الثلاثاء، 23 أغسطس 2011

حكم القلب ... الحلقة 3

الحلقة 3
بعد مااستأذنت نهى فى الانصراف
محمود"ايه يا نهى رايحة فين"
"بعد اذنك يااستاذ محمود ممكن كلمة"
وقام لها محمود وخرجوا من المكتب
"خير"
"معلش يا ا\محمود انا اتسرعت فى ردى وانا بعتذر لحضرتك"
"يعنى ايه الكلام ده"
"يعنى افضل ان روايتى تفضل مقروءة"
"مينفعش الكلام ده... احنا بيننا عقد وشرط جزائى"
"بس يااستاذ...."
"بصى بعيدا عن العقد والشرط الجزائى ممكن افهم ايه اللى خلاكى فجأة عايزة ترجعى فى كلامك"
"بصراحة... لما شفت سوزى وخالد صفوت وطريقتهم استغربت ازاى هيجسدوا دور شخصيتين مثاليتين"
"بصى يا نهى انتى لسه صغيرة ومعندكيش خبرة...دول ممثلين يعنى ممكن يعملوا اى دور والناس تصدقهم... وغير كده انتى فى شغل ولازم تتعلمى تتعاملى مع كل الناس فى كل الظروف... ومعتقدش ان بداية حياتك العملية هتقضيها فى مشاكل مع شركة الانتاج"
كلامه يحمل تهديد فهمته نهى... وف نفس الوقت كلامه صح الى درجة كبيرة
"انا اسفة لتسرعى فى رد الفعل"
"ولا يهمك انا فاهم والله دماغك بتفكر فى ايه... بس ده شغل... يالا ندخل للناس علشان نبدأ شغل"
ودخلوا المكتب وعرفها بكل الموجودين وعلى راسهم خالد وسوزى
وقدم نهى للموجودين
"ا\نهى مؤلفة الرواية وهى مدرسة ابتدائى من اسماعيلية وهتبقى معانا فى كل يوم فى التحضير "
اغلب الموجودين"اهلا وسهلا... تشرفنا... نورتينا"
خالد" اهلا بالابلة"
وضحكت سوزى ضحكتها الرنانة
وردت نهى بهدوء
"اهلا بيك ياا\خالد"
سوزى"استاذ هههههههه احنا مش فى المدرسة"
وضحكت هى وخالد ... وسالها خالد
"اكيد انتى مدرسة دين"
نهى"ليه؟؟ لا انا مدرسة حساب"
خالد" انا قلت يعنى الشيخة نهى اكيد هتبقى مدرسة دين باللبس والطرحة دى"
نهى"والله اللبس والطرحة مالوش علاقة بشغلى...ده له علاقة بأنى مسلمة وملتزمة"
سوزى قامت تتكلم فى التليفون لما لقت ان نهى بترد بجدية على خالد... اما خالد فمعرفش يرد
نهى كانت متضايقة جدا من كلامه وحست فيه انه تريقة او اهانة هى مش هتقبلها
وبدأوا يتكلموا فى الشغل لما كله اتجمع وقعدت نهى تشرح لهم الشخصيات والبناء الدرامى لكل شخصية
ثقتها بنفسها خلت خالد وسوزى يسمعوا لها كانهم فعلا تلاميذها فى المدرسة... كانوا مركزين اوى معاها فى كل كلمة
وبعد ساعتين اضطر محمود ينهى المقابلة لان عنده معاد تانى
ولما بدأ الجميع فى الانصراف
محمود"استنى ياخالد انت ونهى عايزكوا"
واستنوا فعلا لحد ماكل الموجودين مشيوا
محمود"انا ملاحظ ان نهى اتضايقت شوية من كلامك... وانا مش عايز اى مشاكل من اى نوع واحنا بنشتغل"
خالد"اتضايقت ايه يا كبير فيه حد برضه يتضايق منى"
نهى"وانت بترد بدالى ليه... ايوه اتضايقت"
ومكنش خالد متوقع ردها... اتكبس
"اتضايقتى منى ليه؟"
"يعنى احنا لسه اول تعارف بيننا وانت عمال تتريق عليا وابلة وشيخة وكلام انا مقبلوش"
"انتى فعلا اتضايقتى...انا كنت بهزر معاكى"
"وانت تعرفنى منين علشان تهزر معايا"
"ا ا انا مقصدش اضايقك انا كنت بخليكى تاخدى ع الجو"
"معتقدش انى ممكن اخد ع الجو بالطريقة اللى تقصدها"
محمود"ماهو مينفعش كده"
خالد"بتقولى ولا بتقولها"
محمود"بقولكم انتوا الاتنين"
نهى"انا كل اللى بطلبه ان محدش يهزر معايا... صعبة دى؟؟"
محمود"لا حقك...ها ياخالد...كلامك معاها يبقى فى حدود"
خالد"ماشى يا ريس"
محمود"مش عايز العدوانية اللى ف كلامكم دى تانى..خلاص يانهى"
نهى"خلاص يا ا\محمود"
محمود"اشوفكم بكرة بقى ومتتأخروش عن المعاد"
وقاموا مشيوا مع بعض ومحدش فيهم بيوجه كلام للتانى
ركبوا الاسانسير مع بعض ونهى بتبص فى اتجاه بعيد عن خالد
وفجأة وقف الاسانسير... بين دورين
نهى بهلع"ايه ده"
"واضح ان الاسانسير عطل"
"ماانا شايفة انا اقصد هنتصرف ازاى"
"عادى ادينا قاعدين"
"انت بتتكلم ببرود كده ليه"
وضحك خالد
"شفتى انتى بتشتمينى ولسه كنتى بتقولى نتعامل بحدود"
"انا اسفة بس انا خايفة...احنا ممكن نفضل كده.. وبعدين انا اول مرة اتعرض لموقف كده...ارجوك اتصرف"
"متخافيش هتصرف"
ورن خالد جرس الاسانسير
"متقلقيش دلوقتى هيتصلح... بس بما اننا هنا لوحدنا... ومقفول علينا اسانسير واحد... يبقى لازم.."
واتخضت نهى من كلامه ومن تلميحه ورجعت لورا لحد مالزقت فى ركن
"لازم ايه... انت مجنون"
"اشتمى تانى... انا قلت لاااازم...."
"والله لو قربت منى... هموتك"
"تصدقى انتى سيئة النية... انا كنت هقول لازم نتصالح وميبقاش بيننا مشاكل... بس كده "
واتصلح الاسانسير ونزل للدور الارضى
"اى خدمة يا ستى اهو اتصلح... حمد الله ع السلامة"
"ممكن اقولك حاجة مهمة"
"لالا متشكرنيش "
"عايزة اقولك... انت معندكش دم"

