش ممكن يعمل ايه ده قادر"
"يعنى ايه...حقك يضيع كده"
"ليا رب منتقم عادل هو اللى يجيب لى حقى"
"بس ازاى يتهمك كده ومع مين؟حازم..انا مشفتش حد محترم زيه"
والباب خبط... كان حازم على الباب...جاى يشوف هديل راحت عندهم ولا شريف اخدها فى حتة تانية...كان قلقان وعايز يطمن عليها...اول ما هديل شافته ع الباب
"انت جاى هنا ليه... حسبى الله ونعم الوكيل فيك... مش كفاية خربت بيتى وخليت جوزى يتهمنى بالخيانة...امشى من هنا ومش عايزة اشوفك تانى ابدا طول حياتى"
ومشى حازم بعد كلام هديل... بعد مااتاكد ان كل الحب اللى بيحبه لهديل.. من طرف واحد ...من ناحيته هو بس

هناك 21 تعليقًا:

  1. سافل وواطى وحيواان


    ميرا

    ردحذف
  2. والله مش عارفه اقول ايه الى زى ده مش بنى ادم مش لاقيه كلام يعبر عن الى جوايا حسب يا الله ونعمل وكيل فيك يا شريف الكلب خليك يا زباله ورا رحاب هى دى الى هتاخد حق هديل تالت ومتلت يارب صبرنى ع الجحش ده ارحمينى يا دينا انا الضغط علا عندى لو اشوفك يا شريف الكلب هخلى الجازمه اعلا منك
    ayaa mahran

    ردحذف
  3. قولتلك حيطلع عينها ويبهدلها عشان تتنازل عن حقوقها
    واااااااااااااااااااااطي بجد جدا
    بس بذمتك مش طلع توقعس صح

    ردحذف
  4. elwaty hyfdal tol 3omro waty

    nona

    ردحذف
  5. ايه يادينا ...ده انا ماصدقت يطلقها ...تقومى تعقديها كده وتفتكر هديل ان حازم هو اللى خرب بيتها...بجد كده كتير

    ردحذف
  6. ايه
    هههههههه سلامة ضغطك ياحبيبتى

    ردحذف
  7. شذى
    استاااااااااذ ههههههههه

    ردحذف
  8. نونا
    ههههههههه واطى من يومه

    ردحذف
  9. هنودة
    ماهو ده التوقع الطبيعى منها
    فاكرة لما رفضت انها تكلمه
    قام قايل لجوزها علشان يخرب بيتها
    ماهى متعرفش حكاية شريف ورحاب

    ردحذف
  10. و كمان حازم ... صعبان عليه اوووووووووووووووى
    بجد ميستاهلش كده ابدااااااا

    ردحذف
  11. "لااااا...اوعى تقول كده... والله ماخنتك وولا عمر راجل لمسنى غيرك".........قشطة دى طلعت مش بس خاينة لا وكدابة كمان

    ردحذف
    الردود
    1. شكلك متعقد او حصلك حاجه من دى ف حياتك بس متطلعش عقدك ع الناس واسكت احسن

      حذف
  12. هنودة
    ماهو برضه نسى شريف خالص
    خانه فعلا

    ردحذف
  13. راضى

    "اومال اقول ايه... وتلاقى الزفت ده ابنه مش ابنى"
    صرخت هديل
    "لااااا...اوعى تقول كده... والله ماخنتك وولا عمر راجل لمسنى غيرك"

    هى كده تبقى كدابة؟؟؟

    ردحذف
  14. شريف ده شيطان مش بنى ادم

    ردحذف
  15. ليه يا دينا كده اتفضلى بقى صلحى الموقف بين حازم وهديل
    خلود

    ردحذف
  16. ههههههههههههههههه والله هديل مالهاش غير اللى يضربها زى شريف كده مالهاش ف الطيب حازم

    ردحذف
  17. rbna ynt2m men kol zalm

    ردحذف
  18. اه ياشريف يا جزمة ربنا هيبتليك بمصيبه تشيلك ان شاء الله ورحاب فعلا الى تخونك

    ردحذف
  19. ايه ده ده حقير اوووووووى ازاى يعمل فيها كده ده شيطان مش بنى ادم

    ردحذف

قول رأيك بلاش تقرا وتقفل من سكات...ارائكم تهمنى