هناك 15 تعليقًا:

  1. هههههههههههههههه جامداااااااا يا دينا فى انتظار الجديد
    salma

    ردحذف
  2. كالعادة متالقة بابداعك بس الحلقة تحفة ملهاش حل وقفلتها كانت روعة ايوة كدة يا دندن
    سلم ايدك يا قمر ومستنين الجديد

    ردحذف
  3. هههههههههههههههههههههههههههههههههههههههههههههههههه

    يا بت المجنونة


    اااااالله عليكي يا برينسس تسلم ايدك

    ردحذف
  4. جامد جدااااااا ردها بس فعلا هو ملوش غير كده

    ردحذف
  5. ههههههههههه يخربيت كده مش عارف ليه حاسس ان خالد بلطجى :))

    ردحذف
  6. ههههههههههههههههههه حلوة

    ردحذف
  7. هههههههههههههههههه



    مونه

    ردحذف
  8. hhhhhhhhhhhhhhh shklhm he7bo b3d f al a5r

    ردحذف
  9. ههههههههههههههه حلوة

    ردحذف
  10. هههههههههههههههههههههههههههههههههه

    ردحذف
  11. ههههههههههههههههههههههههههههههههههههههههههههههه تحفة

    ردحذف
  12. هههههههههههههههههههههههههههههههههههههههههههههههههههههههههههه

    جميييله اووووى

    ردحذف
  13. حلوة جدا انا متبعاكى بقالى كتير استمرى بقى وابدعينا

    ردحذف
  14. ههههههههههههههههههههههههههههههههههههههههههه تحفه

    ردحذف
  15. هههههههههههههههههه تحفة

    ردحذف

قول رأيك بلاش تقرا وتقفل من سكات...ارائكم تهمنى